بنات مصر: فرحك خلاص قرب.... طيب ايه خطتك في الشهور اللي قبل الفرح

سبايكي اهلا بيكي معانا انتي ممكن تجيبي لخطيبك برفان بيحبه او ساعه او ممكن تروحي للراجل بتاع البراويز وتكتبي اللي انتي عايزه فيها وطبعا تخلي البرواز شكله حلو كده والخط يكون جميل يعني تخلي حد متخصص يعمل كده يارب تكوني فهمتيني
او ممكن تجيبله ميداليه فضه يكون شكلها حلو او ممكن تكتبي اسمك واسمه عليها
شرباته ربنا يكون بعونك وبعوني كمان لان خطيبي شغله 4 ايام بيات بره يعني هقعد لوحد لما اتجوز في الايام دي ادعولي

ربنا يوفقك يا هبه وربنا يصبرك يا شرباتة على الجو اللى انتى عايشة فيه ويجزيكى كل خير ويرزقك باللى تتمنيه

اسبايكى
ازيك ياستى يلا ما احنا ياما بنشوف والله انا قاعده مرعوبه بس الحمدلله على كل حال وشاكره لمشاعرك الرقيقه بصى يا قمر اصلا علشان نكون فى السليم اعياد الميلاد حرام صح الرسول نفسه لما شاف ناس من الحبشه بيلعبوا قالهم فى ايه قالوا دول ايام عيد كانوا عندنا فى الجاهليه قالهم قد ابدلكما الله عيدان خيرا منهما عيد الفطر وعيد الاضحى وفى روايات عيد يوم الجمعه وبس لكن انتى تهدى فى وقت مش لازم مناسبه زى الام مثلا نهديها فى اى وقت وما نربطش ده بيوم معين فهمتينى ياقمر عموما ممكن ساعه قيمه انا لما كان والدى فى امريكا جاب ساعه لاحمد تحفه وروعه وشيك اوى وكانت قيمه بس انا اللى اديتهاله وممكن بارفان قيم برضه وممكن مع الهديه كارت رقيق وممكن خاتم فضه قيم وانتى وذوقك وممكن معاهم ورده حمراء بس اديهم ليه تانى يوم مش يوم ميلاده يا اما لو مجبره غيرى النيه ربنا يستر علينا فى الزمن ده


التيفال والصاج احسن حاجه مش لازم اسيلس




هوب ربنا يعينك
شكل خطيبك لسه فى الامتياااااز

انا جيت يا بنات بصم الملايات اولا الفوط نوعي من الاحجام يعني محتاجه مثلا 2 بشكير كفايه اوي ممكن واحد الفوط محتاجه حجم صغير للوجه ومحتاجه حجم متوسط عشان وانتي طالعه من الحمام تلفيه علي شعرك اما الفوط العاديه فهاتي النوع العادي اللي هو قطن ميه في الميه وجيبي الللي بوشين وجه قطن ووجه قطيفه الاول لاستعمالك العادي والثاني لما يكون عندك ضيوف تحطيه شكله بيكون حلو اوي الاعداد يعني حسب ما انتي عايزه ممكن تجيبي 8 من كل نوع وممكن توصلي لحد 12 من كل نوع زي ما نتي عايزه بس مش اقل من كده
اما الملايات
8 نوعيهم ساده ملون الالوان اللي انتي تحبيها انا عن نفسي جبت بمبي واصفر وسيمون وابيض وفسدقي وبيج ورمادي واحمر وبتجيبي 2 مشجر وماما جابتلي هديه من عندها زياده يعني طقم ملايه لونه بمبي بس ستان وده كان غالي 450 بالنسبه لطقم ملايه بس طبعا ده مش للنوم عليه يعني يتفرش بس شكله حلو والملايات في منها انواع يعني مطرز عادي واللي بالاوراجنزا واللي بالسيرما نوعي منهم يعني 8 مش يكونم نفس النوع لأ نوعي انتي وزوقك
الكبارتيات هاتي 2 عندك العادي وعندك الكبرتايه الطقم زي ما تحبي تحبي العادي هاتي تحبي الطقم جيبي عايزه واحد من ده وواحد من ده ماشي
المفارش مفرش(درابيه) بيكون قيم وشيك ومفرش عادي حلو وسعره معقول انا جبت الدرابيه لونها مش فاتح مش بحب الالوان الفاتحه جبتها لونها نحاسي ومطرزه بالذهبي تحفه وهي كانت ب1000 بس احنا طبعا خذناها ب800 الاول بابا قالي غامقه بس لما راح فرنسا لانه مهندسس بحري قالي كل الالوان هناك كده غامقه وجبت التانيه سكلاما علي بمبي شويه وسعرها حوالي 350
الشتوي
طبعا اتنين بطانيه جيبي واحده دبل فيس بتكون عباره عن بطانيتين مع بعض ودي لوزوم الشتا لما يكون جامد اوي وتجيبي واحده عاديه عشان لما الجو مش يبقي سقعه اوي
كمان مفرش قطيفه انا بصراحه مش كان عاجبني اللي كان في السوق لان معظمه لونه يا احمر يا كحلي عجبني واحد بس لونه عسلي في ذهبي بس رائع هو هندي بس بعد ما عجبني طلع غالي وماما بعد ما مشينا مرضتش تزعلني ولاقيتها تاني يوم شرياه وجايباه هو كان بيعمل 1000 واحنا خذناه ب800 برضه بالعافيه بصراحه ماما مكانتش بتزعلني وكانت بتجيبلي حاجات كتير عشان مش تزعلني ومش تقول لبابا يعني سحبت من صندوق الادخار في شغلها هي وجابتلي عشان مش تزعلني هي الامهات كده مش بيرضم يشوفم بناتهم زعلانين بس احنا متزعلوش مني جزم مش بنقدر ده وبنرد برد وحش جدا وحتي شكرا ساعات مش بنقولها
معلش غيرت الموضوع نرجع تاني
اللحفه اتنين لحاف واحد بيكون زي المفرش يعني زي الدرابيه والتاني بيكون قطن عادي انا بابا جابلي واحد معاه من بره لونه توبي بارز منه فيهبس درجه غريبه وهو متوفر هنا بيعمل 500 هو بيكون تركي بابا جابه من فرنسا بس بابا جابه ب300 ودفع عليه 100 جمرك فبقي 400 بس تلاقوه هنا والتاني ماما عملتهولي قطن عادي خالص عليه رسومات بس وده بيكون عملي في الاستعمال اكتر
والمراتب طبعا عندك خيارين ثواني حكمل ولا تعبتم

