جمعتنا ولمتنا السورية من جديد لشهر سعبان ... اتفضلوا

اهلين صبايا كيف الحال

سمورة اهلين ياقمر والله الشات شوفة عينك الكل مشغول ولاهي والبال اصلا مو فاضي ,,,,
طمنينا عنك وعن ابنك ان شالله بخير .... وان شالله مازن ماعم يغلبك

****************

اهلين سوريتي كيفك اليوم وكيف الاطافيل طمنيني عنك
وشووووو في ماافي

*********

ام مصطفى والله خللي الامر لله منلتهي بحالنا وولادنا والفطور وبعد الفطور
اليوم ماعملت حلا مبارح زوجي جايب جاهز زنكل ومشبك وعندي كنافة من يومين سخنتها واكلناهم

*********

ام سنا تسلميلي انا الحمد لله بخير والله والصيام مو متعبني الحمد لله ماعم حس فيه والله
بس افطر بتدايق اكثر من الحرقة والحموضة

سلامتك يا أميرة المنتدى

والله انتي الاميرة ام مصطفى طمنينا عنك وعن الاولاد
وكيف الصيام معكم ؟؟؟ سمعنا ان الجو صار احسن من اول ولا لسى الشوب هاجم

مرحبا صبايا كيفكون
اهلين فيكي مصطفى وميسم نور عيني
نورت الشات بوجودك انا ياسمينة من سوريا من حماه ومقيمة بحماه متزوجة من سنتين وعندي صبي اسمو مازن عمرو سنة وشهرين قاعدة عند اهلي حاليا لانو زوجي مسافر وهي السيرة الذاتية هههههههههههههههههه

كيفك دمشقية وكيف الحمل معك الله يتمملك ع خير
حبيبتي عم تسأليني ع مازن يقبرني شو حرحور ابني اختصاصي تطبيق خزاين وخزازين مطبخ منشان اذا بدك مساعدة ههههههههه الله وكيلك هالكني ما بلحق لم من وراه لانو لا طلعة ولا فوتة بفش خلقو بالبيت ههههه
الله يحيميه ويخليلي ياه

مافي متلك يا سوريا
كل نسمة من هواك بتسوى الدنيا ومافيها
الله يحمي سوريا

اهلين سمووورة الاموورة هههه
انا الحمد لله بخير وعافية وحملي تمام ماشي الحال ..... راح الكتير باقي القليل على خير يارب

وياحياتي هالمازن باينتو بيجنن ماشالله عليه وامييين الله يحفظه ويخليلك ياااه يااارب ... منيح يعني لقيتي مين يعزل ويساعدك بالمطبخ هههههه
الله يبعتلهم ايام حلوة يارب ...

وا والله مافي احلى من هوا بلادنا بس الله يفرجها علينا ويرجع الامن والامان لربوعها ياارب

اهلا وسهلا فيكي سمورررره منور بوجودك المنتدى يا حياتي
الله يحفظ أبنك يا رب

دمشقيه حياتي والله هاالصيام متعبني كتيير
والحمدلله ع كل شي الاولاد بخير يا عمري.......
والجو مولع عنا طبعا......الله يعنا يا رب........

والله سوريا ما في منا بالعالم كلوا..............الله ينصرنهم يا رب.................. قرب النصر..:096:

كيفكم ياحلويين ان شاء الله الجميع يكون بخير وبصحة وعافية وكيف رمضان معكم ياحسرتي على هالشهر صرنا 21 الله يعفي عنا ويتقبل صيامنا وقيامنا ويجعلنا جميييييييييييييييع من عتقاء هالشهر قولوا آمين وربي يفرجها على بلدنا ويزيل هالغمة ويرجع الامن والامان والايام الحلوة ربنا كريم

اشتقتلكم كتير بس والله ماعم يصحلي ادخل :D
شفتوا بنات مسابقة الطبخ بلش التصويت ادخلوا وصوتوووووووووووووووا ;)

مساالخير
كيفكن ياصبايا
والله اشتقتلكن كتيررررررررر
بس كان عنا ظروف بسوريا ستي ماتت واخي وولاد عمي اعتقلون
بس هلا الحمدلله طلعو وهدي بالنا شوي الله يفرج علينا يارب
طمنوني عنكن شو اخباركن وكيف رمضان معكن
ع فكرة فكرت سكرتو التجمع من اخر مرة لو ماتركتلي رسالة سورية كتر خيرها
والله نسيت اسمكن لاتواخذوني من الضغوطات
الله لا يوفق بشار يلي حملنا هموم الدنيا كلها
كيف حملك دمشقية طمنيني عنك
وشو اخبار البنات كلن

