الي يرضعون عيالهم طبيعي

أما انا فما اعتقد احد عانى اكثر مما عانيت مع الرضاعه
الطبيعيه ..انا والحمدلله عندي اربعة اطفال ..ولدين وبنتين ..

اما ولدي البكر ..طبعا لاني كان اول ولد لي فما كانت عندي
خبره في الرضاعه..فبعد الولاده ما اهتميت وايد ..ولاني مرضت بعد الولاده
مباشره صابني احصار في البول وانتوا بكرامه وهذا اللي خلاني
تعبانه ولا اقدر ارضع ولدي فكانوا الممرضات يشفطون حليبي
ويعطونه..فالولد تعود على المرضاعه ..بعدها بخمسة ايام
بعد مارجعت البيت حاولت ارضعه ..الولد كان يصيح صياح غير طبيعي
كان يسود وجهه من كثر الصياح مايبي صدري ..حاولت بشتى الطرق
جربت الحلمه الصناعيه لكن ما انفعت ..ومعناها ان الولد ابد
مالمس صدري نهائي ..تعبت نفسيا وكنت اقعد اصيييح .:cry:

اما ولدي الثاني ..الحمدلله من بعد الولاده باربع ساعات تقريبا
حطيته على صدري والحمدلله على طوول مسك صدري وقعد يرضع .
.ما تدرون ايش الاحساس اللي حسيته لاني اول مره
احس بهالاحساس استانسسسسسست :dd:


اما ببناتي فكانت معاناه ثانيه ..مع العلم ان بينهم سنتين ونص
والمعروف ان البنت مصها ضعيف ..وانا حلمتي صغيره ووحده
منهم داخله على داخل ..مع اني كنت اسوي لهم مساج من
الشهر السادس او السابع ..لكن بناتي ماكانوا يقدرون
يمسكون الحلمه ابد وكنت اشفط لهم الحليب واعطيهم بالمرضاعه ..
بعد عشرة ايام او اسبوعين يعني بعد ماقوى الفك عندهم صاروا
يقدرون يمسكون صدري ..لكن بعد ايش بعد مانشف الحليب ..
حاولت بشتى الطرق ان الحليب يرجع اكلت رهش ومكسرات
وعصاير لكن مافي فايده يرضعون لكن مايشبعون
يعني لازم اكمل لهم بالحليب الصناعي ..وقبل الست شهور افطمهم
لان حليبي يكون نشف خلاص ..:sad:

ادعولي يابنات هالمره ان الله ييسر الرضاعه عندي ..

معليش طولت عليكم سامحوني .

ربنا ييسرلك يا ورده التواليب ويييسر لكل الأمهات :shy: :shy:

السلام عليكم


دخلوني في القائمة وياكم ..

انا ارضع ولدي طبيعي وطبعا بعد شهر عطيته صناعي لأن اللأجازة خلصت وخلاص وراي دوام

وتعذبت عذاب لأنه في البدايه كره الصناعي وفي النهايه تعود عليه ..

وبعديت جت اجازة عيد الأضحى ورجعت قطعت عنه الصناعي وبعدها كان عندي دراسه ورفض الصناعي خير شر


المهم و الحمد لله على كل حال كل يوم اهو يصيح من صوب وانا لما اركب السياره اصيح من صوب ثاني وعدت على خير



بس اكثر الصعوبات اللي واجهتني هي ان الحليب ينشف من صدري بسرعه لأن أكلي قلييييييييل وما اشتهي آكل

ويوم اللي اغصب على روحي ولدي في الليل يريحني في النوم بس يوم ثاني ارجع لأكلي القليل

والشهر اللي طاف لما رحت الموعد حق تطعيمة الشهر السادس طلع وزنه ما زاد الا كيلو والدكتورة قالت ان الزياده مب طبيعيه قليله وااااااايد وهي شافت شكلي قالت انتي ما تاكلين عشان جيه القيمه الغذائيه اللي في حلبج قليله وما تكفي احتياجات الولد ...

وذاني حرب داحس والغبراء مع الأكل وان شاء الله بعد الموعد برجع واقول لكم شو صار ....!!!!!!

و أنا بعد وياكم

السلام عليكم يا أمهات يا حنونات و اللهيحفظ لكم ذراريكم و يبارك لكم فيهم :)

المهم

أنا و لله الحمد أرضع ولدي طبيعي و الحمدلله أبدا ما عطيته صناعي و ما فكرت أعطيه

و الحمدلله ارتحت من سوالف المغص و الآلالام اللي تصيب الياهل من الحليب الصناعي

لكن

و هذا المهم

الحين بعد ما بديت أأكله أحتاج أحيان أضيف الحليب في أكله و أضطر أحيانا أني استخدم له الحليب الفرش اللي نشربه نحن

وأنا مابا من جيه حاليا أفكر أعطيه صناعي بس مب فالمرضعة لاء لاء

بس في أكلاته فشو رايكم أي حليب استخدم له

و تنصحوني ولا لالالالالالالالالاء

الرجاء الرد

و دمتم بخير

:)

كلم عندكم تجربة واني سمعو تجربتي.
مشكلتي حليبي قليل وصرت تعبانة بعد الولادة وامي بس تقنع فيني مافيش حليب والطفل ضعفان كثري من الصناعي.ولايفوتكم تعبت واني ابدل هالصناعي لاني ولدي الله يسلكم يشتكي من كثرة الغازات.وتعبت وياه للين ما عنجج على صدري وتييني حالة هستيرية وقلت ان امي السبب واقوم لكم واجوع الطفل يوم علشان يشرب من صدري ومنها ظل يشرب.

ياجماعة نصيحة لحد يقارن روحه باحد ثاني لانكم بتتعبون نفسي .كانت اختي معاي والدة وكان حليبها اكثر مني لدرجة ان ولدها صار بعافية مو طبيعية حتى الدكاترة يقولون لها لاتكثرين على طفلش.واني ولدي نحيل حتى رقبته تندلع.فكنت تعبانة من المقارنة

ياالمياسة تحملي تعطين الولد الحليب العادي الي تشربينه.لانه لازم يكمل سنة بعدها تبدين معه المنتجات هذه وبعد قللي منها.لانه في منتجات خاصة بالاطفال في كل السوبر ماركت.في لبن اطفال والروب اشكال وانواع للاطفال وهم في جبن للاطفال لاتغامرين بالولد لانه الحليب الي تشربينه معامل بطريقة مايناسب الطفل ولامعدته::gum:

ياحلوات الي تبي تعطي طفلها حليب او لبن بس ماتبي تتستعمل الرضاعة علمو اطفالكم يمصون بالعود من عمر 4 اشهر

.وادا كنتو تعتمدون على الطبيعي ابدو معاهم من 6 اشهر.

هذي ياخواتي معلومات طبية من كل الصادر لاتتهاونون فيها وحاولو قد ماتقدرو تسالو الدكاترة وتقرأو .
هذي الروح الي في ايادكم امانة وادا ما استمتعتو وانتو تربون وتثقفون نفسكم وانتو امهات محد بسوي هذي المهمة .
669933

:qaq: :sad: :shy: :salam: :angry: ياحلوات الي تبي تعطي طفلها حليب او لبن بس ماتبي تتستعمل الرضاعة علمو اطفالكم يمصون بالعود من عمر 4 اشهر

.وادا كنتو تعتمدون على الطبيعي ابدو معاهم من 6 اشهر.

هذي ياخواتي معلومات طبية من كل الصادر لاتتهاونون فيها وحاولو قد ماتقدرو تسالو الدكاترة وتقرأو .
هذي الروح الي في ايادكم امانة وادا ما استمتعتو وانتو تربون وتثقفون نفسكم وانتو امهات محد بسوي هذي المهمة .
669933

تسلمين بالغالية أم حمودي و الله يخليلج حمودي ياااااااارب يارب :)

تسلمين بالغالية أم حمودي و الله يخليلج حمودي ياااااااارب يارب :B_wink:

السلام عليكم

ياليت تقبلووني معكم في الرابطه ...

أنا توني من ولدت لي شهر و6أيام وهذي اول ولاده ...
ماقدرت ارضع بنتي من صدري أول ماولدت على طول لأنها ياقلبي كانت في الحضانه
اول يومين كنت تعبانه لأني ولدت بعمليه
وماجا على بالي موضوع الرضاعه ... بعد اليومين حسيت بتصلب في صدري وحراره
تطلع منه وكان يألمني مره ..
جابو لي الممرضات شفاطه وجلست اشفط لها..
في اليوم الرابع من الولاده صرت اروح لها الحضانه وأحاول أرضعها
والحمد لله أخذته ...
بس أنا أعطيها حليب صناعي عشان تتعود عليه
أعطيها رضعه وحده في اليوم والباقي كله طبيعي..
اما عن تشققات الحلمه الاحظ انه صدري اليسار رايحه فيها وتألمني اذا
رضعت منه عكس اليمين ماأحس بشي فيها ابد
هذي تجربتي ...
أما عن أسئلتي ...
انا بنتي احيانا ترضع بس خمس دقايق وتنام
واحيانا عشرين دقيقه
وأكثر الأوقات عشر دقايق ...
مدري اذا كانت تشبع او لا
يعني معقوله رضاعة عشر دقايق تكفيها ؟؟؟

وانا في كل رضعه اعطيها من صدر فهل طريقتي صحيحه ؟
وسمعت بعد انه مو زين ارضعها وانا نايمه منسدحه ... انتو وش رايكم؟؟
واخر سؤال واستفسار عندي انا وزني مازاد الشي الملحوظ لاني اصلا نحيفه
بس عندي الكررررش ... هل ممكن الرضاعه تخفيه والا لازم احاسب على أكلي بعد؟

مشكورين
وتحياتي لكم.....

شوق العيون.. كأنج تتكلمين عني بالضبط!!!! أنا بعد ولدت بعملية و بنتي الله يطول بعمرها دشت الشهر الثالث و الوقت اللي تاخذه في رضعتها يختلف كل مرة.. يا عشر دقايق يا ثلث ساعة..

و بصراحة.. انا ارضعها في كل مرة من صدر واحد لأنه قلبي يعورني و ما يطاوعني العوزها و اغيرها كل عشر دقايق..والحمدالله ما عندي مشاكل في هالموضوع بس لاحظت انه مرات ما تشبع يوم ارضعها من صدري اليسار...:(

و عن التشققات .. جربت احط كريم التشققات بس ما فاد.. فسويت بنصيحة الممرضة و هي انج بعد ما اتخلصين رضاعة ادهني الحلمة بالحليب اللي في صدرج.. و صدقيني بيخف عنج و ما بتحسين بالالم موولية...


و عن الكرش.. انا مثلج بالضبط و بصراحة ما راحت 100% بس خفت وايد لأني ارضعها طبيعي بس يبالي شوية تمارين عشان تنشد :)

المشكلة اللي اواجهها الحين هي الزجام و ويع البلاعيم :( بدون ما ادري خذت فيتامين سي البارحة مرتين و اليوم يخبروني انه ما يناسب اللي يرضعون طبيعي.. و وايد زايغة ارضعها... و في نفس الوقت.. زايغة اني اعاديها... فيا ريت اللي مرت بهالشي تنصحني و تفيدني.. ربيعتي قالت لي حطي كمامات و قلت حق ريلي اييبلي يوم بيرد من الدوام المغرب.. بس عندكم نصايح ثانية؟؟؟ اتظنون لازم اوقف رضاعة و اخلي اي حد يعطيها صناعي؟؟؟ (مع اني ما اعطيها الا قبل ما ترقد في الليل بس)..

اتريا ردودكم و لا تخيبون ظني فيكم :)

برد عليكم اخواتي قريبا ان شاء الله :)

هلا والله malaanah

تصدين ذكرتيني انا بعد الممرضه نصحتني نفس نصيحتك
بس ماجا على بالي نسيتها والله ....
<<<<<<<<<<تدرين الحين ماعندنا وقت الوقت لهم

وأنا مثلك بعد يوم ارضع بنتي من صدري اليسار احسها ماتشبع
وتجلس تبكي بعد شوي تبي ترضع ..... غريبه مو

اما عن الزكام ماتشوفي شر ولسه والله ماجربت هالشغله
وعندي البيبي .... ان شاء الله الاخوات يفيدونك

عندي سؤال بعد ...
يابنات انا اكلي مره قليل وهالشي من قبل حملي وانا كذا:gum:
وحملت ونفس الشي ماقدرت اني ازيده
والمشكله الحين اني ارضع والكل يقولي لازم اكل الثلاث وجبات على الاقل في اليوم
وانا بصراحه مافيني عليهم حدي وجبتين اذا مره جيت على نفسي اذا مو وجبه وحده بعد
في رايكم وش اسوي ؟؟؟؟

اختي شووووق العيون..

الرضاعة عادي تكون عشر دقائق بس.. مو دائماً يكون الطفل جوعاااان بنفس الدرجة.. ممكن يحتاج اقل لأنه ما مشاه بطنه.. او انه ما بذل مجهود بكى او حممتيه.. فعادي فترة العشر دقائق تكفي...
تعرفين اختي وهذي المعلومة ذكرتها قبل في هذا الموضوع ان كل ثدي مهما بلغ كبر حجمه، لا يوجد فيه حليب اكثر من 7 دقائق؟ يعني يكفي كل صدر من 7 الى 8 دقائق عشان يشربه الطفل بالكااااااامل.. والباقي كله هوا... عشان يزيد عليه الغازات بس !!

والرضاعة وانتي منسدحة.. ولو انها اريح بوااايد لكنها سبب رئيس عشان التهاب الاذن لدى الطفل..
انا اسويها لكن لما يصير عمر الطفل 5 او 6 شهور.. يكون فكيت عنه القماط خلاص ويرضع براحته ..

وبطنج حتى لوكنتي ضعيفة يبيله رياضة وخصوصا المشي.. حتى لو ما نزل وزنج لكنه يشد البطن والجسم عموما ويخليه متناسق ومرتب..
وتحمللللللللللي تسوين رجيم منج ومن كيفج.. عشان الحليب مايقل.. كثري من الخضراوات لأنها مغذي ة ومفيدة.. وبنفس الوقت ما تزيد وزنج.. والاحسن انج تستشرين اخصائية تغذية.. عشان تحافظين على مقدار الحليب عندج..


ملاااااااااااانة
تصدقين انا بعد مثل الشيء؟ :) اقصد صدري اليسار كمية الحليب فيه واااااايد اقل من اليمين..
يعني اذاا رضعها من اليمين عادي يكفيها.. بس اذا من اليسار لا .. لازم اكمل عليه شوي من اليمين ..
وبطفلي الاول كان حتى يبين الفرق في احجامهم بشكل وااااااااضح
هذي المرة الحمدلله الفرق اقل، واشوف كمية الحليب زادت في الجنب اليسار بعد :) لأني ارضع منه بكثرة ..

وعن التشققات .. :( مشكلة والله ..
حليب الام حلو وزين حقها.. بس اذا زايدة وااااايد وتوصل لدرجة الدم.. لازم تكشف عند الطبيبة.. وممكن تاخذ جلسرين من الصيدلية حلو حق التشققات بشرط تغسلينه زين ما زين ..
ويفضل انك ما ترضعين منه يومين لحد ما تنحل مشكلته .. واكتفي بالشفط...
انا بنتي بعد تعضض بس للحين ما طلع لها اسنان .. .وهذاني خايفة حدي.. ان عضضتني صدقوني بفطمها ولا في قلبي رحمة :D


وبالنسبة للمرض.. تصدقين امي تقول اذا الام كانت مريضة محمومة مو زين ترضع بنتها !!
اقول لها انزين شعطيها؟ انا مرضعها صناعي تقول دوري وحدة مرضعة ولا ترضعينها !!
ههههههههه
طبعاً هذا الكلام احسه مو منطقي ولا عملي ابداً ..
ومافيه مناص من رضاعة الطفل في كل الاحوال..
اذا عن تعاديها.. تلثمي بقماش رقيق .. مال شيلتج.. وفري ويهج غير جهة وجه الطفل..
وعن الادوية ماحب افتي من عندي.. احسن تشوفين الطبيب وتخبرينه انج ترضعين طبيعي..






الله يعطيكم العافية :)

هلا الغالية جمانة :)

البارحة سرت الدكتور و قالي عندي احتقان شديد في بلاعيمي و عطاني كمامات و دوا يصلح للمرضع و الحمدالله مافيني حمى.. بس قلبي عورني البارحة خليتها ترقد عند امي لأني ما شغلت المكيف في حجرتي و ما بغيت اعذبها و اخليها ترقد في الحر وياي :( و بصراحة.. انا ارضعها بروحي طول ما انا الحمدالله مب محمومة :)

و عن التشققات تراني شراتج.. قلت اول ما تطلع ضروسها بفطمها لأني بدون شي ما اسلم من عضها فديتها لول!!!!


بس بسألج سؤال الغالية (اكيد بسأل سؤال يعني بسأل جواب!!! :2_106: ).. الشفط يعور والا لا؟؟ لأني وايد اخاف اشفط.. شريت الشفاطة مالت بيجون و للحين ما استخدمتها لأني خيفانة انها تعورني... و بصراحة مليت و انا البس الbreast pads لأني مب عارفة متى بيتسرب الحليب فأتم لابستنه حتى و انا نايمة...:eeksign:

ما عليج شر يا ملانة.. الزمي الدوا في مواعيده وان اشاء الله تتعافين بسرعة :)

الشفط ما يعور لو يدوية لأني جربتها بولدي الاول لما ترقدت معاه عن بو صفار
بس لو كهربائية سمعت تعور على السرعات المرتفعة..

هلا يا حلواااات

انا ارضعه طبيعي بس ريلي قال بندخل حليب صناعي لاني انا ما اتغذا عدل..

وشربته اليوم حليب اس 26 بس الصراحه خوفني تم يرجعه وطلغ من خشمه والله خفنا عليه وااااااايد

شووو تنصحوني اي حليب زين وما يضر حديثي الولاده خاصه الاطفال الخدج

بنتي عمرها شهرين وسبوع
تاعبتني مع الرضاعه ظول اليوم حاطتها على صدري ما شاء الله عليها
يعني ما في تنظيم وجبات ولا شي
ارضعا واصلي عشر دقايق وارجع ارضع اتغدى واتعشى خمس دقايق وهي تصيح وارجع ارضع
كيف انظم الرضاعه
وحبيت اسأل كم مدة الرضعه الوحده
لاني اقعد بالساعه والساعه ونص ارضع
والمشكله انها ما تقبل الرضاعه
تموت من الجوع والصياح ولا تحطها في فمها
ياليتها تاخذها وتريحني شوي