تجمع الحوامل اللواتي يلدن في شهر اذار( مارس 3) 2009

هلا كروشات
شخباركم مع الحمل
اني اليوم رحت موعدي كلشي اوكي والبيبي راسه نزل تحت ومره وحده قلت ليها انا نزل عليي ماي مو واجد قالت لاتخافين بس قالت اذا نزل عليش مره ثانيه روحي سيده الطوارئ ووصفت ليي تحاميل لان عندي التهابات

طريقة حلوة وما تكلف وايد

*أم زهراء*
هلا كروشات
شخباركم مع الحمل
اني اليوم رحت موعدي كلشي اوكي والبيبي راسه نزل تحت ومره وحده قلت ليها انا نزل عليي ماي مو واجد قالت لاتخافين بس قالت اذا نزل عليش مره ثانيه روحي سيده الطوارئ ووصفت ليي تحاميل لان عندي التهابات

مو كأن مبكر ينزل عليج ماي لو كانت افرازات جيكي في الطوارئ افضل علشان تتطمنين وطمنينا معاج وما تشوفين شر حبيبتي

مراوي22



ان شاء الله تفهمين لهذا الشرح المبسط

كروشات أخباركم إن شاء الله الكل بخير
بالنسبة للجهاز ماشاء الله الأخت دمعة شوق وفت وكفت
حبيباتي أنا من السابع والبيبي عندي في الحوض هل هذا الشي عادي
حبيباتي ليش السدر شو فايدته
كروشات وخاصة إلي سبق لهم الحمل شو أجهز لشمطة المستشفى للبيبي وحقي لأني موب عارفة شو أحط فيها أبي بالتفصيل كل شي

دمعة شوق;8670947:
مو كأن مبكر ينزل عليج ماي لو كانت افرازات جيكي في الطوارئ افضل علشان تتطمنين وطمنينا معاج وما تشوفين شر حبيبتي

نزل مره وحدح بعدين وقف ويوم قلت للدكتوره قالت ليي لاتخافين

هلا كروشاااات

كيفكم ان شاء الله بخير

دلوعه السدر تستخداميه مثل البدوره الجسم
هذ اللي امي قلت للي وانا اخذات
وبعد اخذات قشور القهوه بسوي طريقه اللي وحده من الاعضاء حطتها عشان الكرشه
ميلاد حلوين بس حتى انا ما شفت نفسهم

_*-*-*-_;8669077:
هلا حوامل شخباركم وشخبار بيبياتكم؟؟
أول شيء بتليقف وبرد على اللي سألوا عن قياس البطن بالمتر عشان يشوفو هي في اي اسبوع لان كل سم عبارة عن اسبوع وفي ناس يسوى نفس الحركة بس باليد لكن اللي بالمتر طبعا ادق لكن عرض اصابع كل وحده تختلف عن الثانية
ثاني شيء اللي يحسو البيبيات يرتعشو في البطن اتوقع والله اعلم انو هذا اللي يسموه بالفواق أو الحازوقة لان يجي للبيبي وهو في بطن امه
أخباري
تنومت في المستشفى عشان الضغط كان مرتفع والحمد لله تطمنت على كل شيء البيبي نزل راسه تحت ووزنه زين والضغط اعتدل لكن يبغى له مراقبه والهيموغلوبين وصل 9.3
والله يقوم جميع الحوامل بالسلامة هم وبيبياتهم

الحمد الله على سلامتج وما تشوفين شر

انتبهي لا تكثر املح ولا تعصبي كثير

والله يسهله عليج يارب
يمكن صحيح يكون الحازوقه

مساكن الله بالخير يا كروشات...
اسمحن لى اتاخرت بالرد بس لانى ضيعت الموضوع وكل يوم ادخل ادورة وما القاااة ...

والحمد لله لقيت الموضوع عشان اطمن عليكن..واطمنكن على ..
بالنسبة للقيصرية وقرار الدكتورة اتسويها لى لا نى انا كنت مسوية عملية منظار في الرحم قبل ما احمل .. والدكتورة خايفة ايصير عندي انفجار للرحم هذا بالاضافة الى ان الحوض ضيق والجنين ما يلقى مكان يدور فية .. والراس مول مب نازل تحت كلة بمقعدة وانتن بكرامة ....
بس مو مشكلة .. كل اللى من الله حياة الله ...
وبالنسبة للتجهيزات تقريبا جهزت الاشياء الضرورية حتى البامبرز اشتريتة ..
امس لفيت على كم طقم لدلال القهوة والشاي ابغي شي مميز ..
وفصلت جلابيات بالدانتيلات بتخلص على اخر الشهر .. وان شاء الله يطلعن حلواات .. وكل سوم شوي شوي وبنجهز ان شاء الله ,,,
طمننى عليكن ...

الاخت _*-*-*-_
حياك اختي وتليقفي على كيف كيفك والله
هالايام مو نافعنا الا اللقافة لن الدكاترة ما عندهم ماعند جدتي
قبل شوي كنت بالمستشفى اقول حق الدكتورة احس البيبي كنه يرجف ساعات
تقول لي ( ودي حسيتيها ازاي يعني )
قلت حسيت كذا انه يرجف ببطني كنه بردان .. _ احترت اشلون افهمها_
الا قامت تضحك قالت ابقى اتدفي كويس وانتي نايمة عشان ما يبرد
حسستني كني هبله
قالت احتمال تكون حركة الامعاء
اشدعوة لها الدرجة ما بفرق بين حركة الامعاء ولا البيبي
بيشككون الواح بعقله
بس شكله زي ماقلتي اختي هو الفواق او الحازوقة
يعطيك العافية
وخطاك الشر انتبهي لنفسك ولضغطك .. وسالفة الهيموغلبين مو تستهينين فيها
انتبهي لنفسك وما قدامك الا العافية

ترنيمة شاعر
ماعليه اختي اعذري تناحتي بس اشتقصدين بالسيم خيوط الجراحة يعني
اجل هذي والله معلومة خطيرة وجديدة محد قالها لي قبل
وصحيح انا نسيت ان مراهم العيون صغيرة ومافيها واجد
تحياتي

مراوي22
اختي عادي اللي عندي مو من نفس الماركة واستخدامة مثل الترمومتر الالكتروني العادي
تدخلين في الاذن وبعد 9 ثواني يدق جرس القراءة وينكتب لك درجة الحرارة
بس انشاء الله الاخوات يفيدونك واكيد اللي عندها خلفية ما بتقصر

تحياتي

ام زهراء
احس سالفة الموية اللي نزلت هذي ووقفت مو هينة يتهئ لي استشيري دكتورة ثانية
ما بخوفك بس بعد بكرة يطلعون لك فيها بمية طلعة ويستعجلون عليكك يقولون لك المويه قليلة حول البيبي
نولدك قيصري
وانتبهي لنفسك وما تشوفي شر

دلوعة بودي
حياك اختي ..والحمد لله احنا بخير
بالنسبة للسدر ..الاخت فراشة تقول
مثل البودرة للجسم
انا على بالي بستخدمه بدل الصابون يضله ماده طبيعية ومطهرة مامنها خوف
اختي مدام نزلت البيبي في الحوض طبيعية مامنها خوف حتى لو ارتفع ينزل مرة ثانية
الدكتورة اليوم قالت لي الحمد لله وضع البيبي تمام والراس تحت
بس ممكت يتقلب وما يتم على هالحالة الى نهاية الثامن
بالنسبة لتجهيز شنطة المستشفى
يا كثر ما قريت بتجهيزات هالشنطة وبصراحة في كل مرة اتفاجا
لاني بولادتي الاولى جهزت شنطة وقلت حق امي ذكريني فيها وانا رايحةاولد
حطوها بالسيارة واذا قالوا ولادة نزلوها ..محتوياتها
قميصين خفاف
لاني كنت احترحدّي مع انه كان شتاء وقت ولادتي والناس ترجف برد
واحد اغير فيه بعد الولادة والثاني اطلع به من المستشفى
شبشب
لبسة طقم كامل للبيبي البسه وانا طالعة
ملف الف فيه البيبي
بودرة ومراية صغيرة وكحل
عشان لو جاني احد قبل لا اطلع
وبس هذي كل السالفة بقيت الاغراض كلها يوفرها المستشفى
وما احتجت شي
يعني الفرشاو والمعجون والصابون يوفرها المستشفى ويوفر غيرها
اكمل لكم بعدين اروح اشوف بنت صحت تبكي من النوم


شبشب

اتصدقون كروشات لمن حسيت بهالشعور ان البيبي يرجف
قلت في قلبي انه مو بردانه معقوله البيبي بردان هههههههههههه
ولمن قلت لزوجي قام يضحك علي :o

فراشه بين الزهور
شنو قشور القهوه وليش فيدينا وياج

ميلاد مرسي على تجهيزات الشنطه ويالله ننتظر بقية التجهيزات (a)

صباح الخير كروشات

كيفكم ان شاء الله بخير

قشور القهو ه عشان الكرشه بعد الولاده عبار عن قشور القهوه مطحون
وزنجبيل طازج مبشور ودله صغير فيها ماي حار تاخذين ملعقه من قشور القهو والزنجبيل وتخليهم
في الدله نصف ساعه وتشربين منها في اليوم كوبين

عيون الحمدالله انه تطمنا عنج طمنينا عنج كل فتره والله يسهله عليج يارب

ميلاد كيفج الحمد الله انج تطمنتي بس غريبه دكتوره
ولا تعرف ليه يرتعش الجنين في البطن يالله ان شاء الله كلها بافواق
وصحيح كل شي متوفر في المستشفي بس الهم لبسات اللام والطفل

صباااااح الخير بنااااااات شخباركم وشخبار بيبياتكم

امس كنت متفقه مع زوجي اني اروح اخذ مفرش البيبي وامر ستي سنتر انكمل الاغراض
بس رجعت من الدوام واتغدينا الاايقول قومي بنطلع من الحين علشان نرجع في الليل من وقت
رحنا الرياحين اخذت مفرش احليو ب25 دينار عباره عن مفرش+شنطه+ قطعة تبديل واخذت من عندها قماط وقحفيه

رحت المحل اللي في جدحفص ابغي افصل واحد ثاني وافصل وياه سله ابعجلات شفت اللي عنده تطريز بنااات الحين التطريز دارج ولا اشلون وصراحه تطريز حلووو وناعم فما ادري اخذه ولا لا ؟
بس السله اللي حق البيبي عنده بدون عجلات ابغي محل ايفصلها لي كامله تعرفون محل زين واسعاره مناسبه؟

المهم طلعنا ورحنا ستي سنتر رحت مذركير اخذت 3 شباحات طقم مع بعض اب4 دينار وطبعا ما اخذت شي ثاني لانه اسعارهم فوق شفت طقم المشط ب9 دينار قلت حشى وبعدين اني كل فتره بغير الفرشاة والمشط فليش اخذه ابهسعر.
طلعنا رحنا سنتر بوينت اخذت فوطه ثانيه وفوط للصدر وشنطة صغيره حليوه وعلاقه للمراضع وتلبيسة مراضع اخذت وحده ناعمه لانه زوجي ايقول مايبغي شي دفش عليه صورة دبدوب او سنور خخخ وش انسوي بعد اذا طلعت مره ثانيه بروحي باخذ على كيفي واخذت قطن واخذت طقم فرشاة الشعر ب2دينار

بنااات بغيت اسالكم جهاز تعقيم المراضع مهم ؟
واذا عندكم من وين شريتوه وبكم؟

دمعة شوق

مشكوره إختي على التوضيح شكلي بشتري ماركة براون آنه إلي ماخذته مادري شنو ماركته بس أكيد مو براون ومو هلون يستخدم يعني مايصير أصفار أول ماتشغليت=نه يرن بعد ماتحطينه في الإذن يرن وتطلع كذا قراءة ماعرف شسالفه

وين أحصل ماركة بروان طبعاً أقصد جهاز قياس الحراره لأنه ماذركير ماعندهم

وسؤال ثاني حبوب الحديد ذبحتني من الإمساك وإنتو بكرامه أقدر أوقفها يعني لو وقفتها وكثرت من الأكل إلي يحتوي على الحديد ينفع

وإذا ما أخذتها شيصير ؟ شنو تأثيره على البيبي

مع إني آخذ مسهلات نوعين خمس مرات في اليوم وأشرب عصير برتقال مااااافي فايده قلت خلاص بوقف مايسوه علي :confused:

ترنيمة شاعر

جهاز التعقيم وايد مهم ومريح شرط إنج إنتي تستخدمينه يعني ماعندج خدامه تحوس فيه وتخربه تعقدت آنه من شريت جهاز خربته وهالهمره شريت واحد ماركة بيجون من مذركير أعتقد سعره 40 أو أقل شوي ما أذكر ويوم جافته أمي قالت إنتي طول يومج في الدوام والخدامه بتستخدمه وبتخربه لج مثل باقي الأجهزه إلي حرقتها

ياختج يدهم ثقيله على الأجهزه قمت رجعته وقلت خلها تفوح المراضع أحسن (n)

بس إذا بتاخذينه وايد بترتاحين وثانياً أحسه آمن أكثر من أي طريقه ثانيه للتعقيم

تلقين في ماذركير أنواع وايد بس آنه فضلت بيجون لأنه نه المراضع إلي أستخدمها دايماً بيجون

الله يسهل علينا جميع

اليوم بنتي تسألني متى بجي البيبي من زمان في بطنج بسرعه روحي المستشفى جيبيه


قلت لها باقي شهر قالت وايد قلت لها يمكن يكون اقرب ما ادري بس اذا بجي لازم بجيب لكم هدايا انتي واختج واستانست وايد

الله يسهل علينا جميع تصدقون مع انها ثالث مرة لي بس خايفه هالمرة وايد ما ادري ليش؟؟؟؟