رابطة امهات ديسمبر... حيااااااااااااااااكن هوووون !!

هلا بيكم بنات وصباح الخير عليكم..
مشكورة الاخت جمانة..هههههههههه قلت لج طول ما انا اشرب هالحديد احس بالامساك بس انا عاد عندي الحل (الصبار)..
انا بعد فكرت اخد الوان تناسب الجنسين...
بنات بالنسبة للخطوط اللي تطلع بالجسم حد منكم طلعت له وفي اي اسبوع وشنو تستخدم؟؟؟؟؟؟؟؟؟؟؟؟؟؟؟

انا الحين بجهة اليمين واليسار فوق عظمة الحوظ قاعد يطلع لي خطوط لونها وردي غاتم او مايل على البنفسجي وخايفة انهم يزيدون..بديت استخدم زيت الزيتزن بس زوجي ماارتاح له ولا انا..بعدين لقيت في الصيدلية زيت الموند نفسشكل زيت الزيتون بالضبط ونفس الماركة واستخدمة يمكن مرتين بالاسبوع ريحته وكثافته اخف من زيت الزيتون ادهن فيه جوانب الحوض والصدر لان سمعت ان الصدر بعد الولادة يصيده جفاف والحلمات تتشقق وماتقدرين ترضعين ولازم نستخدم زيت..والله يستر لان انا خد الزيت بكيفي محد نصحني فيه..ههههههههه

هلا بنت البحرين..انا الدكتورة قالتلي ابتعطيني كريم خاص بس مو الحين بعد ما اخلص من الشهر الثالث..

الحين انتي اي اسبوع؟؟



على فكرة عادي الخطوط اتللي تطلعلج بتروح ان شاء الله اذا مو الاشهر اليايه بعد الولادة لا تحاتينهم :)

حبيبتي ام فروحة انا بالاسبوع 17 الحين بس اخر مرة رحت الدكتورة ماكان طلعت الخطوط بروح السبت وبخبرها يمكن تفيدني

زيت اللوز اختي بعد وايد حلو لترطيب البشرة...

انزين ما دام انتي رايحة الصيدلية ليش ما سأليتهم عن كريم زبدة الكاكاو؟ هذي المنصوح به عادة للحوامل.. ومافيه ريحة او مساوئ زيت الزيتون.. :)

بنات هذاك اليوم قريت موضوع عن فاكهة السفرجل..سمعت يمنع الاجهاض و يحلي البيبي..

عاد اختكم ما صدقت خبر رحت و شريييييييته على طول هههههههه


بس اتصدقون ما قدرت اكملها يمكن كليت ربعها و بالغصب بعد..:(

طعمها ما ادري شلون..منو جربتهاااا؟؟

هلا والله بامهات ديسمبر اشحالكم ادري اني قطعت عنكم بس كنت معذورة لاني داومت باركولي من بعد سنتين ونص من التخرج توني متوظفة
واليوم فحصت على النونو وتخيلووووو بنت مثل العسل اشحلاتها واهي تلعب بايدينها وريولها فديتــــــــــــــــها
والفال للجميع
واللي بتيب ولد لا تنسى تخطب بنتي له لانها عسل مثل ابوها

هههههههه فروحه قالوا اخطبوا لبناتكم..بس مو واهم في بطون امهاتهم ههههه..


الف مبروووووووووك على الوظيفه جنج طولتي وايد سنتين و نص !!!


و متى بينت معاج انها بنت بأي اسبوع؟؟


و لا اطولين علينا على طول داومي اهني و بدوامج اليديد :)

السلام عليكم ....

شخباركم بنات وشلون البيبيات معاكم...

والله وحشتوني....

والله يبارك فيكم والفال حق اللي ماتخرجت....


انا لين الحين ماعرفت جنس البيبي ويمكن اروح الاسبوع الجاي لين ادخل الاسبوع 18

وهالايام وايد تعبانه ومتعبه زوجي معاي:smile:

ظهري واااااايد يعورني ويشير على وانا امشي ولا قاعده واكثر شي وانا نايمه:sad:

مااقدر اقوم من السرير لازم كل شوي اقعده عشان يساعدني

ما ادري هالالم زايد ليش مع ان بطني صغير

[line]

اختي جمانه اكثر من وحده قالت لي ان اللي فيني ولد.....

