إلي عندها تكيس وقاعده تنزل وزنها تدخل.. والي متعايزه تنزل وزنها تدخل

السلام عليكم ورحمة الله وبركاته ،،،

أختي شما العيناوية موضوعج وايد حلو وشيق ويهم شريحه كبيرة من الحريم اللي للحين ما حملوا ، وأنا منهم متزوجة من عشر سنوات وللحين الله ما أراد لي الحمل هناك أسباب كثيرة منها أني دورتي غيرررررررررر منتظمة بتاتاً من أول ما بلغت كانت تجيني شهرين متواصلين وبعدين تقطع 6 شهور وهكذا حتى بعد الزواج وبعد الزواج زوجي مرض وقام ياخذ علاجات كثيرة وقوية أثرت على انتاجه لكنه الحمد لله أحسن لكن ما زال ياخذ علاجات وراح ياخذها على طول أما أنا فآخر شي عندي ثلاث أكياس على المبيض الأيسر وعندي التبويض ضعيف وعمري الحين 33 سنة وناويه أكرر تجربة أطفال الأنابيب للمرة الرابعة وأنشاء الله ربي يرزقني ويرزق كل اللي تتمنى آآآآآآآمين.

بالفعل أنا أمس بدأت أكل صحي يعني تغديت سلطة تونه والعشاء كان فواكه ،، وناويه أنشاء الله أني أغذي نفسي تغذيه صحية عشان تفيدني في الحمل ،، وآبغي نصيحة منج ومن الأخوات إذا عندهم فكرة عن نوعية الأكلات أو الفواكه أو الخضراوات اللي تساعد على تقوية المبايض والبويضات ياريت لو أحد يرد ويفيدني ويفيد الأخوات ،،

راح أكون معاكم متابعة وكل ما حصلت فرصة راح أنزل يومياتي مع النظام الجديد (مثل ما قلتي أختي شما نظام مش ريجيم):D_smil1:

السلام عليكم ورحمة الله وبركاته ،،،

صباحكم الخير يا بنات ،، أختي شما الله يقوم جدتج بالسلامة أنشاااااالله ،، مشكورة على المعلومات وأنتظر فوائد المرميه ،، وخلطة العسل مع طلع النخل وغذاء الملكات وين أحصلها يعني أروح محل بيع العسل وأقوله أخلط لي عسل مع طلع النخل أو أشتري طلع النخل من مكان والعسل من مكان وأخلط بروحي أنتظر ردج أختي وأنا مقدرة الوضع اللي تمرين فيه أنشاء الله ما عليها شر،،،

أختي هملوله الشابورة يعني البقصم اللي نغطه مع الشاي الحليب وينباع في كل السوبر ماركت في جهة الخبز والروتي والكيك في أكياس مكتوب عليها شابورة أنا أمس أشتريت شابورة الهرفي طعمها حلو والله مع الشاي،،


أمس تغديت تبولة مع كم حبة روبيان مقلي والعشا شربت عصير كوكتيل رمان ومانجا وقطعة خبز بالثوم مع الجبن وبس ،، الحين أنا في الدوام والساعة الحين سبع ونص فطوري راح يكون سندويتش جبن دايت مع شريحة طماط والروتي أسمر طبعاً وباشرب شاي بالحليب القليل الدسم والغداء للحين ما قررت وأكيييد باوافيكم بآخر التقارير ،، بأنتظاتر تفاعلكم

يعني شنو الكولوفاج