تجمع بنات مصر المتاخرات عن الحمل

بت يا أيام إنتى فين من زمان

ازيكم يا بنات ... مرسيه جدا على ردكم عليا

أخباركم ايه ؟ ان شاء الله تكونوا بخير دايما يارب ,, أنا عاجبنى أوى ترابطكم مع بعض وسؤالكم دايما عن بعض ربنا ما يفرقكم أبدا ويجمعكم على خير وفى الأفراح والأخبار السعيدة ,,,, وعايزة أقولكم حاجة فيه خلطات ووصفات شعبية بيقولوا بتساعد على الحمل أيه رأيكم نجرب ولا نكبر دماغنا

أنا على فكرة وصلت للأربعين بس الحمد لله شكلى مش باين عليا خالص علشان بهتم ببشرتى ونفسى شوية
وطبعا كل اللى يشوفنى بيقولولى عندك 27 أو 28 بالكتير ههههههههههههههههههههه مش عارفين اللى فيها

عموما بتمنى لكم كل السعادة وربنا يرزقنا جميعا باللى نفسنا فيه

إزيك يا نوجا عامله إيه و صحتك عامله إيه و بتعملى إيه دلوقتى بتاخدى أدويه ولا حاجه ولا موقفه كل حاجه ما شاء الله عليكى برافوا عليكى محافظه على بشرتك و بعدين إنتى زى أختنا و كلنا هنا إخوات بنجاوب على بعض بصراحه و ربنا يفرح قلبك يا رب و يرزقك الذريه الصالحه و قولى وصفات مفيده و يا ريت وصفات للجسم كمان منك نستفيد
نونا و أيام فينكم يا بنات يا رب تكونوا بخير يا رب بت يا نونا لسه النت عندك بايظ طمنينى عليكى

أيام فينك يا رب تكونى بخير يا رب

ايوة للاسف النت بايظ ومتنيل بنيله
مش عارفه اكتب كلام كتير
مرة كتبت كتير اوي و بعديت جيت ابعته مارضيش وقطع
ياللا معلش هحاول من وقت للتاني كده
اخبارك ايه يا رونا
والبت ايام راحت فين؟؟
ازيك يا نوجا
لو عندك وصفات مجربة قوليهالنا وربنا يكرمنا يا رب

ازيك يا رونا مرسيه يا حبيبتى على الرد والدعوات وربنا يسعدك :888345:
وانت كمان يا نونا ازيك وايه اخباركم .... يا بنات والله حبيتكم جدا وكأنى بتكلم مع اخواتى ,, أصل أنا عندى اخت أكبر منى بس من زمان وهى عايشة بره مصر وكل 7 سنين بشوفها مرة بس حاسة ربنا عوضنى بيكم
أنا الحمد لله عندى أصحاب كتير أوى وأحمد ربى على نعمة حب الناس لأنى بحب أساعد كل اللى حواليا أوى فى أى حاجة علشان كده الناس كلها بتحبنى الحمد لله دى نعمة كبيرة أوى على فكرة ... المهم مش عايزة أطول عليكم أنا هجاوب رونا الأول على موضوع العلاج وبعدين أقولكم ماسكات علشان أشوقكم شوية :shy:
بصى يا ستى أنا بأه من ساعة لما أخدت الدوا بتاع المحاولة التانية لطفل الأنابيب وجوزى الله يسامحه رفض تماما طبعا ما كملتش أدوية ووقفت كل حاجة بس فيه حاجة واحدة بعملها دلوقتى عارفين ايه ؟
بصلى قيام ليل واستغفار وتسابيح والحمد لله
نخش بأه على الماسكات ... أنا ممكن كل يوم أديكم ماسك لبشرة أو للجسم أو طريقة أو فكرة حلوة تعملها كل واحدة لجوزها وباذن الله تعالى أنا برتب لمشروع كده ادعولى بحاول أفتح بيوتى سنتر ,ان شاء الله لما يكمل هعزمكم كلكم وأعملكم ماسكات للبشرة وحمامات بايدى ههههههههه بس ما تخافوش ان شاء الله خير الحمد لله أنا خبيرة تجميل بجانب شغلى ...... أكتب لكم أول ماسك بأه أحسن أنا رغيت كتير وشكلى صدعتكم
أول حاجة نعملها قبل ما نحط الماسك ننظف الوجه جيدا بدون صابون طبعا ولو عملتى مساج خفيف للبشرة بالربت الخفيف على الوجه بحركات دائرية يكون خير وبركة - مفيد جدا -
الماسك ده بينفخ الوجه والخدود ويغذى البشرة كأنك عاملة كولاجين
1- مقدار من قشر الجمبرى الأحمر
2- مقدار من زيت زيتون أو زيت لوز

