كلنـــا مع بعض .. ميــدان التحــدي ، مُتنـــفسٌ اتكــوتيني !!!

يومي بروتين صافي..

الريوق..
٢ بيض مفيوح و٢ مربع كيري

الغدى...
نص دجاجة مشويه وخس وبربير وبقدونس ونص ليمونه وملعقة كاتشب

العشى...
٣ برجر لحم مشوي وخس وبقدونس وخيار

الماي اوكي

والرياضه والسناك لايوجد

وسؤال الذرة المعلب يصير ناكله؟؟

ام علاوي يعني اني ما شيه صح��

بس في جم سؤال سألتهم قبل ما رديتين عليي فيهم��

يومي الأتكوتين (26)

الفطور: حليب قليل الدسم + اقل من قفشه بتر وقفشة قشطة
الغدا: شاورما طبعا بدون الخبز + بيبسي دايت
العشى: حمص وتبولة

لسناك: ولاشي
الماي: اوكي لا بأس
الرياضه: الاحد والاثنين ماروح النادي لأنه مايناسب الوقت مع دوامي بس نطيت 20 مره حبل وانشالله اليوم بعد :thumbs_up:



يوم الجمعه بكون كملة 30 يوم اتكوتين يعني شهر بالضبط :D وباخذ 3 ايام بريك السبت والأحد والأثنين وبعدين 3 ايام بروتين صافي وبكمل بعدها اتكوتين شهر :thumbs_up:
احس اتعودت على اكلي ونظامي جذي وماحس قاعده اسوي رجيم كأنه شي عادي في حياتي وهالشي فرحني واااااااااااااااااااااااجد والعيش طبعا التغى من حياتي ومايغريني اله وقت الصافي :D بس احتماااال كبيييير يوم العيد اخرطها وآكل غدا العيد وبعدين اكسر 3 ايام صافي واكمل اتكوتين بس مابكثر من العيش بحط لي في صحني شوي بس :thumbs_up:

هذرت واجد مو :o:-#

صوت الوجدان;15685216:
يومي بروتين صافي..

الريوق..
٢ بيض مفيوح و٢ مربع كيري

الغدى...
نص دجاجة مشويه وخس وبربير وبقدونس ونص ليمونه وملعقة كاتشب

العشى...
٣ برجر لحم مشوي وخس وبقدونس وخيار

الماي اوكي

والرياضه والسناك لايوجد

وسؤال الذرة المعلب يصير ناكله؟؟

الذره بشكل عام اوكي مرتين في الاسبوع ..

وممكن معلقه بس بشكل يومي تضاف للسلطه مثلا !

بس لو بكميه اكبر مرتين فقط ..

صوت الوجدان;15685219:
ام علاوي يعني اني ما شيه صح😊

بس في جم سؤال سألتهم قبل ما رديتين عليي فيهم😥

ماشيه صح ..

وسالي اي سؤال حاضرين ..!

عس عس;15686388:
يومي الأتكوتين (26)

الفطور: حليب قليل الدسم + اقل من قفشه بتر وقفشة قشطة
الغدا: شاورما طبعا بدون الخبز + بيبسي دايت
العشى: حمص وتبولة

لسناك: ولاشي
الماي: اوكي لا بأس
الرياضه: الاحد والاثنين ماروح النادي لأنه مايناسب الوقت مع دوامي بس نطيت 20 مره حبل وانشالله اليوم بعد :thumbs_up:



يوم الجمعه بكون كملة 30 يوم اتكوتين يعني شهر بالضبط :D وباخذ 3 ايام بريك السبت والأحد والأثنين وبعدين 3 ايام بروتين صافي وبكمل بعدها اتكوتين شهر :thumbs_up:
احس اتعودت على اكلي ونظامي جذي وماحس قاعده اسوي رجيم كأنه شي عادي في حياتي وهالشي فرحني واااااااااااااااااااااااجد والعيش طبعا التغى من حياتي ومايغريني اله وقت الصافي :D بس احتماااال كبيييير يوم العيد اخرطها وآكل غدا العيد وبعدين اكسر 3 ايام صافي واكمل اتكوتين بس مابكثر من العيش بحط لي في صحني شوي بس :thumbs_up:

هذرت واجد مو :o:-#

باقي 13 يوم عن العيد ..

ليش ما تكملين وتطلعين بريك اسبوع العيد بس بعقل يعني ..

