مجلس امهات شهر مايو 2006 حياكم

دلولة مسا الخير،،ولا تعالي أي مسا
صباح الخير،،شخبارج عيوني؟؟
دلولة الحقيني وشيري علي خلاص ماني قادرة أتحمل التعب،،المرض بيذبحني..مو عارفة شسوي؟؟
كلمت الدكتورة ووصفت لي دوا للكحة والزكام،،المشكلة عندي مو في الزكام ،المشكلة في الكحة اللي خلاص حاسة أنها بتقضي علي
أول مرررة بحياتي تجيني كحة هاللون،،صدري شوي وينفجر، وخايفة من كثر تعبي على البيبي ومن ثقل الكحة والزكام أحس بالضغط على بطني وهذا الشي مسبب لي ألم أسفل بطني على خفيف،حتى ولدي على عمري صاير راكد اليوم وحركته أخف
المصيبة أني ماودي أستخدم أدوية
انهلكت والله شسوي؟؟ودي أي أحد يسمعني ويشير علي

ام جواد في اعشاب طبيعيه حق الكحه اعتقد اسمه ورد لسان الثور تلقينه عند الحواج او العطار

احسن لك من الادويه والله ينخاف منها

هلا وغلا مــــراوي
على قولة ريلي أنتي ماتشربين النعناع،،بتآخذين ورد لسان الثور!!!!!!!
وأنا بعد إن جيتي للحق نحيسة الشي اللي ما أحبه لو مهما حاولت وأجبرت حالي ما أقدر أتقبله عشان جذي أكلي زي الزفت
ومصيبتي أني ماودي أستخدم أي دوا حتى لو بوصفة الدكتورة لأني من كل قلبي أخاف على الياهل
مشكورة ياعيوني وماقصرتين

أمهات مايو السلام عليكم و رحمة الله و بركاته..
أنا زعلاااااااااااااااااااااانه وااااااااااااااااااااااااااايد:mad2::mad2: منكم اختفيت مدة أكثر من أسبوع و محد فكر يسأل و يقول المسكينه نبض الإمارات وينها شو صار لها؟؟؟؟؟ليش ما عادت تدخل..
مشكوووورررررين و ما قصرتوا خوااااااااااااااااتي:sad:

هلا نبض
شخبارج انشالله بخير
أنا بصراحة ماصار لي فترة من دخلت هالمنتدى،،وبصراحة من لما دخلت ما التقيت معاج ابد عشان جذي ماعرفتج عدل
بالعادة لما أدخل الاقي مراوي أو دلولة
على العموم انتي لاتزعلين وحيّاش الله والبنات أكيد يتذكرونج بالخير

مشكورة اختي أم جواد ع الكلمات إللي ترفع المعنويات..
و بعدني ما بقووول سبب اختفائي لحد ما يتذكروني كلهم و يقولوا لي الحمد لله ع السلامه(لا تخاااافوا ما ولدت)

شـــدعوة ياعيوني تتغلين علينا وعليهم
والحمدلله على سلامتج يالغالية
خلاص قولي لي ومابقول لهم!!!!!!!! هههههههههههههههههههه
قـــوية ها؟؟كأنهم مابيشوفون كلامج
والله بتشوفينهم شلون ملهوفين عليج اذا دخلوا بعدين وشافوا كلامج
أهم شي إنش بخير وبصحة وكتكوتنا الصغير مافيه شي

انقذوني
انا يومين و بدخل السابع و قالت لي الدكتوره باخر مراجعه انه ولد

و هالفتره جسمي صاير واااااااااااااااااااايد اسمر ماادري من شو

منطقة الابط و خلف الفخذ و الايد و الرجل

ما ادري من شو ؟؟

يا ريت حد يفيدني شو السبب و شو اسوي علشان يخف

حبيبتي أنا ماعندي هذيك الخبرة لأن هذا أول حمل لي
بس أنا سمعت أن بعض الحوامل يسمرون كثير في فترة الحمل بس بعد الولادة بفترة ترجع الأمور مثل ماكانت
انتي مو تخافين هذا شي طبيعي انشالله مو مرض حتى تخوفين حالج كل هالخوف،،أنا في ناس من أهلي صار لهم نفس الشي والحمدلله بعد ماولدوا كل شي رجع مثل أول،،هذا كله تغير هرمونات الجسم،،ومن حامل لحامل تختلف الأعراض
انشالله ماعليج شر

السلام عليكم ورحمة الله وبركاته
شكراً لك اخي الكريم على هذا المقال
هذا حملي الثاني و موعد ولادتي 25/5/2006 وانشاءالله ولله الحمد ان فيني بنت وانا عندي ولد وعيد ميلادة 25/4/2006 يعني بينهم سنة وشهر فبغيت اعرف هل في غيرة بهالسن ولا لأ ؟

نبض الامارات سامحينا بس والله كنت افكر ان قطعتو الملف او مليتو ماطرى في بالي ان تكوني تعبانه :(

حتى ام راشد و ام خلفان بعد ماشوفهم و نفس الشي افكر انهم مشغولين عن النت

عسى ما شر الغاليه ان شاء الله احسن الحين

=============================

هلا بك اخت مويا و حسب موعد ولادتك فأنتي بعدي ب 4 ايام و سابقه ام جواد ب يوم واحد

اذا وصلنا شهر 5 بيحمى السباق بينا يا حوامل كل وحده تبي تولد قبل و تبشر الباقي عدل؟ :)

السلام عليكم

ام جواد

شلونج وشخبارج الحين عساج بخير وانشالله خفت الكحة شوفي عليج بالحليب الدافي وحطي فيه عسل وايد زين انا من فترة صادتني كحه ومافادني الا الحليب والعسل صج يريحج خصوصا لين بتنامين احسن من الادوية وحطي على روحج حتى لو ما تحبينه علشان البيبي وانشالله بتصيرين احسن وطمنينا عليج



نبض الامارات

سامحيني ياالغالية بس والله هالجم يوم مشغولة حتى ما ادخل النت الا بالليل طمنيني عنج شخبارج وشنو سبب غيابج ترى احنا مالنا الا بعض ومافي زعل بيننا <<<كل ذي علشان اعرف السالفه:think:(r):yes::bigsmile:



مراوي

شخبارج وشخبار التعب معاج انشالله احسن... انا باجر نتيجة السكر انشالله مافيني لاني اموت بالكاكاو وما اقدر استغني عنه



سحايب دبي

هالشي عادي لا تحاتين يروح بعد الولادة وانا رقبتي صايره سمره وايد كريهه بس نتحمل شنسوي فات الكثير ومابقى الا القليل

هلا دلولة شخبارج ياقلبي؟؟انشالله بخير
أنا والله ممكن يكون حالي الحين أحسن من البارحة واليوم الصبح فعلا حسيت إن روحي بتطلع
الحين أحس إن صدري هدأ عليّ لأن توني شاربة شوربة ساخنة،،أنا من نحاستي إني ما أشرب حليب من كنت صغيرة ومن سابع المستحيلات أتقبله،،ومن أول الحمل حاول أشربه بس تكرمين كنت أرجعه،،حتى الدكتورة قالت لي خلاص لاتغصبين على حالج لأن بيصير عندج رد فعل عكسي
بس اليوم لما لقيت ان ماكو شي فايد معاي حاولت أشرب شوية حليب،،والليلة انشالله بعد بغصّب على حالي إني أشرب حليب بالعسل حتى لو ماتقبلته علشان هالياهل المسكين اللي أحسه تعبان معاي
تسلمين ياغالية على السؤال وماقصرتين وانشالله تسمعين عني أخبار طيبة

ما تشوفين شر يا ام جواد تره طلعتي مثلي انا بعد من وانا صغيرة ما اشرب حليب ولين اشربه ارجعه بس شاسوي غصبا علي في هالفتره اشرب حليب بالكاكاو لأني احبه هذي الشي الوحيد اللي ناقذني .. انتي حاولي تحطين معاه نكهه تغير الطعم شوي لأني احس فيج الصراحة

