تجمع بنات مصر المتاخرات عن الحمل

ايه يا ست ايام
انتي وعدتينا ترجعي زي الاول
ادينا بقينا اول الشهر و مش بشوفك برده
انتي فين من الصبح؟؟؟؟
ماشي ماشي

إزيكم يا بنات عاملين إيه يا بنات كفر الدهاشنه أنا أم عتريس ماشى يا نونا عتريس عتريس بس ييجى بالسلامه أنا راضيه بأى أسم شوفى يا أيام أنا المره دى منقتش أسامى لحد دلوقتى بصراحه خايفه المره اللى فاتت نقيت أسامى و بعدين حصل اللى حصل عشان كده قررت منقيش بس ممكن تقوليلى أسامى بس أول ما هعرف نوع الجنين هقولكم و أنتوا تقولولى أسامى على ذوقكم غير هريدى و عتريس لأن الأسمين دول إنتشروا خالص فى الكفر عوزه أسامى تانيه ماشى
نونا إتصلى بالدكتوره بتاعتك عشان تطمنك على نفسك أحسن لأن منقدرش نفيدك فى موضوع الدواء ويا رب يكون خير ويكون التأخير ده فى صالحك يا رب

ازيكم يا حلوين
الهانم شرفت بالسلامه والحمد لله
و انا قاعده بتقطع من الوجع في الشغل و عاوزة اخد اي مسكن
سبحان الله
اتاخرت شويه كنت هتجنن عليها
و لما بتيجي ببقى مش طايقاها و لا طايقه نفسي
الحمد لله على كل حال

انتي يا بت يا ايام
مختفيه فين و غطسانه
لما اشوفك بس يا هريدي انتي
هضربك وهضرب هريدي على ......
و خليه يعيط و يوجع دماغك طول الليل

ههههههههههههه أحلى سلااااااااااااام مربع لأحلى معلمين بالبلد.... ازيكو يا بنات..اعمل ايه انا؟؟اقطع نفسي؟؟؟ انا بقالي يومين زي الكورة بين البيت و الشغل..و بكرة كمان احتمال اختفي تاني... هههههههههه

انا مشتقالكو قوي يا جماعة ... ألف سلامة عليكي يا نونا و انشالله في الصيف ما تشوفيهاش خااااااااااااااااااااالص ...

ولا يهمك يا رونا انتي بس قولي جنس الجنين و انا محضرالك حتة أسماء تحفة .... بس ابقي بشرينا ..إلا صحيح انتي في الشهر الكم دلوقتي؟

انا آخر أخباري اني رحت عند الدكتورة لقيت بس بويضة واحدة ناضجة للتلقيح ..و قالتلي إزا ناوية اعمل تلقيح صناعي لازم آخد إبر علشان تطلع أكتر من 3 بوضات على الأقل..و ربنا يجيب اللي فيه الخير بقى

خدوا بالكو من بعض عبال ما آجي تاني :)

يا سلاااااااااااااااااام يا ست ايام
لسه هتغطسي تاني؟؟؟؟؟؟؟
يا رب البويضة اللي عندك تبقى نونو الشهر ده
عشان تحملي وتدخلي كل شويه تتكلمي عن الوحم

إزيكم يا بنات عاملين إيه و إيه أخباركم و أخبار كفر الدهاشنه إيه معلش يا نونا إن شاء الله العمليه تتظبط معاكى يا قمر و تكونى زى الفل إن شاء الله
إزيك يا أيام ما أنا قلتلك كده من الأول عن الحقن لكن مسمعتيش كلامى يا بنتى أختك خبره بكل أمراض النساء الحمد لله كل الدكاتره اللى رحتلهم كانوا مطلعين فيه القطط الفطسه بس الحمد لله المهم خلى بالك على نفسك و إن شاء الله العمليه تنجح بس زى ما قلتلك الراحه بعد العمليه وربنا يرزقك الذريه الصالحه يا رب
على فكره يا أيام أنا فى أول الرابع الحمد لله مع إنى مرعوبه و عاوزه أروح للدكتور لأن جوزى لسه جاى من السفر و لما حصل جماع لقيت دم نزل و من ساعتها و أنا قلقانه بس اللى مطمنى إنه وقف و كمان كنت متعوده على نزول دم كل ما جوزى بييجى من السفر و يحصل جماع بس أمانه إدعولى ربنا يكملى حملى على خير لأن من ساعه ما جوزى جيه مهدوده فى البيت و العزايم وربنا يكرمنا كلنا يا رب بالذريه الصالحه يا ر ب