3 فري عدل والباقي ضبطي نفسج وراح نرجع للموضوع ببارت ثاني :)

وعلى راحتش !

لانه العيد راح نوقف ونطلع بريك !

جمرية والنعم;15686903:

سلام عليكم :)

شحوالكم ؟؟

قرأت الموضوع وشوقني انى انظم اليكم هوو صدق واجد اشياء ويفر الرأس بس لمصلحتي
ابغي انزل وزني وياريت تشجعوني:D
لاني حاليا اتابع عند دكتورة منى الشرقي وقالت ليي لازم تنزلين وزنش من الموعد الاولي لما رحت ليهاا
وتاريخ 16 رحت موعدي الثاني نازلة بس كيلوو كنت اخفف في الاكل مع خربطة كبيرة طبعا
وكنت اروح نادي العب ايروبكس:o:o

وانتهى اشتراكي يوم السبت وراح اجدد بداية شهر 12 لانه المدربة بتسافر وبترجع شهر 12
قالت ليي الدكتورة انه التبويض نازل عندى من خلال التحاليل:'(
وعطتني حبوب دفستون من اليوم ابدي فيه اشربه

وقالت ليي تبغيني بموعدي الثالث اللي بكون 2/11 يكون وزني نازل لانها بتعطيني كلوميد
وانى احتاج منشطات ولازم ينزل وزني:(

اتمنى انى ماثقلت عليكم ادري هدرت واجد
بس تعبت ابغي انزل وزني مو بس عشان الحمل
عشان صحتي اولاا;);)

واتمنى انكم تقبلوني وياكم وتشجعوني:)

ما بردش ابدا خيو ..

حياش الله

والموضوع سهل كل ما في الامر الابتعاد عن النشويات والسكريات

( الخبز والعيش وكل ماهو طحين وسكري ) ..!

وكل شوي واضح بالتفصيل في الموضوع ..

وعلى فكره البروتينات نظام منشط للتوبيض !

و كذا وحده من الا شتركو معانه في فترات سابقه حملو بعد النظام على حسب كلامهم يساعد يعني !

بالتوفيق !

مشكورة حبيبتي ماتقصرين
بس انتظروني بوزن اول وراح اخبركم متى راح ابدأ

وين الناس ؟؟؟

وين الحماس احس في ابو التخبيصات الا بتطلع مخبصه براويها :/

مرحبااا

على ما قلتين ام علاوي باقي 13 يوم على العيد يعني اني يصير اطلع 3 ايام العيد اجازة؟ لان طلعت اني يومين كانوا بتاريخ 12/10 و13/10 وكنت في هاليومين اكل شي واني خايفة احس عيب 😖
بس كان خاطري في بيتزاهت وباستا يصير اكلهم؟ 
هالايام بقلل من التمر بظل على الرطب وبحدد ليي من 3 الى 4 وحدات 

يومي البروتين الصافي 2

الريوق..
2 بيض مفيوح شاركني ولدي فيهم وخياره

الغدا..
سمك مشوي ونص ليمونه وخيارتين

العشا..
كباب لحم وخس

السناك 4 رطب مجفف
الماي اوكي
الرياضة ولاشي

ههههههههههههههههههه ام علاوي حساسه من تشووف احد غيب عرفت في تخبيص

بصراحه اني بعد الفطور خبصت لانه امي وخواتي جو عندي بس ماسويت تخبيصات عالميه يعني اكلت نتفه حلاوه فسفست شوي حب واكلت جم نتفه من الجبس...

وخلااااص ببدي بروتين صافي ومافي لعب بالمره زواج اختي في نص شهر 11 واني وامي وخواتي خلااااص بنبدي يعني في تشجيع قوي...

وابي منكم تشجيع بعد

أم عــلاوووي;15686833:
باقي 13 يوم عن العيد ..

ليش ما تكملين وتطلعين بريك اسبوع العيد بس بعقل يعني ..

3 فري عدل والباقي ضبطي نفسج وراح نرجع للموضوع ببارت ثاني :)

وعلى راحتش !

لانه العيد راح نوقف ونطلع بريك !

