حوامل وامهات مصر تعالوا نتجمع

نور طمنينى رحتى الدكتورة ولا اية؟

ازيك يا رور عاملة ايه وحشتينى
الحمد لله رحت والتحليل طلع ايجابى والحمد لله ادعيلى وربنا معاكى طمنينى عليكى

شفتى مش قلت لك بس حرقتى اعصابك على الفاضى المهم برضوا خلى بالك على نفسك ما تهمليش خصوصا اول 3 شهور دول وربنا يثبت لك حملك يارب
انا الحمد لله تمام اهو بنعافر لحد معاد الولادة ربنا يستر و ييسر يارب

يا بنات فين جيسي اختفت ليه ؟؟

يارب المانع يبقى خير

صحيح يا بنات انا عايزاكم تقولولي على مسجات موبايل حلوة ابعتها للأقارب و الأصدقاء لمّا ربنا يقومني بالسلامة يا رب

عايزه مسج حلوة , اصلها بتبقى ذكرى جميلة

انا لسه محتفظة بالمسج بتاعة اختي لما ولدت بنتها مع ان بنتها دلوقتي عندها سنتين و نص :)

يؤسفني اقول لكم اني لية ماولدتش بس للاسف كمان نفسيا مش مهيأة ادخل معلش اتحملوني
سلامي للجميع

معلش يا جيسى المهم انك بخير و كل شىء فى اوانة و ربنا يكتب لك ولادة سهلة يارب

فين باقي البنات ؟

انتو بتختفوا ليه؟

ازيكم يا اجمل امهات في الدنيا
ايه مكسلين ليه؟؟؟؟
ايه اخر اخباركم

ازيكم يا حلوين موناليزا و جيسى و نور و توتونوتو
اة والهى مكسلين انا البيبى حاسة طلع عند قلبى لا عارفة انام و لا اصحى و لا اقعد ربنا يهونها علينا يارب انتم طمنونا عنكم كل واحدة وصلت للشهر الكام انا دلوقتى تقريبا خلصت اسبوع من التامن ربنا يكمل لنا على خير يا رب

ازيك يا رور يا جميله و ازيكم كلكم ؟

انا تقريبا خلصت اسبوع من التاسع ر بنا يسهل يا رب على كل الحوامل

كان عندي معاد امبارح عند الدكتور و الحمد لله طمّني على كل حاجة بس قالّي لازم امشي كتير

اخبار تجهيزاتكم ايه ؟

تصدّقوا انه انا جهزت تقريبا كل حاجه و فاضلّي ايييه !!

فاضل سالوبتات البيبي بورن اللي هو مقاس زيرو جايبالو كل المقاسات اللي تقضيه لغاية 18 شهر و لسه مش جايباله بتاع الزيرو ,, و كمان فاضل سرير البيبي ...

و فاضل حاجات مش عارفة اجيبها دلوقتي و لا ماجيبهاش خالص زي الحماله اللي بتشيل البيبي على الصدر او الضهر و فاضل البانيو و فاضل الكاري كوت اللي بينام فيه البيبي و هو خارج اول مايتولد اللي ببقى عامل زي الشنطة و شنطة البيبي اللي بنحط فيها حاجته و هو خارج.

يااااه انا فاضلّي كل ده !!!

اسألوني جبت اييه على كدة ,, و انا اللي فاكرة اني خلّصت حاجة البيبي :(

انتو يا بنات جبتو ايه و فاضلكم ايه؟

ربنا معاكم
مناليزا امال انتى جبيتى ايه لسه عليكى حاجات كتير بس طالبة منك طلب تكتبلى الحاجات الى المفروض تجبيها عشان انا ابيض خالص

عينيه ليكي يا نور الشمس انا حاكتبلك الحاجات اللي انا جبتها او المفروض نجيبها

بس ادّييني وقت كدة عشان ارتب الحاجات عشان مانساش حاجة

انتي في الشهر الكام يا نور؟

احم احم احم :o :o :o :o :o :o :o :o :o :o :o :o
ليه الاحراج انا لسة فى التانى بس انا حبعت اجيب الحاجة من مصر
عشان انتى عارفة الغربة ؟ بس جوزى قلى قولى كل الى عايزاه مرة واحدة عشان لو بعد ما جت الحاجة طلبت شىء قلى انسى هى مرة واحدة عشان التكاليف والحاجة عشان يجيبوها ويشحنوها بتاخد وقت كبير
معلش حبيبتى حتعبك معايا:shy: :shy: :shy: :shy: :shy: :shy: :shy: :shy: :shy: :shy: :shy: :shy: :shy: :shy:

ازيكم ياقمرات
انا حاليا فاضل 3ايام وادخل في الرابع ربنا معانا وخاصة اللي قربو على الولاده ربنا ييسرلهم
ياريت فعلا يا مناليزا تقوليلنا ايه الحاجات اللي المفروض نجيبها

رور فينك ؟؟؟؟؟؟؟؟؟؟؟؟؟؟؟؟؟؟؟

ازيكم يا حوامل يا حلوين اخيرا ظهرتم الحمد لله انكم بخير
موناليزا ازيك يا جميل حاالك من حالى والهى رحت انا و جوزى البحرين قلت علشان اخد راحتى و انا بشترى حاجات البيبى (كاشفة وشى يعنى) و فكرت نفسى جبت كل حاجة بس لما شفت الى انتى كتبتية جالى احباط انا تقريبا جبت لبس البيبى كلة لحد 3 شهور بس الكل نصحنى اجيب لحد 3 شهور بس لانك ما تعرفيش البيبى يتخن و لا يطلع رفيع وكمان لان انا كنت فى الاول مفكرة انى حامل فى ولد و طلعت بنت فقلت خلينا نكمل لبس لما تيجى بس فاضل لى بطانية شتوى لان هنا صيف شتا تكييفات مش فاضل لى حاجة خالص يعنى بس السرير و الكرسى بتاع العربية و الحمالة و البانيو وشنطة البيبى الخ الخ الخ بسيطة بسيطة ههههههههههههههههه :dd:حالى من حالك بس على فكرة انا مش بحب الكارى كوت احلى حاجة تضمى البيبى لصدرك احلى حاجة انا بحلم من دلوقتى المهم يا موناليزا انتى لازم تجيبى السرير و البانيو
اهم شىء بتقولى اجيبة ولا لاء لان لسة قدامك تحضير شنطة المستشفى هنا فى السعودية الوضع مختلف علشان كدة انا محتاسة لان بعد الولادة لازم الام و البيبى يفضلوا فى المستشفى 3 ايام لحد ما يتطمنوا عليهم يعنى لازم اخد الدولاب كلة معايا :yes:

توتونوتو ونور عاملين اية ادعوا لنا والنبى احسن انا بديت اخاف:sad: كل ما يوم يعدى اخاف اكتر

انا اكتشفت ان حاجة البيبي دي مابتخلصش, كل ما اشتري حاجة افتكر حاجة ناقصاني...

بتفكرني بأيام جهازي ماكنتش جايبه حاجة خالص قبل الخطوبه و اتخطبت اقل من سنه و كانت السنة دي هية بكالريوس و ماما ما كانتش ماعايا برضه
و كنت محتاسه حوسه و اتجوزت بعد ماتخرجت ب اسبوعين بس
و النتيجة اني لغاية دلوقتي بجيب حاجات البيت اللي مابتخلصش :)


انا حروح بقه اكتب لكم الحاجات كلها اهو و ليه رجعة...

بسم الله الرحمن الرحيم

دي الحاجات اللي وعدتكم اكتبهالكم , يا رب تكون شاملة و وافية كل حاجة و تبقى مفيدة ليكو و لو ناقص حاجة ياريت تفكروني
بس انا حكتب الحاجات من غير اعدادها عشان ده بيعتمد على ظروف كل وحدة


[grade="00008B FF6347 008000 4B0082"]اللبس [/grade]

سالوبيتات متنوعة ( كم و نص كم و رجلين مفتوحة و مقفولة حسب الولادة في اي شهر )
فنيلات داخلية بكباسين من تحت (كم و نص كم و كات)
بافتات البيبي بورن
لكلوك
جوانتي
زعبوط
شال شيك للخروج
رباط السرة (في ناس بتستخدم الشاش الطبي عشان يرموه بعد كل استخدام بدل مايغسلو)

[grade="00008B FF6347 008000 4B0082"]الحمام[/grade]

بانيو
ليفة اسفنج ناعمة
شامبو - صابون - شاور جل - لوشن - زيت للجسم - بودرة (اختاري ماركة الاطفال اللي تعجبك)
برنس اطفال
مقص او قصافة
مشط او فرشاة
اعواد قطن ( لتنضيف الأذن)

بامبرز (او اي نوع تحبيه)
كوافيل (احتياطي ,في نوع نازل جميل شبه البامبرز و نفس فكرته بس بيتغسل)
مناديل الأطفال المبللة
كريم للترطيب و منع التسلخات (انا جبت كريم زنك اوليف بيقولو حلو)
فوط احجام (كبير و وسط و صغير , و اللي بتحطّو على كتف الأم عشان لما يجشأ بعد الرضاعة)


[grade="00008B FF6347 008000 4B0082"]الأكل[/grade]

بيبرونه احجام (عشان الميّه و الاعشاب)
فرشة تنضيف البيبرونه
علب صغيرة لحفظ الطعام (احتياطي)
لهايّه (تيتينا)

[grade="00008B FF6347 008000 4B0082"]الكراسي[/grade]

سرير (بمرتبه قطن)
بطانيه
كوفرته
كرسي منزل هزاز
كرسي عربيه
عربية البيبي ( بتاعة الخروج)
كاري كوت (ده يا رور عشان لو كنت عند ناس مثلا و البيبي نام منك او تعبت من الشيل تحطيه فيه
او كنت في مطعم بتاكلي او حاجة )
كاريير (اللي بيشيلو البيبي فيه على الصدر بدل ماتشيليه على دراعك ,انا ماجبتوش الصراحة)
شنطة البيبي (اللي بتحطي فيها اغراض البيبي و انت خارجه)



دي الحاجات اللي عرفت احصرها ,طبعا مش كل حاجة فيها لازم نجيبها و لو عندكم اي اضافة ياريت تفيدوني, و لو عندوكو اي استفسار انا حاضرة :):)

في حاجات افتكرتها برضه بس انا ماجبتش منها حاجة سليباها بظروفها

بيبي جارد (جهاز من جزئين جزء بتحطيه جنب البيبي و هو نايم مثلا و انتي بعيدة عنه و الجزء التاني معاكي عشان تسمعيه لو صحي )

تيرمومتر قياس الحرارة

شفاط اللبن من الصدر