|,",|| دورة : كيف تكسبين محبوبك ||,",|| للمتزوجات و المقبلات على الزواج ||,",|

تسلمي عزيزتي على هالموضوع المفيد............و لو بإمكانك تضيفي موضوع بإسم ((دورة: كيف تحافظين على محبوبك))
لأن كسب الحبيب صعب لكــــن الأصعب المحافظة عليه!!!

موضوع رائـــــــــــــع فعلا ..

شكرا لك اختي

الله يعافيكم جميعاً ..

*
*

أختي خيال ملاك ::

عشان تحافظين عليه .. اكسبيه في البداية .. و صدقيني لو قدرتي تكسبينه .. بتعرفين

اشلون تحافظين عليه من غير ما أعظيج أي دورة :)

*
*

هلا فيكم

الطريقة التاسعة :: تجنبي الشكوك ::

في شكوك و في غيرة / الغيرة مقبولة و مرغوبة أحيانأ و انا اقصد الغيرة المعقولة .. أما

الشكوك فهي مرض ونار تغلي في قلب الشكاك .. و نار تكبر تبدا بالسؤال الواحد .. عقب هالسؤال

يستوي أسئلة كثيرة ما لها حد .. بعدين تتحول الأسئلة هاذي الى تنصت و مراقبة و تتبع و تفتيش

في الجيوب ... الخ ! عملية كبيرة و معقدة ما لنا بها ..

المرأة اللي تشك دايماً عايشة في قلق و توتر و معاناة و إكتئاب .. و ممكن تمرض بعد !! و يصيدها

مرض ذهاني و في هالحالة راح تحتاج إلى طبيب نفسي ..

عشان جذي .. إذا ما كنتي تشكين قولي الحمد لله لأن هذا أمر طيب .. و تجنبي الشك من البداية ..

و إذا ابتليتي بالشك و تعانين منه لازم و حتماً تتخلصين منه .. و تفضلي الطرق اللي ممكن

تساعدج للتخلص من الشكوك

1- اقطعي الشك من أول وهلة .. و لما تكون السالفة فكرة بس اقطعيها ..

2- إذا لا سمح الله شكيتي لا تتحققين ,, لأن ورد في الحديث الشريف ( إذا شككتم فلا تحققوا )

يعني لا تسوين شي و إذا كنتي تراقبين زوجك أو تتنصتين عليه .. اطلبي العلاج على طووول ..

و لا تطولين في المسألة ..

3- إذا كانت عندج شكوك و في مواقف أكدت شكوكج .. لا تحترقين بشكج .. روحي و صارحي زوجج و تأكدي ( إن الله لا يهدي كيد الخائنين ) ..

4- إذا عشتي في بيت أهلك .. و بين أم كانت تشك أو أب شكاك .. و تعترضتي أنتي للشكوك , اعرضي نفسج على طبيب نفساني .

5- إذا لا سمح الله زوجج فقد الثقة فيج .. بسبب شكج و متابعتج له .. تقدرين تردين الثقة و تبنينها
جديد في فترة ست شهور تقريباًُ بس متى ؟ إذا قطعتي التحقق تماماً ..

6- تعلمي الجلسة الإسترخائية .. لأنها راح تعينج على التخلص من الشكوك و التوتر بشكل عام ..

7- إذا مانفع الحوار مع الزوج و لا فادتج الاستشارة النفسية ,, وقتها اعرضي نفسج على الطب النفسي ..

:clap:

طيب خلنا نقول إن الزوج هو اللي يشك فيج .. اشلون بتقدرين تخلصينه من شكوكه ؟؟؟؟

( هالكلام للي زوجها شاك على الفاضي أو الشك صفة فيه و مبتلي فيها )

انا اقول لج اشلون .. تابعيني :)

تفضلي :

1- إهتمي فيه أكثر ..

2- اكدي من الوقت للثاني إنه هو الوحيد اللي في قلبج .. و كل معاني الحب اللي في داخلج له ... الخ ..

3- حاولي تجرينه في الكلام .. و خليه يتكلم عن طفولته و ماضيه .. يمكن تكون في حوادث مترسبة
في نفسه .. و تخليه يشك في أي شي ..

4- تحاوري معاه في هالموضوع ( الشك ) و اوعديه إن الكلام بيدور بينج و بينه ..

5- علميه على طول وين تكونين .. رحتي مشوار .. طلعتي مع اختج مع صديقتج علميه على طول بمكان تواجدج .. هالشكل أنتي بتساعدينه يتغلب على شكوكه + لا تنسين تستأذنينه في أعمالج و خروجج .. بالعربي حطيه في الصورة ..

6- لا تسمحين له يتمادى في التحقق من شكه و متابعتج .. و أكدي له إنج مستحيل تسوين أي شي هو يشك فيه .. بعد ما تسمحين له يتعرض لكرامتج أو يشكك فيج .

7- إذا استمر في شكوكه و لا شي نفع وياه .. تعالي له في لحظة هدوء و استرخاء و اقترحي عليه إنه يطلب الاستشارة النفسية ..

" الله يهدي جميع الشكاكين من الازواج " :)

*
*
*



الواجب الثاني عشر

اكتبي في ورقة المفاهيم :

" الشكوك مرض يعالج بمواجهته و ترك التحقق "


:)


الطريقة العاشرة :: اخلصي الدعاء لله :: قريبــــاً

جزاك الله خيرا

ووفقك الله دائما

سؤال اذا الزوج من النوع غيرمبالي بوجودزوجته اوما يشعربوجودها اوما يرد ع تلفوناتها

فكيف تتصرف معااه؟؟؟

انادايمااسمع مثل هالجمل

ومرات تصير لي يوم ازعل منه والغلط منه ما يعتذر ويستمرايام عادي مايرمسني اويعتذر لاني معصبة ؟فشو حل هالحالة؟

واحنامتابعين لج

جزاك الله خير فعلا استفدت كثير لاني مقبله على الزواج وربي يسهل ان شاءالله

وانا كنت جدا متخوفه كيف ابتصرف معه في بداية الايام وانا من النوع الحساس مجرد تفكير على طول احس بضيقه واصيح لاني متوتره؟؟؟؟؟؟؟؟؟ شو الحل حبيبتي

انا متزوجة من 15 سنه والسنتين الاخيرة صرت اشك في زوجي وشكى له مو من فراغ صار يسافر كثيربحكم شغلة واحيانا من غير شغل صار جوالة معلق في صدرة24 ساعة حتى في دورة المياة يدخلة معاه أنا تغيرت كثير افتش فى كل اغراضة لانى شاكة فية حتى جوالة اشوف مين اتصل علية وكلم مين وهو انتبة لهذى الشغلة وعمل قفل للجوال .لقيت عندة ارقام خارجية واتصلت عليها وكانت الصاعقة مو كلها للرجال .تعبت نفسيا وصرت اتخاصم معاه بأستمرار وخاص أذا قال لى بيسافر واحنا قريب من دولة شقيقة صار يروح ويجى يمكن في الاسبوع "اسبوع" واذا صار بيننا نقاش حتى لو عادى يروح لهذا الدولة أنا مو شاكة أنا متأكدة انه عندة علاقة هناك
في هذى الحالة ايش اسوى ؟انا وزوجي كنا قمة في الحب والكل كان شايف هذا الحب والحين تغير هذا الحب وصار.............. أنا الحين متحسفة انى تزوجت وأنا صغييرة وانصح كل وحدة تنتظر لحد ما تبلغ العشرين وبعدين تفكر تتزوج لان الصغيرة تحب ممن كل قلبها ويستمر هذا الحب لمماتها والشي القوي وايلي ممكن يسبب لها صدمة انه يروح لغيرها وهو عندة عادى طالما موفر لكى الاكل والشرب والملبس والرفاهية

دوحانية


اكيد متابعينج بكل تركيز

و ننتظر تكملة الموضوع بلهفة


الله يعطيج العافية

معتزلة الغرام


نصيحتي لج


لا تخلين الشك يدمر بيتج


وحتى لو تحول الشك الى يقين


بعد لا تدمرين بيتج بيدج


واغلب الأزواج تمر عليهم بعد سنوات زوااااااج


علاقات عابرة او نزوات ويبتدون يطالعون برع البيت


بس الزوجة الذكية لازم ما تطور هالعلاقات العابرة وتطفش زوجها من البيت


وتزين له البنت الثانية الي عرفها بالحرام واللي الشرع ما حرم عليه انه يتزوجها بالحلال




تحملي تواجهينه او تتغيرين عليه او تقصرين عليه باي شي

لا تخلين له ثغرة تنفره منج


نصيحتي لج بكلمة وحدة : احتوي زوجج

تسلمون على مروركم ..

بارجع إن شاء الله أرد عليكم وحدة وحدة ..

و أضيف لكم تكملة للموضوع ..

و السموحة :)

مشكورة اختي دوحانية على الموضوع جزتكي الله كل خير

اخت دوحانية ما قدرت اشوف الattachementللجدول في صفحة 3 يقول لي
ملف مرفقTo view attachments your post count must be or greater. Your post count is 0 momentarily.
ما فهمت شو القصد؟

هلا أختي أم جنى :)

و يجزينا وياج كل خير ..

بخصوص المرفقات .. ما عندي فكرة ..

لما توصل مشاركاتك 15 مشاركة .. ارجعي للمرفقات شوفي تقدرين تشوفيها و لا لا .. و إذا

المشكلة ما زالت موجودة .. اسئلي المشرفات ..

الله يوفقك و يفتح لك أبواب فضله وين ما كنتي و يحقق لك خير ما تتمنين ..

راااااااااااااااااااااااائع بمعنى الكلمة ..

دعواتي لك الله يسعدك ..

أختي ودي بحبك

سؤال اذا الزوج من النوع غيرمبالي بوجودزوجته اوما يشعربوجودها اوما يرد ع تلفوناتها

فكيف تتصرف معااه؟؟؟

انادايمااسمع مثل هالجمل

الإحتمالات كثيرة ::

1- يمكن تكون عنده معلومات مغلوطة بخصوص الزواج .. فهنا لازم تتصحح هالمعلومات ..

2- ممكن تكون هاذي طبيعته ( جامد ) .. هنا لازم تتحملينه .. خاصة إذا كانت هاذي تصرفاته من
البداية ..

3- إحتمال تكون تصرفاته هاذي .. تعبير عن حاجة في داخله .. يعني ممكن يبي يبين لك إنك مقصرة معاه في حاجة .. أو أي شي ثاني ..

كيف تتصرفين معاه ؟

بالمصارحة :)

اجلسي معاه و صارحيه بكل اللي يدور في قلبك و تحسين به .. يمكن اللي تتكلمين عنه هو مو منتبه له .. جلسة مصارحة معاه .. بتتكشفين حاجات كثيرة ..

ومرات تصير لي يوم ازعل منه والغلط منه ما يعتذر ويستمرايام عادي مايرمسني اويعتذر لاني معصبة ؟فشو حل هالحالة؟

عزيزتي ..
في شغلة انتبهي لها .. و هي إن الرجّال ( نادر ) ما يعترف بخطأه .. أو يعتذر لك بصراحة .. فالمطلوب منك .. حتى لو كان هو غلطان تحاولين إن الليلة ما تمر الا و هو راضي عليك و أنتي راضية عليه .. ولا تزعلين لأنك راح تتعبين :)

الله يوفقك (f)

أختي feedback

ليش تتوترين ؟ المسألة جداً عادية ..

كيف تتصرفين معاه .. هذا أنا ما اقدر اقول لك إياه أو أعلمك .. لكن أهم حاجة هي إنك تتصرفين على طبيعتك + لازم تكونين عارفة حقوقك و الواجبات المفروضة عليج كزوجة ..

أنا أنصحج تثقفين نفسج أكثر في مسألة الزواج و الحقوق و الواجبات ..

و الله ييسر لك كل أمورك (f)

أختي معتزلة الغرام

رايي من راي الأخت شظايا الماضي " الله يجزاها خير " كفت و وفت ..

والله يصلح الحال

*
*

خواتي ::: لمسة أمل / باليرينا / شظايا الماضي / صعود ::

جزاكم الله خير على متابعتكم (f)

الطريقة العاشرة :: اخلصي الدعاء لله ::

نعم .. أكثري الدعاء لله .. لأن من الحاجات الرئيسية و اللي بإذن الله راح تعينك على الحياة الزوجية 3 أشياء : 1- الإيمان . 2- الدعاء . 3- العمل الصالح

تذكري قول المولى عز و جل في الإيمان و العمل الصالح :: ( من عمل صالحاً من ذكر أو أنثى و هو مؤمن فلنحيينه حياة طيبة ) ..

و تذكري قوله في الدعاء ( و قال ربكم ادعوني استجب لكم ) ..

يعني تخيلي حياتك كيف بتكون لو وفيتي هالجوانب الثلاث :: أن تكونين مؤمنة بالله وحده و تعملين أعمال صالحة يتقبلها الله بإذنه .. و تطلبين ربك بنية صافية و خضوع .. و يتقبل ربك منك دعائك و عملك و إيمانك ( تخيلوا لدقايق ) (f)



هاذي 7 معينات للدعاء المستجاب ( بإذن الله ) ::

1- ادعي بخير دائماً .. و امنعي نفسك من إنك تدعين على أي بشر مهما كان ..

2- ادعي و انتي موقنة بالإجابة ..

3- خلي دعائك في كل وقت . و لا تيأسين .. لأن الله يحب من عباده الملحين بالدعاء ..
و لا تنسين أوقات الدعاء : وقت المطر / السفر / المرض / السجود / بين الإقامة و الصلاة / و بعد الصلاة المفروضة / و عند خطبة الجمعة / و قبل الغروب / و عند شرب ماء زمزم ..

4- اخلصي الدعاء لله وحده .. و لا تشركي به أحداً نبياً كان أو وليا صالحاً أو حجرا أو شجرا أو مشعوذ .. خلي دعائك لله ..

5- الصدقة .. و أنتي تدعين تصدقي .. و أنتي تتبرعين بأي حاجة ادعي الله يتقبل هالعمل خالص لوجهه ..

6- اعملي عمل صالح .. لأن الدعاء يرفع العمل (( اليه يصعد الكلم الطيب و العمل الصالح يرفعه ))

7- إذا لزم الأمر صلي صلاة الحاجة .. ركعتين تقرين في الركعة الأولى بعد الفاتحة سورة الكافرون و في الثانية الإخلاص .. ثم تدعين في السجود الأخير بهالدعاء :

"" لا إله إلا الله الحليم الكريم ,,
سبحان الله رب العرش العظيم ,,
الحمد لله رب العالمين ,,
اللهم أسألك موجبات رحمتك و عزائم مغفرتك و العصمة من كل ذنب ,,
و الغنيمة من كل بر ,, و السلامة من كل إثم ,,
لا تدع لي ذنبا إلا غفرته ,,
و لا هماً إلا فرجته ,,
و لا حاجة هي لك رضى ولي فيها صلاح إلا قضيتها يا أرحم الراحمين ,, """

بعدين تسألين حاجتك ::

""" اللهم وفق بيني و بين زوجي و عمّر المحبة بيننا ""




الواجب الثالث عشر

اكتبي في ورقة " مفاهيم " :: الإيمان و الدعاء من أقوى معينات الإستقرار الأسري ::
و اكتبي في ورقة " أعمال يجب إنجازها" :: الدعاء يومياً لله بتقوية علاقتنا الأسرية ::



*
*
*
*

في غرفة النوم [ قــريــباً ]

:)