نصائح لتسهيل امورك بمملكتك بدون الخادمه ..

متاااااابعه معاااااااك =)

الحمدلله عالسلامة يالغالية

وايد استانست برجعتج

روعة الموضوع

ما شاء الله عليكم

عاد ما نبي تشجيع وحماس بس لقراءة الموضوع

يعني التطبيق على طول لا تقولين تعبانه التعب بيروح بعد النتيجه الاخيره

والله التعب النفسي اشين من التعب الجسمي

تعبانه من بيتك ومن اشغالك الي قدامك ومتعيزه تخلصينها

لكن لو حطيتي يدك وخلصتي شوفي كيف بتحسين ان عندك

وقت فراغ كبير وراح تبدعين كيف تطلعين لج شغل من تحت الارض

يعني مثلا الي دائما تنظف بيتها وبيتها نظيف ومرتب

تأكدي انها دائما تهتم انها تطلع لها اشياء زياده

مثلا تشيل الفلاتر وتغسلهم للمكيفات

ويكون عندها بعد نظر لكل شي

لأن نفسيتها مرتاحه وقادره انها تتابع يوم بعد يوم

لكن تكدس الاعمال يخليك تاخذين الامور ببطء وملل

وكأن الوحده مننا جارينها لغرفة الاعدام

الي دائما بيتها نظيف اول بأول

تلاحظين عليها من زود وقت الفراغ الي عندها

متعدله متكشخه وريحة عطرها وااااو كأنها هي بكبرها فواحه كل ما تمر

مكان تفوح بالروائح الزينه ...

يا بخته هالريل يرجع يلاقي كل شي عال العال

ويا بخته ان يشوفج كل يوم بأحلى حله

شوفوا يا حريم احيانا الرجال يدخل البيت

ما يقول والله البيت نظيف ويعطيك العافيه

وانتي ما شاء الله ربت بيت سنعه ونفس الوقت مهتمه بنفسك

لكن تأكدي ان طبع الرجال غير عن النساء

يعني يلاحظون والله يلاحظون اشياء احنا ما نلاحظها

لكن يقتصر الكلام بنظره او معامله طيبه

وان كان دخل عليك حتى ما ابتسم بوجهك تأكدي

انك مو انتي السبب لأنه جاي من برااا البيت يعني السبب

بخارج بيتك عاد هنا يجي دورك كاس عصير بارد كفيل انه يلفت

انتباهه لك بحنانك وعطفك واهتمامك ..

ابتسمي وصكي فمك لا تقولين وين تأخرت وله اشفيك وله من هالاسئله

عاد في حريم ما شاء الله عليهم يعني تشوفه مكتأب تجي تقول له كيفك عساك بخير

يا ماما خليه يتنفس اشوي عطيه مجال عشان يستوعب انه داخل بيته الي في راحته

بيته الي لاجئ له بعد يوم عمل طويل وممل وشاق وروتيني ..

تبون الصدق انا زوجي عمله من النوع الي المفروض انه يتكلم كثير واجتماعات ومشاكل مع الموظفين ولازم هو يشوف لهم الحل السريع باللوكيشن المعين والله لو خلااا الشركه او مكتبه يجيه تلفون ولازم يشرح ويتكلم ويتكلم واحيانا حتى بالبيت يتكلم عن العمل بالتلفون وانا اصدع اقول مسكين اشلون حاله هو كل يوم على نفس الحال

فلما يرجع اعطيه مساحه انه يكون بروحه يعني لو دخل غرفة النوم اجيب له العصير وانا مبتسمه وبعدها اطلع

عاد احيانا مو دائما اكسر خاطره يقول لي تعالي قعدي اقعد لكن بسكوت وان شفته تكلم خلاص اواصل معاه

لكن ان ما نادى علي اخليه بروحه يريح اعصابه ويستوعب انه بالبيت والعمل انتهى لمجرد دخوله هنا ...

معلش كتبت قصة حياتي

لا بس خاطري تعرفون ان الزوج لما يدخل ما يكون عنده مزاج حتى لو كان عمله بشكل بسيط مهما يكون لازم نقدر تعبه وقومته وروحته لعمله بكل يوم فالمفروض اننا نهيأ له الجو المناسب ببيته ...

اول شي البيت نظيف مرتب ريحته حلوه ومبخر

شي ثاني وجبته جاهزه

شي الثالث انك تكونين مو بأحلى حله ما ابي ابالغ على الاقل كوني لابسه نظيف ومرتب حطي بلاشر وقلوس لمي شعرك ونزلي خصل خليك نعومه قدامه وتعطري وتبخري وقت ما تبخرين البيت وانتهى الموضوع

يمكن وحده من الي تقرأ كلامي تقول الا زوجي ما يستاهل دائما يعاملني كذا وله كذا او يضربني وبخيل علي ووو

خليك انتي احسن يا اختي وكل واحد يشوف مسئولياته

ان كان هو كذا بالمعامله الطيبه و تدبير امورك اول بأول راح يحس على دمه

انك انسانه سنعه ومتربيه

واحنا قلنا من البدايه
احتساب الأجر من رب العالمين بكل شي نسويه

وقت الحساب انتي كنتي تسوين الي عليك وما كنتي مقصره

والي له حق ما يضيع عند ربه ..