يجفف قشر الجمبرى كويس ويطحن ونضعه فى مقدار الزيت ويتم تقليبه جيدا ونتركه حتى نرى الزيت تلون بلون الجمبرى بعد كده نقلبه كويس ونصفى الزيت ,, ندهن الوجه بالزيت الملون جيدا مع حركات دائرية ونتركه نص ساعة وبعد كده تغسلى البشرة جيدا بماء فاتر وتمررى مكعبات ماء الورد المثلجة على البشرة .

هتشوفى خدود قمررررررررررررررررة والله

ماسك كمان لتوحيد لون البشرة وصفاءها ونضارتها

المقادير
1- ثمرة كيوى
2-ملعقتين لبن بودرة
3-4 وحدات توت أو 3
4 شوية ماء ورد

تهرسى الكيوى والتوت بالشوكة كويس وتضيفى لبن البودرة وماء الورد وتخلطيهم كويس مع بعض لحد ما يكون زى الكريم وبعدين توزعى على الوجه واتركيه من 20دقيقة الى 30 دقيقة واغسلى وجهك بماء ورد مثلج

وبالهنا والشفا ههههههههه ايه رأيكم أنا انهاردة اديتكم ماسكين ده جر رجل فى الأول بس بعد كده ماسك واحد وطبعا لازم يكون فيه مقابل !!!!!! عارفين ايه ؟

دعوة من كل واحدة تجرب الماسك ويعجبها ماااااااااااااااااشى , ما أنتو عارفين ما فيش حاجة ببلاش
ادعولى ربنا يهدى جوزى ويرزقنا جميعا أنا وانتم بالذرية الصالحة
ياللا بأه جربوا وعرفونى ايه الأخبار :Zd_bye_3:

إزيكم يا بنات عاملين إيه النهارده نونا يا رب النت عندك يتصلح و ترجعى تدخلى زى زمان يا قمر مقلتيش هترجعى مصر إمتى
أيام فينك يا بت وحشتينا طمنينا عليكى
نوجا إزيك عامله إيه بصى يا ستى أولا ميرسى على الماسكات الجميله ربنا يكرمك ثانيا أول ماسك مينفعنيش لأنى الحمد لله وشى منفخ و مقلبظ من غير ماسكات و لكن الماسك التانى هجربه و أقولك رأيى فيه بإذن الله و ربنا يكرمك فى المشروع اللى نفسك تعمليه و بقولك إيه خدينى معاكى فى الشغل أنا أخدت كورسات ميك أب لكن لسه مستلمتش الشهادات بتاعتها و إن شاء الله مشتنيه يبدأوا كورسات الشعر و هاخودها بس بصراحه أنا باخد الكورساات دى تسليه لأن جوزى بيسافر فبسلى نفسى مش أكتر و ربنا يكرم إن شاء الله
و مستنيه باقى الماسكات و يا رب يهديلك جوزك و يرزقك الذريه الصالحه يا رب
عاوزه أسألك على حاجه إنتى المفروض دلوقتى معندكيش أى مشاكل صح ولا فيه عندك مشاكل فى المبيض ولا إيه

