مجلس امهات شهر مايو 2006 حياكم

صباح الخير

شخباركم

مراوي انا الثانيه بس بعد في وحده مو متذكره اسمها معاي في نفس اليوم موعد ولادتها .. الظاهر عدوى الذاكره انتقل لنا كلنا

ام جواد جفتيه واهو يتحرك لحظات حلوة تتمنين انج شايله بيدج في هالوقت يله لا نستعيل مابقى شي وبنشوفهم

نبض
شخبارج انتي الاولى وفي احتمال اكون معاج يعني لا تحاتين وبالنسبه للنوم انا قعدت عالساعه 5 ونص الفجر صليت وييت بيت اهلي بس ماكان لي خلق ادش النت ونمت لي شوي والحين قعدت وبالنسبه لام جواد كسلانه ما تقعد من وقت ومراوي مسكينه بالدوام وما ادري عن ام راشد
كلنا تمللنا ونحس بثقل وانا عن نفسي ابي اولد خلاص تمللت خاطري ارجع ايام النوم عالبطن

شدعوة بنات سويتوا حالكم انتو المجدّات النشيطات ... وانا الكسولة؟؟ طيب اراويكم؟؟
من بكرة بقعد من الساعة 7 (( ماصارت ولا بتصير)):bigsmile:
أنا بالعادة ما أصحى الا على 10 أو 11 ،،شسوي والله منحرمة من النوم العدل،،أتقلب يمين ويسار وأقوم للحمام ألف مرة،،،أي نوم هذا
ودي أنام مثل أول عشان جذي تلاقيني قاعدة بس أكابر ما أقوم أقول يمكن أنام لي شوي...
أنا بعد مثلك دلولة ودي أولد وترجع حياتي مثل قبل،،بس وين؟؟ اذ جى البيبي بتنعفس نومتنا أكثر
وبعدين بتلاقينا كلنا في وقت وواااااحد في المنتدى واحنا نتشكى!!!! من قلة النوم ومن السهر
..................
انا انشالله في نفس اليوم اللي أولد فيه بخلي بنت عمي لأنها مثل أختي اربع وعشرين ساعة على النت،،،تخبركم عن ولادتي لأني ماعرف شلون بيكون الوضع عندي ببيت هلي.يلاّ كل وحدة تقول شلون بتخبرنا؟؟
بس أهم شي إن علاقتنا تظل لبعد مرحلة الولادة،،أنا عن نفسي مستانسة مرة معاكم،،وانتو مجموعة عسل
أنا قبل ماكنت أدخل منتديات وهذا أول منتدى وأحس أني مرتاحة فيه على الآخر،،حتى لو تلاحظون تسجيلي مرة متأخر بس مع هذا تعوّدت عليكم
.....................
مـــــــــــــراوي اليوم موعدك ....طمنينا عنك وعن البيبي
.........................
نبض الله يعينك والله بس ماعليه هانت
أم راشد ما أشوفها تدخل واااايد بس مع هذا سلام لأم راشد

هلا ام جواد صح النوم حبيبتي
اي والله مثل ماقلتي عقب الولاده ما بنحصل نوم وانا اموت على شي اسمه نوم بس شاسوي هالايام اقوم من وقت لأن الله يعزكم وايد اروح الحمام مثل مثلج يا ام جواد
وانشالله بنتم مع بعض لي عقب الولاده احنا خوات الحين وانا بعد وايد مرتاحتلكم

بالنسبه لي اول ما اولد بتم جم يوم وبعدين بروحي بخبركم لأن عندي نت في بيت اهلي يعني بسرق دقيقتين علشان اخبركم فيها شاسوي ما اقدر استغنى عنكم

هلا حبيبتي صح الله بدنج
تسلمين دلولة ولا احنا لنا غناة عن بعض
والله مثل الخوات وأكثر...والله يسهّلها علينا كلنا

قوه يا بنات

بسألكم حصلتوا كلمات لكروت التوزيعات انا عجزت وانا ادور وكله قديميين ابي شي يديد مادري جان عندكم علشان نستفيد

دلولة
أنا من فترة سالت بنات برا هالمجلس وماحد أفادني بشي
أنا بعد أبي أحد يساعدني اذا لقيتي أحد ممكن يفيدنا خبريني

انشالله بشوف ومايصير خاطرج الا طيب

مرحبا بنات

انا ادخل اقرا .. بس مستويه قليل اشارك ..
انا موعد ولادتي مثلج ام جواد ان شاء الله .. لو اني اتمناها اتطول لين اول 6 عشان اقدر امتحن فاينل
كان عندي موعد الاسبوع الماضي وقالولي الراس فوق .. ياخوفي ايتم جيه
بنات لين الحين كم زاد وزنكم ؟؟

انا عني تقريبا 4 وشويه

هلا وغلا عالي مستواها
شلونج حبيبتي؟؟اوالله أنا عن نفسي أول مرة التقي فيج وحياج الله يالغالية
انشالله تمشي الأمور زي ماتتمنين،،أنا موعدي كان من يومين وقالت لي الدكتورة إن الراس نازل لتحت،،وتقول حتى لو مانزل عند البعض ممكن بنص الثامن أو في نهايته فلاتخافين ولاتحاتين انشالله بينزل هالفترة
ياعمري عليج تدرسين؟؟والله تعب الله يعينكم انتي ومراوي ومادري منو بعد في هالمجلس يدرس..
ماشاء الله عليج ليش بس 4 كيلو مررررة قليل ليش انتي ماتآكلين؟؟الزيادة الطبيعية فترة الحمل من 12 الى 15
انا زدت من بداية الحمل للآن 7 كيلو والحمدلله ماتغيرت وااااايد
...............................................
مــــــــــــراوي وينج حبيبتي مابينتي اليوم عسى ماشر
اهم شي تكونين بخير طمنينا عليج

شلونكم جميعا

اليوم رحت الموعد كل شي تمام حمد لله بس يبيلي اشرب ماي وايد عشان البيبي يقدر ينقلب للحين راسه فوق

وقالت لي حطي موسيقى كلاسك على رجلك عشان البيبي يسمع و ينقلب ناحيه الصوت

كتبت اسئلتي على التلفون لاني طول الدرب اتذكر شغله و انسى الثانيه قلت اضمن شي اكتبها في التلفون

سؤالي الاول عن الرباعي قالت لي تقدرين تسوينه و خذيت موعد اسبوع الياي :)

سؤالي الثاني عن فصل التدريبي حق الولاده و قالت لي يوم الاربعاء و هو مجانا و طبعا راح احضر لانها قالت انها بتذكر معلومات مفيده جدا بهالحصه

سؤالي الرابع عن الولاده عندهم فخذوني جوله وروني الغرف و غرفه الولاده .. بصراحه غرفه تشتهين تولدين فيها :) فيها مثل الجاكوزي يخفف الالم و طبعا سعرهم شامل هالعلاج

بعد ابي اقول شي بس نسيت !!!

هلا اختي عالي مستواها شخبارج عساج بخير ولا تحاتين الراس بينزل انشالله


ام جواد شخبارج ليلحين ما نمتي ؟؟


مراوي
شلونج عساج بخير والحمد لله ان كل شي تمام .. اكيد الكل يتكلم عن التخصصي وايد يرتاحون فيه ولا تخلين عليج بالحصص الي يوم الاربعاء علشان تستفيدين

هلا بنات
للحين مانمت دلولة.....شفتي إني لي حق أتأخر بالنوم الصباح...الله والنوم اللي أحصله يادوب كم ساعة بس.راحت ايام العز
مـــــــــراوي الحمدلله طنتنا عليج وهالله هالله بالدروس خبرينا عن تفاصيلها بالحرف الواحد،،حتى نستفيد خبرج كلنا مبتدئات مانعرف شي>>>الأخت تتمسكن
بنات انا اليوم حاسة بتعب ألم على خفيف في صدري وألم أسفل البطن مثل التقلصات تروح وتجي ،،هاذي حسيتها من أمس
انا الحين باقوم تعبت من الكمبيوتر تصبحون على خير
التقي معاكم بكرة عــــــــســــــولات

صباحكم عسل

هلا والله يا ام جواد ايييييييي مثل ماقلتي راحت ايام العز والنوم لي متأخر صدقيني احس فيج لأني مثلج ما احصل نوم كفايه شاسوي

ولا تحاتيين اعتقد هذي غازات لأني من يومين حسيت بألم في صدري ويمتد لي ظهري والله الم فضيع مو كأنه غازات بس بالفعل طلع غازات عليج بماء الورد وايد زين للغازات وانشالله بتحسين بالفرق .. وطمنينا عليج



نبض صباحج ورد قومي بسج رقاد وينهي اللي تقوم اول وحده ومن الصبح اليوم غلبتج وقمت قبلج


مراوي شخبارج انتي الواحد ما يعاتبج لأنج مشغوووله واعرف انج قاعده الحين وميته تبين تنامين فشتسوين غصبا عليج ... يعطيج الف عافية


ام راشد .. وينها لا حس ولا خبر طمنينا عليج


عالي مستواها شخبارج عساج بخير .. لا تقاطعينا

دلوله ..يسعد صباحج-أقصد مسائج.
أنا صراحة نايمة من وقت بس عشاني أعرف إن طول الليل بتناوب ع الحمام-تكرمون-و صايرة كسلانه واايد..
و بالنسبة للألم أسفل البطن مستويلي هاليومين حتى مثل الكهربه أحسها أقصد تقلص مفاجئ..
تدرون تولهت ع النوم ع البطن عشاني من عرفت إني حامل ولي 5 أسابيع صرت أنا ع جنبي أو ع ظهري..

أنا بعد أدور عبارات تهنئة...

هلا وغلا بنات شخباركم وشخبار كتاكيتكم؟؟
دلولة ماشاء الله عليج نشيطة اليوم جان قعدتينا معاج..شخبارج ؟
انا اليوم دخلت متأخرة لأني أعيش معاناة مع النوم...ودي أنام نـــــــــــوم مـــتــــــواصـــل بس ليلة
الله يعين
..................
نبض شلونج؟؟
انا أمس بس اقول لدلولة عن التقلصات وأنا قرأت إنها شي طبيعي وان هاذي التقلصات تهيئ الوحدة لألم الولادة اللي بتحس فيه بعدين
الله يعينا كلنا ويعينج ولو عالنوم كلنا انحرمنا منه يالغالية
...............
نبض شلونج عيوني؟؟انشالله بخير والله ناقصتنا هالصباح وكل صباح
...............
باقي البنات اللي مايدخلون الا قليل ومايطمونا عليهم وعلى اخبارهم بنحوّلكم على مــــــراوي وهي عاد تتكفل فيكم ؟؟!!؟؟
عاد اللي بتعطيها انذار وكرت اصفر،،،واللي نصيبها الأحمر ،،مايندرى انتو وحظكم

أم جواد..
الحمد لله زينه و يسرج الحال..
أم جواد هذا أول حمل لج؟؟

هلا نبض الحمدلله إنج بخير
أنا حملت قبل هالحمل بفترة بسيطة بس أجهضت وأنا في نهاية الثالث وبعدها الله رزقني وحملت
والحمدلله هذا الحمل ماصادفتني متاعب والله يتمم لي ولكم على خير
وانتي ياعيوني هذا حملج الأول؟؟

مرحبا بنات شخباركم

ماشوف تفاعل اشفيكم عسى ما شر؟؟

الله يسهل عليكم...

ويقومكم بالسلامه..

أم جواد..
هذا أول حمل لي بس صراحة صادفتني مشاكل واايده معاه-فقر دم,حبوب طلعت لي ع طرف الوجه،اسمرار،حكة،.................
الله يعين..

هلا دلوله صح مافي تفاعل،والتفاعل ما يطلع إلا آخر الليل و أنا أكون طبعا راجعة من المشي و تعبانه حيل و أدخل الغرفة بي عشان أرفع رجلي فوق و أنام ع ظهري..و أتريا بس توصل الساعة 12 أو 1 عشان أنام في سابع نومه(وطبعا الليل ما يخلى من القومه عشان الحمام-تكرمون-)