وانتي شتوقعين اللي في بطنج؟؟؟؟

بــــــــنات لحقو علي......انه من حملت للحين والحمد الله ماصادني امساك ابد بس اليوم مادري اشصار صادني امساك حااااد ماتوقعته جذي يضايق الله يعين الي صادهه بليززززززززززز بنات الي تعرف شلحل تقول لي بس لاتقولون التمر الهندي(الصبار)ولا المرقدوش ولا الماي والشكر تره مافي فايده جربتهم كلهم اليوم مااافي فايده ابي حل غيره بليزززززززز انقذوني

مساء الخير........

اختي شقوره ماتشوفين شر....

كثري من الفواكه اللي فيها الياف مثل البرتقال و المنجا والخوخ....

ام فروووحه ههههههههههههههههههههههههههههههههههههه
ويلي ويلي ههههههههههههههههههههههههههههههههههه

بسني خلاص لا اموت... :D

السفرجل انا ما ادانيه خير شر.. واهو فعلا معروف عنه انه يحلي الطفل من ناحية الشكل ومن ناحية الاخلاق بعد.. وفوائده الصحية وايد زينة.. اول ما حملت بولدي الاول.. رحت شريت لي سفرجل ومستانسة على عمري.. يمكن كنت توني في بداية الحمل الاسبوع الثامن .. كليت نصها.. ماشوف الا وقفت لي في بلعومي.. ابيها تتحرك.. فوق .. تحت .. مافيه مكانها ههههههههه والله صارت حالتي حالة .. حتى الكلام ما اقدر اتكلم .. وتميت من المغرب الى الساعة 12 الليل يالله رضت تنزل معدتي هههههههه

بعدين قالوا لي انه السفرجل وايد خشن رغم كمية الماء العودة اللي فيه.. وعادة اذا بتاكلينه لا تاكلينه بروحه.. لكن قطعيه مكعبات صغار وحطيه في سلطة الفواكه...
عاد انا خلااااااااااص كنسلت على شيء اسمه سفرجل... وحتى لما ولدت.. من اشوفه اغاور بوجهي عنه هههههههه سبب لي عقدة..

[line]

فروحه القطوة..
مبرووووووك الف الف الف لا مليووووووووون مبروك على التوظيف.. والفال لنا ان شاء الله.. يارب ترزقني مثل ما رزقت اختي فروحه من خيرك ونعمك يا رب..

بسألج اختي.. ما اعترضوا على توظيفج وانتي حامل؟ احنا عندنا في البحرين اذا وحدة حامل ما يرفضونها يعني بالصريح.. بس اذا معاها شخص ثاني على نفس الوظيفة يفضلونه عليها.. على اساس انها تبي اجازة وضع وغيره.. مدري شنو الوضع عندكم؟؟

الف مبروك البنوتة... ياااااااي وايد حلو البكر تكون بنت.. الله يحفظها لج.. بتستانسين موووت وانتي تتشرين لها.. ملابس البنات حلووووووووات ..

[line]

اختي ليتك معي.. انا اتوقع فيني ولد... بس خاطري ومنى نفسي اجيب بنت :(
يالله كلهم خير ونعمة .. اهم شيء صحتهم وسلامتهم..

الي قالوا لج فيج ولد .. على اي اساس؟ خبرينا خل نطبق على روحنا ..

[line]

اختي شقورة الله يعينج.. الامساك بلوته بلوى.. وما دام بديتي تاخذين الحديد فراح يطول معاج..

شوفي اختي .. لا تشربين ماي باااااارد على الريق.. اشربي ماي مخلوط نصه من الثلاجة ونصه من ماي محطوط برا الثلاجة.. واشربي قد ما تقدرين على الريق.. بدي بقلاص ماي كامل.. بعدين زيدي..
انا عن نفسي اشرب كلاصين كبار كاملين ماي فاتر.. على الريق.. لعل وعسى... انا انمريت وااايد بالامساك .. ورحت المستشفى وللاسف كان ودي بتحاميل جلسرين تريحني بس قالت لي الدكتورة ان التحاميل تخض المستقيم خض .. وبالتالي تخض معاه الرحم ويتأثر الحمل ولا سمح الله يسوي اجهاض.. فمن جذي .. عطتني شراب اسمه ايزي لاكس.. وهددتني ما اشربه الا في الضرورة القصوى وبعد الاسبوع ال 12.. وانا ما شربته الا مرة وحدة بس.. وهو ملين مش مسهل.. والحمدلله مشى الحال..