هاى يا رونا مرسيه على ردك وأهلا بيكى معايا فى أى وقت ومن غير كورسات حتى بأذن الله الموضوع يكمل زى ما أنا عايزاه وفيه ماسكات تانية كتيرة هقولكم عليها بعدين أصلى انهاردة مودى وحش والبريود جاتنى امبارح باليل وأرفانى شوية ..المهم يا رورو أنا فعلا وقفت كل الأدوية بس ده مش معناه أنى كويسة لأ أخر تقرير أنى بعيد الشر عن أى حد هنا يعنى ( معدومة البويضات ) معرفش ازاى وما تسألنيش أكبر دكتور فى مصر قال كده أنى ما عنديش بويضات علشان تتلقح !!!!!!!!! مع انى بحس بأعراض التبويض كل شهر وبشوف علامات لكده ده أنا طول عمرى بعرف أيام التبويض بتاعتى وكنت بسأل دايما الدكتور يقولى صح وتخيلى بأه هو ده فى الأخر اللى عندى طبعا بجانب الالتصاقات الشديدة فى الحوض والمبيض الشمال يعنى كل أسباب عدم الحمل متوفرة عندى والحمد لله على كل حال.. أضحكك على حاجة مرة فيه دكتورة كنت بتابع معاها وشافت تبويضى على السونار تخيلى بتقولى بمنتهى الحسد كل دى نسبة تبويض دا انت بويضاتك فوق ال 24 حجمها كبير أوى كل دى خصوبة !! هههههههههههههههههه ما كنتش أعرف ان هيوصل الحال لكده

معلش يا نوجا ما إحنا ياما شفنا من الدكاتره متزعليش و ربنا يرزقك يا رب و يكدب كل كلام الدكاتره يا رب و يفرح قلبك بإذن الله و مستنيين باقى وصفاتك الحلوه
بت يا نونا فينك النهارده يا رب تكونى بخير طمنينى عليكى
أيام فينك و بتعملى إيه مخليكى مشغوله عننا طمنينا عليكى

ازيكم يا حلوين وحشتوني اوي اخباركم ايه و عمالين تدوها ماسكات من ورايا.... ازيك يا بت يا رونا طمنيني عليكي...البت ايام راحت فين يا جماعه..... اطلع عربيه تنده عليها وللا اعمل ايه في البت دي؟؟؟ غلبتني والله ...ازيك يا نوجا؟؟؟ ايه المشاريع الجامده دي ماشاء الله ربنا يوفقك و يديكي اللي نفسك فيه ويرزقك بالذرية الصالحه اللي تنور حياتك يا رب... انا عاوزة اسالك ليه ماجربتيش طفل الانابيب؟؟؟ انا شخصيا فكرت فيه كذا مرة... تعرفي ان الموقف بتاع الدكتورة اللي حسدتك ده حصل معايا؟؟؟؟!! اصلي اول ماتولدت جاتلي بيرود لمدة 3 ايام ومامتي خافت فراحت للدكتور قاللها ماتخافيش دي بنتك دي حالة نادرة من كل 1000 طفلة بيكون في طفلة كده زيي و ان ده دليل على الخصوبة العالية و اني هخلف عيال كتير.... و ماما حكتلي لما كبرت ولما اتجوزت كنت خايفه اني اخلف على طول و عيال ورا بعضها فرحت واخده حبوب منع الحمللمدة شهر ووقفتها بعد الدورة ما جات و ده لان ظروفنا انا و جوزي اول جوازنا كانت صعبه... وكان عاوز يسافر ومش عاوز لخمة و قلق وانا من هبلي سمعت كلامه تاني شهر اكتشفت ان عندي كيس ع المبيض الشمال وابتدت رحلة العذاب مع الدكاترة و لحد اخر مرة كشفت كان الكيس لسه موجود في مكانه لا بيكبر ولا بيصغر لكن انا تخنت اوي من العلاجات اللي اخدتها وشكلي اتغير و في ميه محبوسه ف رجلي زي الحوامل و اللي زاد الطين بلة ان جوزي مسافر بعيد عني و بشوفه في السنه مرة ومش بتهنا عليها كمان..........الحمد لله على كل شيء ... ادعولي ربنا يجمع شملي بجوزي و يرزقنا الذرية الصالحه..... يا رب امين

