مجلس امهات شهر مايو 2006 حياكم

اسمحيلي يا ام جواد ما انتبهت حق سؤالك عن التوزيعات ترى صج احس الحمل مأثر على ذاكرتي شوي

المهم بالنسبه للتوزيعات وايد اماكن يسوون شغلات حلوه و بتستخفين لو بتلفين كل الاماكن بس انا متعوده اسوي كل شي عند حديقه الازهار بالقضيبيه يراعيني بالاسعار و هم ان شغله حلو و مبدع

في عندك بايانكا في السلمانيه هذا بعد شغله مرتب و حلو و ناويه اسوي عنده البالونات عند مدخل غرفه المستشفى

قبل لا انسى سؤالك الثاني :) انا مدرسه الصبح و ادرس بالجامعه العصر و المفروض بدا الدوام الاسبوع اللي طاف بس مارحت لاني لازم اطلع الساعه 4 حق الجامعه وانا يدوب الساعه 2 ادخل البيت يعني مايمديني ارتاح و اذا نمت ماقدر اقوم
الله يعدي هالكورس علينا بسرعه ومانحس فيه الا خلص

هلا عيوني مــــراوي
ماعليه تعبتك معاي وأسألتي وااايد وماتخلص،،بس تحمليني لأني أحب أكوّن خلفية عن الناس اللي أسولف معاهم بشكل شبه يومي
الله يعينك خوخة ((هذا تدليعي حق خواتي بالبيت)) والله تكسرين بخاطري أحسج تتعبين مع الدوامات بالصبح وبالعصر ،،والحامل يبي لها راحة .الله يعدي هالكورس على خير وترتاحين
على طاري الذاكرة،،أنا زين مانسيت اسمي من حملت والحمدلله اني ما أدرس ولا كان نسيت كل مذاكراتي للإختبار،،صاير عندي نسيان فظيع بس تعرفين يقولون ان هذا شي طبيعي نتيجة لتفكير الأم العميق بالطفل،، بحيث يشغل مساحة كبيرة من عقلها
على العموم مشكورة عيوني على المساعدة ،،السلمانية ادلها بس القضيبية قاعدة وين بأي منطقة؟؟

السلام عليكم شلونكم وشخباركم

ام جواد القضيبية في منطقة المنامه

تعالوا بسألكم صايره عندي غازات ذابحتني كلش مو طبيعيه تألمني والله مو عارفه من شنو انا قبل ماكان فيني غازات بس الحين مادري يمكن من البيبي مادري اذا عندكم فكرة

هلا دلولة
الغازات يمكن تكون من نوعيه الأكل اللي تآكلينه....
لاتكثرين من المكسرات ولا الاشياء الحارّة ومادري اذا البنات عندهم اي فكرة
وماعليج شر حبيبتي

مثل ماقالت دلوله القضيبيه بمحافظه المنامه

شلون توصلين للمحل بحاول اوصف لك لانه داخل المنطقه صعب عليكم اذا جياتكم للبحرين قليله انكم تدلونه

اسالي زوجك يعرف جامع القضيبيه اللي يصير بره شارع المعارض اهو عند راس دوار

او اساليه قط مره مر عند مركز شرطه القضيبيه؟

الوصف بيكون اسهل لو اهو يعرف هالمكانين

لو مايعرفهم شوفيه يعرف فندق الخليج بيكون الوصف ابعد بس ان شاء الله يوصلكم للمحل :)

=====================

دلوله بالنسبه للغازات اعتقد انها بالمرحله اللي احنا فيها يمكن طبيعيه لاني انا بعد من فتره لفتره تصيدني واعتقد انه بسبب الحليب
لان الحليب يسبب غازات

هلا مـــــراوي
احنا ياعيوني روحاتنا للبحرين وااااااايد و24 ساعة عندكم بس خفيّت شوي فترة الحمل. وانشالله ماراح نضّيع المكان وتسلمين ياقلبي ماقصرتين
...................................
دلولة حبيبتي شخبارج اليوم؟؟؟انشالله احسن والغازات خفّت عليج.؟

هلا والله
انا الحمد لله بخير انتوا شخباركم

الغازات الظاهر انها من الفلفل لأني وايد اكل فلفل واخر مره كثرت منه وماقدرت انام بالليل بس الحين الحمد لله وايد احسن ولا باكل فلفل بعد



وينهي نبض الأمارات مختفيه هاليومين

حياكم الله ام جواد :)

نبض الامارات

و ام خلفان

و ام راشد

كلهم مانشوف لهم بيان عسى المانع خير !!

السلام عليكم و رحمة الله وبركاته..
أنا موجودة بس يوم أدخل ما ألقى غير أم جواد-شكله انا وياها إللي ما نشتغل قاعدين في البيت..

انشالله نشوفهم جريب


انتي شخبارج وشخبار هاني معاج انشالله مو متعبج

هلا دلوله بس حبيت أقول لج لا تاكلين فلفل واااااايد عشان ما تصير حقج التهابات لأن في ناااااااس تصير لهم الالتهابات عقب الولادة-أنا كنت أكل صراحة ما أقاوم الأكل الحار بس يوم شفت بعيني مرت أخوي تعبانه عقب الولادة من الالتهاب قللت منه-صراحة كانت مدمنة أكل حار و حتى أختي حذرتني من الأكل الحار..
الله يعينا

هلا نبض شخبارج وشمسويه ويييييي انا بعد قاعده في البيت بس ما ادخل النت وايد

انشالله بس خلاص ماراح اكل اللي شفته ذاك اليوم مو شويه

الحمدلله يسرج الحال..انتي اشحالج؟عساج طيبة؟؟شخبار الحمل معاج؟
أنا بعد ما أدخل النت واايد بس الضحى أدخل و بالليل شوي و أطلع بس اليوم طولت عشان قاعدة أدور لأخوي معلومات يبا يسوي مجلة حائط-بيدخل مسابقة

انا الحمد لله بخير طاب حالج والحمل ماشي الحمد لله يله يا نبض مابقى شي ونشوف البيبي

السلام عليكم ورحمه الله ... كنت وياكم زمان .. وجان اقطع وما ادري شوه السبب

يمكن هالدوام والجامعة .. الله يعدي هالكورس على خير

بنات شوه انا لين الحين ما بين بطني انتوا شراتي والا .. ؟؟

و الله خلاص مستعيله أبا أشوف الياهل...
هذا أول حمل حقج؟؟شو قالوا لج بنت وإلا ولد؟؟وإلا مخلتنها مفاجأة مثلي!!!!!!
الل يقومنا بالسلامة و يكون الياهل بصحة و خير

هلا اختي عالي مستواا حياج الله مره ثانية وانشالله ما تقطعينا هالمره والله يعينج على الدراسه ويعدي هالكورس على خير

انا مثلج اللي يشوفني مايقول اني بالشهر السابع بطني كلش صغنون يمكن لأن البكر دايما جذي

اي والله يا نبض وانا بعد

اي نعم هذي اول حمل لي وقالولي بنوته مستعيله ابي اشوفها
والله يقومنا بالسلامه

هلا بك سهر الليالي و لاتقاطعينا ترى حتى انا عندي جامعه العصر و دوام الصبح :)

بعدين يعني بطنكم بالمره ماطلعت؟ مايصير !!

يطلع البطن و يبين من ورا العبايه مو مثل لما كنت بالرابع و الخامس ماكان مبين من ورا العبايه