اخواتي انتبهوا زين ما زين على نفسكم .. وحددوا لكم غرشة ماي صحة من الكبار ام لتر ونص .. يوميا لازم تخلصون وحدة كاملة... حاولوا في البداية نصها بعدين زيدوا شوي شوي.. لما تكملونها كلها كل يوم.. مو عشان الامساك بس.. لكن عشان التهاب الابوال وهو الاخطر من الامساك بعد..
احد صاده التهاب ابوال من قبل؟ اقصد قبل الحمل؟ تعرفون شلون اعراضه؟

مشكوره اختي ليتك معي عل نصيحه
انه من حملت افضل الفواكه والخضروات بلاخص على الكل العادي ,,,,
[line]
اختي جمانه انه من حملت وزوجي هاريني من ماي الصحه كارتون رايح كارتون راد يعني في الشهر كارتونين تقريبن وعلى طول يشربني يقول لي شربي غصب ههههههههه

بس بقول لكم بنات تره انه لقيت حل حسيت ان وااايد فادني عن الامساك ,,,,توقعو من الي اكتشف الي الخلطه الي تودي الامساك!!!!!!!!! (زوجي)
ماتوقعته عنده خبره جذي هههههههههههههههههه
بقول لكم ’’اليوم الصبح انه ميته من لصياح من الامساك مب قادره وزوجي مبتلش عدل ههههههههههه مسكين عاد قال لي تدرين تبين حل قلت له ارجوك قال زين دخل المطبخ وبعد شوي ياب لي قلاص صغير في شي قال لي شربيه,,,,,وانه شربته من هني تقريبن نص ساعه او ساعه ومشى بطني !!!!! قلت له تعااال شنو هل خلطه السحريه اله يقول لي خلطت لج كل شي في ويهي هههههههههههههه يقول حطيت عصير نص ليمونه مع ربع قلاص ماي مع شوي مرقدوش وطبعن هل خلطه تكون في قلاص صغير,,,,,
جربوهه اتمنى انهه تفيدكم مثل مافادتني

العفو حبيبتي شقوره....

احنا حاضرين(r)

والحمد لله ارتحتي:smile:

السلاااااااام عليكم شلونكم بنات؟؟

ههههههههه جمانه ضحكتيني على السفرجل..اي والله و انا آكله خايفه اغص فيه..



ليتك معي شلونج حبيبتي؟؟

عاد بشرينا اول ما تعرفين جنس البيبي..

انا ان شاء الله بعد اسبوعين موعدي..

اتوقع ان شاء الله باجر ادخل الشهر الرابع..

الحمدلله و اخيرا..عاد باجر بروح اسوي تحاليل ملوت السكر و هالسوالف..و ببتدي آخذ حبوب الحديد و الكالسيوم..

انتوا من اي شهر بديتوا تاخذونهم؟؟



شقورة المرقدوش زين حق الحامل في هالاشهر؟؟ ديري بالج سالي اخاف مو زين ولا شي..

بالنسبه لي اذا بغيت بطني يمشي ىكل سلطه بس لازم بكثثثثرة مع تبوله لان البقدونس زين يمشي البطن مجربته و اصلا التبوله حلوة يعني ما تاكلين شي مغصوبه عليه..

انا تقريبا اسوي هالشي مره بالاسبوع اذا حسيت الامساك لا يطاق..

بس على قولتكم دام حبوب الحديد اتسوي امساك يبيلي على الاقل مرتين بالاسبوع..

اما الماي والله بنات احس مستحييييييل اقدر اشربه حار ما اقدر ارجعه..

لازم مثللللج بعد مو اي ماي..او ان حددددددده باااااااااااااااااررررررد يالله ينزل من بلاعيمي :(



بنات اليوم قاعده اسولف مع رفيجتي توها والده..تقول نصيحه اول ما تعرفين جنس البيبي ابتدي جهزيله شويشوي لي سن سنه..
لان بالاشهر السابع الى التاسع تحسين روحج ثقيله و مالج خلق..و ما تدرين شنو يصيرلج من ظروف..لأن اهي زلقت بالسابع و انكسرت ريلها..

فاشرايكم بنات بكلامها..؟؟

عاد انا كنت امفكره ما اجهز الا بالسابع..الحين جني بغير رايي..

قولولي آرائكم ابهالموضوع..