ازيكم يا بنات وحشتونى ... نونا مرسيه يا حبيبتى على سؤالك وقبل ما أجاوبك عايزة أدعى لك دعوة كبيرة أوووووووووووووووى ربنا يجمعك انت وجوزك ويهنيكى معاه ويسعدكم ويجيبه لكى بألف سلامة ويرزقك يارب بتوأم

وبعدين هو يا أختى ياريت يجى الحسد من الدكاترة وبس ده ممكن تلاقى عين ضربت فيك من أى حد حتى لو ماشية فى الشارع وتلاقى اللى يقولك أيه الجسم ده دا انت فرس دا انت موزة جامدة كل دى أنوثة ؟ الله يهدهم مش عارفين ولا حاسين الواحد فيه ايه يعنى انت مثلا ممكن يحسدوك ان جسمك منفوخ ومليان ويقولوا أهه دى البت دى عليها صحة !!! ما يعرفوش يا قلبى ان ده من العلاج والأرف اللى احنا فيه بس معلشى ربنا يكفينا جميعا العيون دى ويحفظك ويحفظ البنات كلها من شر الحسد
وبالنسبة بأه لمشروعى الصغنن والله والله يا جماعة أول ما أعمل افتتاح ويجهز لازم هتكونوا موجودين أن شاء الله انت ورونا وكل البنات ومعاكم أولادكم ممكن يكونوا لسة فى بطنكم بأه لأنى مش هطول باذن الله ويمكن ساعتها تكونوا لقيتوا أيام اللى بتدوروا عليها انت ورونا ههههههههههههه وتكون معانا ان شاء الله .
المهم يا قمر أنا عملت طفل انابيب والموضوع فشل ولو قريتى اللى أنا كتبته قبل كده هتعرفى التفاصيل بس أنا مش هينفع أعمل أى حاجة تانى لأن جوزى خلالالالالالالالاص رفض ونهى الموضوع فى أى محاولة تانية ده غير أن الدكاترة قالوا أن مش هينفع حتى طفل أنابيب لأن البويضات عندى فارغة ما فيهاش السائل اللى يتلقح والحمد لله .
بس عايزة أقولك وأقول للبنات كلها حاجة مهمة بالنسبة لأدوية المنشطات والحاجات دى هى طبعا بتنفخ الجسم وبتكبر البطن بس لازم تتخلصوا من الموضوع ده بسرعة علشان أثاره مش حلوة على التخن وممكن بعد كده يعمل مشاكل خصوصا لو عايزة تعملى محاولات تانية فى الحمل
أنا لحقت نفسى وفى كل مرة كنت باخد المنشطات دى بعدها على طول بعمل ايروبيك ورياضة خفيفة وبحافظ فى أكلى علشان كده الحمد لله احتفظت برشاقتى وجسمى ( انت عارفة أنا بقالى 7 سنين كنت باخد الحاجات دى ) بس بجد لازم تهتمى بالموضوع ده أولا علشان نفسك ثانيا علشان جوزك وعلشان البيبى لما ييجى ان شاء الله وأقولك حاجة بأه أنا حاسة والله ان ربنا هيكرمك انت و رونا أنا يا بنتى عندى الحاسة السادسة هههههههه لأ بجد والله أنا الحمد لله عندى شفافية كده فى حاجات كتيرة والله العظيم بتحصل ومن أول ما قريت كلامكم حتى من قبل ما أرد عليكم جانى الأحساس ده وان شاء الله هيحصل بس افتكرونى بأه وقتها وادعولى
بصى أنا مودى مش حلو علشان عندى البريود بس أن شاء الله هقولكم المرة الجاية شوية خلطات وماسكات تعملوها وأقولك شوية حاجات هتساعدك تظبطى جسمك ماشى ياقمر -:Zd_bye_3:

إزيكم يا بنات عاملين إيه و إيه أخباركم عاملين إيه النهارده
نونا فينك من زمان يا بت إنتى وحشانى جدا جدا و صلحى النت بقى عشان تعرفى تتكلمى براحتك ماشى
نوجا إزيك النهارده يا قمر عامله إيه على فكره عاوزه أقولك على حاجه أنا الحمد لله حامل كنت فكراكى عارفه لأنى كتبه فى التجمع هنا أنا و البنات عن حملى بعد 4سنين عذاب من الدكاتره و إجهاض قبل كده و كمان التوقيع بتاعى بس الحمد لله و الشكر لله ربنا كرمنى و حملت بعمليه تلقيح و ربنا يكرمك إنتى و نونا و أيام يا رب بالذريه الصالحه يا رب و يكملى و كل اللى زييى على خير يا رب العالمين
أيام فينك يا بنتى الظاهر هنضطر أنا و نونا فعلا إننا نطلع منادى ينادى عليكى ربنا يطمنا عليكى يا رب

إزيك يا رونا اخبارك ايه والله انتو وحشتوني اوي والنت اتصلح اهو بس ان شاء الله مش يبوظ تاني بقه.... البت ايام دي انا هوريها بس لما اشوفها بس... طولت الغيبة اوي المره دي و دي حاجه مايتسكتش عليها....
انتي كمان وحشتيني يا رونا و الله و كنت هطق من القعدة من غيركم و ماكنتش اعرف ان البت ايام قاطعه هي كمان... ياللا ربنا يرجعها بالسلامه ويطمنا عليها
ازيك يا نوجا و اخبارك ايه ... على فكرة انا كمان عندي الست هانم مشرفه وعاملالي مغص ومخليه مزاجي زفت بس هنعمل ايه قدرنا...
انتي على فكرة عامله جو لذيذ للتجمع وفكرتيني بمصر اوي لانها وحشتني موت
و ربنا يستجيب منك يا رب و نحمل قريب و نتجمع انا و جوزي يا رب و اباركلك على الحمل و الولاده يا نوجا

إزيك يا نونا عامله إيه و إيه أخبار الجو عندك فى الإمارات عندى ليكى خبر بس مش هقولهولك غير لما تخمنى إيه هو طمنينى عليكى و على صحتك و بتابعى مع الدكتوره ولا لأ و شوفى إذا كنتى حابه لما تنزلى مصر تيجى زياره للدكتور بتاعى قوليلى عارفه أنا 2 من صحباتى راحوا عنده و قالولى فرق كبير بينه و بين اللى كانوا بيتعالجوا عندهم مع إن الإتنين كانوا بيتعالجوا عند دكاتره مشهوره جدا منهم أحمد عبد العزيز وواحد تانى إسمه حسن على حسن و مرتاحوش معاهم بسبب إسلوبهم على طول مستعجلين و متعرفيش تستفهمى منهم عن حاجه لكن الدكتور ده ما شاء الله عليه مريح جدا فى التعامل شوفى و قوليلى و ربنا يكتبلك الخير إن شاء الله
وعندك حق نوجا فعلا عملت حس للتجمع بعد ما الست أيام تقلت علينا و بتشوف معزتها عندنا بس يا رب تكون كويسه و صحتها كويسه و متكنش القطعه دى بسبب حاجه وحشه لا قدر الله
نوجا إزيك يا قمر النهارده عامله إيه و إيه أخبار صحتك و مزاجك النهارده

ازيك يا بت يا رونا
اكيد انتي عرفتي انتي حامل في ولد وللا بنت؟؟؟؟؟؟؟؟
صح؟؟؟؟؟؟؟؟؟؟؟؟؟؟؟؟؟؟
طمنينا عليكي يا قمر وعلى النونو المنتظر
ربنا يتمم لك على خير يا رب و نفرح بالنونو بتاعك ان شاء الله

ازيكم يا بنااااااااات خلتونى بحب اشوفكم كل يوم أنتم زى العسل

مبروك يا رونا على الحمل بس والله ما أخدت بالى وبرضه عموما احساسى نصه طلع صح :wink:

وعقبالك يارب يا نونا انت والبنات كلهم هنا ومرسيه يا نونا على المجاملة دى بس أوعوا تنسونى لما أيام ترجع بالسلامة
وان شاء الله هتكون بخير أنتم قلقتونى عليها أنا كمان وشكلى كده هنزل أدور معاكم عليها ههههههههه
هى يمكن تكون مشغولة فى حاجة والدنيا واخداها شوية بس أكيد هتدخل تطمنكم عليها قريب ان شاء الله
وأنا الحمد لله مزاجى يعنى شوية ابتدى يتعدل , بصوا البت أختى بقالها 17 سنة عايشة فى السعودية وامبارح اتصلت بيا فجأة كده لوحدها وقالت لى فيه حاجتين مهمين ناس أصحابها كتير فى السعودية جربوهم ونفعوا معاهم على طول فطبعا ما كدبتش خبر وقلت ماليش غيركم لازم أقولكم وأشوف بأه حد يبتدى معايا ونشوف ايه اللى هيحصل معانا !!!!!!!!
أيه رأيك يا نونا تيجى نبتدى مع بعض ونشجع بعض ؟
أه طيب .. هقولكم الأول هى قالت أيه ..
عليكى بسورة البقرة كل يوم بعد نص اليل وبعدها نص ساعة استغفار وطبعا بنية خالصة لله وانه هيكرمنا بالذرية
ثانى حاجة سورة الفاتحة بتقسم لى أنها نفسها جربتها فى حاجات كتير وبتقول ان فيها أسرار عظيمة يعنى لو فيه ألم أو مرض فى أى مكان فى الجسم نخلص النية لله ونكون مقتنعين تماما اننا لو عملنا كده وقرأناها ربنا هيشفينا ونحط أدينا على المكان ونقرأ الفاتحة 7 مرات صباحا ومساءا والله هو الشافى

بس أنا عندى مشكلة أول ما أبتدى أقرأ سورة البقرة بيجيلى نوووووووووووووووووووووم معرفش منين حتى لو كنت لسة صاحية برضه بنااااااام وبشخرررررررررررررررر هههههههههه والله ياجماعة النوم بيكبس عليا بشكل فظيع وجسمى كله بيوجعنى وكأن حد بيضربنى بكرباج استغفر الله العظيم مش عارفة ليه بيحصل معايا كده وبغصب على نفسى وأقراها بس ما عرفش أكرر المحاولة تانى

المهم ياللا يا نونا بعد البريود نعمل كده ولا ايه ؟
أه صحيح عايزة أسألك عن حاجة يا نونا هو انتى مش مصر أنت بتتكلمى منين هههههههههههههه معلش اعذرينى أصلى بصراحة ما شفتش أخباركم كلها من التجمع ما ركزتش يعنى فى قراءة الأخبار
وتفاءلى خير يا بنتى طالما الحاجة نوجا قالت لك هتحملى باذن ربنا وان شاء الله خير
وانت يا رونا يارب تكونى حامل بتوأم بس ادعى لنا وانتى بتولدى ان شاء الله عارفين مش هتكونى فايقة لينا بس حاولى تركزى معانا شوية ساعتها هههههههههه
ربنا يكملك بخير ان شاء الله ياللا بأه أنا هسيبكم علشان أعمل أكل لجوزى وبالليل أكبس عليكم أشوفكم بتعملوا ايه :21_218::Zd_bye_3:

نوجا إزيك يا قمر عامله إيهبصى بصراحه كان ليه تجربه مع الوائم مؤلمه شويه فعشان كده إتعقدت منهم بصراحه لكن الحمد لله عندى بيبى واحد ربنا يخليهولى و يباركلى فيه و من غبر ما تقولى أنا والله بدعى لنونا و أيام كل يوم فى قيام الليل و هدعيلك إنتى كمان والله إن ربنا يكرمك إن شاء الله و هقولك على الطريقه اللى إتبعتها قبل ما أعمل العمليه ووالله قللت الحقن خالص لما جيت أخدها
شوفى يا ستى كنت كل يوم أول ما أصحى أشغل سوره البقره و أنا بشتغل فى البيت و أحاول على قد ما أقدر أركز فيها و بالليل أقرى سوره مريم و كنت بشرب كل يوم قرفه باللبن لكن مش فى أيام البريود و بالليل بعد الساعه 12 قيام الليل و الإستغفار و الدعاء و الله غير إنها فرصه إن ربنا يستجيب للدعاء كمان بتحسى براحه نفسيه غريبه بعدها إن شاء الله
نونا يا أروبه عرفتى المفاجأه إنتى أروبه صغننه عقبالك يا رب إيه رأيك إنتى اللى تقولى لنوجا عشان تكون بشره خير ليكى و ليها و لأيام إن شاء الله