ونعم بالله ...

لعيون اطفالك وعيون اهلك الي ربوك واصلي بصبر واعلمي ان الدنيا فيها الحلو وفيها المر

وان الانسان ممكن يتغير بقدرة رب العالمين بالدعاء ربي يسخر لكم ازواجكم اجمعين ويصلح ما بين كل زوجين بماهو طيب ويجمعهم على طاعته ان شاء الله ..

اقرقر كثير صح ..

...........

غرفة الاطفال ..

اقصد مخزن الالعاب ...

هاتي علبه كبيره كبيره على كثر ما عندك من العاب

حطي فيه كل العابه كلبوهم بدون ما تقولين هذا يبيه وهذا ما يبيه

وحطي له عدد ثلاث لعبات وبس

هذي الطريقه للي عيالها ما يعرفون الترتيب وعنيدين انهم يلمون العابهم بعد ما ينتهون من اللعب

طيب حطي العلبه بمكان بعيد عنهم ممكن فوق الدولاب مثلا

انا كان عندي علب من الخشب الثقيل بأحجام مختلفه خذيت العلبه الكبيره

وحطيت فيها الالعاب والعلبه الي اصغر منها حطيت فيها شراشف وهكذا

حطيت العلبه الصغيره على الكبيره عشان امنعهم انهم يفتحونه

طبعا بتصير عندك مناحه يومها معلش استحملي

ولا تقولين ليه انتي سويتي كذا

لأن صدقيني الطفل يدري ان هو السبب ببعثرته وعناده

انتي لجأتي للطريقه هذي حتى طفل السنتين يدري ان السبب عدم تنظيمه

طيب صدقيني بتلاحظين انه متعلق بألعابه الثلاث لمده معينه لأن كل شي

يزيد عند حده يسبب ازمه لطفلك يبي زياده لمجرد التعود انك تقدمين له الزياده بالالعاب

لكن نقصان الشي يخلي الطفل يحس بقدر الالعاب

انا اتكلم نفسيا وهذا شي بتلاحظينه

طيب بعد تقريبا اسبوع افتحي العلبه وخليه معاك

وخلي يرجع الثلاثه للعلبه وبدلهم يختار ثلاثه من محتويات العلبه

هاااا خليك جاده معه ولا تتهاونين ابدا

ونفس العمليه بدون ميعاد شوفي تصرفاته متى ما مل من العابه

هاتي الصندوق وخليه هو الي يختارهم

وصدقيني لأن العابه بعيده عن عينه بيصير كأنه داش محل العاب ومو عارف وش يختار عشان

يحتفظ فيه لمدة اسبوع ..

وانسي يا اختي انك تشترين له العاب زياده

بدل الالعاب يا اختي تقفيه على قد عمره الالعاب ما راح تنفعه على

قدر ما يلهيه بالسنتين الاولى من حياته

لكن الطفل بيكون عطشان انه تهيأين قدراته الجسميه والفكريه

هاتي اقلام هاتي الوان خصصي له وقت انك تقعدين معاه تلونين

وهو يشخبط بالبدايه بيعرف كيف يمسك القلم لا تستعجلين الامور

خليك هادئه بتعلمينه الهدوء منك وخليك واثقه بيتعلم الثقه منك

وان وعدتيه بحاجه تأكدي من نفسك انك قد كلمتك

.........

خلصنا من الالعاب و فكرة التخزين المعتمده لمدة اسبوع

وكل اسبوع يتم تغيير واخذ رأي الطفل بإختيار لعبه من المخزون ولكن اشدد على

هالكلمه بـــــــــــــــحزم

ثلاثه يعني ثلاثه ما فهم بالكلام فهميه بأصابعك عشان يفهم وش يعني ثلاثه

...............

فتحي الدولاب

هاتوا كيس اسود حق الزباله كرمكم الله لأن ادري ان فيه اشياء واشياء بغرفة الاطفال تحتاج

إنك تستغنين عنه ..

شوفي الملابس اي شي صغر على عيالك خليه بكيس عشان تتبرعين فيه واجرك على الله

لا تقولين للطفل الي بجيبه بعد سنه مدري سنتين

صلي على النبي لو كانت هالطريقه صحيحه كان السوق خلااااا من الناس من زمان

طفل جديد ملابس جديده هذي معروفه

اما الاجهزه الخاصه بالطفل اقصد مثلا المشايه القعاده ممكن تخزنينهم لكن ملابس

ليه ؟؟؟

كل اشوي الموضه تختلف اشتبين فيه عطيه لأحد يحتاجه الحين وما عنده يلبس عياله وارحمي نفسك عشان الله يرحمك ويحفظك ويوسع رزقك انتي وزوجك ..