بانتظاركم :)

صباااااح الخير حوامل ... شحالكم :shy:

بنات انا هاليومين كنت تعبانه .. زكام وبلاعيم والتهاب اذن ، وما رحت المستشفى بسبب انشغالاتي في الخميس والجمعة عند الاهل بس الحمد لله ان اليوم بديت اخف شوي :shy:

ام فروحه بالنسبة لتشري الاغراض في الاشهر الاخيرة فيعتمد عليج وعلى حجم بطنج يمكن .. يعني انا بحملي بحسون مثل ما قلت بديت في نهاية الثامن اشتري الاغراض وكلهم شريتهم في طلعة وحدة وكنت حاسة بمتعة وقتها وما حسيت بتعب ابداااا يمكن لان بطني انا ما كان كبير في حملي بحسون او يمكن من متعة وحلاوة الموضوع نسيت التعب والالم خصوصا ان انا اخذت معاي امي وافترينا البحرين فر ذاك اليوم من شمالها لجنوبها هههههههههههههههه وامي بعد ما قصرت قامت تتشرى اي شي يعجبها لها ولخواتي :shy: حتى زوجي كنت احسه مستانس وهو يدفع فلوس اغراض البيبي وكان فرحان وهو يطالع اغراض اليهال وينقي معاي الالوان بعد هههههههههههه كانت فعلا طلعة حلوة .. ووقتها اشتريت كل الاغراض ما عدا الاغراض الشخصية مثل الشامبو والصابون واللوشن والبودرة وووو هالسوالف يعني اللي خليتها لنص التاسع لكن صادف اني ولدت بعد ما شريتها بيومين بالضبط لاني ولدت قبل موعدي ب10 ايام .


بالنسبة للامساك بنات انا يجيني اوقات واوقات لكنه يكون خفيف وما يأذيني وايد بس اذا زاد اشرب المرقدوش وتتسهل علي :shy: وعلى فكرة المرقدوش ما فيه شي وزين للحامل وللطفل وللكل يعني.

انا بكرا عندي موعد .. ان شا الله كل يطلع بخير واتطمن واقدر اسافر وانا مرتاحة ..

جمانة :: بالنسبة للسفر فهو باقي له اسبوعين بالضبط وانا كل اللي سويته اني اخذت بس بدلتين لولدي واذا قدرت باخذ له بدلتين او3 قبل ما نسافر .. وزوجي بعد رحت معاه واخذ له شوية ثياب خفيفة للسفر على قولته يدري اني بفرفره في الاسواق غير الاماكن السياحية والمشاوير اللي يبي لها مشي وايد فأخد اشياء خفيفة بدل الجينزات عشان يتمشى براحته ..
لكن انا للحين ما اخذت لي شي .. رحت امس السوق عشان اشتري لكني مو من النوع اللي يعجبه اي شي ويشتري وما قدرنا نطول في السوق لان كنا مخلين حسين مع عيال عمته وما بغينا نتأخر عليه .. وامس شرينا شناط للسفر لان هالسفر اطول سفرة لنا مع انها قصيرة بعد ههههههههه وكنا من قبل ناخد شناط من عند اهلي او من عند اهله لكن انا هالمرة اهلي بيسافرون وام زوجي بتجي معانا فقررنا نشتري لنا شناط خاصة لنا وامس كنت فرحانه فيهم حتى بغيت اصف فيهم الاغراض بس زوجي قال لي تو الناس :sad: ههههههههههههههههههههههههه

باقي طبعا شوية التناتيش اللي بناخذها معانا في السفر واحنا مأجلينها لقبل السفر بيومين او 3 على اساس بنشريتها وبنحطها في الشنط مرة وحدة :shy:

ان شا الله نستانس في هالسفرة وما ينغص علينا شي ونروح ونرد بالسلامة ..


والحين بتفرغ لاخبار حملي :: صار لي كم يوم ما احس بحركة البيبي مع اني من قبل ما كنت احس بها يوميا واصلا ما احس بحركته الا وانا منبطحة .. احاتي شوي لكني ما شا الله قاعدة الاحظ ان بطني قاعد يكبر شوي هاليومين وهذا يدل على نمو الجنين :shy:
الوحام مثل ما قلت قاعد يرجع شوي ومن يصير الليل احس روحي ما اطيق اتعشى وكل لايعة جبدي وعموما اكلي رد رجع خفيف مع انه قبل اسبوعين صار طبيعي بعد ما خف الوحام والحين من اسبوع صاير خفيف لكني مركزة على شرب الحديد والفيتامينات عشان ما يتأثر دمي والجنين خصوصا ان وزني ما زال ينقص .

