تجمع بنات مصر المتاخرات عن الحمل

ايوة انا لسه واخده بالي دلوقتي لما قلتيلي
يا رب يكون فال خير يا رب
ادعيلي يا رونا ربنا يخليكي انتي و شهيدة
انتي كنتي سالتيني عاملة ايه في الشغل
انا بقضي الايام عادي لحد ما جوزي يبعتلي او حتى ييجي
بس بروح الشغل وانا نفسي اليوم يعدي
و بحاول افرفش نفسي باي حاجه عشان انسى ان ايام عمري عمالة تعدي قدام عنيا
ولا مني متجوزة ولا مني بنت
الموضوع مش الخلفة وبس يا رونا
انا حاسة ان حياتي مالهاش معنى واضح
او ان انا شخصيا ماليش لازمة عند حد
يعني اتجوزت وجوزي مسافر بعيد عني طب هو كده محتاجني في ايه
ولا عندي عيال اربيهم و يبقوا محتاجين ليا
عشان كده بتخنق كتير وانا قاعدة لوحدي
بس خلاص اللي عاوزه ربنا هيكون
و الحمد لله على كل شيء

معلش يا نونا هنعمل إيه ده قدرنا إننا يكون جوازنابيسافروا بكره إن شاء الله ربنا يكرمك بنونو يملى عليكى حياتك و يشغل وقتك يا رب و يفرح قلبك بالنونو بتاعك يا رب و تبقى مش لاقيه وقت ترتاحى فيه إن شاء الله
فين أيام مبتدخلش ليه يا رب تكون بخير يا رب
شهيده يا رب تكونى بخير وربنا يسهلك ولادتك إن شاء الله و تجيبى نونو زى القمر

ربنا يستجيب منك ان شاء الله يا رونا

انا مش عارفة البت ايام غطسانه فين
كل شويه عندها حجة شكل
ربنا يطمنا عليها الست مشغولة هانم

ربنا يكرمك يا نونا و ينولك كل اللى فى بالك و تتمنيه من ربنا و يرزقك الذريه الصالحه يا رب إنتى و أيام المختفيه يا رب تكون بخير و صحه أهم حاجه و ترجعلنا تانى يا رب

غيه يا بنات فينكم مختفيين فين يا رب تكونوا بخير يا رب و ترجعوا تنوروا التجمع تانى

ازيك يا رونا
هي البت ايام لسه ماظهرتش
ربنا يطمنا عليها يا رب
اخبارك ايه يا رونا
و الجو في مصر عامل ازاي دلوقتي
في احتمال اني اسافر لجوزي الشهر الجاي ان شاء الله
و بإذن الله هنزل مصر على شهر 7 او 8
تكوني انتي قربتي تولدي ان شاء الله
ربنا يتمم لك على خير يا رب

على فكرة انا دخلت و كتبت كلام كتير بس معرفتش ابعته لان النت كان بطئ اوي
معلش بقه

إيه يا حلوين انتو روحتو فين؟؟؟؟؟؟؟؟؟؟؟
حد يطمنا على أيام يا جماعة
البت وقعت في بلاعة وللا إيه؟؟؟؟؟؟؟؟؟

إزيك يا نونا عامله إيه معرفش فين أيام بصراحه الظاهر مش فاضيالنا اليومين دول يا رب تكون بخير
يا رب ترجعى مصر بالسلامه يا نونا و بالنسبه للجو عندنا حبه حر و حبه سقعه بس عموما بدأ يحرر شويه يا رب يا نونا ييجى شهر 8 ده على خير يا رب عارفه نفسى أغمض عينى و أفتح ألاقى رمضان جيه يا نونا وربنا يكرمك المره دى و ترجعى مصر حامل إن شاء الله

أولا صباح الخير يا جماعة ..انا عارفة الود ودكوا تغتالوني ..بس مش مشكلة ..انا ببقى سعيدة قوي و انتو بتسألوا عني و مفتقديني..بعدين ما طلعش معاكي إلا بلاعة يا نونا هانم، مش يمكن مخطوفة في غوانتانامو ولا حاجة؟!!! عموما انشالله انا كمان هكون في مصر على شهر 8 و انشالله ربنا يكرمني أنا و انتي يا رب...

و انتي يا رونا ربنا يسهلك أمورك و عدي حملك على خير و يبقى الصيف شهر خير و بركة عليكي و علينا.

أنا يا جماعة بقالي فترة في صراع ما بين الشغل و البيت و الطلعة ..لأنو عقبال عند العزاب عندكو ..إبن خالي خطب ..و يوم الجمعة حفلة الخطوبة..علشان كدة مش قادرة ألحق يادوب برجع من الشغل عالبيت أطبخ لتاني يوم بعدين أطلع بالليل عالسوق أكمل اغراضي و اغراض ماما و مرات اخويا..لأنو ما فيش سيارة توديهم و تجيبهم غيري.... شفتي يا ست نونا...قدينا بقينا سواقين تكاسي عالخط على آخر الزمن..

أما بالنسبة لموضوع الحمل فأنا نسياه الفترة دي لما بلاقي حاجة تانية شغلاني زي الحفلة دي.... اصلا انا نسيت احسب الأيام من بعد ابرة التفجير..يلا خليها على البركة...

ديرو بالكو على حالكو و انتو عالبال دايما بس هوا الوقت عندي ديق خالص... و ما تنسونيش من دعواتكو..صحيح سلمولي على شهيدة لو ما لحقتهاش

ازيك يا ايام باشا
وحشاني موووووووووووووووووووووووت
وش القمر وللا وشك يا جميل
و عقبال ماتجوزي ابنك يا رب

حمد الله على سلامتك يا قمر و عقبال ما تنزلى تجيبى حاجات النونو يا رب و عموما خلاص سامحتك يا ستى بس دايما إدخلى طمنينا عليكى ماشى يا قمر و ربنا معاكى إن شاء الله
نونا إزيك عامله إيه و هتقضى شم النسيم إزاى زيى كده بيتك بيتك ولا هتروحى حته و بتكلى فى اليوم ده فسيخ ورنجا ولا لأ
شهيده يا رب تكونى بخير و تولدى بالسلامه و تجيبى بيبى زى القمر يا رب

إيه يا بنات فينكم عاملين إيه وحشتونى

معلش يا بنات
النت مقطوع عندي من فترة ومش عارفه اعمل ايه
انا بكتب لكم من الموبايل
ايه الاخبار؟؟؟؟
والتجمع ماحدش بقه بيدخله ليه
فين ايام
وشهيدة
وانتي روحتي فين يا رونا؟؟؟؟؟
طمنوني عليكم

ايه يا جماعه
انتو فين
وحشتوني
طب طمنوني عليكم بس و اطلعوا؟؟؟؟؟؟؟؟؟؟

السلام عليكم .. ازيكم ايه أخباركم
أنا نوجا من القاهرة بصراحة كنت مترددة اكتب وأشارك مش علشان حاجة غير انى مش عايزة أزود همومكم بس أخيرا قررت أكتبلكم عن المأساة بتاعتى عارفين ليه ؟؟ علشان كل واحدة فيكم هتقول الحمد لله على اللى هيا فيه لما تعرف اللى حصلى من الدكاترة أنا كنت متجوزة من 8 سنين ( وحاليا متجوزة وتحد تانى من 7 شهور ) ومن أول شهر فى جوازى الأول جلتى مغص فظيع كان بيجى مع كل بيريود - دورة - المهم رحت لدكاترة كتير ومشهورين اللى يقول قولون عصبى واللى يقول قرحة فى المعدة المهم واحد منهم قال اعملى سونار وأشعة بالصبغة ونشوف ( أنا هحاول أقولكم باختصار ) ظهرت الأشعات والدكتور اياه قالى تكيسات على المبيض الشمال ومليانة دم ودى حاجة اسمها انديمتريوزس وبتمنع الحمل ولازم تتشال بعملية أما بالمنظار أو بفتح البطن :mad: بينى وبينكم أنا كنت عمرى ما دخلت مستشفى ولا روحت لدكتور كان كبيرى بيجى لى صداع بس المهم طبعا أختكم حمارة مش فاهمة والحمد لله على كل حال كنت بروح كل الحاجات دى لوحدى صاحبتى بس اللى كانت معايا لأن أهلى كانوا مسافرين السعودية وما حبيتش أخضهم وجوزى كان عايش فى دور رجل الأعمال المشغول لأنه كان ملحن مشهور ومشغول دايما فكان سايبنى لوحدى على طول ومش مهمتم وصاحبتى كانت هابلة زيى ومش عارفة حاجة قلنا للدكتور انت رأيك ايه أيه العمل قال تعملى جراحة عملية فتح بطن أسرع وأحسن ( حسبى الله ونعم الوكيل ):mad2: ودخلت العمليات عارفين فيه مثل خدوه من الدار للنار .. هو أنا ... عموما مش هطول عليكم فضلت شهر ونص بموت من العملية ومش قادرة اتحرك وطبعا فتح بطن كأنها قيصرية بالظبط وجاتنى التصاقات شديدة على المبيض الشمال والناحية الشمال كلها ومنطقة الحوض بسبب العملية دى وده اللى عرفته بعد كده من دكاترة تانيين روحت لهم بعد العملية لأنى تعبت ... المهم مريت بأه بكل ألوان العذاب من متابعة تبويض وكلوميد وبعدين حقن تفجير بويضة وعذاب نفسى أكتر علشان الأقى جوزى وقتها علشان أستفيد من البويضات المفجرة وتخيلوا بأه انى أوقات كتيرة اخد الحقن وما اعرف أنام مع زوجى علشان مشغول أو مش موجود أو أى حاجة ,,, المهم لفيت على أكبر دكاترة مصر كلهم وأشهرهم وطبعا كل واحد بيجرب طريقة علاج مختلفة عن التانى وعملت تانى عمليتين منظار فى خلال سنتين علشان يفكوا الالتصاقات ما نفعش وطلعت من النوع السميك ومالهاش حل وبرضه فضلت الف على الدكلترة كل ما اسمع عن دكتور مشهور وعمل لفلانة كذا أجرى احجز عنده وأحكى قصتى من البداية لحد ما عملت دولاب وفايلات من التحاليل والأشعات وخلافه .... فضلت اعانى كده 7 سنين وكل ما يمر يوم يزيد عندى الأمل انى أكيد ان شاء الله هكون حامل وأشعر بأحاسيس ومشاعر كل واحدة حامل وطبعا جوزى ولا كان فى دماغه ,,, لحد ما النصيب وقف لحد كده وتم الطلاق بينا وخرجت من تجربة الزواج والجرى ورا الخلفة متدمرة بكل معانى الكلمة وكان فى الفترة الأخيرة واقف جنبى صديق للعائلة وبيحبنى فى صمت وخلاصة الكلام اتجوزنا من 7 شهور وقلت الحمد لله ربنا عوض صبرى خير ورزقنى بشخص رائع وما فيش مشاكل وعرفته كل شىء عنى وبصراحة كان انسان فاضل ووافق انى أروح أعمل حقن مجهرى بعد الجواز بشهرين طبعا بدون معرفة أهاه ولأن ده كان أخر أمل ليا والنسبة ضعيفة زى الدكاترة ما قالولى وأخرهم د/جمال أبو السرور ,,, جريت بأه وكلى أمل وأحلام أنى رايحة أعمل حقن مجهرى وربنا هيرزقنى بتوأم وفضلت أحلم وأخد منشطات ياما أخدت زيها قبل كده وأحلم وأخد حقن فى بطنى وعضل وأحلم وأتعذب وأموت وبرضه بحلم وخلاص قرب الحلم يكون حقيقة ودخلت غرفة العمليات علشان يسحبوا منى البويضات وبعدين يلقحوها بالعينة اللى أخدوها من جوزى ... وأنا بحلم خلالالالالالالالالالاص يومين ويزرعوا البيبى عندى وأبقى أم ...أم ما كنتش قادرة أصدق نفسى فى مجرد الحلم ويا ترى التوأم هيطلعوا ايه ولد وبنت ولا بنتين ولا ايه وقلت يا عبيطة حتى لو طلع بيبى واحد خير وبركة وبوسى ايدك واحمدى ربك ... الحمد لله على كل شىء
واستنيت اليوم التالى للعملية علشان يبلغونى بنتيجة التلقيح واتصل بيهم ما حدش يرد عليا وفى الأخر الممرضة ردت وقالت اللى هز الدنيا كلها من تحتى ... معلشى يا مدام مالقيوش بويضة عندك علشان يلقحوها ... واللى طلع عليا أمال بويضاتى راحت فين واللى شفته على السونار ده كان ايه واللى كان حجمها كبير وباخد منشطات علشانها كان ايه ؟ حسبى الله ونعم الوكيل وقالت تعالى قابلى مدير المستشفى وروحت علشان أفهم قالى بالحرف الواحد انت مش هتخلفى أبدا وبعد المركز بتاعنا ما بيطلعش نتائج فى أى حتة تانية يعنى حتى لو سافرتى لأمريكا وعملتى محاولات تانى برضه مش هتخلفى لو عملتى ايه ,,,وانصحك تنسى موضوع الأطفال بأه وارضى بقدرك ومشيت من عنده وأنا سايقة عربيتى مش شايفة من دموعى أى حاجة غير انوار فى وشى كأنها تلطمنى على وجهى ولسانى لاينطق غير لا حول ولا قوة الا بالله اللهم أجرنى فى مصيبتى واخلفنى خيرا منها ورجعت البيت جوزى هو كمان قالى وبمنتهى القسوة خلالالالالالالالالالالاص أنا وافقت نعمل الموضوع ده علشان خاطرك مرة وخلاص ما فيش محاولات تانى وارضى بأه بقدرك ونصيبك:cry: مش هقولكم ولا هقدر أوصف الأيام مرت عليا ازاى بعد كده ولا كلامى مع ربنا ..........وبرضه ما انقطعش الأمل منى وروحت لدكتور معرفة ابن خالى وقال انه عنده ضمير وكويس وقالى معلشى يا بنتى نعمل شوية تحاليل وبعدين أقرر ينفع تعملة محاولة حقن مجهرى تانية ولا لأ وعملت تانى تحاليل .. وكل اللى طلبه منى والمهم قالى هى نسبة التبويض ضعيفة شوية بس الحمد لله نقدر نبتدى من الشهر الجاى العلاج والمحاولة وطرت من الفرحة وروحت أكلم جوزى حلف ميت يمين لألألألألألألألألألألألألألألألألألألألألألألألأ ما فيش محاولات ولا عايز أطفال خلاص الموضوع انتهى وبرضه ما سمعتش كلامه وابتديت فى العلاج على أمل جوزى يغير رأيه لحد يوم العملية وبعد شهر اللى هو الشهر اللى فات اتحدد يوم العملية وجوزى رفض وأهلى كلهم حاولوا معاه ورفض وصليت استخارة وازداد رفضه ووصل الموضوع بينا لمشكلة كبيرة كانت هتنتهى بالطلاق ورضخت لأمر جوزى وسكت وأنا بتقطع خلاص ده كان أخر أما ليا زى ما قلت لنفسى لأنى دلوقتى خلاص تميت فى شهر مارس 41 سنى يعنى بقيت كبيرة مش هينفع اى فرصة تانية وتقوقعت داخل نفسى وعشت أرضى جوزى واهتم بنفسى علشانه وعلشان ارضى ربنا فيه بس بصراحة عندى أمل كبير فى الله لغاية ما أموت أنه هيرزقنى من عنده هو من غير دكاترة ولا غيره وربنا يستجيب لأحساسى ولكم ويرزقكم جميعا يارب - أسفة انى طولت عليكم

السلام عليكم يا بنات عاملين إيه معلش كنت مسافره و لسه راجعه من ساعتين بس مهدوده و قلت أدخل يمكن ألاقى واحده فيكم دخلت ولا حاجه بس الحمد لله نونا طمنتنى عليها عقبالك يا أيام لما تطمنينا عليكى بإذن الله

إزيك يا نونا وحشانى جدا و كنت كل ما بدخل مبلاقيكوش لا إنتى ولا أيام المهم طمنينى عليكى عامله إيه و إيه أخبارك و أخبار صحتك
نوجا أهلا بيكى معانا بصى يا ستى على فكره كلنا إتقرصنا من الدكاتره منهم لله بس الحمد لله محدش بيتعلم بالساهل بس ربنا يعينك على اللى مريتى بيه بس هقولك حاجه والله شفت ناس كتير و فى سن كبيره و من غير ما يحسوا بيحملوا توكلى على الله و شيلى الوضوع من دماغك و بإذن الله هتلاقى نفسك حامل من غير ما تحسى و ربنا معاكى إن شاء الله
شهيره فينك شكلك ولدتى ربنا يكرمك و يرزقك الذريه الصالحه يا رب اللهم أمين يا رب العالمين

فينكم يا بنات بقيتوا بتختفوا كتير جدا يا رب تكونوا بخير يا رب

يا جماعه معلش بجد مشكلة النت عندي لسه ماتحلتش
انا زهقانه اوي من غيركم
انتي فين يا ايام؟؟؟؟؟
كنتي مسافرة ليه يا رونا؟؟؟؟؟؟؟؟
اهلا بيكي يا نوجا معانا
وكلنا اتقرصنا من الدكاترة ومرينا بالافلام دي كلها
بس صدقيني انا لسه كنت بقرا في مجلة ان في هوجة ممثلات في هوليوود كلهم حوامل و هم فوق الاربعين
وشكلهم يجنن والحمل مصغر سنهم جدا و مخليهم زي العسل
سبحان الله يمكن ربنا يكرمك ان شاء الله من غير ماتحسي تلاقي نفسك حامل
مش بعيد على ربنا
مافيش بادينا غير الدعاء
و ربنا يكرمنا جميعا يارب

إزيك يا نونا عامله إيه وحشانى جدا جدا عامله إيه و إيه أخبارك و هتنزلى مصر إمتى إن شاء الله أنا كنت مسافره مع جوزى عشان يزور جدته و عمامه فى المنصوره و مش عاوزه أقولك كان مشوار متعب جدا و رجلى نفخت جدا جدا و و إمبارح النفخان ده قل شويه و قالولى ده عادى عشان كنت منزله رجلى طول السكه بس يا ستى و الحمد لله عدت على خير المهم إنتى عامله إيه طمنينى عليكى