عجل اووكي بكمل الى العيد اتكوتين وبعدين بطلع اسبوع بريك :thumbs_up: وبعدها اكمل وياكم

يومي الأتكوتين (27)

الفطور: قفشة قشطة + جاي حليب
الغدا: ترياكي دجاج ولحم مع سلطة + بيبسي دايت
العشى: شوربة ماجي

لسناك: ولاشي
الماي: تمام
الرياضه: ولاشي اليوم انشالله بروح النادي

ام علاوي ان شالله بخفف مخللات ههههههه
يومي امس نسيت اكتبه

الفطور
بدون

الغذاء
صالونة لحم. مع كم قطعه. قرع وباميا
سلطة

العشاء
جكن فيليه. 3 قطع
خيارة
عصير ليمون بالنعناع بدون سكر

السناك
ملعقه بتر
3 حبات زيتون اخضر

رياضة
بدون

ماء لا بأس

صوت الوجدان;15688213:
مرحبااا

على ما قلتين ام علاوي باقي 13 يوم على العيد يعني اني يصير اطلع 3 ايام العيد اجازة؟ لان طلعت اني يومين كانوا بتاريخ 12/10 و13/10 وكنت في هاليومين اكل شي واني خايفة احس

هو لبريك بعد الشهر 3 ايام ..

بس بما انه عيد راح نتوقف الاسبوع الا بيصير فيه العيد ..

انتي حابه تاخذين بريك 3 ايام بس او يوم على راحتش بس ما بحاسبكم على هذا الاسبوع !

وبعد بفتح موضوع جديد (بارت ثاني ) وبكون شديده جدا معاكم !

اي تخبيصه فيها عقاب ..!!!

أم حسااني;15689028:
ههههههههههههههههههه ام علاوي حساسه من تشووف احد غيب عرفت في تخبيص

بصراحه اني بعد الفطور خبصت لانه امي وخواتي جو عندي بس ماسويت تخبيصات عالميه يعني اكلت نتفه حلاوه فسفست شوي حب واكلت جم نتفه من الجبس...

وخلااااص ببدي بروتين صافي ومافي لعب بالمره زواج اختي في نص شهر 11 واني وامي وخواتي خلااااص بنبدي يعني في تشجيع قوي...

وابي منكم تشجيع بعد

التخبيصات الصغيره مرات اكبر من غيرها

يعني الحرق بيتوقف عندش جم يوم !!

يالله تشجعي ورجعي مثل قبل !!!

حمااس !

::


ونصحيتي للكل :

لسناك هو الا يخلي النزول بطىء وهو انوجد علشان نتسلى فيه !

بس مو معناته كل يوم ناخذه ..

والتمر نخلي للضروره لين مافي طاقه !

كل ما كان بدون كان نزولكم سريييع !

ام علاوي وش نقدر ناكل في هالاجازة؟؟
عادي ناكل باستا وناكل بيتزا؟؟ وناكل غدى العيد؟؟
اني ما بطلع اسبوع اخاف اخورها واجد... بكتفي ب٣ ايام��

اصلا انتون واصلين للوزن المثالي عادي تخربطون اني توني في بداية الدرب بعد عليي ١٢ كيلو انزلها
صرت الحين ٧٩ من اصل ٨٦ كيلو

صوت الوجدان;15690323:
ام علاوي وش نقدر ناكل في هالاجازة؟؟
عادي ناكل باستا وناكل بيتزا؟؟ وناكل غدى العيد؟؟
اني ما بطلع اسبوع اخاف اخورها واجد... بكتفي ب٣ ايام😉

اصلا انتون واصلين للوزن المثالي عادي تخربطون اني توني في بداية الدرب بعد عليي ١٢ كيلو انزلها
صرت الحين ٧٩ من اصل ٨٦ كيلو

في لبريك ..

لا ترجعين لعاداتش الغذائيه سابقه ..

لانها غلط ..

قللي الكميه اولا ..

مو لازم كل وجبه تحتوي على نشويات ..

ممكن الغذى اي العشى لا فيه حذفي النشويات ..

خربطه بعقل يعني ..

ولازم في زياده وهميه نسميها و باول يوم اتكوتين تختفي ...

صح كلامش ام علاوي واني حسيت لجسمي بعد

اول مابديت التكوتين كنت ماخد سناك واذا كلش بتر دايت او تمر ونزلت بسرعه ويوم اسوي هالمره كنت اخد مكسرات ديريتوس سمبل وماتغير جسمي حتى قلت ليكم


والاسبوع اللي راح بديت وكنت اصوم ولسناك اللي اخده هو البتر وبين علي بسرعه ... خساره خربت البارحه واكو للحين معدتي تقلب وماني طايقه اكل.....