بالنسبة لجنس البيبي ففي ناس قاعدة تقولي شكلج بتجيبين بنت وفي ناس تقولي ولد .. والله العالم .. واللي يجي من الله حياه الله ، اهم شي الصحة والسلامة


للحين احس بملل وكآبة وضيقة خلق خصوصا لما اكون بروحي :sad: احاول اشغل نفسي باشياء حلوة مثل التفكير والتجهيز للسفر او اي شي حلو ويريحني لكني بعد شوي ارجع اتملل ويضيق خلقي .. في ناس قالو لي هالشي طبيعي بسبب الهرمونات الحامل ممكن تحس باكتئاب :sad: الله يعدي هالفترة على خير ان شا الله (w)


بنت البحرين بانتظار البشارة بجنس الجنين والله يعطيج مرادج ان شا الله :shy:

مساااااااااااااااااااااااااااااااء الخير ....


هلا اختي ام فروحه......شخبارج وشخبار النونو


انا الحمد لله ومادري متى اروح للعيادة صايره واااايد متكيسله

[line]

اختي جمانه شخبارج؟؟

اذا عن الاهل ليش يقولون ان اللي في بطني ولد:

-ان شكل بطني ... يقولون البنت يكون البطن بالعرض

-ودايما احس بالم عالجنب والبنت يقولون يكون الالم في نص البطن

والله العالم

[line]

وتدرون بنات انا في خاطري اشتري اغراض البيبي...

واذا عالسابع او الثامن الواحد مايضمن شيصير فيه مثل ما قالت اختي ام فرووحه عن رفيجتها

ان شاء الله اول ما اعرف جنس البيبي

بشتري الاغراض بتدريج



وبنتظار نتايج الجنس المواليد

نم نم .. انتي تحبطيني الحين يا ليتك معي...

انا قاعدة واعشم عمري ان شاء الله فيني بنت.. بس بكلام اهلج خلاص فيني ولد الحين :(
انا بعد احس بالالم على جنب اليسار.. بالضبط مكان حسينووو ولدي..

[line]

بنات شتشورن علي.. انا عندي اغراض ولدي الاولي.. وبصراحة اشتريت له ثياب واااااااااااايد على اساس انه كان الاولي.. ويا زعم اول الفرحة.. لكن مصختها في التشري.. اشياء وايد ما ستعملتها الا مرتين او ثلاث خصوصا بتاعة الشهور الثلاثة الاولى لأنه كبر بسرعة وما لحقت استعملهم له..

وفي نفس الوقت مو هاين علي اللي ببطني ابي اتشري له كله جديد.. احس اني راح افرق بينهم تفرقة عنصرية اذا لبست الاولي كله جديد والثاني نص جديد ونص قديم !








موعدي الاسبوع الجاي في نفس هاليوم... ان شاء الله يطلع اللي في بطني بنت يارب عشان اشتري لها كله جديد بدون تأنيب ضمير !! :D

ههههه جمانه ضحتيني..عادي يعني الياهل ماراح يفهم..لبسيه يديد و هم القديم حرام تقطينه خصوصا انج لبستيه مره او مرتين..و هم اذا طلع ولد معناته راح يكبر بسرعه خصوصا الثلاث اشهر الاولى و ما يمديج اتلبسينه..

و ان شاء الله تيبين بنت مثل ما تبين :)


هلا ليتك معي ان و النونو الحمدلله بخير..

اليوم رحت سويت تحليل السكر و شربوني ماي و شكر طعمه استغفرالله لاااا يطاااااق..لكن شربته عالسريع و النتايج تطلع بعد اسبوع و الله يستر ان شاء الله..


ماما حسووون كلامج يشوق عن السفررر شوقتيناااااا..هههههه بس اتصدقين حتى لو اتحصلي سفرة لأحلى ديرة..أخاف اسافر لان ظهري ذابحني هالايام..و اخاف اروح انكد على ريلي..

و المشكله ان اهو ما يحب السفر بالمرة و انا عكسه تماااااااااماااااااا :(


عشان جذي ودي اييب ولد عشان يصير محرمي بعد جم سنه و اسافر وياه و ابوه كيفه ههههههههه

بنــــــــــــات ادعولي بكره موعدي في المستشفى قولو انشاالله يطلع البيبي بنت ......
وقولو انشاالله سليم ومافيه شي لاني تعبانه شوي هل فتره وحتى اكلي قل وااايد وااايد
صايراكلي جنه مال رجيم ههههههههههههههههه
وخبركم الحبوب ماشربته عدل يعني ماتابعته من البدايه اشرب على الطقات يعني خايفه البيبي تاثر بهل شي قولو انشاالله مافيه شي وانشاالله يبين جنسه عشان ابشركم بكره

الله يبشرج اختي شقوره بصحة البيبي

ويكون بصحه وعافيه


وان شاء الله بنوته حلوه مثل امها


وننطر بشارتج:smile: