مجلس امهات شهر مايو 2006 حياكم

هلا والله بنات
مـــــــــــراوي هلا شخبارج؟؟مو كأنج زوديتها شوي؟؟احنا ننتظر على نار وانتي تلعبين باعصابنا ،،،بس ماعليه مردودة
انا اذا رحت يوم الأحد أسويه ماراح أقولج شي>>>ياحسرة عادي من زمان خلصتي وارتحتي
أهم شي أنج انبسطي والبيبي بخير وسلامة وننتظر منج آخر الأخبار
...............
أم هديل ياهلا
لاتحطين هالشي في بالج ،،،هاذي مجرد أفكار بس وانشالله بتوليدين في الوقتت المحدد للولادة
................
أم راشد مــــراحب
احنا بخير ونسأل عنكم جميعا

عدنا :)

سوري والله مو الهدف اني العب باعصابكم بس ماكنت ابي اعطيكم معلومات سطحيه لاني كنت توي راجعه من العياده و تعبانه

المهم نرجع لتفاصيل حدث اليوم

طبعا من الصبح رحت دوامي وانا متشوقه و متشققه كانه شعور البنت اللي بتدخل تشوف عريسها اول مره شلون .. انا كان هذا شعوري , بشوف ولدي اول مره ملامحه بتكون واضحه فالتوتر كان موجود و ترقب ساعه الموعد واصل حده :)

وصلت المستشفى قبل الموعد بربع ساعه و قعدت انتظر للساعه 11 و 5 دقايق مع ان موعدي كان 10 و نص بس لان الفحص هذا ياخذ وقت من كل مريضه و انا على اعصابي

11 و 5 دقايق نادو اسمي و رحت اركض ورا الممرضه و طبعا طول فتره انتظاري وانا امسح على بطني عشان يتحرك او اذا نايم يقعد لاني حسيته خامل و كنت خايفه مايبين شي في الفحص

و بالفعل دخلت و حاولت الممرضه تحركه بس هو خامل لاني ماتريقت الصبح و بعد كنت قبل لا ادخل الفحص شربت ماي وايد و مادخلت الحمام ( عبالي احسن المثانه تكون ممتلئه)

كان ولدي مستخبي ورا المشيمه يعني يبين نص وجهه بس وانا بدا الاحباط يسري فيني قلت لها خليني اروح اكل شي عشان يقعد

قالت لي اوكي دخلي الحمام و روحي اكلي و بعد 20 دقيقه ارجعي

الله وكيلكم رحت الكفتيريا و طلبت و طلبت كاني مسويه بوفيه و شكلي يضحك كل هالصحون على طاولتي و ما معاي احد

تبوله + حمص+ فتوش + ورق عنب + سندويش جبن + بيتزا + كاكاو و عصير برتقال

الريال اللي كان مع زوجته قاعدين يمي التفت ان كل ساعه يجي صحن حق طاوله هالبنت شسالفه !!! :)

المهم .. كليت و رجعت العياده و طبعا دخلت الحمام 20 الف مره عشان مايكون في ولا قطره و تخرب التصوير مره ثانيه

لايكون مليتو طولتها عدل ؟؟؟

بس بكمل

رجعت العياده وانتظرت لي بعد مادري شقد يعني صارت 1 الا ثلث يمكن يوم تناديني مره ثانيه

مع الفحص البيبي كان يتحرك بقوه و غير وضعه ماعاد ورا المشيمه بس كله حاط يد قريبه من وجهه

يا يمه شيل يدك .. احرك بطني و اطبطب عليه عشان يشيل يده وهو معاند

لا و يعصب بعد .. فيه له صوره معصب مو عاجبه الوضع كانه يقول أذيتوني :)

بس للاسف جهازهم ماكان يسجل حركه البيبي بس يلتقط صور و انا في بالي كنت ابي اللي يصور الحركات بعد

وعشان جذي افكر ارجع اعيده في عياده ثانيه بعد 4 اسابيع بس بتأكد اذا كان اللي عندهم يسجل الحركات ولالا

من كل هالقصه حبيت انصحكم ببعض النصايح اللي تنفعكم لو حبيتو تسوون الفحص

1. روحو ماكلين قبل الموعد بثلث ساعه تقريبا عشان البيبي محتاج طاقه يتحرك

2. لازم المثانه تكون فاضيه عشان ماتضغط على الرحم

3. الماي حوالين البيبي لازم يكون كافي للحصول على صور واضحه لذا لاتاخرون الفحص اذا عندكم نيه لان مع الاشهر الاخيره يقل الماي حول البيبي

4. تاكدو ان العياده اللي بتسوون عندها الفحص جهازهم يصور التحركات حق البيبي مو بس صور

و سلامتكم و عذروني ان طولت عليكم :)

هلا مـــــــــــراوي شخبارك
زالله عليك سوالف مو طبيعية،،،تموتين من الضحك
المهم في النهاية التصوير يكون واضح؟؟تحسينه دقيق؟؟ملامحة باينة؟؟
يعني ماعطوك سي دي؟؟?>>> كأني أسأل وااااااااايد
ماعليه تحمليني

هلا ام جواد

عطوني سي دي بس عليه صور انا كنت ابي صور بالاضافه الى مقطع وهو يتحرك

كنت شايفه زميلتي بالدوام مسويه عندهم قبل 3 سنين و كان ولدها يتحرك الحين تقول ان مغيرين السوفت وير مادري شنو

برجع اسويه في عياده ثانيه

و الملامح تكون تقريبا واضحه بس يعتمد على وضعيته

و من الظهر لين الحين وانا و زوجي كل واحد يقول انه يشبه له و كلام في سرك الولد طالع يشبه له اكثر بس مابي اعترف :)

انا مثلك في بالي إنه لازم يعطوك بالسي دي مقاطع واهو يتحرك
الصور حلوة بس شوفته واهو يتحرك أحلى وأحلى
يالــــعــــيارة وش فيها اذا ااعترفتي انه يشبهه،، لكن كلمة الحق ثقيلة علينا
تدرين عاد شوقتيني أسويه بسرعة ،،،انا راح اسويه يوم الأحد،،انشالله بس الولد مايعاند ويخربها علينا،،،الحين بسم الله عليه الله حارسه حركته قويه ماشاء الله
انشالله يظل راضي علي على طول
الا تعالي؟؟؟ رسيتون على اسم الكتكوت ولا لسة؟؟

السلام عليكم

شخباركم

واخيرا يا مراوي سوييتي الفحص ياربي احاتي جني انا اللي باروح .. بس زين الصبي يطلع شبه ابوه ماعليه الحمل الياي انشالله بنت وتشابهج ولا تزعلين

الحين عرفتي شكل كتكوتج يعني لين بتولدين انشالله جنج جايفته من قبل

يالله بننتظر موعدك يا ام جواد عشان اخر الاخبار و خبرينا كل شي خصوصا شعورك قبلها و بعدها :)

و الاسم للحين انا مصره عالاسم و هو يبي اسم غير و كل مانفتح الموضوع نعيد نفس الحوار

اهو يقول ان الولد ابوه يسميه و البنت امها تسميها و اننا متفقين هالاتفاق من قبل لا احمل

و انا الحقيقه ماذكر اني اتفقت معاه على هالشي

=====================================

دلوله مو ناويه تسوين الفحص؟

والله مادري حابه اشوفها يوم الولاده انشالله احسها مفاجأه

صباح الخير

شخباركم عساكم بخير.؟

صباح النور دلوله انتي شلونك :)

صــــــــبـاح الورد للورد... شلونكم بنوتات؟؟
وينج دلول؟؟كل يوم تقولين قعدت قبلكم ها؟صدتج يالعيارة؟؟؟الساعة الحين 10 ونص وانتي مو موجودة،،ماعلينا انتي شلونج وشلون مرت ولدي انشالله بخير؟؟
.................
مـــــــــــــــراوي مــــراحب حبيبتي
شسويتي فيني أمس انتي؟؟ماظل ثلاثي ولا رباعي ولا خماسي الا حلمت فيه؟؟وحلمت بكتكوتي واني شفته بكذا صورة.>>>> تقولين استيديو هذيك الصور مو رباعي!!!
خلاص البارحة احلامي كانت كلها على هالموضوع،،ومن قعدت اليوم اتصلت عشان تأكيد الموعد،،كا يقولوا لي الجهاز بالصيانة ويمكن يخلص على نهاية الاسبوع الياي؟؟وفي احتمال على بدايته!!!! شفتي النحس كيف
المصيبة اني مثل ماقلتي مابي أتأخر لأن بعدين يمكن مايعطيني السونار نفس التصوير باعتبار البيبي يكبر والمساحة المتاحة له للحركة تقل
ريلي طبعا مستانس لأنه مايبي يشوفه الحين،،،يقول لما يولد نشوفه أحسن،،بس أنا صايرة في خاطري وابيها للذكرى
لـــــــــكن ماراح اتركهم وكل يوم بتصل اسألهم خلص ولا لا؟؟واذا سويته مابراويه ريلي>>>خليه ماحد قال له يشمت فيني
........................................
انا اليوم انشالله راح اكون موجودة لغاية الساعة 11 وربع ،،ونص،، لأن بعدها بطلع بيت هلي ومابرجع الا الليل،،،اليوم عندنا عزومة عائلية،،وهذاني توني مخلصة شغل،،،مســـوية لهم تبوله شــــــــــئ>>>>مـــادح نفسه؟؟ تبون اشيل لكم؟؟
.................
نبض وينج هاليومين مو مبينة؟؟والله الج وحشة؟انشالله تكون بخير انتي والبيبي

السلام عليكم...
وبعد غياب رجعت لكم أسأل عن أحوالكم_أم جوااد،دلوله ،مرااوي،أم هديل ،أم راشد)و إذا نسيت أحد يسامحني
المهم شخباركم حوااامل و شخبار الحمل معاكم،صراحة اسمحولي هالأيام ما أدخل عشان وااايد مشغوله و عشان ظهري ذابحني موت..
بسألكم..
أنا لما أنام و أقوم عشان أغير جهة النوم أحس الحوض يطق بصوت عالي كأن شي ينكسر و الله طول الليل و أنا أسمع عظام الحوض و هي تطقطق-عااادي و إلا-
و تدرون تييني انقباضات في آخر البطن و لا كأنها كهربه حتى البيبي لما يرفس أحسه يألمني(سألت وحده قالت لي هذي انقباضات عادية و عشان الراس كل ما نزل تحت كل ما زادت الانقباضات(الله يعين يوم بدخل التاسع)

أم هديل............
صراحة هالعبارات إللي حصلتها و إذا حصلت لج عبارات عن بنوتات بخبرج....فالج طيب الغاليه

هلا نبض شخبارج ؟وحشتينا والله
حبيبتي معذورة ولله واحنا نسأل عنج لأننا افتقدناج،،اهم شي انتي بخير والبيبي بعد
ابي من يواسيني في ألم ظهري،،اقعد الصبح وانا فيني الصياح،،من قلة النوم،،،ابي انام لو ساعتين متواصل بسن،وأحس حركة البيبي أقوى هالشهر من قبل في كل مكان،،فوق تحت،،يمين يسار
بس سالفة الصوت اللي تقولين عنه مادري عنه شي،،يمكن عشان انتي سابقتنا فماحسيت فيه ،،بس اعتقد شي طبيعي نبض ،،ولاتنسين الحين البيبي والرحم قاعدين يتهيأون للولادة
الله يعينج ويعينا جميعا

آمييييييييييييييييييييييييين يا رب....

هلا حوامل وشلونكم؟؟ انشاء الله طيبين كلكم والبيبيات مب معذبينكم ؟:up:
مراااوي مت ضحك وانا اقرى كتاباتج عن الثلاثي ههههه ما خليتي شي الااكلتيه يالله بلعوافي هههههه:dd:
نبض الامارات تسلمين عيوني وما تقصرين وعن الطقطقه اللي بلحوض عادي انا تصيدني مرات واتألم منها سألت القابله قالت لي عادي لا تخافين
ام جواد اذا بتتكلمين عن النوم والم الظهر انا من اكثر المتعذبين من هاي السالفه والله اني الى الساعه 6 الصبح ما تجوف عيني النوم اتقلب كل مكان ولا فيه فايده:cry::cry: بنوتتي تعاند كل ما انقلب جهه يات وراي واخذي عاد لترفس بكل مكان مثل ما قلتي يماما خليني انام لا عناد اتزيد بلحركه ربي يحفظها ... وملاحظه بعد اني لما باكل او اطبخ تزيد الحركه بعد مدري تشم الريحه:think: خخخخخخ

ام جواد كل تاخيره فيها خيره و كل ماتاخر الوقت كل ماكانت الملامح اوضح بس سمعت ان اذا كبر البيبي اكثر و اكثر يصير بالتصوير شكله مخيف عشان جذي ينصحون ان الوحده تسويه من 28 الى 34 اسبوع

على فكره توني ماتغديت و صار خاطري في التبوله عسى رفعتي لنا :)

شلونكم بنات جميعا عساكم طيبين

بقولكم انتو تتعشون او تاكلون شي قبل النوم؟
ترى حركه البيبي تزيد اذا كنتي ماكله لانك تعطينه طاقه للحركه فاحسن شي تخلين العشا قبل النوم بوقت كافي عشان هو ينام و انتي تنامين :)

الحين بخليكم بروح انسدح شوي عشان العصر عندي جامعه >>> كرهونا في يوم الاربعا الناس تستانس فيه واحنا شايلين همه

قوه بنات شخباركم

ام جوااااااااد
شلونج ومن قالج اني ماقمت من الصبح انا اول وحده فيكم كالعاده طبعا >> امدح نفسي
مرت ولدج زينه تسلم عليكم بس اليوم عطتني كوع في بطني عورني وقلت خل اتيي باردلها هالكوع
لا تتأخرين علينا وهالله هالله بالتبوله نبي صحن مو صحين صغير


مراوي
هلا وغلا الله يعينج على هالجامعه .. واشكثر باقيلج؟؟
صدقيني احس فيج لأني تغربلت مع الدراسه ولا عت جبدي بعد .. لايكون تاخذين دبلوم تربية لأن اللي يدرسون برع البحرين يرجعون ولازم ياخذون دبلوم تربية من جامعتنا


نبض
شخبارج الغالية وينج ووين هالغيبه كلها .. وبالنسبه لألم الظهر كلنا نعاني منه انا احسن ان ظهري بينقص علي ومن ابي انبطح اقول جان زين تامه قاعده اريح لي وصج وقت النوم الياهل اكثر نشاط مادري ليش يمكن مثل ماقالت مراوي العشا ومايسوي


ام هديل
شخبارج عساج بخير وشخبار بنوتج الحلوة انشالله تمام
تعالي مالقيتي عبارات حلوة حق البنوتات انا بادورلج لأني انا بعد ابي حق بنوتي


ام راشد
شخبارج وين وين انتي ما تطلين علينا الا كل اول شهر .. لا تتأخرين علينا وطمنينا عليج

هلا وغلا حوااامل...يسعد مساكم ....شخباركم

والله لو مابينا هالجسر كان انتو أول من أكل هالتبولة،،ولا تغلى عليكم،،،خلاص بعد مانولد بفترة عازمتكم عندي اطلبوا واختاروا>>>بس لاتزودوها عاد

*مـــــــــراوي*
انا اتخذت قرار وانشالله مايكون كلام الليل يمحوه النهار>>> كالعادة،،،، اذا مابيصوره لي واهو يتحرك ماراح اعمل الرباعي،،لأن حلاوتها بشوفته واهو يتحرك،،انا لو على الصور،،كثّر خيرها دكتورتي،،كل مرة أروح تعطيني صور لولدي،،وآخر مرة عطتني ثلاث صور ،من ضمنهم وحدة على الوجه،،والله ان كل شي واضح،،العيون والخشم وحلوة مررة بس عيبها انها بالابيض والاسود
وعلى طاري الأكل،،انا عن نفسي آكل خفيف مرررة بالليل ،،،لكن مع ذلك الحركة بالليل تزيد،،،العناد ومايسوي،،عموما هو من الأفضل انك ماتروحين للسرير الا وانتي مآكلة قبل بساعتين أو اكثر عشان ماتحسين بثقل أو ضيق نفس أو حتى انقباضات في الشهرين الأخيرين..

تعالي صحيح>>>>عندنا فضول مو طبيعي،،انتي شتدرسين حاليا؟؟وايش دارسة من قبل؟؟ماعليش لقافة،،بس حبيت اعرف
....................
دلووووووووووولة ياعسل شخبارك؟؟؟
لو على الدراسة كلنا تلعوزنا فيها،،،انا لما تزوجت كان باقي لي سنتين وأتخرج،،والله تبهدلت فيهم حيل،،بس الحمدلله ارتحنا،،والله يعين البنات
..........................
أم هديل كيفيك حبيبتي؟؟
والله مو بس بنوتج اللي تاعبتنج،،عندنا وعندج خير،،،شوفة عينك على آخر الزمن صاروا يرفسونا ،،واحنا ساكتين وعلى قلوبنا زي العسل

صباح الخير

دلوله انا باقي لي بعد السنه اليايه و مثل ماقلتي دبلوم التربيه الله ياخذه و جان زين مستفيدين منه .. كله كلام خرطي

===================

هلا ام جواد

تدرين حطيت صوره من اللي طبعوهم لي في اطار و حاطته عند راسي

اقعد و انام على صورته بعد قلبي الحين احس انه واحد من العايله و عايش معانا اكثر من قبل

و تييني حالات ودي اعضه من خدوده الله يستر عليه اذا شرف :)

السلام عليكم

شخباركم يا حلوين

ام جواد
خلاص اول ماتولدين بالسلامه كلنا بنييج ومو بس تبوله كل شي انتي تسوينه ولا شي تجيبينه من برع >>> وحده نذله هههههه


مراوي
الحين زاد اشتياقنا لهم اكثر من قبل لأن صرنا نحس فيهم ومابقالنا شي ونشوفهم انشالله
والله تبين الصج ماعندهم سالفه ويا هالدبلوم بس لوعة جبد وثقاله .. الله يعينج