|,",|| دورة : كيف تكسبين محبوبك ||,",|| للمتزوجات و المقبلات على الزواج ||,",|

دوحانية انتي رووووووووووووعه ماشاء الله عليج والله يخليج لنا
ونستفيد من هالخبرات العجيبة
صراحه انا معاج لي اخر الدورة وان شاء الله الجميع بيستفيد
عندي استفسار المفاهيم هل انتي جايبتها من كتاب معين ؟؟

السلام عليكم ورحمة الله
الصراحة موضوع رائع وشيق وأستانسة يوم قريته لان هذا فعلا الي يصير في حياتنا الزوجية وبعدين هذا عن تجربتي الشخصية مع زوجي.......الله يوفقك وأتمنى لك التوفيق دائما وننتظر المزيد

مرحبا اختي دوحانيه يعطيك العافيه على هذا الموضوع


وانا محتاجه هذا الموضوع جدا جدا جدا........


وهل تطابق الرواح في كل الازواج ؟؟


كيف ؟؟

وشلون تفسرين الاختلافات الكثيييييييره بين الازواج سوا كانو متفقين في المواصفات اولا


وسوال مهم :angry: :angry: :angry:


اذا زوجك في خصلة ماتحبيها وحاولتي تغيريها في كافة الطرق وصارحتيه اكثر من مره وطلبتيه


وترجيتيه انه يغيرها لاكن مافيه اي استجابه ايش تسوين كيف تتعاملي معاه خاصه اذا مريتي


بفترات يدخلك اليأس وتكوني معاه فاتره ومن غير نفس ممكن يسأل اش فيك وماحتى تردي؟؟؟




يالله جاوبي:dd:

ما شاء الله تبارك الله
الله يعطيك العافيه اختي
ويجعلها بموازين حسناتك

ننتظر التكملة دوحااااااااااااااااااااااااااااااااااااااااااااااااااااااااااااااانيه

هلا والله بدوحانيه
صج اني جيت متأخر بس الصراحه قريت كل كلمه قلتوها واحس اني تعلمت شغلات وانتبهت حق اشيا انا ما كنت حاطتها في بالي

اشكرج الصراحه على هالموضوع الهام والقيم والي الصراحه ساعدني واااااجد وانا توني قاريته...
باكون معاكم خطوة بخطوة وبكل مرحله لأنه احس انه هالكلام كله مفيد وبيخلي كل حياه ان شاء الله بسعاده....

انا عن نفسي احس اني فهمت زوجي بس بهال 9 شهور من اول ما تزوجت لأنه مرات اطرح عليه اسأله الزوج يمكن تكون بداخله بس يبي احد يسمعه ويعرف شنو بداخله ...

لازم تعرفين زوجج شلون نفسيته بكل شي عشان تقدرين تتعاملين معاه انا احس كذا

ماراح اطول عليكم بس بعد مشكووووره يادوحانيه وجزاج الله الف خير ان شاء الله :)

أعتذر عن التأخير خواتي .. بس مشاغل الدنيا ما تخلص :)

*
*

شظايا الماضي :: أم المشاكس :: الليازي :: ريانة العود :: pinky_flawer :: أخت القمر ::

جزاكم الله خير على مشاركتكم و ردودكم اللي تسعدني .. و تحسسني إن مجهودي مب على الفاضي .. الف شكر لكم :)

*
*

أختي *((أم راشد))* ::

مشكورة عزيزتي على المتابعة :)

بصراحة الموضوع كله مو من عندي .. من كتاب قريته من فترة .. و استفدت منه ..

و حبيت أنقله لكم بطريقتي .. و أحس إني أسولف معاكم .. ^_^

*
*

أختي أم شيوخ ::

مشكورة حبيبتي على مرورج ..

امممم تدرين إن أول سنة للزوجين هي سنة تخبطات !!

مع إني مثلج أحس إني فهمت ريلي بهالكم شهر .. لكن أتفاجأ إني بعد محتاجة أفهمه أكثر ..

المواقف اللي ممكن تصير بينّا .. العشرة و توطد العلاقة .. كل هذول يأكدون لي إني لحد الحين

ما فهمت ريلي 100% ..

*
*

نكمل باقي الموضوع :)

ارمني

مشكورة على متابعتك ..

أختي بالنسبة لتطابق الأرواح .. أقدر أقول موجود في كل الأزواج بنسبة كبيرة ..

لأن إحنا مثل ما ذكرت نقول " نصيب .. " بالرغم من الفروقات اللي نشوفها في الزوجين ..

و الإختلافات موجودة في أي زوجين .. سواء إختلافات ظاهرة أو باطنة .. و مثل ما قلت للأخت

أم شيوخ .. بداية الزواج عقبات و إختلافات و ممكن صدمات .. لكن العشرة تفهّم كل زوج و زوجة

طبيعة الطرف الثاني ..

و على فكرة .. مع مرور السنين .. بتلقين هالزوجين يتشابهون حتى في الشكل ..

تحسين كل واحد فيهم ياخذ من الثاني .. :)

وسوال مهم


اذا زوجك في خصلة ماتحبيها وحاولتي تغيريها في كافة الطرق وصارحتيه اكثر من مره وطلبتيه


وترجيتيه انه يغيرها لاكن مافيه اي استجابه ايش تسوين كيف تتعاملي معاه خاصه اذا مريتي


بفترات يدخلك اليأس وتكوني معاه فاتره ومن غير نفس ممكن يسأل اش فيك وماحتى تردي؟؟؟

عزيزتي .. إحنا ما نبي الزوجة توصل لمرحلة الياس ..

عليج بالمحاولة مرة مرتين ... عشر .. 100 مرة .. غيري من نفسج و غيري طريقتج .. مرده بيتغير

لو ماكان اللي تبين تغيرينه طبع .. لأن الطبايع ما تتغير بسرعة .. ^^

أتمنى إني جاوبتج :)

[grade="00008B FF6347 008000 4B0082"]شاكرة لك دوحانية على المعلومات الرائعة

ولقد سمعتها كلها في شريط وكتاب ( كيف تكسبين محبوبك) للدكتور صلاح الراشد

وله شريط ايضا (كيف تكسب محبوبتك) خاص للرجال

وانصح الجميع اقتنائه


بس اسلوبك رائع ،،،،



الف شكر حبوبة [/grade]

|,",|| دورة : كيف تكسبين محبوبك ||,",|| للمتزوجات و المقبلات على الزواج ||,",|

حوار <<----- حب ----->> بناء

كلمة ( حب ) تتكون من حرفين الحاء و الباء .. خلها تذكرج بـ ( حوار بنّاء ) ..

و للحوار الفعّال بين الزوجين 3 قواعد رئيسية :

1- الإفصاح بدقة عن مشاعرك .

2- الإستماع بإنصات إلى الطرف الآخر .

3- تقبل مشاعر و رأي الطرف الثاني حتى و لو كانت المشاعر و الآراء مختلفة عنج .

إذا هالشروط ما تحققت = الحوار غير فعّال و ما منه فايدة .. و الزوجين بيكونون في حاجة لتدخل

أطراف متخصصة ( و إحنا نتمنى قد ما نقدر إن ما نوصل لهالمرحلة ) . .

طبعاً لا تنسين عزيزتي .. تعطين زوجج فرصة إنه يتكلم .. و لازم بيكون في تنازل عن راي ( سواء

رايج أو راي زوجج ) إذا في راي أصح منه ..

خلونا نشرح القواعد الرئيسية الـ3 :

1- الإفصاح بدقة عن المشاعر

صارحي الزوج بإنج محتاجة تتناقشين معاه في موضوع معيّن يعنيج .. مثلاً : صارحيه بإنج تبغين

شوية إهتمام عاطفي / أو رغبة في الجنس لمدة أطول / .. خلج صريحة و دايركت معاه ..

و لا تدورين و تلفين .. لأن الصراحة في مثل هالمواضيع مثلاً مطلوبة جداً ..

عبري عن مشاعرج بصراحة " أنا خايفة " ,, " أنا أغار ... " ,, " أنا محتاجة ... " ,, " ودي أقعد

معاك وقت أطول هالأسبوع " ... الخ .. لأن التعبير عن المشاعر بيخليج صادقة مع نفسج أولاً ..

و بترتاحين ..

لا تكبتين مشاعرج لأنه خطأ .. و تدرين ليش خطأ ؟ لأن العواقب

مكلفة .. الكبت ما راح يحل مشكلة و لا راح يوصل للطرف الثاني اللي أنتي تبينه .. و اللي تبينه

- و هني أقصد المشاعر - ما راح يستوي من تلقاء نفسه ..

