وين كنتي لما تفاجأتي بالطلق؟؟ و ايش سويتي؟

الصراحه موضوع رائع و نفسي اشارك فيه بس ان شاء الله ارجع لكم بعد 5 اشهر لاني لسه في الرابع و ربنا يسهلها عليا

حياك الله حبيبتي عطر الحب

بإنتظارك حبيبتي و ربي يسهل عليكي

للرفع

تجربتي الأولى : كانت الساعة خمس العصر يوم الخميس كنت نايمة وزوجي يشاهد التلفزيون قعدت من نومي بإحساس حركة قوية في بطني ورحت الحمام جفت الماي ينزل بغزارة فرحت وقلت لزوجي يالله المستشفى مع إني ما أحس بأي ألم ولما وصلت سمعت الصراخ كنت أقول في نفسي ما في داعي يصارخون ليش كل ذا وكنت أقول للممرضة هذا الكلام وقالت بنشوف ولما أشتد الأمر صرخت أزيد منهم بس كانت ولادة عسيرة ولدت يوم الحمعة الساعة خمس الفجروجبت وردتي الأولى.
تجربتي الثانية : كلها خوف في خوف طول فترة الحمل أرق لأني اعرف اشبيصير وشنهو الألم ودخلت المستشفى صراخ مو من الألم لا من الخوف بس الولادة الثانية كانت أطول مدة من الأولى لأن بدا فيني الطلق من الساعة 12 الظهر يوم الجمعة ولدت الساعة خمس الفجر يوم السبت بعد عناء وجبت وردتي الثانية

انا كانت ولادتي حيل متعسره وطاف علي موعد الولاده اسبوعين و3 ايام وسوولي طلق صناعي قعدت في المستشفي 5 ايام ما كنت حاسه بطلق ابدا واليوم السادس ياني عوار بظهري وما كنت ادري ان هذا الطلق ورحت اتمشي بالجناح واموري طيبه وبعدين لما زاد العوار ناديت الدكتور وقال ما فيك طلق انتي بتدلعي وما كان مبين شئ بجهاز التخطيط ولما شافني اتلوي من العوار فحصني وطلع الرحم مفتوح 4 او 5 ما اذكر ودخلني غرفه الولاده بس الحمد الله ولادتي كانت سهله مو مثل الطلق تعذبت فيه وطبعا
وانا رايحه غرفه الولاده كنت وايد مستانسه (وحده ما جربت الولاده ) وبنفس الوقت ابي ارتاح من عذاب المستشفي
وطبعا ما كان في احد معاي (اكسر الخاطر)
وبالتاكيد كنت لابسه ملابس المستشفي ( انا سميته قميص السهره) من يومين خست فيها

عروس اللولو

الغالية-22

هنومه

يعطيكم ربي ألف عافية
مشكوراااااات

واخيرا وصل دوري
انا كنت الله يسلمج اتعشى بيت ام ريلي في اماااااااان الله وما عرفت الا ونزل علي فشششششششششششششششششششششش ماي وجدامي يالسين اخوان ريلي وحريمهم الله لا يراويج قلت كيف اقوم احينه وجان اقول حق سلفتي ان جي وجي وهي وقفت جدامي وانا على طول قمت وعلى الحمام نزل علي ماي بدون الم وهاي اخطر شي وجي اذا رمست عشان اقولكم سالفتي ما بخلص يالله انشوف الي عقبي شو بتقول

:cool:

نترياج يا البستكية
كملي

كملي البستكيه لانها نفس قصتي شوقتيني


انا بقووولكم انا كنت فاول يوم فالتاسع وزوجي اليوم جاي من السفر ونتيجةالثانويه طالعه بعد فنفس اليوم يعني يومي كله فرح

كنت اضحك واسولف مع خوات ريلي وفرحانه بنتيجة الثانويه يايبه76بالميه منازل قولو ماشالله

المهم كنت امزح مع اخت زوجي وبالغلط يت ايدها عبطني وتاسفت مسكينه وانحرجت

المهم يا وقت العشاا وكلنا ناكل واخوان ريلي وخواته وعمي واحس شي يضغط تحت سالت عمتي قالت لازم تبدين تمشين الحين شي عادي
وانا ما اقدر اقوم كلهم خلصو اكل وانا قااعده وشوشت ريلي وقومني اونه يمزح ويااااااااااي يعني
واستحملت ضغط خفيف