خلونا نقسم الادراج

اول درج الي يكون موقعه فوق اعلى شي بالدولاب

خصصيه لملابس الشتاء لكن تذكري ان هل القطعه هذي بتكون مناسبه له بالسنه الجايه بموسم البرد

نصيحه وقت ما تشترين ملابس الشتاء اخذيه اكبر بشوي من قياسه لأن الشتاء عامه في الخليج كلها شهرين بالكثير وبعدها توجهين القطع الى التخزين خليه يستفيد منهم بالسنه القادمه مثل الجاكيتات وغيره

كيف نخزنهم هاتي المكنسه وهاتي كيس التخزين حطي الملابس اشفطي سكري عليه

وانتهى الموضوع حطيه بالرف الاول من الاعلى عشان هذا الرف مهو عملي بالدرجه الاولى

ولما يجي وقته غيري الاماكن هاتي ملابس الشتاء تحت ورفعي ملابس الصيف وهكذا

في حبيبات لحفظ الملابس نفس الحبيبات الي تلاقونها بعلب الجزم الله يكرمكم

لا تقطينه لما تشترين حذاء جديد خلي هالكيس الي فيه الحبيبات بالكيس لتخزين ملابس اطفالك او ملابسك

بس الله يعافيك لا يوصل له عيالك وياكلونه وان كانوا كبار ويفهمون فهميهم هذا لأيش وليه بتحطينه وان يسبب كذا وكذا ...

طيب

الرف الثاني خصصيه لملابس البيت

يعني ان كان ولد دائما يلبس بيجامات او ملابس العصر بالبيت عباره عن شورت مطقم بالتي شيرت حقه

اقول لك كيف ترتبينه صفطي التي شيرت وبعدها دخلي فيه الشورت بوسطه عشان يكون رفه مرتب وكل طقم مع بعض

بالنسبه للرف الثالث خليه لملابس الطلعه نفس الشي طقمي وجهزي

خذي منه طقمين اكويهم وعلقي مكان التعليق وكل ما تستخدمين هالطقمين

جهزي طقمين غيرهم كويهم وعلقي هذا عشان وقت ما تبون تطلعون يكون ملابس عيالك للطلعه

جاهزين وما يحتاج منك الا انك تلبسينه او هو يلبسه

طبعا شوفوا ولاحظوا لو كانت الخادمه موجوده كان وجهتي كل الغسيل للكوي

لكن بهذي الطريقه راح تلاحظين انك تقدرين انك توفرين لأطفالك ملابس مرتبه بطوي مرتب ومطقم وجاهز للبس

وايضا ملابس جاهزه للخروج مو مره وحده الا حتى مرتين ..

طيب

الرف التحتي اخر شي

لأن ادري اكثر الدواليب فيها اربع رفوف هذا المعترف فيه

خليه للشراشف والبطانيات واسحبي الهواء عشان ما تاخذ منك حيز ما شي الحال

.............

راجعه ان شاء الله اكمل بالنسبه لملابس الداخليه لاطفالك وايضا تحت السرير وفوق السرير وهكذا

رتبت الصاله
وغرفة النوم مافيها شغل كثير
بس الليله عندي عرس بكرة ان شاءالله
أرتب غرفة النوووم لأني تعبت من غسل
الصحووون << الله يسعدك حمستيني
وزوجي انبسط...
بس غرفة الأطفال لاحقه عليها خلني أحمل أول
ادعيلي بالذرية الصالحه...كملي انا معااااك..

مساء الخير

اما انا اليوم اشتغلت على ما تحت السرير ويوووووووو اشكثر فضى وبعدني ما خلصت.

اما فكرة الالعاب عجبتني واااااااااااااااااااااااااااااااااااااااااايد ما تدرين اي كثر واني من امس قلتي لي جهزي العلبة الكبيرة جهزتها لانا تونا شارين مكيف جديد حق غرفة النوم فاخذت كارتون المكيف خخخخخخخخخخخخ وودي الحين اقوم وانفذ بس للحين افكر وين بخليه؟؟؟؟ اول ما اطلع له مكان من تحت الارض على طول بنفذ يالله ما اتخيل اشلون بيكون شكل شقتي من غير العاب وبقنع زوجي انه خلاص ما يشتري لعب لانها والله وحده وهالكثر العابها لو معاها واحد اشبيكون الوضع؟

ميرسي حبيبتي والله يجعله في ميزان حسناتج

ترانيم انا متابعه معاكي و منتظره كابوس المطبخ

يعين انا غرفه نومي ما شي حالها الصاله نص مأساه اما الكابوس الأكبر هوالمطبخ

متابعه معاكي و يلا الله يقويكي يا رب و يحفظك لعيالك و يحفظهم لك و زوجك بعد

ما شاء الله لا قوة إلا بالله عنك

ما شاء الله عليج والله تستاهلين كل خير
يعني حتى انج حمستيني اتزوج عشان اطبق لوووول
انا من ناحية النظافة والترتيب مو مشكلة بس الطبخ!! و ما ادراك ما الطبخ هذا اللي معقدني ههههه
الله يعيني و يعين اللي يتزوجني

ما شاء الله عليج اختي الغالية ترانيم
ما من قصوور يالغالية
وكملي واحنا معاج نستفيد من خبراتج الراااائعه
الله يوفقج ويسعدج ياااارب

مشكوووووووورة ياقلبي
جبتيها ع الجرح شغالتنا من فترة سافرت بلا عودة
وماتعودنا تصادف اجازة ورمضان مايكون عندنا شغاله
وربي راسي بينفجر بيت كبير وانا البنت الوحيده
وكلهم اولاد كبار وصغار وأوامر :confused: مع ان الصغار بديت اعودهم اي شي يجيبونها يردونه ويساعدوني والكبار بعد صارو ياخذون المكنسه يكنسون مجلسهم بس امي ماترضى ماتحب الاولاد يتحركون بس انا تعبت مافيني صرت اهمل نفسي واللي مثلي تتجهز للصيف والطلعات واهملت صديقاتي بععععععد
لا والمصيبه الاكبر تونا مغيريين فالبيت وقاطين الغرف حتى مابعد فرشنا بعض الغرف وغرفتي اولهم وصاير بيتنا يملل
خاصه غرفتي مدري وين احط كتبي ما استغني عنهم اغراضي يوووووو
حطيتهم بزاويه والي بعلبه ع الثلاجه وربي انرحم :ss:
الملابس تركنا دولاب كبيييييييير بمستودع وحطينا ملابسنااااا كلنا فيه لين ربي يفرجها لنا ونبدا نأثث غرفنا
وربي موقادره ارتبها مشوش تفكيري ماااااااااره بس من بعد طريقتك الله يوفقك دنيا واخره ويسعدك ويهنيك تشجعت ارتبها الليله اذا ربي اراد وبرتب غرفة الجلوس ترتيب من قللللللللب عشان التعب مره وحده وعقب يصير تشطيب بس(y)


وبسالك عن الشراشف والبطانيات الزايده وين انحطهم ؟؟فكرت انوديهم الغسال وعقب نحطهم بالمستودع بس بعد فترة يطلع فيها ريحة غبار ؟؟ شسوي قبل لا احطهم احيانا يصير عندنا ضيوف واتفشل منها !!:o
وربي يعطيك الف عافيه

أنا الغلا كل الغلا

الله يقويك ان شاء الله يبين عليك انك سنعه قبل ما تتزوجين
الله يرزقك بالزوج الصالح ان شاء الله وتتفوقين بحياتك

عجبني حماسك ومره مره سعيده بتواجدك ربي يقويك وايانا اجمعين
ان شاء الله ..

...........

بدري عالشقا يا قلبي

ربي يرزقك ويرزق كل من يتمنى الذريه الصالحه
اللهم آمين يا رب العالمين ..

.........

أكبر قلب

عسى لقيتي حل للصندوق وجلديه عشان يتم لك فتره اطول
وان شاء الله يقتنع زوجك لأن كثرة الالعاب هذا ما يعني انك تسعدين

فيه اطفالك بالعكس تواجد الوالدين حول الطفل ورعايته واهتمامكم وحنانكم

كفيل ان الطفل يتربى تحت اجواء نفسيه صحيحه وان شاء الله تستغلون

هالشي عشان الطفل يعرف قيمة الاشياء الي المفروض ان يحتفظ فيهم

ونفس الوقت يكون عنده الوقت ان يكون لنفسه الهوايات الي تناسب سنه

وبتشجيعكم يتم كل شئ على اكمل وجه ان شاء الله ..

........
ريم

يا بعد عمري ان شاء الله بعد غرفة الاطفال مطبخ على طول

ولا يهمك وعلى أمرك ..

ربي يسعدك ويوفقك ان شاء الله
..........


b.g

يا بعد عمري فديتك يالغاليه الله يرزقك
بالزوج الصالح وتطبقين ببيتك ان شاء الله
ويرزق كل بنت كل ما تتمناه بحياتها
والله يسعدكم ان شاء الله
اللهم آمين

.........

عسولة قلبه
يالغاليه تسلمين يا بعد عمري
والله تواجدك يسعدني من قلب

.......
صبا
تدرين عاد بعد الكلام الي كتبتيه بردك
خاطري تكونين قريبه مني واجي اساعدك بنفسي
احب هالسوالف خصتا اذا البيت عفسه حده
احب اشوف قبل وبعد
وارتاح نفسيا
يلا يا قلبي سوي الي عليك والله يقويك ان شاء الله
ونفس ما قلتي كل شي اول بأول
وسوي كل شي اليوم وباقي الايام بتحسين بالراحه لأنه مجرد تشطيب يعني
تسوين كل شي سريع سريع وخلصتي بأسرع ما يكون ويكون عندك وقت لإهتماماتك الثانيه

.............

باقي البنات بدون استثناء
حبيباتي وجودكم يسعدني كثير
وتواجدكم معطر الموضوع من اول صفحه الى اخره
ربي يوفقكم ان شاء الله

............

يلاااااا نكمل سواااا

ثواني واضيف الباقي من غرفة الاطفال

توكلنا على الله وهو على كل شئ قدير ..
.............

أنزين حبيباتي نتكلم عن ملابس الداخليه للأطفال
الي عندها حفاضات فالأسهل انك تحطينهم إما بمكانه المخصص
بطاولة تبديل الحفاضات او انك تخصصين حامله للحفاضات

اما الملابس الداخليه يا حلو ملابسهم صغار يعني علب الجزم كرمكم

الله مناسبه لرص ملابسهم الداخليه فيه على شكل اسطوانات

ونفس الشي للجوارب

خصصي لكل فرد من اطفالك درج خاص فيه لملابسه الداخليه

وان كانت عندك دروج زياده خليهم مثلا للقصص ان ما كان عندك

مكتبه لهم .. او انك تحطين رفوف خاصه على شكل مربعات بالجدار يحمل الكتب

وبعض الاغراض الحلوه مثل ساعه او تحفه او دبدوب

زيني غرفته عشان هو يحس بالراحه وانتي بعد تحسين انك مرتاحه نفسيا

كل ما تدخلين معه الغرفه وتقضون وقت ممتع مع بعض

بالنسبه للأطفال فوق ثمان سنوات افضل انك لو كنتي حابه تفصلين

له غرفه جديده انك تفصلين له غرفه ما فيها رسوم وما توحي بالطفوله

لأن هالغرفه بتم معه للسنين القادمه
اعتقد الخشب الغامق جدا مناسب للأطفال

لأن سنين لا يتغير لونه ولا يتغير موضته

اما المفارش ممكن انك تشترين له على شكل كارتون

وتضيفين بالوسط قطعة سجاد عشان ما ينحرم من الاحساس

ان هالغرفه تخصه..

انا ولدي خلص تقريبا التسع سنوات
وبنتي بالثمان

فلما غيرت الغرفه لهم سويت نفس ما كتبت لكم فوق

والحمدلله احس ان المبلغ المدفوع بأثاث غرفهم المفصله

راح تتم سنين الين ما يكبرون بدون ما يحسون بعد كم سنه

انهم يحتاجون تغييره لكبر سنهم ..

..........

طيب خلصنا من ملابسهم الداخليه

نجي الآن للالوان خصصي له علب خاصه للألوان ان كان

طفلك فوضي خلي العلب الايس كريم الي له غطاء محكم للألوان

عشان يحفظهم ونفس الوقت مو لمجرد ان يطيح من على الطاوله يتنثر يمين شمال

خصصي له سله للمهملات وقولي له انه هو المسؤل عن غرفته ونظافته

ان كان سنه يسمح بهذا الشي

بصراحه سن الست سنوات مناسب ان ينظف غرفته

وان كان اقل راح يقدر يرتب اغراضه البسيطه او يجلب لنفسه الشي الي

يبيه من غير مساعدتك

استغرب من بعض الامهات الي تحاول ارضاء اطفالها على حساب راحتها

يعني الطفل يشترط على امه انه يبي ماء وهو بسن الثالثه او الرابعه

وتقوم هي تجيبه له الين عنده وهو يتفرج على التلفزيون

تدرون معلش عاد انتي ام وانا ام وغيرك جابت وكبرت

لكن انتي تعلمينه انه يتكل عليك تماما وبالاخير يتزوج وما يقدر

يجيب لنفسه كاسة ماء عشان وشو عشان انه يحب الكسل والاتكاليه على الغير

ويمكن بعد ما يشرب خير شر عشانه متكيسل انه يروح يشرب لحاله

معلش انا مكبره الموضوع

سالفة الماء مثال تافه بس لمجرد تذكيركم ان في سوالف كثيره

الامهات يتغاضون عنها لمجرد احساس الامومه

على عيني وراسي عيالي لكن ما اقدر اني اسوي كل شي

وفوق هذا اخدمهم لمجرد كسلهم لشي بسيط

حطي ببالك انتي فيك قوه الآن لكن معلش عيالك يفهمون كل شي

بالشكل الخاطئ حبيبتي ..

خليه ينظف كل شي الي هو السبب فيه

يعني لما يبعثر اغراضه نبهيه قولي له بعد ما تخلص من التلوين

راح تشيلهم ..