اهلين ام فيصل والله اشتقنالك كتيييير
الله يرحم ستك واحسن الله عزاكم ... والحمد لله على سلامة اخوكي وولاد عمك ... الله اكبر على كل ظااااالم وكل ابن حرام

طمنينا عنك وعن ولادك ان شالله تمام ؟؟

انا الحمد لله بالف خير وحملي بخير الله يتمملي انا وكل حامل وربي يطعم كل محروووم

.
السلام عليكم

كيفكم ياغوالي اشتقتلكم كتيرررررررررررررررر
ام محمود وام سنا وام عبد الله ونبوعة و ام فيصل
والعرايس الي لسا ماتعرفت عليهم
طمنوني شو اخباركم وكيف كان رمضان معكم
والعشر الاواخر كيف عزيمتكم فيها
الله يتقبل منا ومنكم
انا والله اضطريت اتغيب عن المنتدى لفترة
بسبب انو قصفولنا بيتنا والف الحمد لله طلعنا منو سالمين
وكانت امورنا مكركبة لهيك ماقدرت ادخل
الحمد لله على كل حال
.

مرحبا يا بنات كيفكم بتتذكروني ؟؟
على كل حال أكيد بتعذروني لأنو النت عنا بحرستا مقطوع من زمااااااااااااااااااااااااااان ونحنا مقطوعين عن العالم وكنت لما افتح اتصفح عالسريع من خارج البيت بشغلي أو مكان تاني بس عنا عبث مبارح عم جرب بالصدفة عالتراس عندي واذا لاقيت زاوية بيلقط منها السيرف تغطية وطار عقلي بس كل شوي بيفصل
من فرحي مانمت وأنا فاتحة لأنو حاسة حالي مقطوعة عن العالم على فكرة القصف شغال فوقي وأنا عالتراس متل المجنونة والله بس نحنا تمسحنا ماعاد تفرق معنا كل قذيفة بقول رح فوت وما بفوت

.
ههههههه ياصباح القذائف
والله شر البلية مايضحك
لك شامية حتى انا متلك والله
وهلأ القصف شغال بس انا عم طلع من الشباك وفاتحة من جوال بلكي تجيني شي شظية من هالكلاب لارتاح من هالشوفات كلا الله يخلصنا يارب
والله عيشة بتقصر العمر
.

ياهلا فيكي نينو أنت وين ساكنة ليش ولو اني بعرف ماعاد في أرنة هادية الا بعض الأماكن يلي ساكنين فيها يلي ما بيتسمو

والله أوقات بحس الموت أرحم يلي مات الله يرحمو مات مرة وحدة بس نحنا عم نموت كل يوم ألف موته من القعدة على أعصابنا ومن الرعبات ومن هالشوفات العجيبة الغريبة

.
والله انا ساكنة بدرعا والقيامة قايمة عنا
ومعكـ حق مليون بالمية والله الي مات الله يرحمو
ونحنا الي عم نموت مليون مرة باليوم
الله وكيلكـ وضع مأساوي لابعد درجة ضو بالشارع مابتلاقي
مي مقطوعة والكهربا 12 ساعة مقطوعة اتصالات نفس القصة
جرحا بالشوارع قدام عيونا مو قادرين نوصل لالهون
بس حسبنا الله ونعم الوكيل
الله يفرجها علينا عن قريب يارب
.

الله يسعدلي أوقاتكم يارب
أهلين وسهلين بأم فيصل والله اشتقنالك ان شاء الله العمر إلكم يارب وألف الحمدلله على سلامة اخوكي واولاد عمك الله يحميهم يارب كيف اولادك ان شاء الله بخير :) ضلك طلي علينا ها ههههه

اهلين نينو ألف الحمدلله على سلامتكم وربي يعوضكم ببيتكم ويفرجها عليكم وعلى سوريا

مية اهلين بشامية شو مانتذكرك والله بالنا عندك الحمدلله انك بخير وكيف سالم العسل أكيد كبران الله يحميلك ياه
نينو وشامية أمانة انتبهوا على حالكم والله نحنا هون عم ندعيلكم بكل وقت وربنا كريم

بنات ادخلوا على قسم الطبخ وشوفوا مشاركة دمشقية بمسابقة الطبخ :thumbs_up: