مجلس امهات شهر مايو 2006 حياكم

المفروض اني اطلع الجامعه الحين و قاعده و لابسه بس ياترى ليش ماطلعتي يا مراوي للحين ؟؟؟؟




لان الباب مقفول عليي مو راضي يفتح وانتظر زوجي الحين يجي يفتح لي
صارت 5 الا ربع و المحاضرة الساعه 5 شكله بيطردني الدكتوره اليوم

هلا أم هديل حياج معانا في المجلس و إن شاء الله تستانسين...
مراوي ..جان طلعتي من فتحة الباب:dd:..أونها مسويه نفسها جدامنا ما تبا تفوت المحاضرة و هو داخلها تقول أتمنى أوصل و نص المحاضرة فايته:think:(لا تاخذين علي ترا أمزح)الله يوفقج يا رب وتخلصين مثل ما خلصنا وترتاحي و الله يعينج...

مـــــــراوي ياعمري تـــقـــفل عليج الباب؟؟ ليش؟؟ انشالله وصلتي في الوقت المناسب ومانطردتي؟؟:smile:
انتي حامل والمفروض في استثناءات للحوامل :clap: الله يعيج والله على هالتعب؟؟ باقي لج واايد حبيبتي وتخلصين؟؟
الا شخبار فصل الحوامل؟؟علمينا شصار فيه؟؟
..............................
نبض هلا وغلا شخبارج اليوم؟؟شلونج من التعب؟؟احسن انشالله
....................
دلولة هلا ياعمري
ايه والله جيت هلكانة يادوب طليت على المنتدى على السريع ودخلت نمت لي شوي وريّحت ظهري
والله انبسطت بالسوق وتمنيتج معاي والله،، اذا انتي مثلي بالسوق ونطلع سوا،، أزواجنا بينيمونا في بيوت أهالينا:dd:
على عمري ريلي الله يخليه لي متحملني أنا واايد أصرف،،على قولتج ماحد جايب الفقر لأزواجنا غيرنا:o
الغريبة إني كل مرة أطلع السوق أرجع أقول آخرة مرة خلاص شريت وااايد،،وبعدين أرد أرجع في كلامي..
................................
أم هديل شخبارج؟؟ من الحين الثقل؟ شفتي انج لازم تباشري تشتري الأغراض؟؟
قالوا لج بنتوتة؟؟ياعمري على البنات الله يجيبها بالسلامة،ياحلاة أغراض البنات يهبلون،،أن عن نفسي اذا أطلع اشتري لكتكوتي ،،أوقف على أغراض البنات وأطالع فيهم بصراحة يجنون
ســـــــــــــــلام

مرحبا .. رجعت لكم

الحين ارحب على راحتي بضيفتنا الجديده ام هديل ماكنت ابي ارحب ترحيب عالسريع مساع و ان شاء الله نشوفك دايما معانا :)

اقولكم شصار

زوجي وصل بالضبط 5 الا ربع و محاضرتي 5 و الدكتور مايحب احد يتأخر حتى مره تأخر واحد جان يقوله لاتدخل وانا كنت خايفه يصير فيني هالموقف ولو هو كلمني ولا قال لي شي اعرف روحي ما بسكت و بيحط لي العداوه و يمكن يرسبني

معليش سويتها قصه:) المهم ... اول مافتح لي زوجي الباب وانا طيران

طول الدرب و جرس السرعه يرن و صلت تقريبا 10 دقايق متأخره قلت الله يستر بس بدخل و اللي فيها فيها مو معقوله عقب ماطقيت هالمشوار مادخل

حمدلله الله رابط لسانه ماقال لي شي

يوم قربت تخلص المحاضره يعني 6 و ربع تذكرت ان اليوم كلاس الحوامل على الساعه 7

و مره ثانيه اروح المسجد ركضه اصلي و هاتك يا ركض عالمواقف و كانت الساعه 7 الا عشر

و اسوق مثل المجنونه لان قهر تركت محاضرتين ماحضرتهم عشان الكلاس و بعد اتاخر عن الكلاس او يفوتني جزء كبير منه!!!! فكان لازم اسرع و تقريبا وصلت 7 و ربع

للاسف الكلاس اليوم كان حق ازواج بس انا بسبب التاخير ماعندي وقت ارجع البيت و اطلع الكلاس مع زوجي

حسيت روحي مثل اليهال اللي اهلهم مايحضرون عرض مسرحيتهم شلون ينكسر خاطرهم << متأثرة بالافلام شوي

الحين مادري شلون بحضر الكلاس مره ثانيه لاني نسيت انه يوم الاربعاو انا يوم الاربعا عندي جامعه للساعه 9 !!!

مرحباااااااااااا يا امهات المستقبل شخباركم؟؟


واخيرا لقيت وحده تدري ان بتجيب بنت مثلي واخيرا يا ام هديل حصلتج اللي معانا تقريبا كلهم بييبون اولاد بأستثناء نبض اللي ماتبي تعرف شنو اللي في بطنها وانا اقولها انشالله بنت لأني حاسه انها بتجييب بنوته حلوة


ام جواد
يا حلو السوق ويا حلو اغراضه عليه بالعافيه جواد ريل بنتي خل يستانس بأغؤاضه

مراوي
شخبارج لا تسويين بروحج جذي مب زين لا تسوقين السياره وانتي مسرعه على الأقل فكري بالياهل وانتي جذي جذاك متأخره ما بتقدرين تجدمين الوقت اهم شي انتي والبيبي ومادام عندج جامعه يوم الاربعه حاولي تكلمين الدكتوره تقولج الأولويات بعد شتسوين الجامعه ما تقدرين تتركينها ولا الكلاس بس انا اقول محاضراتج اولى ولكلاس خلي الدكتورة تقولج الأشيه المهمه
وعساكم عالقوة

هلا بنات كيفيكم حبوبات؟؟
مـــــــــــراوي حرام عليج ليش السرعة؟؟تبهدلين حالج وتبهدلين البيبي معاج،،أهم شي إنج وصلتين وحضرتين بدون ماتحصلين لج تهزيئة
ذكرتيني بأيام الجامعة وكيف كنا نتهزأ من الدكتورة اذا تأخرنا ،،لا وقدام البنات وكل وحدة تقعد تطالع بالثانية والفشيلة على الآخر
...................................
دلولة شنسوي بعد كل هالكشخة عشان عروسته،،بعد مايصير هي تكشخ وهو لا
شخبارج انتي انشالله تمام

هلا ام جواد انا الحمدلله بخير يسرج الحال
متى بتبتدين تمشين؟؟

مــــــــــراحب حبيبتي
والله مادري دلول ،،سألت دكتورتي بموعدي الماضي ،،قالت لسّة بدري وانها بتقولي متى أمشي
الحين انا مواعيدي صارت كل اسبوعين عشان جذي الاسبوع الجاي مو هالسبت اللي عقب عندي موعد وبرد أسألها
انتي حبيبتي لاتمشي قبل ما تسألي يمكن مايناسبج تمشي الحين

تصدقين ماخطرت لي هالفكره اني اسأل دكتورتي
مادام قلتيلي بسألها انا موعدي 19/3
انا بعد كل اسبوعين

يله حبيبتي انا الحين بروح انام تصبحين على خير .. وانتي بعد روحي نامي علشان ما اتعبين ظهرج وايد لأن اليوم رحتي تسوقتي
فمان الله

هلا دلولة صباح الورد :flower:
اليوم بعد قعدت قبلكم،:clap:،الساعة الحين 10 ونص،،انا الحمدلله بخير وأسأل عنكم،،حبيبتي انتي مواعيدج بعدي بيوم ،أنا موعدي 18/3
على العموم أنا اليوم مابتواجد على النت الا آخر الليل يمكن،،لأن اليوم الخميس وانا بكون في بيت أهلي من الظهر،،ومابدخل النت من هناك،،عشان أوحشكم:shy:
على العموم انتظر آخر أخباركم
نبض ومراوي وأم هديل شلونكم عسولات انشالله تمام؟؟
نبض ياكسوووووولة،،بطيح فيج طيح هاليومين،من كم وانتي تقولي اني ما أقوم بدري،الدور عليج:smile:
يعطيكم العافية جميعا

صباح الخير يا الغاليات

تراني صاحيه من 10 و نص مثلك ام جواد بس توني ادخل الحين عبال ما تريقت و جهزت اغراضي بروح بيت ابوي و برجع لكم في الليل

ان شاء الله اليوم ناويه اروح اقضي لي جم شغله واهمها التوزيعات اللي شاغله بالي حتى طالعه لي بالحلم

على فكره .. حلمت اني ولدت بالسابع بس ولدي كان حجمه طبيعي و كل شي تمام حمد لله حتى اني ولدته في البيت

عاد يوم ولدته اقول شهالوهقه الحين الناس اذا درو اني ولدت بيزوروني وانا لحين ماجهزت التوزيعات ولا الديكورات اللي نويتها

جان اقوم اخش عن الناس اني ولدت و اللي درو اني ولدت قلت لهم لاتعلمون احد ان مراوي ولدت خلني اروح الحين بسرعه اشوف الفلبيني يثدر يجهز لي التوزيعات لليل

علمت زوجي بالحلم يقول بس هذا اللي شغال بالك التوزيعات و الديكورات و الفشخره قدام الناس :)

هذا بكري و ابي اسوي له كل شي :)

هههههه يا مراوي احلام مره وحده
هلا فيكم كلكم بدون استثناء والله انا قعدت مع الاذان لاني بالليل ما اقدر اناااااااام مدري ليش صار لي فتره اقعد اتقلب اتقلب ما اخلي آيه الا وأقراها عل وعسى تجيني النومه بس البيبي تعاند لمرافس يزيد وقت النوم ووقت الاكل والله انا امس رحت السوق شريت لي كم شغله لانكم حمستوني صراحه وهم اليوم لي طلعه وبكره بعد وانشاء الله اقدر اخلص اغلب الاغراض .. انا اللحين بطلع وراح التقيكم بالليل بأذن الله خبركم اليوم الخميس واليوم من الصبح الى الليل في بيت اهل زوجي بيت عمي يعني سي يو حبوبات واجوفكم على خير

السلام عليكم

شلونكم وشخباركم
اشفيكم كلكم طلعتوا وخليتوني مالي الا اسوي مثلكم واروح بيت اهلي

مراوي
تره الاحلام زايده هالايام حتى انا كله احلم بأرنوبتي وجني ارضعها ومن اقوم من النوم ابي اشوفها واقول جان زين انا والده ومفتكه لأني لين اولد في الحلم ولادتي سهله ومايعورني شي الا يعين الصج .. انا اليوم بعد باروح اكمل اشغال التوزيعات وما يصير الا الخير

ام جواد
هلا والله لا تطولين بيت اهلج نبي نسولف>> حسوده انا هههههه


ام هديل
شخبارج انشالله بخير
زين سوويتي علشان تفتكين وماتحاتين ان ناقصج شي في التاسع وطمنينا عليج

نبض
مو جنج مصختيها وينج مالج طاري يله عاد اخرلج مره وايد تأخرتي علينا والأعذار غير مقبولة

بنات هالموضوع من الأخت أرجوحة الزمان حبيت انقله لكم وراح يفيدنا

أحب انقل لكم الادعية وبعض من القرآن علشان كلنا تكون ولادتنا سهلة بأدن رب العالمين .

1_آية الكرسى .

2_ و قولة تعالى إِنَّ رَبَّكُمُ اللّهُ الَّذِي خَلَقَ السَّمَاوَاتِ وَالأَرْضَ فِي سِتَّةِ أَيَّامٍ ثُمَّ اسْتَوَى عَلَى الْعَرْشِ يُغْشِي اللَّيْلَ النَّهَارَ يَطْلُبُهُ حَثِيثاً وَالشَّمْسَ وَالْقَمَرَ وَالنُّجُومَ مُسَخَّرَاتٍ بِأَمْرِهِ أَلاَ لَهُ الْخَلْقُ وَالأَمْرُ تَبَارَكَ اللّهُ رَبُّ الْعَالَمِينَ {54} ( سورة الأعراف ( 54 ) .

3_المعوذتين .

أدعية لتسهيل الولادة ..
( يا خالق النفس من النفس يا مخلص النفس من النفس يا مخرج النفس من النفس خلصني)

- لاا له إلا الله الحليم الكريم سبحان الله رب العرش العظيم والحمد لله رب العالمين

- (كأنهم يوم يرونها لم يلبثوا إلا عشية أو ضحاها ) و(كأنهم يوم يرون ما يوعدون لم يلبثوا إلا ساعة من نهار بلاغ فهل يهلك إلا القوم الفاسقون)

- سورة الفاتحة سبع مرات وآية الكرسي وسور الإخلاص والفلق والناس كل منها ثلاث مرات وسورة الزلزلة

- قول "بسم الله (3 مرات)..أعوذ بعزة الله وقدرته من شر ما أجد وأحاذر (7 مرات )ًعلى موطن الألم "

- (ياحي يا قيوم برحمتك استغيث) ثلاثا

- (حسبي الله لا اله إلا هو عليه توكلت وهو رب العرش العظيم) الايه سبع مرات

)اللهم لا سهل إلا ما جعلته سهلا، وأنت تجعل الحزن إذا شئت سهلا )

- دعاء الكرب : ( لا إله إلا الله العظيم الحليم , لا إله إلا الله رب العرش العظيم , لا إله إلا الله رب السماوات ورب الأرض ورب العرش العظيم ).

**إذا تعسرت ولادة المرأة فتقرأ هذه الآيات في ماء ثم تشربه المرأة وتمسح منه على بطنها فإنها تضع بسهولة – بإذن الله – وقد جُرب ذلك فنفع الله بها :

1- الآية الأولى : ( اللهُ يعلمُ ما تحملُ كُل أُنثى وما تغيضُ الأرحامُ وما تزدادُ وكُلُّ شيءٍ عندهُ بِمقدارٍ )
2- ) والله خلقكم من تراب ثم من نطفة ثم جعلكم أزواجاً وما تحملُ من أنثى ولا تضع إلا بعلمه وما يعمر من معمرٍ ولا ينقصُ من عُمُره إلا في كِتابٍ إن ذلك على الله يسير )

3) والله أخرجكم من بطون أُمهاتكم لا تعلمون شيئاً وجعل لكُمُ السمع والأبصار والأفئدة لعلكم تشكرون )
4- سورة الزلزلة .

أتمنى من الجميع أن على الأقل كل يوم يقرأ الأدعية والآيات علشان تسهل لنا ولادتنا

هلا حواااااااااااااااااااامل اسمحولي اليوم ما دخلت و لا البارحة عشان نهاية الأسبوع أكون مشغوله وااايد لأن زوجي يرجع من الدوااام فأستغل الوقت :shy:و اليوم قايمة من الصبح بس ما دخلت عشان أولا كان عندي مثل الشد في الجهة اليمنى من بطني و ما قادرة وثانيا عمتي-أم زوجي طابخة الغدا ع الخشب-الضو-في المزرعة ورحنا نتغدا ورجعنا العصر ورجعت طلعت أشتري أغراض لي و بعدين رجعت البيت وعقب طلعت و توا على أذان العشاء رجعت خلاص منهد حيلي بس بريح و برجع أطلع وبروح بيت أهلي و عقب بروح أمشي و عقب بروح بيت خالتي أسلم عليهم و في نهاية المطاف برجع البيت هلكانه و بنااااااااااااااااااااااااااااااام و ما اعتقد أدخل إن شاء الله باجر بدخل بس بعد ما اعتقد أدخل إلا ع الليل يوم زوجي بروح الشغل:sad::cry::sad::cry:...

رحت جم محل حق التوزيعات ابي اشتري التحف اللي تتزين ماحصلت شي يسوى

كله سيراميك اللي على اشكال اليهال و هذي صارت موضه قديمه او المراضع الزجاجيه و هذي بعد بكل محل موجوده

ابي شي جديد بحيث لو تزين بعدين يطلع شي حلو شي كشخه

ورحت بشتري دلال شاي و قهوه بعد ماحصلت شكل يعجبني

ولا حتى الفناجين و استكانات الشاي

يعني بالعربي هاللفه اللي لفيتها ما استفدت منها شي

و اذا بظل على هالحال مابسوي شي ولا بخلص شي بالمره

هلا مراوي
انشالله بتحصلين بس يبيلج شوية تعب وتلفين جم محل لا تأيسيين ومثل ماقلتي هالاشيه موجوده في كل محل واذا انتي في شي في بالج اكيد راح يسوونه لج

هلا بنات أنا جـــــــيــــــــت...شخباركم وحشتوني؟؟
اشوف كلنا اليوم في بيت أهالينا...ياعمري دلول قعدتي لحالج.. شسوي عن نفسي أنا يوم الخميس مو لي،،اسبوع في بيت هلي وأسبوع في بيت عمي
شخبارج مع التجهيزات باقي لج واااايد؟؟

مـــــــــراوي ياهلا...ياقلبي عليج وعلى أحلامج ،،انا بعد أحلامي هالفترة دايما على البيبي،،وكل مرة أحلم فيه شكل غير،،، مرة أني أولد،،ومرة إني ولدت وافتكيت ومرة اولد بالخامس أحلام خربوطة
من كثر ما تفكيرنا كله في البيبي صايرة أحلامنا دايما عليه،،بس والله احلامج funny عيل تخشين عن الناس ولادتش عشان التوزيعات هههههههههههههه صج رايحة فيها..
حبيبتي أنا فكرت أخلي محل الحلويات اهو اللي يسوي التوزيعات،،لانها بالمحلات العادية بتكون مثل ماقلتي تقليدية وقديمة،،أنا في بالي محلات باتشي وشوكولاين وكادي وبيتيل حق الحلويات بشوف اش عندهم ،،انا مابي شي زحمة ،،ابي شي حلو وأنيق في الوقت نفسه،،العبارات والله مادري شلون الي فكرتهم
طقم الشاي أنا كنت شارية طقم جديد هالفترة وكامل راح استخدمه لبيت هلي،،،والله اني مليت من اللف والدوران زهقت وأبي أخلص

نبض وأم هديل شخباركم؟؟لكم وحشة عسولات

صباح الخير

تدرون اني البارحه بعد حلمت بسالفه التوزيعات .. علمت زوجي وهو طالع الحين يقولي انتي بتستخفين مخك بيصير له شي

انا الحين بطلع تذكرت محل بيانكا دلوله اكيد تعرفينه .. بروح اشوف شنو في عنده و بوريه صور حق بالونات ابيه يسويهم لي

اشوفكم بالليل لاني بروح بيت ابوي بعدها :)

صباح الورد حـــــــــوامل
تدرون إني قاعدة م الساعة 7ونص بس مادخلت النت،،والله بيصير فيني شي من قلة النوم،،لا وكتكوتي عنده مباراة كرة قدم داخل بطني،،،الرفس قايم على الآخر
مــــــــراوي يانتي ياهالتوزيعات ،،أنا عاد أحلامي مختلفة عنك شوي،أنا رديت حلمت إني ولدت البارحة وماشاء الله الولادات في الأحلام سهلة ومافيها تعب
أنا هاليومين تفكيري صاير مع غرفة المستشفى،،قاعد أقارن بين الغرف والأجنحة،، في عندي جناح خاص وجناح ملكي،،الفرق بينهم بسيط مررررة ومترددة آخذ أي واحد،،بس الظاهر راح آخذ الملكي علشان أكشخ>>>> ريلي يقول حشى مو ولادة هاذي
.................................................
دلولة ياكسلانة قومي اقعدي من النوم ،، تسوين حالج أول وحدة تقعد في الأيام العادية هـــا؟

بنات صار لي فترة جذي من 3 أيام وأنا أحس بحرقة عند حلقي ،،قالوا لي خواتي اشربي حليب بارد أو كلي خيار،،ويقولون السبب ان البيبي يضغط على المعدة لأن حجمه كبر فحامض المعدة يركب للمرئ ويسبب هالحرقة،،انا ما اشرب حليب وهذاني على الخيار خيارة رايحة وخيارة جاية
عندكم فكرة ايش مكمن يخفف هالوضع بعد؟؟