ربنا يكرمك و يكمل حملك على خير يا رونا
بس ما ينفعش موضوع العزايم والكلام ده
يا بنتي ريحي نفسك
و بعدين خلي بالك في الجماع لازم يكون بشويش
بعد الولاده يعمل اللي هو عاوزه ان شاء الله
ربنا يفرحنا بولادتك يا رب

صباح الفل يا بنات.. الف حمدلله على سلامة جوزك يا نونا بس ديري بالك على حالك و انا من رايي تراجعي الدكتور أحسن....و زي ما نونا قالتلك لازم تريحي نفسك بعدين الناس يعني ما بقدروووووش ليه؟ يا إما ييجي حد من عيلتك او عيلتو يساعدوكي

ازيك يا نونا...أديني يا ستي ما اختفيتش النهاردة..من الصبح جايالكو زي القردة ...ههههههه .. انا رجعت للدكتورة تاني و قالتلي نأجل العملية للشهر الجاي أحسن ..قلت و مالو ....كل محصل بعضو.

نشوفكو على خير يا بطابيط

مش مشكله
يمكن الشهر الجاي تكوني مرتاحه اكتر من الشهر ده
لانك كنتي مشغوله جامد الشهر ده
كل تاخيرة و فيها خيرة

صباح الخير يا عيال
انا قلت اعدي اسال عليكم واصبح
جمعه مباركة ان شاء الله
و ربنا يستجيب دعاءنا ونجيب احلى عيال يا رب
ويكمل لرونا وشهيدة على خير

إزيكم يا بنات عاملين إيه وحشتونى أنا الحمد لله أحسن دلوقتى و الناس اللى بيجولى بيقعدوا بشوات و أنا رايحه جايه بس جوزى أخر مره أحرج أخته و قالها تقوم تساعدنى
أيام عاوزه أقولك نصيحه غيرى الدكتوره دى و روحى لحد تانى صدقينى كلامها متناقض لأن المفروض من ساعه ما قررت تعملك تلقيح صناعى كانت تديكى الحقن مش تتعبك نفسيا وبعد كده تقولك الشهر الجاى و بعدين مادام إنتى هتعملى تلقيح صناعى ليه متعمليش حقن مجهرى بدل ما تدفعى فى التلقيح مبلغ كبير و نسبه نجاحه مش ناجحه زى الحقن المجهرى عندنا فى مصر فرق بتاع 2000 جنيه و عارفه تعب ساعه ولا كل ساعه وصدقينى الدكاتره دول جزارين و كل اللى يهمهم إزاى يستنزفونا و ياخدوا فلوسنا فكرى و أستخيرى ربنا و قررى و كويس إنها معملتلكيش حاجه الشهر ده وربنا معاكى
نونا إزيك يا قمر عامله إيه عارفه يا نونا مش عارفه ليه كل ما أكلمك أبقى عاوزه أسألك النونو عامل إيه بجد والله و بقول يمكن بشره خير و بقولك إيه رأيك فى اللى قلته لأيام و من خبرتك مع الدكاتره إيه رأيك فى كلام الدكتوره بتاعتها بس بأمانه ماشى

انا اصلا مخنوقه من كل الدكاترة اللي ايام بتروحلهم
مش عارفه ليه بحس انهم قاصدين يدوخوها
انا مش حاسه ان ايام عندها حاجه لا قدر الله تمنع الحمل
التبويض موجود مع ان عندها تكيس يعني ماشاء الله ممكن تصحى تلاقي نفسها حامل
انا شايفه انها تختصر و تروح تعمل حقن مجهري وتريح نفسها لو مستعجله ولو مش مستعجلة تكمل علاج بالهرمونات مع انه بيتخن ومقرف
لازم تستخير وتتكلم مع جوزها ويتفقوا على طريق يمشوا فيه في موضوع العلاج
و ربنا يسهل لها امورها يارب ونسمع عنها كل خير باذن الله

يسمع من بقك ربنا يا رونا
بس افتكري تدعيلنا وانتي بتولدي ان شاء الله
ونفسي اقول لشهيده تدعيلنا في الولادة
ربنا يتمم لكم على خير يا رب

ازيك يا بت يا ايام عامله ايه
مش المفروض انك في اجازة النهارده
امال سيادتك مانورتيناش ليه؟؟؟؟؟
ماشي خليكي فاكرة التقل ده
وانا برده هعذرك يمكن جوزك عاوزك في كلمه سر وللا حاجه
بس ماتنسيش تعدي علينا اخر الليل او حتى اخر النهار
ماشي يا جميل
مع تنمياتي ان الدورة ماتجيش الشهر ده و تطلعي حامل

إزيك يا نونا عامله إيه و أخبارك إن شاء الله أدعيلك بس إمتى ييجى اليوم ده يا رب ييجى اليوم ده و أدعيلك و أدعى لكل البنات إن شاء الله
أيام إسمعى الكلام وروحى لدكتوره تانيه أحسن تطمنك على نفسك و إن شاء الله خير و ربنا يكرمك بالحمل يا رب

صباح الورد و النور و العسل لأحلى بنات و أمهات المستقبل (انشالله)...ليكو وحشة كبيرة قوي... عاملة ايه يا رونا؟؟حجزتي للصيف و لا لسة؟؟ اسعار التذاكر هتبدأ تولع من الشهر الجاي...

ازيك يا نونا ؟ و ازاي الحمل معاكي؟؟ انا بعرف بالرابع جنس الجنين بيتحدد..ما تنسيش تسألي الدكتور لما تراجعي المرة الجاية...عقبال عندك يا رب انا مرات أخويا حامل في الشهر السابع و في بطنها بنوتة ..و أديني بخرج معاها بالأجازات نشتري و نجهزلها...انشالله عقبال ما جهز لنفسي و و انشالله يا نونا تفرحي بالعيل على ايديكي و تلبسي أحسن لبس..

انا يا بنات الصراحة اللي قلت للدكتورة ما تدنيش الإبر..هيا كانت ناوية تبدأ معاية كورس علاج بالإبر..بس انا قلتلها ما فيش داعي طالما اني بستجيب للكلوميد و قلتلها انو الشهر اللي فات كان عندي بويضتين كويسين من الكلوميد بس ... فهيا بناء على رغبتي كملت معايا بس على حظي ما طلعش الا بويضة واحدة ...شايفين البخت...
الحاجة التانية أنا حابة أعمل هنا تلقيح صناعي قبل الصيف على اساس لو ما زبطش اسافر على مصر للعلاج..لأنو مش عايزة احس بتأنيب الضمير إني ما جربتش كل حاجة ... تانيا التلقيح مش مكلف للدرجة دي ...
بس اطفال الأنابيب هنا ولعة بتوصل ل 13000 و فوق يعني عن 9000 جنيه تقريبا

ربنا يجيب اللي فيه الخير لو ربنا كاتبلي الحمل على التلقيح هحمل و لو مش كاتب اهو الواحد بيضل يطرق أبواب أخرى و انشالله باب منهم يفتحلي الخير

يا رب انا و انتي يا رونا نحمل السنة دي و تكون 2008 خير علينا يا رب...

لا حول ولا قوة الا بالله
انتي احوليتي يا ايام
بتكلميني على اني رونا
و بتكلمي رونا على انها انا
ههههههههههههههههههههه
لا شكلك تعبانه بجد
على فكرة رونا هي اللي حامل
و انا اللي اسمي نونا
وعموما بشرة خير
ان شاء الله يا ستي نحمل كلنا

ما هوا انتو كمان مختارين اسمين تحفة الصراحة ..نونا و رونا ...زي حرقش و مرقش بتوع رسوم الكرتون .. و لا زينجو و رينجو ......غصبن عني لازم أتلخبط

إزيكم يا بنوتات عاملين إيه عنك حق يا نونا أنا كمان لما قريت اللى أيام كتباه حسيت إنى أنا اللى أحوليت و مكنتش مجمعه هى عوزانى أحجز إيه بالظبط بس بعد كده لقيتها بتكلمك عن الحمل فقلت يبقى أيام اللى إتحولت و عموما بشره خير يا ستى أنا و أيام مصرين نكلمك على إنك حامل يا رب يا نونا تحملى يا رب من أول يوم ييجى جوزك فيه و خلى بالك دعوه الحامل مجابه إن شاء الله
إزيك يا أيام عامله إيه حمدالله على سلامتك و عقبال يا رب لما تنزلى تشترى حاجه النونو بتاعك يا رب و تشوفيه بيلعب و بيتنطط حوليكى و يا ريت بعد كده متخترعيش و تسمعى كلام الدكتوره ماشى وربنا يكتبلك الخير يا رب و يفرح قلبك إنتى و جوزك بالنونو اللى يكمل سعادتكم يا رب
بكره إن شاء الله ميعادى مع الدكتور إدعولى إن كل شئ يكون تمام بإذن الله و يا رب الدكتور يكون من النوع اللى بيقول جنس الجنين يا رب لأن الدكتور اللى قبله مكنش بيقول بس أنا وعدتكم إذا عرفت هقولكم وربنا كريم يا رب