المهم فالليل الساعه 1 تقريبا من فرحتي بالنتيجه وبرجعة ريلي ماياني نوم وحسيت اني ابا اروووح الحمام رحت بس شي نزل ماتوقعت انه الماي لانه ماكان عندي خبره انه فيه ماي ينزل المهم رحت بنام ماقدرت احس الدفع زياده صحيت ريلي قام ونادى امه قالت يمكن عشان ماكلين اكل ثجيل اليوم عالعزيمه مال رجعت ريلي ويابت لي سفن اب يمكن يخفف ههههههه

وانا بمووت وعمتي تقول شربي وانا مابا غمزت لريلي اني ما اقدر اشرب رخص امه وشرب عني السفن اب وقالي قومي اروح امشيج مثل ماقالت خالتي قتله اوكيه لبست عباتي وانا وااصله فنص الصاله قعدت مكاني وصرخت بموووت
سوووو ا زوجي حالة طواري وعمي يركض يشغل السياره وعمتي تلبس عبايتها بالمقلوب وخالت زوجي تساعدني هي وزوجي بس دقايق ووصلنا وانا خف عني الويع قلتلهم بروح الحمام ماخلوني كشفت الدكتوره قالت 8 سانتي مفتوح ولاااااااااااااااده

انا ماعرف شويعني 8 صغيره والله 20 سنه وماسكه فريلي اقوله ماترووح انا بمووت وهو ميت خووووووف
ودخلوووني الغرفه وانا من صوت الصرخات اصرخ معاهم من الخووف
ومرت وانا اقولهم ابي ماي يجيبولي ماي اقولهم مابا وعهالحال بس لاني مستحيه من عمتي ماباها تشوووف وكنت الهيها اني اقولها ابي ماي وبعدين مابا وترجعه يعني بس كنت مستحيه مابيها تشوووف شي كنت اباها تطلع بس استحي اقول لها
وولدت ويبت احلى بنوووته على اخر صرخه رفست السيستر فبطنها مسكينه اختمهااا ههههههه
وزوجي كان فرحان مووت وماجاني نوووووووووم من الفرحه عند اذان الفجر ربيت الحمدلله ماطولت
الله يسهل علي وعليكم دايما يارب
وطلعت من المستشفى مع البيبي والهدايا والورود وزوجي المسكين الي جا من السفر ودخلت الاربعين ههههه ما اتهنى مسكين

شرااايكم بقصتي هههههههه

وانتظروووو القصه الثانيه

انا يوم ولادتي كنت بالبيت لحالي كنت واقفة اجلي و بداء الوجع بس ما كنت متاكدة انو طلق و لكن زاد الوجع و صار يجي كل خمسة دقائق و كان ايزيد الوجع اتصلت بزوجي و بحماتي اهلي ما كانو لانهم كانو امسفرين
اخذت ثياب لي و للبيبي
ورحت انا و زمجي و حماتي و عمة زوجي
و كنت لبسة عباية

الحمدالله على سلامة الكل

فطامي .. ذبحتيني من الضحك والله .. لما رفستي الممرضة في بطنها ...
ههههههههههههههههههههههه

ههههههههههههههههههههههه

صراحه مواقفكم اتضحك .. بس صراحه انا لما اقرا اخاف من الحمل والولاده ..

الله يسهل على كل حامل ولادتها ويزرق كل متزوحه بالابناء الصالحين ..

اول شي احب اقول لكم اني حامل...(البيبي الثالث)

وثانيا.. راح اقول لكم ولادتي الثانية.. بنتي غالية...

يوم اللي ولدت.. رحت الدوام الصبح ..(حال كل يوم..) عموما بنتي طولت شوي لين طلعت..التاسع خذته كامل..
وشفت نفسي ماقدر اتحمل ثقل بطني.. تقريبا الساعة 11..
قلت حق رفيقتي.. الدكتورة عطتني موعد مفتو.. باروح لها.. واشوف اخرتها مع هالبنت اللي ماتبي تطلع..

رجعت البيت.. جلست على الارض ..بكل سهولة.. وتغديت..
وبعدها رحت للدكتورة..

المهم..الدكتورة فحصتني..وسألتني باستغراب..: انتي فيج ألم؟؟(طلق يعني)
قلت: لا..
قالت لي: انتي مفتوحة بين 5 و 6 سم..وان شاء الله اليوم تولدين..

