يا بنات.. عندي لكم نصايح اتمنى تاخذونها بعين الاعتبار.
لازم تشربون حليب كل يوم مو عشان ريجيم تخافون وتنحاشون عنه، واذا مو حليب عوضوه في شي ثاني.. زبادي، جبن، لبنة، وهلما جرى!
ترى احنا معشر النساء نمر بفترات حمل ورضاعة وهالشي يسحب من كالسيوم جسمج.. راح يأثر على أسنانج بتخترب ولما تعجزين تعالي لآلام الجسم والهشاشة لا سمح الله!
اييي خذوا الموضوع بجدية وطالعوا قدام وشوفوا شلون امهاتنا الله يطول بأعمارهم يعانون.. اللي من ركبها واللي ظهرها.. حافظوا على شبابكم من الحين:$:
السلطة ادري معظمكم ما يقصر فيها.. واحنا البحارنة بعد متعودين على خضارة لازم في الغذاء.. يا جرجير يا رويد..<<روايح حلووة خخ.. بس بعد في مجموعة ف القروب مقصرين من ناحية السلطات!
ويمكن تتمللون من هالشي بالأول.. بس ما يحتاج بعد اقول لكم عن التنويع ودوره في فتح نفسيتكم لهالطبق..
في وايد أفكار حق السلطات..
مرات قطعوها كبار "مثلاً الطماطم قطعوها 4"
ومرات اغسلوه من غير تقطيع واكلوه مع وجبة الغذاء.. على قولتنا "حشة"
ومرات قطعوه ناعم مثل "التبولة" ولو بعدد الأفكار ماتخلص.. شغلوا مخكم شوي.. وخططوا كل يومين ولا 3 في السلطات اللي بتسوونها وبتدللون نفسكم فيها وروحوا البقالة ولا السوبرماركت واشتري الاغراض اللازمة.
وشوي شوي ما بتستغنون عنها في كل وجبة!!!
واكيييد تدرون بفائدة السلطات:
غنية بالفيتامينات والاملاح المعدنية، واهم شي الألياف اللي تساعدنا على تنزيل وزننا في الريجيم وتقلل من الامساك اللي يصعب نزول الوزن وتملأ المعدة وتشبعون على ما تاكلون الطبق الرئيسي!!
اما الدريسنغ تبع السلطة.. حبذا لو تدورون على النوعية اللايت، وابتعدوا عنه بقدر الامكان لأنه غني بالزيوت والسعرات
واختاروا التتبيلات الخفيفة مثل تتبيلات كنور
ولا رشة خل ممتازة في حرق الدهون في ريجيمنا او عصير ليمون ورشة فلفل اسود ام سماق ولا زعتر أو ملعقة زبادي!
واللي نقطة ضعفها الحلويات..
تسوي لها طاسة كبيرة من سلطة الفاكهة في نهاية الاسبوع، ولما تهف نفسها على الحلو، تنجب لها ربع او نصف كوب منها وتدلل نفسها بالطعم الرهيب لهالطبق وبيتم عندج كم يوم تستمتعين فيه
بس لاتاكلون واجد منه
والعصير تبعها سووه انتوا بنفسكم من البيت لا تحطون من الجاهز، حتى لو كان مانجو.. ترى في ربع كوب من السلطة ولا نصف الكوب.. كم بتكون نسبة المانجو فيه؟ 30 سعرة؟ لا تحاتون!
بس اخلطوا معاه عصير ثاني مثل البرتقال او من الفاكهة نفسها اللي قطعتونها خذوا مقدار صغير وخلوا وياه قليل ماي واخبطوه في الخلاط بيستوي كوكتيل!
شفتوا الصورة الحلوة هاي؟
تقدرون بدال ما تحسرون نفسكم تسوون لكم زبادي مخفوق بالفواكه بدال الجاهز المليان بالسكر والدسم!
وتقدرون بعد تاكلون من الايسكريم تبع الدايت..
حتى في باسكن روبنز في نوعية ايسكريم للدايت..
اشتروا لكم ولا تحسرون عمركم<<اش فيها الدنيا!
اغرفوا لكم شوي وتشاركوا مع احد ثاني الكوب عشان تذوقينه بدون ما تكثرين منه!
خلوها ك مكافئة مثلاً لما تنزلون عدد معين من الكيلو جرامات..
ولما تجي نهاية الاسبوع.. وتحبين تطلعين مع ابو العيال وتخافين على نفسج من المغريات في الخارج!
في بعض النصائح اللي تخليج تمسكين نفسج..
حاولي ما تكونين طالعة على جوع..
يعني اكلي حبات من الفاكهة قبل ما تتطلعين..
واخذي معاج غرشة ماي بو نصف ليتر.. كلما شفتيها اشربي رشفة وبهالطريقة ما تختلي معدتج وتدور عينج على الاكل!
اذا حبيتي تسالي..
اختاري "نفيش"مملح.. وعصير بدون سكر، كي دي دي أناناس مثلاً:celebrate:
ولما تجين بتتعشين برا..
اطلبي اول شي المقبلات وكملي صحنج كله قبل الطبق الرئيسي
ولما تبغين شوربة لا تاخذين اللي فيها كريمة.. اخذي العادية .. زين؟
واكييييد ابتعدي عن الدسومة .. لا باستا ولا خرابيط.. خذي مشوووي:worn_out:
تراها الوناسة مووو بالأكل.. الوناسة هي طلعتج مع زوجج العزيز
اكلي على مهلج وحسسي نفسج انج رقييييقة وايد.. وطولي في قعدتج بالسوالف.. راح تحسين بالشبع..
وموو شرط تكملين طبقج.. تشاركي مع عيالج ولا ريلج فيه!
وبلا اسراف في الطلبيات اللي وراكم بتنقط.. سامعين؟:hysterical:
ولما تخلصون عشاكم طلبي من حبيبج تروحون تتمشون شوي عشان تحرقون اللي كليتوه..
في الكورنيش.. في الممشى.. على البحر..
رجعوا أيام الخطوبة والدلع..
وفي بعد عندي كلامات .. بس الحين مامبي أمللكم..
مرة ثانية نكمل حديسنا "حديثنا":thumbs_up:
