حوامل وامهات مصر تعالوا نتجمع

انشالله يارب تقومى بالسلامة انتى ومناليزا وانا وكل بنات المنتدى اااااااااااااامييييييييييييييييين

يارب يسمع منك
على فكرة يا بنات يمكن ما اقدرش ادخل تانى النهردة و بكرة لان الجهاز فية فيروس و بنودية يتصلح ان شاء الله يكون المنتدى كمان اتصلح وقتها

ازيكم يا بنات عاملين ايه؟

انا عايزة اسألكم في حاجة

من ساعة ما دخلت التاسع من 10 ايام و انا ما بحسش بالتقلصات اللي هيه الطلق الكاذب او التفاسيح

مع اني لما كنت في التامن كانت بتجيلي :(

هو البيبي على كده ناوي يطوّل جوة ولا ايه ؟!!!!!!!!!

مناليزا عقبال ما تحصلى جيسى باذن الله و انا وراكى المفروض تطمنى من الدكتورة بتاعتك بس على حد علمى ان فى الشهر التاسع بيكون البيبى كبر و البطن صغرت علية يعنى الحركة بتقل بس الافضل لما تروحى للدكتورة اساليها علشان تطمنى

يابنات يا ريت تطمنونا على جيسى و تباركوا لها بالنيابة عننا لحد ما تدخل لنا و نبارك لها بنفسنا

ان شاء الله يا رور لو كلمتها النهاردة حقولها انكم بتسلمو عليها

بس لازم نعذرها لو اتأخرت علينا ربنا يكون في عونها

رور ايه موضوع المشد ده؟

اجيبو منين و شكله ايه؟

قوليلي لو تعرفي حاجة عشان الحق اجيبو

يا ستى المشد دة الكورسية او الحزام الى بيتربط بية البطن بعد الولادة بس على حسب ما سمعت و الى انا حاسوية باذن الله مش حستخدمة و نصيحة بلاش لان سمعت انة بيسقط الرحم و سالت عنة فى منتديات تانية حذرونى منة فبلاش احسن اهم شىء اول ما تولدى بالسلامة تنامى اول اسبوعين على بطنك من غير ما تربطيها و بعد كدة اربطيها باى حاجة عندك مش كورسية اى حزام او حاجة زى الشماغ السعودى افضل و انا حنقل لكم الرد الى فى المنتدى التانى الى ردوا على نفس الموضوع

يابنات خصوصا موناليزا تعرفى حاجة عن بواسير الحمل؟؟؟

اخباركم ايه كلكم
امة الله
نور العيون
مناليزا
رور
نور الشمس
جيسي
سما ميدو
مناليزا فعلا كتير بيقولو ان المشد ده مش كويس وبيضعف عضلات البطن والاحسن منه انك تربطي حاجه زي شاش او اي قماش طري تلفيه على بطنك لو الولاده طبيعي يبقي بعدها بكام يوم ولو قيصري بعد الاربعين

يلة الحمد لله كدة الواحد اتاكد انة مفيش مشد بس ربنا يقومنا بالسلامة وبعدين يحلها حلال

عايزه اقولكم اني روحت لدكتورة جديده غير السيده حتشبسوت وفعلا هي كويسه وانا مرتاحالها
رور ومناليزا احنا قولنا ايه احنا جامدين ورجاله واحنا شوفنا جيسي كانت خايفه ومرعوبه انها تولد قيصري وربنا اكرمها بالطبيعي ما تخافوش ربنا معاكم ويقومكم بالسلامه كده عشان تيجو تحكولنا وتشجعونا

يارب نيقى شجعان ساعة الولادة يارب المشكلة ان الوقت فى التامن بيجرى بسرعة يعنى انا حاسة ان الموضوع بيقرب بسرعة ربنا يستر يارب

انا عايزه اقولكم معلومه مهمه جدا جدا
في اوقات بتكون الولاده الطبيعيه فيها ضرر للام وفي حالات كمان لو الدكتور مش شاطر ممكن الام تفقد البيبي بسبب الولاده الطبيعيه مثلا لما بيكون الجنين عظم الاكتاف عنده عريض لازم يتولد قيصري لان في الطبيعي بيضطر الدكتور انه يكسر الكتف وبالتالي الطفل بعد الشر علينا كلنا يموت بس ديه حاله نادره
كمان لما بتكون راس الجنين كبيره بيتعب الام جدا في الولاده الطبيعي وممكن يسبب مضاعفات للام
اذا اكتمل نمو الرئه والام ما حستش بالام الوضع في خلال مده يحددها الدكتور بتاعها لازم القيصري عشان ما يتخنقش
اذا لف الحبل السري حول الجنين لازم القيصري
اذا كان عنق الرحم عند الام ضيق لازم القيصري
يعني الولاده الطبيعي مش احسن في كل الحالات بالعكس ممكن تكون اضرارها اكتر من نفعها ونفس الشئ الولاده القيصري مش احسن اذا كانت الظروف الي فاتت كلها مش موجوده طبعا هايكون الطبيعي احسن
انا الكلام ده اختي في اخر سنه كلية طب هي اللي قالته ليا وانا حبيت اقولكم
وربنا ييسر لكل واحده فينا الولاده الانسب

رور احنا قولنا مش عايزين نشمت الرجاله فينا كله بيعدي انا حاليا في الرابع بس نفسي انام اقوم الاقي نفسي في اخر التاسع

والهى كنت زيكيا توتونوتو بس الحمد لله المشكلة انى كنت ناوية اولد بابرة الضهر و فى دكتور خوف جوزى منها منوقتها وانا مرعوبة يعنى كنت حاطة فراسى انى حولد بدون الم بس دلوقتى هيهات بس ان شاء الله خير و باذن الله ولاداتنا كلنا تكون سهلة و طبيعية و ربنا يرزقنا باطفال معافين و صالحين و حلوين كمان يارب

يارب يسهل ولادتنا كلنا

حد يعرف اذا كانت فيه تمرينات معينه بتساعد على ان البطن ما تطلعش بعد الولاده ؟؟؟؟:think: :think: :think:

تقريبا والله اعلم ان اغلب التمرينات الى بتساعد على نزول البطن بتكون بعد الولادة بس فى شوية تمرينات جبتها من النت وحاولت اسويها شحرت من اول مرة بس حسب علمى اهم تمرين الى هو بتاع عضلات المهبل و القرفصاء لتسهيل الولادة اما عن البطن مش عارفة بصراحة والافض انها تكون تحت اشرف حد عشان ما يحصلش مضاعفات لا سمح الله

شكرا يا رور انتي و توتونوتو على المعلومات بتاعة المشد دي خلاص ححاول اربطها بطرحة او حاجة

بالنسبة لبواسير الحمل ماعرفهاش دي بتيجي امتى و ازاي؟

والله يا توتونوتو انا لا فارقة معايا طبيعي من قيصري كل اللي يجيبو ربنا كويس بس بدعي انها تبقى ساعة سهلة و طفل سليم

بس الواحد بجد حاسس ان الوقت مابيعديش الحقيقة اللي بصحى عليها كل يوم اني لسّه حامل :)

ربنا ييسرها علينا كلنا امييين