وحطي ببالك انك ما تنسين تهديدك له

وان ما نفذ خلاص شيلي الالوان وقولي له عقاب

وما يشوفهم حتى لو تأسف يومين ثلاث وبعدين عطيه

وذكريه بالوعد ان لو ما رتبهم بعد استعمالهم راح تنفذين العقاب لكن

هالمره لمده اطول ونفذي العقاب للمره المليون بعد ما راده الي بيتعلم اول

شي انك لما تقولين شي راح تسوينه ثاني شي يتعلم ان هو الخسران بالنهايه

خصتا ان العابه مخزنه بعيد عنه ..

لا تقولين ولدي بيتعقد لا سلامتك ولدك بيتأدب بالطريقه الصحيحه

لا تمدين يدك عليه لو وش يكون

انا اعرف اطفال من كثر ما تعودو على الطق والضرب صاروا

يضحكون على عصبية الام بدون حتى انهم يتأدبون

صوتك نظراتك وهدوءك وثقتك بنفسك بتأدي الواجب بدون عنف

...........

افضل ان ما تخزنين اي شي تحت سرير اطفالك

لسبب واحد ان غرفة الاطفال المفروض يتم تنظيفه بطريقه صحيه

لمصلحة اطفالك فالمفروض غرفهم ما تحتوي على اثر للغبار والهواء يكون فيه نقي

دائما نظفي تحت السرير بالمكنسه عشان كذا ما نبي تخزين تحته عشان لمجرد

انك تمررين المكنسه تحتها ما تتضايقين من وجود الاغراض وغيره ..

............
ما افضل انك تكثرين المخدات فوق السرير لأطفالك

معلش تبين تزينين السرير زينيه بطريقه غير مبالغه

الا ان كانوا اطفالك كبار بالسن

يعني غرفهم تحتاج لأهتمام متواصل واحيانا

تضطرين ترتبينها اكثر من الصاله وغرفة نومك

عشان كذا سهلي امورك وقللي المخدات

ان كانوا اطفالك من النوع الي يتعلقون بالستائر

غيري ستائرهم لأنهم ما راح يتعبون من التعلق

خلي لهم ستاره من النوع الي تقدرين تطوينها الى فوق

او ستائر خشب البامبو الي تنطوي بشكل دائري للأعلى

ترفعينه الصبح عشان التهويه وتنزلينه الليل

وخلصتي من الشقلبات الهوائيه ..

............

ان كنتي تبين تختارين أثاث جديد ولو شي بسيط مثل طاوله او كرسي

حطي ببالك ان تختارين اشياء مو حادة الزوايا يعني تكون مدببه الزوايا او بشكل دائري

عشان سلامة اطفالك ويا كثر ما يطيحون او ممكن يتعاركون مع بعض ..

.......

تعرفين سر من اسرار اختيار ملابس الاطفال

واحد اختاري القطع او القماش الي من النوع الي ما فيها خطوط

ان شاء الله تعرفون قصدي شوفي الاقمشه القطنيه مثلا

اكثر الانواع لو حصل عليها بقع ما راح تتنظف خصتا لما يكون لونه

فاتح ان كانت القطعه من النوع الي تسحبينه تشوفين خطوط عريضه واضحه

فهي من النوع الي يحتاج للعنايه ان تبقعت يعني لازم تغسلينه على طول وتفركينه

وان ما سويتي كذا ما راح تزيلين البقع بسهوله يمكن تحتاج لأكثر من غسله

أما الخطوط الغير واضحه فهي سهلة الغسل ..

شوفوا حبيباتي لو تشوفون ثياب البيبيات كل ست شهور لهم مقاس صح

ونفس الشي الكبار

اعتقد لو اخترتي القطع الي حابته لعيالك المفروض انك ما تشترين الا بعد ست شهور

يعني اختاري عدد مناسب من البيجامات تقريبا سبع بيجامات

وملابس داخليه لهم كل ستة شهور تقريبا عشره مثلا

وملابس للطلعات عدد سبع ملابس

واوعدي نفسك ما تروحين تشترين لهم ابدا ملابس الا للمناسبات الخاصه

بسك تخزين وبسك صرف معلش ادري الكل لما يروح السوق صار ما يشتري لنفسه ودائما يفكر بملابس وكشخة عياله

لكن ليه ما توفرين دام طفلك ينمو بشكل طبيعي

يعني كل ست شهور يحتاج لملابس

خلاص ان كنتي تحبين تاخذين نص العدد من الماركات راح تقدرين

لان بعدها ما تبين تشترين الا بعد ست شهور

ونص الثاني خليه ملابس مو غاليه للطلعات البسيطه

والكشخه للمجمعات وهكذا ..

امسكي ايدك عشانهم ...
وفري لهم وخصصي توفير لعيالك لمستقبلهم الدراسي ان شاء الله ..


ملاحظه : بعد ما نظمنا امورنا بغرفة الاطفال لاحظي الفرق بعد التنظيم الجديد

وحاولي قدر المستطاع انك تتركين عنك الاشياء الي ما تبينها او تخزنينها لفتره الي بتحتاجينها

لكن كوني حازمه وقت الجرد ووقت التخزين

وكل الي عليك الآن انك تمسحين الاثاث وتكنسين بالمكنسه

وخلي بالك من البيت

الصاله وغرفة النوم وغرفة الاطفال ..

خصصي اوقات معينه تمرين كأنك مشرفة نظافه

يعني بعد ما نظفتي كل شي

بعدها بساعتين ثلاث خذي لفه وشوفي اشصار على الترتيب

اما النظافه افضل يكون عندك مكنسه من النوع الصغير المخصص للشحن

عملي جدا لو شفتي شي من بقايا طعام مثل فتات البسكويت تشفطيه بالمكنسه الصغيره

عشان ما تملين من مد الواير للمكنسه الكبيره

بعد الغدا تذكري انك تمرين على الغرف مره ثانيه

غرفة النوم انتي قافلته او مسكرته خلاص يعني قل مسؤليتك

باقي الصاله وغرفة الاطفال مري عليها

شوفي كل اشوي في شي صار ويحتاج انك الآن تشيلينه من على الارض

حافظي على وقتك دام تعبتي فيه خلاص باشري انك تحافظين عليه

كل هذا لليوم الي بعده عشان ما تتعبين من تكوم الاشياء و الكركبه

اطفالك خليهم جنودك لا تنسين علميهم المساعده

خصتا بغرفهم

وصار عندك ثلاث لعب ما راح تتعبين ان شاء الله بترتيبهم

خواتي الحبيبات بالنسبه لغرفة الاطفال ما افضل انك تبخرينها

في منتج عجيب من ديتول لإزالة روائح الغرف معطره بشكل بسيط وصحي

ونفس الوقت معقم للجو علبته نفس مرش الخاص المعطره للجو باللون الاخضر

هذي خليها لتعطير غرفة الاطفال احسن من الدخون

وحتى الصاله لما الاطفال جالسين لا تدخنين البيت بالعود او الدخون

لان الدخان مهما يكون مضر بالصحه مثل دخان السجائر



أمممم ان شاء الله ما نسيت شي ..

عموما اي سؤال انا حاضره قبل ما ابتدي بالمطبخ ان شاء الله

اقول ناموا عدل وريحي لأن بكره راح تشتغلين بالمطبخ وما تطلعين الا وهو منور ..

ماشي حبيباتي

تصبحون على خير ..

هلا فيك أختي ترانيم .. كلامك عين العقل و الله

أنا لسه مخطوبة و أجهز لزواجي ، و إن شاء الله راح أسمع كلامك و لا أعطي بيتي فرصة يصير مخزن ، و هاليومين راح أبدأ بغرفتي المسكينة ، ليه هاليومين ؟ الآن راح اقوم و أرتب الغرفة و أخليها ديلوكس ...

بس بغيت أسأل : لما أغلف طاولة الكي بالقصدير ما تحترق الملابس ؟؟؟

أنتظر ردك علي

فديت قلبج يالغاليه ترانيم :87457:

بصراحه شجعتيني بردك كثير
وانا بانتظار نصايح المطبخ لان مطبخنا صار مخزن
وااااااااااايد فيه اشيا مالها داعي :sa24:


بالنسبه لترتيب غرف الاطفال
غرفة اخوي الصغير _10 سنوات_ مليااااااااانه العاب
ولكن حاطين له مكتبتين كلهم رفوف يصفهم عليهم
واحس اننا جريب راح نتخلص منهم . لانه قام يحس انه كبر على هالسوالف :bigsmile:
اللهم البلاي ستيشن وبعض السيارات والالعاب اللي تنعد على الاصابع
وانا دووووم اشيك عليه اذا في العاب مايبيلها وصالحه نعطيهم للمحتاجين
اما الكراكيب فللكيس الاسود
وامي بعد ماتقصر من هالناحيه




وحبيت اعقب على كلامج على الاحساس بعد التعب

اي واللللللللللللللللله صدقتي اني احس براحه :poster_vt:
كأني صايره خفيفه حيل
عاد الحين من ساعه تقريبا صاحيه
جان اصير مفتشه
اشوف شصار على الصاله
تصدقين احس باحساس منعش يوم شفتها مرتبه
واخواني واخواتي يوم شافوني تعبت فيها ماناموا وهم معفسينها
بالعكس قمت شفت حتى المخدات اللي على الكراسي مرتبين بانتظام
بجد فرحت :Za_thanx:

اول ماقمت ماسويت الا اني انزل الكاسات << عندنا مثل زاويه كانها مطبخ بصالة القعده
وفرغت سلال الزباله وانتي بكرامه

وبسسسسسسسس


بجد احساس حلو حلو

والله اني انصح اي اخت تشوفنا تطبق من الحيييييييييين
لان الاحساس لا يقدر بثمن
خلنا نترك الكسل والتأجيل
ونصير نلمع من النظافه والنظام :up:


وبما اني مارتبت غرفتي امس
الحين راح ارتبها .. عندي غسيل ثياب وايد
الله المستعان


بانتظارج فديتج

ترانيم
ماشاء الله عليك دوم مميزه بمواضيعك والكثير يستفيد منها جزاك الله خير
والحمدلله عندنا مافي شغالات وان شاء الله مابنحتاجها لأننا اتعودنا على كذا وقادرين نتصرف بدونها بكل شي

مرحبا كلامك على الصالة فادني كثيرا لانه الصاله هي إلا كانت متعبتني وايد هي والمطبخ وسراميك الشقة إلا لون وايد فاتح واقل شي يبين فيه والحمامات وانتوا بكرامة لكن غرفة بنتي الحمدالله انا متفقه معاها على النظام هي تحبها مرتبة ما تلعب شي إلا رجعته والألعاب أنه حاطتهم في ثلاث سلال تختار السلة الا تبيها وتلعب فيها أحيانا تلمهم والكثير من الأحيان انه اشيلهم وبالنسبة للتخزين تحت السرير ابد ما احبه ما أدري ليش لذا مفتكه من هاالخطوه .,,, متابعة

ترانيم الغالية
شكرا لك الف مره على الموضوع وجزاك الله الجنة
قريت كل كلمة في موضوعك وحفظت الموضوع عندي بالمفضلة لاني ناويه استغنى عن الشغاله
انا ساكنه بيت اهل زوجي والحمد الله الشقه صغيره
ثلاثه غرف وصاله ومطبخ وحمامين وانتي بكرامه
وما عندي الى بنت واحده واطريت اجيب شغاله من اول ولادتي ببنتي عشان اني اروح الدوام من الصبح وما ارجع الى بعد الظهر
لأني ساكنه بيت اهل زوجي ووضعي اني بيتي على طول مفتوح من اول ما اصحى حتى قرب النوم يتسكر
كذا عودني زوجي واهله على طول داخلين خارجين من بدايه حياتي ودحين الحمد الله تعودت على الموضوع
فلازم البيت يصير نظيف فأطريت اجيب شغاله بصراحه
وتصدقين انه لمن يكون مافي عندي شغاله يصير البيت نظيف بشكل اكثر من انه يكون عندي شغاله
ونفسيتي مرتاحه لابعد حد
المهم حبيبتي
الموضوع اني مستنيه المطبخ وترتيبه بفارغ الصبر كذالك لو عندك جدول او طريقه لتنظيف الحمامات والمطبخ بشكل سريع يوميا فلا تبخلين فيه علينا
اممممممممم كمان عندي بلكونه
فيها اشيا زوجي وخرابيطه وحاجات والله مالها داعي بس موراضي يرميها وانا مني مستفيده فيها بشئ لان الغبار فيها حده ومهما تنظفت فيها برضه غبااااااااااار
نفسي استفيد منها مش عارفه
يعني احط فيها مثلا الشراشف والبطانيات الكبيره حقت غرف النوم مساحتها طيقه يعني ما تنفع احط فيها دولاب
او رفوف واصلا الغبار ثم الغبار الي خانقني ومو خليني استفيد منها اعطيني طريقه لها الله يجزيك خيري الدنيا والاخره ......

بصراحة كلامك درر

أتا بصراحة أفضل تكون غرفة الاطفال للنوم والدراسة وقراءة القصص فقط

ما احب تكون مكان للعب علشان دائما تكون مرتبة بس المشكلة اللي ماعندها غرفة زيادة تكون غرفة ألعاب
وهذي مشكلة انا اعاني منها شخصيا .. انا ناوية اغير غرفة بنتي على رمضان ان شاء الله وراح آخذ نصايحك بعين الاعتبار والحمدلله بنتي عمرها 6 سنوات لكن مسؤلة عن غرفتها وتنظيمها بسم الله عليها وماتتعبني كثير

بس بما اني حامل وفي بيبي جديد بالطريق ما ادري وش راح يصير << الله يسهل


يلاه بانتظار أفكارك بالمطبخ ويعطيك العافية

يا الله يا رب يا ترانيم يرزقك بكل اللي في بالك

لأنك تساعدي البنات و خصوصا بنات الخليج اللي الفكره عنهم انهم ما يعيشوا بدون شغاله على انهم يكونوا ميه ميه

و الدليل تفضلوا و اقروا الموضوع و شوفوا البنات شو تسوي

ما شاء الله لا قوة إلا بالله

تسلمين اهتي على المجهود الواضح


انا عندي خادمة بس راح تسافر شهر 11 و يمكن ما اجيب غيرها لأن جبتها يوم كنت حامل ما اقدر على شغل البيت والحين بنتي ما شاء الله سنتين عمرها

منتظره تنظيف المطبخ والحمامات عز الله السامع