المهم.. طلعت من عندها.. ورحت بيت امي..عشان يكون عندي حد يوديني المستشفى...
خذتلي شاور وقلت اقيل وارتاح.. لان شكلي وراي ولادة..

لما تأكدتي انه فعلا طلق شو سويتي بذاك الوقت؟؟

و من كان معك من أهلك؟

و هل تألمتي من أول لحظة؟؟

انا كنت نايمة.. وفجأة صحيت.. وانا مفزوعة..مادري ايش صحاني..
غمضت عيني مرة ثانية..ومرة وحدة احس بألم غير طبيعي...قلت اكيد هذا طلق..

قمت غسلت وجهي واسناني..وقلت للخدامة تصحي امي. قالت لي بس هي نايمة..( امي ماتحب احد يصحيها من نومها)
قلت قوليلها ابغيها..
امي نزلت من فوق مستعجلة تسألني .. فيج الم؟؟.. قلت ايه.. يللا عالسيارة...
كان يوم خميس وزحمة سير المغرب.. وخصوصا الدوار اللي عند بيتنا..(المول)

و هل انتابك الخوف و لا تحمسي أكثر للولادة؟؟

و أيضا لما طلعتي للمستفشفى من كان معك؟

المشهد المضحك.. انا فيني الم.. يدي اليمين ماسكة المسكة اللي فوق الباب.. والجوال في اليسار...ابعث مسجات للاهل .. اني رايحة الولادة...
وقلت لأمي اتصلي الشرطة يفتحون الطريق.. ولا اولد في السيارة.....المهم.. وصلت المستشفى.. وعلى طول غرفة الولادة..
وعلى فكرة انا احب الولادة...

والاغراض المعتادة..بوعزوز جابلي الشنطة..ملابس لي وللبيبي ولوازم النظافة العامة والشخصية...

وكنت لابسة مثل الناس..
جلابية.. والقطعة السفلية بسسسس..
لانهم بيخلوني البس شي ثاني تماماً..

يعني تقريباً كنت مستعدة...

وسلامتكم..اكيد مللتكم..

صرااحه موضووع حلو للرفع يالله بنات قصصكم ادري انه الموضوع قديم

[grade="8B0000 FF0000 FF7F50"]الله موضوع حلو ....خليتوني اتشوق احكي لكم قصة بنتي الاولى الله يحفظها


اولا ...كنت رايحة بيت اهلي تاريخ 2/5/2004 على اساس اني بارقد عندهم ...وكان يومي عادي جدا لا حسيت بالم ولا شيء ....ورقدت في الليل مرتاحة بال ....يوم 3/5/2004 ...الساعه 5 الفجر قمت من الرقاد وحسيت بالم في بطني كنه الم دورة ..وبنفس الوقت احس اني ابي اروح الحمام ...طبعا ما توقعت انه طلق ...المهم اني رحت الحمام الله يعزكم ورجعت اكمل رقادي ...

وبعدها قمت مرة ثانية نفس الالم ...ورحت الحمام ...بس مافيني شيء ...فطنشت ورحت ارقد ..ما وعيت الا ذاك الالم اللي جاني ...فقلت في نفسي ....بس هاذا هو اليوم الموعود .....

لما تأكدتي انه فعلا طلق شو سويتي بذاك الوقت؟؟

و من كان معك من أهلك؟

و هل تألمتي من أول لحظة؟؟

رحت المجلس وقعدت هناك محتارة مب عارفه شاسوي ..اخاف اقعد امي ويكون تو الناس علي ...واخاف اسكت واولد في البيت ...وعلى كل الم اقعد ادعي ان الله يسهل علي ولادتي ...وابوي الله يطولي في عمره كان قايم علشان يصلي الفجر ...وشافني قاعده متربعه ومنزلة راسي وساكته ...جاني وقالي ..انتي فيج وجع يا بنتي ...؟؟....قلت له اي بس شوي شكلي تو الناس ...علشان ما يحاتيني ....طبعا هو ما صدق انا قلت جذي وراح يقعد امي للصلاة ويبشرها ..وانا اتصلت بزوجي ..لان كان موعد قومته للشغل ...وقلت له اني اتوجع واحتمال اني اولد ...طبعا استانس وقالي اذا رحتي المستشفى وقالوا لج ولادة اتصلي لي ...قلت له اوكى ...وسكر زوجي ..وجاتني امي تسالني ...طبعا شافتني اسولف قالت البنت مافيها شيء يمكن الم عادي ...بس انا كنت قاعده احسب الفرق بين كل طلقه والثانية وكان الوقت منتظم ..عرفت انها ولادة وقلت لامي ..وقالت لي بس تو الناس عليج ....رحت تسبحت ..وسويت شعري ولبست بيجامه وقعدت في غرفه امي ..قاموا اهل البيت وامي جابت لي الريوق ...واكلتني غصب على اساس اني اقوى للولادة وامي اتصلت بخواتي تبشرهم ..وخواتي يقولون لها تو الناس عليها ...طبعا تحملت الالم لين الساعه 1 الظهر ..فجأة جاني الم مب طبيعي ...صرخت صرخة ...من قوتة ..امي تخرعت وودتني المستشفى ..على الساعه 6 ونص 7 انا مربية ...وجبت احلى بنوتة ...نور ...الله يخليها لي ...والين انا حامل بطفلي الثاني ادعولي يا بنات الله يسهل علي الولادة [/grade]

