جمعتنا ولمتنا السورية من جديد لشهر سعبان ... اتفضلوا

صباح الخير والياسمين والأمن ان شالله ع عروسات الشام ...ان شالله بينعاد عليكم بالراحه والأمن والسلام

مسا الخير يا بنات
كيفكم؟شو الأخبار في سوريا عند الصبايا؟

يسعدلي صباحكم ومساكم بنت الشام وام مصظفى والله يسمع منكم وربي يفرجها على الجميييع

الاخبار والله مابتسر لا عدو ولا حبيب كتير علقانة بسوريا وبكل مكان الله يحميهم وياخد ربي كل ظالم وابن حرام

اهلين بنوتة صباح الخيرات وينعاد عليكي يارب طمنينا عنك وعن ابنك واهلك ان شاء الله كلكم بخير

أهلين أم مصطفى الله يسعد مساكي يارب نحنا بخير الحمدلله انتي كيفك وكيف اولادك

الله يفرجها يا دمشقيه على أهلنا في سوريا واله طولت ليش هيك أكتر شي على سوريا....... يعنى وين العالم العربي عنها بس بدي أفهم..................يا حسرتي عليكي يا سوريه

أهلين وسهلين سوريه وبفتخر....كيفك أنتي ؟
أنا الحمدلله بخير ومو ناقصني غير تكونوا بخير يا رب..........
الله بفرجها أن شاءالله..........الله يحفظكم يا رب....ويحفظ أختي كمان ودار جدي والكل...........

شو وينكم

اهلين ام مصطفى الله يفرجها احسن شي بدنا رحمة الله وغير هيك مابدنا حدا

والله لاهين بهالدنيا والمدارس على الابواب علمك يوم السبت بتفتح عنا

هلا ام مصطفى تسلميلي يارب الحمدلله نحنا بخير وآمين يارب الله يحمي أهلك وأهلنا وكل واحد بسوريا ياعليي والله حاجتهم ياربي دخيلك فرجك عليهم

صباح الخير يابنات
كيفكن سورية ودمشقية وام مصطفى وشامية للعظم وروح عامر ونينو
شواخباركن ان شاء الله بخير
نينو طمنينا عنك مو مبينة هون ولاعالفيس بوك الله يجعلو خير يارب
اهلين فيكي ام مصطفى
والله العرب نايمين عن سوريا
وقلناها من البداية ياالله مالنا غيرك ياالله
الله يفرج عننا احسن شي.

اهلين ام فيصل يسعد صباحك .... نحنا بخير الحمد لله عم نستنى الفرج من رب رحيم كريم
انتي طمنينا عنك وعن ولادك ... خلصتي تجهيزات المدرسة ولا لسى

صباح النور دمشقية
امين يارب تفرج عننا
لاوالله انا ماعندي مدارس ولادي صغار
4سنين و سنتين
انت كيفك وكيف حملك
الله يقيمك بالسلامة

الله يسعدك يارب ... مسيت ان اولادك صغار ربي يحميهم وان شالله بتشوقيهم شباب
الحمد لله انا بخير وحملي تمام الله يتمم على خير انا وكل الحوامل ...

اهلياتك كلهم بخير ان شالله ؟؟

أهلين ام فيصل الحمدلله نحنا بخير انتي كيفك وكيف اولادك وطمنيني عن اهلك ان شاء الله كلهم بخير
نينو وشامية ان شاء الله تكونوا بخير ربي يحميكم ويفرجها عليكم

كيفكم يا بنات حبيت طمنكم عليي الحمد لله بخير لحد الآن دمشقية أمانة طمنيني على أخواتك لأنو كفر بطنا اليوم اقتحموها والله يستر نحنا ساكنين بحرستا بمنطقة بجانبها ادارة المركبات يلي منها عم ينقصف الريف كلو وعم نسمع صوت القصف ماعم يوقف على عربين وزملكا وعين ترما وكفربطنا وكل الريف وطبعا لحقنا كم قذيفة

حملة عنيفة على الريف بدهم يخلصونا عفوا يخلصوها قبل ما تبدا المدارس
بس وينكن متل ما قال الكبير أهم شي حياة المواطن وممتلكاته اييييييييييييييييييييييييييييييييييييه

هي أرخص شي وأهون شي والله

لك شامية شو مخليكي بهالمنطقة ؟؟؟؟ امانة عليكي ارحمي الصغير وارحمي حالك
روووحي عند اهلك بعرف اللي ربك كاتبه بده يصير بس كمان قالوا اعقل وتوكل .... يالله يحفظكم ويحميكم ويكون الكم عون

اختي ربك حميد لما قررت ترجع بيتها قامت القيامة بكفر بطنا والحمد لله قدرت من يومين ترجع بيت اهلي مع ان الدنيا كانت كلها مسكرة بس ربي حماهم
الله يحفظكم ويحميكم جميييع
ولا تزعلي ربك كبير وبشر القاتل بقتله ولو بعد حين ..... حسبي الله وكفى

دمشقية تقبشي قلبي ان شالله قلتلك أهلي ساكنين جنبنا تمام واقرب مني على ادارة المركبات
حبيبتي رحنا لبيت حمايي يوم ويومين وتلاتة لك الشغلة طويلة مو معقول اترك بيتي واسكن عندن وبعدين بخاف عليه من السرقة بتعرفي انتي البيوت يلي عم تنترك فاضية معظمها بسلامتك عم تنسرق ما قلتلك أهم شي حياة المواطن وحماية ممتلكاته

على كل حال الحمد لله على سلامة أختك وطمنتيني لأنو بعد يلي صار بداريا ماعم يروح الموضوع من بالي

.

السلام عليكم

كيفكم ياجماعة
أم محمود أم فيصل شامية أم عبد الله أم سنا
والجميع شو أخباركم
يارب تكونو بألف خير انتو واهلكم .

انشغلت عنكم بس صارت معنا شغلة من كم يوم
رجعو قصفو بنايتنا بقذيفة هاون وهي المرة التانية
الي الله بسلمنا وبيحمينا انا واهلي الف حمد وشكر لله
الاضرار كلها كانت مادية متل اول مرة بس ووالله قايمة القيامة عنا
جانين ع الاخررررررر القصف ع البيوت بزيادة والقناصات ماعم ترحم
لك حتى خبز مافي والله ياجماعة عم تمرق علينا ايام بلا خبز
لك الله ينتقم من كل ظالم حسبنا الله ونعم الوكيل فيهم
.

نينو كيفك ألف الحمد لله على سلامتك والحمدلله تطمنا عليك والحال من بعضو

النا والكم الله الله يفرج

نينو بعتيلي اسمك عالفيس حتى ضيفك