و عشان تصارحين باللي في نفسج و تفصحين عنه و بدقة .. لازم تتكلمين بتأدب و لطافة ..

و حاسبي لا تكون في صراحتج تجريح للزوج .. قولي رايج بلطف و شوي شوي ..

و حاسبوا من المرادم :dd:

2- الإستماع بإنصات للطرف الثاني :

المقصود هنا ( افهمي و تفهمي زوجج ) و ذكرنا إنه عشان تفهمينه لازم تسمعين له ..

كلنا نعرف نسمع .. لكن مب الكل يعرف يستمع .. لأن الإستماع فن .. و في فرق بين تسمعين و

تستمعين ..

قلنا إن الإستماع فن .. و هو سهل .. اسمعي عدل و افهمي و بعدين قولي رايج ..

القاعدة تقول : إفهم قبل أن تًفهَم ..

في دراسات تأكد إن أغلب المشاكل الزوجية سببها تافه .. هو سوء الإتصال ..

و تأكدي عزيزتي إن الإستماع صفة الناجحات .. و إن الله عطاج أذنين و لسان واحد ..

فاستمعي ضعف ما تتكلمين ..

3- تقبل الرأي الآخر :

إحنا كمجتمعات شرقية .. ما تعلمنا أو أقدر أقول ما نعترف بهالنقطة .. و أكيد أنتوا معاي ..

و متبعين قاعدة ( كل شخص يخالفني الراي .. يعني هو عدو و خصم لي ) و هذا غلط ..

لأن يمكن اللي يخالفني شخص أحبه واايد ..

و القرآن الكريم ذكر خلافات زوجات النبي عليه الصلاة و السلام .. لكن ما تغير شي من حبهم له

و لا حبه لهم رضوان الله عليهم جميعاً ..

خلي صدرج وسيع .. و تقبلي راي زوججخاصة إذا صارحج بمشاعره ..

اشلون بتتصرفين لو جا مثلاً و قال لج : ( أنا عندي مشكلة في الفراش ) .. أو ( عندي رغبة في

الزواج ) أو أي شي ممكن ما تتقبلينه ..

تعودنا كحريم .. نستقبل مثل هالأمور بالصراخ و العويل .. الشي اللي يخلي الزوج يكتم على كل

شي و مايتكلم .. و الكتمان قنبلة موقوتة ..

الصراحة .. يقول لج عن اللي يكرهه أحسن من إنه يكتمه .. خليه يفكر معاج بصوت عالي ..

خليه يتكلم .. اعرفي مشاعره .. اعرفي أسبابه و النتايج اللي يبي يوصل لها .. و بعدين

ناقشيه بالبدائل ..

و تحملوا يا أخواتي .. لو وحدة زوجها صارحها بشي في نفسه .. تروح تقول للغير .. خلي كل

حاجة بينكم سر .. و لا تعايرينه باللي قاله لج .. بالعكس شجعيه و خليه يتكلم و يعبّر ..

*
*

في نقطة مهمة .. أبيكم تعرفونها يا أخواتي .. خاصة بالحوار ..

و هي المفاهيم السابقة اللي شايلها كل طرف عن الزواج

و معتقداته ..

يعني أنتي جاية من بيئة و عندج خلفية معينة عن الزواج .. زوجج كذلك .. جاي و عنده معتقدات

عن الزواج .. ( أنصحكم بقراءة كتاب : الرجال من المريخ و النساء من الزهرة ) مفيد جداً في

هالخصوص ..

الإنسان بطبيعته تركيبة معقدة جداُ .. كل شي عندنا نقوله و نسويه و نفكر فيه ما طرى علينا الا

و له علاقة بتجارب سابقة ..

مثال :

زوجين يشوفون إن الحب مهم في الحياة الزوجية .. لكن كل واحد فيهم له مفهوم مختلف

كلياً عن الحب ..

الزوج يشوف إن الحب حماية و رعاية للزوجة ..

الزوجة تشوف إنه عطاء و تضحية ..

الزوج يشوف إن زوجته تحبه لما تستمع له ..

الزوجة و الله تشوف إن زوجها يحبها لما يقعد معاها وقت أطول ..

و هكذا .. و هالمثال موجود بين الأزواج ..

لذلك .. عليج تفهمين و تعرفين مفاهيم الزوج الخاصة تجاه المشاعر المهمة بالنسبة لج ..