رونا يا حبيبتى والله أنا فرحانة ليكى موووووووت وكأنى أنا اللى حامل وبدعى لك والله العظيم كمان أنا كأنى أعرفكم من زمااااااااااااان وبعدين أنا شكلى كده عرفت أيه هى المفاجأة بس برضه هسيب نونا تقولى واعمل نفسى أتفاجأت ههههههههههههه
يارب يارب يخلى لك ابنك وتشوفيه وهو بيكبر أدام عنيكى وتفرحى بيه ولما ييجى يتجوز تجيبيه لحمام العرايس عندى فى مشروعى وما فيش مااااااانع أخدك فوق البيعة بأه علشان ساعتها هتكونى تخنتى وأظبطك بأه ماسكات وخسسان وغيره :wink:

ربنا يخليكى يا نوجا والله العظيم ربنا يعلم إنك فعلا مليتى علينا التجمع ما شاء الله عليكى و فعلا والله بدعيلك إنتى و أيام و نونا لأن اللى عشت فيه قبل ما أحمل زيكم بالظبط و عارفه الأصعب كمان من كده إنك بتعيشيه لوحدك بعيد عن جوزك فاهمه قصدى ياما عانيت و كنت بدخل أحكى لنونا و أنا بعيط بس الحمد لله ربنا عوض صبرى خير و إن شاء الله هيعوض صبرك و صبر نونا لإنها تقريبا نفس ظروفى و أيام إن شاء الله خير بس توكلى على ربنا و ربنا هيكرمك إن شاء الله و بكره إن شاء الله نونا تقولك المفاجأه لأن نونا مشركانى كل حاجه من يوم ما إشتركت فى التجمع فحبيت إنها هى اللى تقولك المفاجأه دى و بعدين عاوزه أقولك حاجه أنا مش مستنيه حمل ولا ولاده عشان أكون تختوخه أنا الوحيده فى العالم اللى الدكتور و هى حامل فى أول 3 شهور قالها تخس شوفتى بقى بس الحمد لله دلوقتى بطل يقولى الكلمه دى

الف الف الف مبروووك يا جماعة
ان شاء الله احنا منتظرين بنوته زي القمر
هتجيبهالنا الحاجه رونا على سن و رمح
ربنا يتمم لك على خير يا رونا يا سكر
و يفرح قلبك بشوفة العسل الصغنن

ربنا يكرمك ان شاء الله يا رورو وانا كنت بهرج معاكى لما كنت بقولك تخينة وبصى بأه أنا كنت بنكشك لما بقولك ابنك يجى أعمله حمام العرايس علشان تردى عليا قبل نونا وتقوليلى لأ دى بنت

بس انت طلعتى ذكية ههههههه يا بنتى ربنا هيعوض صبرك خير أوى ان شاء الله ويارب يهنيكى دايما انت ونونا وأيام اللى مش لاقينها وانا معاكم وكل البنات . وباذن ربنا بنتك هحضرلها هدية فظييييييييييييييييعة لما تيجى بالسلامة لازم نشوفها ان شاء الله أنا ونونا

ويا ست نونا ما ردتيش عليا ليه ؟ ايه نمشى فى الخطة بتاعة ال40 يوم دول ولا ايه ؟ نشجع بعض يعنى

طيب خدوا عندكم بأه كريم للهالات السوداء

2 ملعقة فازلين+2 زيت لوز مر +2زيت جنين القمح اخلطيهم مع بعض وادهنى منطقة العين ومحيطها بعد كريم الليل بنص ساعة وسيبيها للصبح ولو حبيتى تحطى منه الصبح ممكن مرة واحدة

وممكن خلطة تانية
زيت جنين القمح + كبسولة فيتامين E نفتح الكبسولة ونمزجها بالزيت ودى ممكن نوزعها على الوجه كله بمنطقة العين كمان هتخلى وشكم تحفة .... ياللا ادعوا لى