[grade="FF1493 FF1493 4B0082 4B0082"]مشكوره فوانيس على الموضوع

انا لسى حامل وان شاءالله يجي يوم واحكيها لكم
بس بقولكم قصة اختي
انا واختي ندرس بنفس التخصص ونفس السنه وكان موعد الاحتبارات بعد يومين من زواجي طبعا اجلت الاختبارات وبعد شهرين بديت اختبر وكنت كل يوم اكلم اختي عشان تقولي في كل مادة ايش جاتها اساله وفي مادة قولتلها قبلها ابغى اجيكي البيت تشرحيها ليا
ويومها كنت اتمشى مشي زوجي واحنا راجعين اتصلت باختي اقولها اني باجيها قالت ياله انا استناكي ولاتخافي من الاختبار سهل وترى الاسئله جات كذا وكذا ...... قاطعتها قولتلها انا قريبة من بيتك خمس دقايق واكون عندك الا اسمها تقول اه اه اه وامي تاخذ الجوال(الموبايل) وتقولي اختك بتولد وانا مو مصدقه اقولها دحين باجيكم تقولي لا اخاف تخافي وانتي لسى عروسه وزجي مارضى يوديني يقولي اسمعي كلام امك الا اقل من نص ساعه امي تقولي سوي قهوة وتعالي اختك ولدت وجابت توتي(تركي)الله يحفظه لها يارب
لما رحت المستشفي جات ام زوجها تقولنا وهي تضحك على اختي كانت الظهر تكلم سلفتها والمويه نزلت منها وماهي عارفه انها ولاده ولما خلصت منها اتصلت على اهلي وكلمت اختي الثانية والعصر زوجها كلم امه يقولها نزلت منها مويه قامت قالتله بسرعه على المستشفى ولادة والحمدلله ولدت المغرب
الله يسعدها اختي كانت مبسوطه وتهون عليا الاختبار وهي بوضع صعب بس الحمدلله ولادتها سهلة وعقبالي
طبعا انا رحت اختبرت ومافتحت الملزمه ابدا والحمدلله نجحت بتقدير طيب[/grade]

بخبركم قصتي انا بعد:
انا ولدت وانا في قبل الاسبوع الاخير من الشهر الثامن يعني ما كلمته( ولدي قاصر) قبل ما اربي كنت في بيت اهلي العشا وتعشيت معاهم وحنيت ريل امي ،وبعدين قعدت شوية وقلت لأهلي بروح احس اني تعبانة عادي مو الم ثاني، ورحت البيت وانتظرت ريلي لين ما يرجع ورجع ونمنا بعد ما طالعنا تلفزيون، الساعة 2 بالليل حسيت بالم الله لا يوريكم استغربت صدق من قلبي بس ما فهمت هالالم شو يعني، ما قدرت انام ولا اقعد ولا اوقف بس اتجلب على بطني وظهري من الالم وكل يوح الالم ويرجع لمدة 5 دقايق وظليت ع هالحالة للساعة 4 الفجر وما خبرت ريلي وكان نايم، رقدت من حسيت ان الالم خف من الساعة 4 لين 6 وقمت فزعانة خلاص مو قادة اتحمل، طرشت مسجات حق خواتي قلت لهم انا تعبانة وفيني الم غريب ما اعرف ليش، ردو علي على طول على اسا انهم رايحين المدرسة يدواومون، فقالت لي اختي روحي المستشفى احسن لج احنى ما نقدر قولج شو حالتج,,قام ريلي الساعة 10 الصبح وشافني خلاص حدي قال لي بوديج المستشفى ما رضيت ويالله بالتحايل علي رحنا ع الساعة 11:30 واول ما فحصتني الدكتورة قالت لي انتي على ولادة، ما صدقنا، قلنا كيف ولادة انا ما دشيت التاسع وماخلصت الثامن بعدني حرام اربي من الحينه,,وريلي يحليله ركض يتصل حق امي وامه علشان يزهبون لنا الاغراض ( لأنها حالة مفاجأة)..
وتخيلو طلعنا بالسيارة انا وريلي وامي وخواتي بالسيارة الثانية ومرت اخوي بالثالثة ( حفله ههههههههه) وعلى بال ما وصلنا المستشفى بالسيارة 3 ساعات انفتح عندي الرحم 5 وقعدت عاد لحظات العذاب من الساعة 4 لين ما ولدت الساعة 8:30 بالليل..،]في غرفة الولادة كان معاي ريلي واخر شئ طلع وامي خواتي,وهذا افضل شئ صار لي,اول شئ ريلي حس فيني فديته وقعد ميت صياح : يقول لي ما خفت ع الولد خفت عليج اخاف تموتين، يحليل ريلي ، والله يطول في عمر امي وخواتي ما قصرو لولا الله ثم فضلهم ما حسيت بالامان تعرفون الوحدة اول ما تولد واول مرة تكون غير،،والله رزقني باحلى ولد سعود الغالي,, وكم تسوا فرحى اهل ريلي اللي غطت فرحة الناس لأنهم فرحانين اني يبت ولد ومن 5 سنوات..
والحين انا حامل توني بدش الخامس وطلع ولد الحمد لله( أم الاولاد) وريلي فرحان والله يسهل على كل حامل ويسهل الولادة

ووووووووووووووووووين الباقي الصراحه قصصكم حلوه تخلينا نعاايش الوضع

انا الصراحه ما جاني طلق ..

انا قعدت الصبح تفاجأت ان ملابسي الداخلية متبللة رحت الحمام لقيت ان ماي نازل علي وكان هذا قبل موعد ولادتي بعشرة ايام ، وبعد حوالي 10 دقايق بس بدا ينزل بغزارة وسألت ام زوجي قالت لي روحي المستشفى احسن ورحت المستشفى وانا مو بالي اني بولد بس الحمد لله اني كنت قبل يومين بس مجهزة شنطة اغراضي واغراض البيبي حتى امي يوم قلتلها علقت وقالت اني مستعجلة وان البكر دايما تأخر .. كأني كنت حاسه ههههههههههههه
وطبعا رحت المستشفى مع زوجي بروحنا وقالولي ان الماي اللي نزل يعني ولاده .. وخلوني عندهم مع ان يوم جيكوني طلعت مو مفتوحه ولا سنتيمتر .. وحتى يوم جهاز التخطيط طلع ما عندي طلق ولا كنت احس بألم ..
بعد 3 ساعات سووا لي طلق صناعي وكانت الساعه 12 ونص الظهر وتميت اتألم مع الطلق الى لما ولدت وكانت الساعه 19.34 المغرب ..
بس يوم كنت حامل كنت كل افكر لو يجيني الطلق وانا برا البيت وخصوصا لو كنت في الجامعه .. كان احرااااااج :o

الحمد لله على كل حال

بس الصراحه خاطري اذا حملت في المستقبل يجيني طلق طبيعي واحس بهد واروح المستشفى عشان اولد .. مو مثل المرة اللي طافت ، خصوصا ان يقولون ان الطلق الصناعي يألم اكثر من الطبيعي ..


شكرااا ع الموضوع الحلو

السلام عليكم...

أنا عني ما حسيت بالطلق الطبيعي أبدا.. ولدت بالطلق الصناعي ..

بس الي صار نزل عليه الماي والحمدالله كنت راجعه من الدوام صاير لي ساعتين ... أيامها كان رمضان فطرت ورحت على المستشفى ونمت هناك ليله والطلق ما ياني وانتظروا اليوم الثاني بطوله وبعد ما شي طلق فاستسلمت وأخذت الطلق الصناعي وبعدها ب 9 ساعات ولدت بحمودي.. كان الطلق مؤلم جدااااااااا...