قعدوا و خلوها جلسة نقاشية ( بعد ما تستأذنينه في هالشي أكيد ) .. و النقاش يدور حول موضوع

معين.. ( الحب .. الأسرة .. العلاقات الإجتماعية .. الإلتزامات المالية ... الخ ) ..

الجلسات هاذي بتكون عبارة عن أسئلة توجهينها له .. و تتناقشون فيها مع الأخذ بالإعتبار

الشروط الثلاث اللي ذكرناها ..

*
*
راح يكون عندنا واجب بإذن الله .. بس أجهزه و أنزله في أقرب وقت .. :)

دوحانيه

موضوع رااااااااائع .. يعطيج الف عاااافيه

زهرة سدير ..

هلا فيج أختي ..

و نعم الموضوع هو نفسه محتوى كتاب ( كيف تكسبين محبوبك ) و على فكرة ( كيف تكسب

محبوبتك ) يحتوي على نفس النقاط تقريباً .. :)

الف شكر لمتابعتج ..

*
*

لذيـــذة ..

هلا أختي .. و الله يعافيج :)

الواجب الثامن

نفذي جلسات للتحاور ..

الجدول موجود بالمرفقات .. و كل اللي عليكم إنكم تعبونه بالمواضيع .. ولا تنسون تراوون أزواجكم

المواضيع و عطوهم فرصة للتعبير .. يعني لو حاب يغير موضوع معين أو يضيف موضوع ثاني له

الحرية ..

حددي الوقت قبل الجلسة بيوم على الأقل .. و كل ما أنجزتي جلسة حطي عليها علامة صح و اكتبي

" أنجز " .. دوني أي ملاحظات .. مثل : " لم ينته النقاش بعد " " تم تأجيل النقاش إلى ما بعد

مناقشة ... " ..

بعد كل جلسة .. سجلي الملاحظات في ورقة مستقلة .. عن أهم المفاهيم و النتائج .. و بعدين

الأعمال اللي تبين تسوينها ..

تسلمين يالغاليــهـ على درسـ اليومـ الصــراحه شد إنتباهيـ أكثــر ،..
وراح أبتدي بالنقاشـ على طووولــ ..


1- الإفصاح بدقة عن المشاعر :

بخصوصـ [ الصراحه ] لااااابد تكونـ الزوجه صرريحه مع زوجها وزوجها بعد يكونـ صريح
وماافيـ أحلى منـ الصــراحه كلـ واحد يطلع الليـ بقلبه لأنه إذا كتمـ الشخصـ بقلبه ماراح
تنحلـ السالفه بالعكسـ راح تزيد المشاكلـ وتضعفـ العلاقه منـ بينهمـ وراح يحدثـ نوع منـ
الفتور لكنـ عكسـ إذا كلـ شخصـ فضفض الليـ بقلبه ..

مثالــ ..
أنا عنـ نفسيـ منـ بداية الملجه عودتـ بوالشبابـ يكونـ صريح وياي وأنا بعد أكونـ صريحه
وياهـ ..


2- الإستماع بإنصات للطرف الثاني :

إذا الزوج ماسمعتي له ولاعرفتي شنهو الليـ بخاطرهـ !!
وعلى فكرهـ أغلبـ المشااكلـ الليـ تحدثـ بينـ الأزواج سببها الزوجه ماتسمع لزوجها ولاتعطيه
أيـ أهميه ،.. وترى الزوج وااااايد حساسـ إذا لاحظ إن زوجته ماتهتمـ فيه ولاتسمع له صدقونيـ
بيززهقـ منها ..


3- تقبل الرأي الآخر :

في جمله قلتيها يادوحانيه وبالفعلـ أنا مأيدتج 100% الليـ هيـ :
( كل شخص يخالفني الراي .. يعني هو عدو و خصم لي ) ..

تصدقينـ دح دوح أنا عنـ نفسيـ إذا بوالشبابـ خالفني الراي بالعكسـ أتقبلـ
الموضوع لكنـ فيـ أوقاتـ يحز فيـ خاطريـ خخخخ

وبخصوصـ المفاهيمـ مثلـ ماقلتيـ سبحانـ الله المفاهيمـ تختلفـ يعني في شغلاتـ أنا أشوفها
عاديهـ لكنـ بوالشبابـ يشوفها غلط والعكسـ صحيح ..

يعطيج العافية
وربي يرزقج الذرية الصالحة

الليازي
مشكورة على مداخلاتج التحفة .. و أنا معاج في كل شي قلتيه ..