وعساج عالقوة وأجر وعافية

هلا دلولة
تسلمين غناتي على السؤال من جد أحرجتيني ياقلبي والشر مايجيج انشالله
أنا والله حتى النكهات ماتنفع معاي،،ريلي جاب لي حليب بالفانيليا والفراولة والكاكاو بس الله يسلمج عندي عقدة منه
بس اليوم ومن ساعتين ولأول مرة في حياتي أشرب حليب بالعسل،،طبعا لو تشوفيني وأنا أشربه تموتين عليّ من الضحك،،أشرب وأنا مغمضة وريلي معاي وكل ماشربت شوي قال يالله باقي شوي وتخلصي والله ما أبالغ في الأخير حسيت إني برجعه بس ريلي قال لي قاومي هالإحساس حتى تستفيدي منه ويرتاح صدرج
وبالفعل الحين أحس إن صدري شوي هادئ انشالله بكرة بحاول بعد أشرب عالصبح..الا بسألج شلون النعناع لحالتي؟؟
أنا طبعا وكالمعتاد ما أشرب هالسوالف ولا شاي ولاقهوة لأني ماحبها،،بس ريلي اليوم قال لي اذا كان النعناع تمام لج وممكن يفيدج حاولي بكرة انج تشربين كاس شي بالنعناع!!!!! شفتي الطمع؟؟
أنا كأني مزودتها بالسوالف بس حاسة حالي مرتاحة شوي الحين وتسلمين ياقلبي على الوصفة...
الا انتي شخبارج وكيف الحمل معاج؟؟وكيف النونو؟؟

بسم الله الرحمن الرحيم بسم الله الرحمن الرحيم الحمدلله والصلاة والسلام على رسول الله وعلى آله وصحبه أجمعين السلام عليكم ورحمة الله وبركاته

انا الحين بالشهر السابع وانشاءالله موعد ولادتي 25/5/2006 بس بخاطري 8/6/2006 بعيد ميلادي
وانشااللة فيني بنت

هلا وغلا مويا حياج الله معانا
الله يقومج بالسلامة انشالله يعني انتي على حسبة دكتورتي سابقتني بيوم أنا قالوا لي 26/5
بس تصدقين ساعات أوقول ياريت تصير 6/6/20006 أحسه مميز،،وساعات اذا شفت حالي تعبانة قلت أنشالله اولد بسرعة وأرتاح
............................
دلــــولة صباح الخير شخبارج؟؟
بعد ماكنت فرحانة مستانسة البارحة وكتبت لج أني حاسة اني صرت أحسن،،تبدلت حالتي 180 درجة بالفجر وصدري ذبحني مووووت وماعرفت أنام أبد،،اليوم من صحيت شربت حليب بالعسل وحسيت حالي أوكي بس المصيبة مفعوله بسرعة يخلص
أنا قلت باروح المستشفى العصر خلاص يأست وتعبت وبصراحة خايفة على البيبي لأن من مرضت واهو حركته مو عاجبتني،،والبارحة صابني ضيق في نفسي وتعبت قلت اليوم باروح خلهم يشوفوا شفيني...مو فايد معاي شي..وأنا والله كل خوفي على هالياهل مابي يصيبه أي شي
والله كارهة حالي صايرة ماعندي مناعة كلش كل يومين أمرض!!!!!!!!!
...................................
مــــــــــــــــرواي
شخبارج عيوني ؟يعطيج العافية والله يعينج على الدوام
شلون البيبي الصغير انشالله بخير؟؟
.........................................
نبض الإمارات...
هلا وغلا عيوني شخبارج؟؟وكيف النونو معاج؟؟
انشالله كل شي أوكي،،خلينا نسمع أخبارج..
..........................................

هلا خوااااتي ...الله يسلمكم
ألحين عااااد بخبركم سبب غيابي...
أولا:الباسورد ضاع عني و أكثر من خمس مرات طلبت استرجاع لكلمة المرور بس ما تتطرش لي..
ثانيا:تعرضت أنا و أخوي لحادث بالسيارة-شاحنة من ورانا لصقتنا في شاحنة من جدامنا..و طبعا مت من الزيغة و الشيطان-الله يغربله-ما خله شي ما وسوسه فيني و خاصة يوم لاحظت إن النونو من عقب الحادث صار يرفس و ما راضي يسكت-يحليله تخرع-و أول ما تفيجت رحت العيادة و طمنتني ع المشيمة و النونو
و الحمد لله ع كل حااااااااااال

ماتشوفين شــــر نبض الإمارات وألف الحمدلله على السلامة
والحمدلله أن البيبي قام يرافس بـــقوة هذا دلالة على انه بخير..مسكين ياعمري خاف من الخرعة
ماعليج شـــر انشالله

ام جواد انا قبلك فكرت اول مادريت اني حامل قلت لو اتاخر الين تاريخ 6/6/2006 .. طبعا هذا اول الاشهر

الحين ابي اولد بأسرع وقت مافيني صبر اقول لو على 5/5/2006 بيكون بعد حلو مافيه شي التاريخ :)

=======================

نبض ماتشوفين شر و الحمد لله اهم شي البيبي ماصار له شي و جان حطيتي صدقه تحت راسك ليلتها