*
*

جست فور هم << عيزانة تكتب بالإنجلش ^_^

آآآآمين .. و جزاج الله خير ..

هالمرة بازود الجرعة من الموضوع .. خلكم معاي و تابعوني



سادس طريقة :: أظهري إهتماماً بجسده و مظهره ::

من المتعارف عليه بينّا كإناث .. إن نلقى من المديح و المجاملات أضعاف مضاعفة .. يعني لو سألتج

عزيزتي .. متى آخر مرة سمعتي فيها مدح لج؟ اللي بتقول اليوم .. أو من شوي .. أو بالكثير

أمس ..

لكن لو سألت أخوي او أي رجل آخر .. لا تستغربين لو قال لج ( و لا مرة ! ) أو .. أذكر إنه الشهر

اللي فات اختي امدحتني أو قالت لي شي ..

لأن الحاجة هاذي متعارف عليها و إحنا نشوفها طبيعية .. :gum:

الدراسات شتقول ؟ تقول إن الأولاد يقضون نفس الوقت اللي تقضيه البنت جدام المرايا .. بس وشو

اللي يصير ؟ إن البنت تلقى المديح أكثر .. او يمكن هو ما يلقى على كشخته و مظهره أي كلام

أو تعليق !!

بس على فكرة يا جماعة ترى الرجّال يحتاج لمن يمدح جسمه و مظهره بالضبط مثل ما تحتاجينه

أنتي ..

يعني انتي لو كنتي كاشخة و مظرج وااو و رايحة حفلة .. إذا ما لقيتي المديح من زوجج .. راح

تلقينه من أي حد موجود في الحفلة .. صديقاتج .. صديقة أمج .. اي حد ..

لكن الزوج إذا ما لقى الإهتمام و الثناء من البيت .. نادر لما يلقاه برى البيت ..

مسكين الريّال .. صح ؟

يعني تخيلوا خواتي .. يمشي الريّال و ملبسه مكلفه غالي .. الغترة مكوية و منشية ..

الثوب من أروع ما يكون خامته ممتازة .. و تفصيله مرتب .. و العطر من كثر تركيزه تشمينه من

بعد أميال .. غير النعال الله يعزكم تلق ما هي جديدة .. يعني يسرف و يبذر في الأخير ما

يحصل كلمة و لا ثناء حلو .. حرام ( حنوا على أزواجكم يا متزوجات )

امدحي فيه كل شي .. كشخته .. ثوبه .. غترته .. بسمته .. ضحكته .. ريحته .. وقفته .. مشيته ..

رجوله .. ايديه ... الخ ..

لا تنتظرين لحد ما تسمعين التعليق من غيرك .. انتي ابتدي .. و قولي اللي عندج بكل صدق ..

بس انتبهي : لا تمدحينه مرة وحدة انتهزي الفرص ..



الواجب التاسع

هاتي ورقة و كتبي العنوان ( صفات عظيمة في زوجي ) و اكتبي فيها الأشيا اللي عند زوجج ..

و أي ملحوظة أو صفة تقدرين تثنين عليها .. و كل شي يشعره برجولته ..

*
*
*

الفقرة الجاية : اكتشفي السر العظيم و المخبأ عن الرجل :)

مرحبا اختي
انا متابعه معاك من زمان
وبصراحه انا اعشق هالمواضيع اللي تخص تحسين الشخصية وكيف نتعامل
مع الجنس اللطيف وكذلك كيف نتعامل مع الرجل مااحب اسميه جنس خشن لان
هالجمله او المعنى مو حلو
وانا معاك مئه بالمئه وخاصه بمايتعلق في
أظهري إهتماماً بجسده و مظهره
صدق الرجال من هالناحيه جدا مسكين وفقير يالله بالسنه حسنه يحصل له كلمه مدح

وشكر اختي ويعطيك ربي مليون عافيه وانا بنتظار الباقي
وعلى فكرة انا من زمان حابه اقرء كتاب كيف تكسبين محبوبك
انا عندي كتاب " الفرق بين الجنسين " وبصراحه هالكتاب خيال حلو ومفيد بمعنى الكلمة
يعطيك العافيه مرة ثانيه

شكراً أختي أنفاس طفلة على المتابعة :)

بخصوص الكتاب .. هذا هو صار بين ايدينج .. بس بأسلوبي ^_^

أتمنى لج الفائدة ..

يسلمو