المراتب عند خيارين ولكل منهما عيوبه ومميزاته
الاول المراتب الجاهزه ودي في منها انواع النوع اللي كله فيبر والنوع اللي وجه منه فيبر ووجه منه قطن وكلاهما فيه سوست اولا المميزات طبعا السوست بتخلي النوم رائع لانها بتكون طريه جدا العيوب الحجم الكبير يصعب تهويتها ثانيا الاقمشه الناعمه جدا التي لا تثبت عليها ملائه انا شفتها عند بنت خالتي وشفت عيوبها ثانيا ان الفيبر مضر جدا لانه يرفع من درجه حراره الجسم ويمتص الرطوبه ومع الوقت السوست دي بتنخفض وبالتالي بتكون متعبه جدا للظهر والسوست بتصدي
حتقولوا عرفتم ازاي حقولكم ازاي انا بابا وخالي مهندسين بحرين وطبعا انتم عارفين ان مصر هنا اي حاجه بتوصلها بعد زمن يعني حديكم مثال بابا مثلا كان جايب التلاجه النوفروست من 25 سنه وكانت لسه منزلتش مصر وحصل فيها حاجه صغيره جاب واحد يصلحها استغرب انها مش بتعمل تلج ليه راح قاصص منها انبوب عشان يخليها تعمل تلج زي باقي الثلاجات شفتم ههههههههههه
خالي كان جايب المرتبه دي من بره من 10 سنين ليه ومع الوقت شاف العيوب دي كلها وقالي عليها
اما المراتب القطن مميزاتها وعيوبها اولا مميزاتها سهوله حملها والتهويه لانها بتكون مرتبتين مش واحده حريه اختيار الاقمشه التي تكون من القطن فتمنع انزلاق الملايه من عليها وطبعا اصح شئ القطن الطبيعي لانه بيكون في صورته الاوليه ولا يدخل في اي عمليات صناعيه زي الفيبر
عيوبه ان في الاول بيكون عالي جدا اما مع الوقت فبيهبط ولاكن ليها علاج انك تحطيها في الشمس بترجع تاني وممكن كل فتره تعيدي تنجيدها وبترجع احسن من الاول لاكن الجاهزه لأ
المخدات بتعملي اتنين اما الخداديات فا دي مشكله كبيره حصلتلي ان المفارش واللحفه والمفرش القطيفه خدادياتهم مش نفس الحجم وده خلاني اعمل خدادايات كتير يا قمرات ده كل اللي عندي لاكن طريقه الفرش دي بتختلف من واحده لاخري تحبم اقولكم انا حعمل ايه

امة الله
شكرا حبيبتى على المعلومات القيمة دى انا عن نفسي لسة مش اشتريت غير 7ملايات و3 مشجر وجبت 6 سيفرى اللى هما بتوع الاطفال ، وجبت كبرتايتين لسراير الاطفال، وواحدة كبيرة ،
وباقى لى واحدة اللى هى طقم دى بس هستنى اجيبها من المعرض السورى .
اما البطاطين واللحاف فانا هشترى لحاف واحد اللى هو الفيبر دة وهجيب بطانية واحدة دبل فيس واتنين صغيرين عاديين للسراير الصغيرة ، وحماتى كانت فى السعودية واشترت لكل واحد من اولادها بطانية حلوة اوى ومفرش خطيبى بيقول انة تحفة وبيبقى فى كمان لحاف عادى مع التنجيد .
وهجيب مفرشين ان شاء الله مفرش صيفى ومفرش شتوى قطيفة.
والفوط انا جبت 10 قطيفة و6قطن عاديين ولسه البشاكير .

كان عندى سؤال ليكوا انا لحد دلوقتى لسة محددتش لون غرفة النوم هيكون ايه ، تفتكروا استنى مجبش المفارش لحد مااعرف علشان اجيب الوان مناسبة ولا اعمل ايه؟


وياريت تقوليلنا يا امة الله انتى هتفرشى ازاى ؟والكبرتاية الطقم انتى جبتيها نوعها ايه ؟

بصي يا قمر لاني بصراحه كنت مقرره قبل حتي ما اتفرج علي حجرات النوم حجيب اللون ايه فجبت المفارش بدري لاكن لأنك لسه مش حددي يبقي لما تشتري حجره النوم ابقي جيبي المفارش اما موضوع حجره النوم لان احنا متفقين انها تكون عليه فهو حيجبها بعدين ففرشها مش دلوقتي اما انا حفرش ازاي التقليدي يعني ليله الدخله طبعا بتفرش الملايه البيضا وفوقيها حفرش الدرابيه الغاليه ووقت النوم حطبق الدرابيه واشيلها عشان مش تتبهدل وحكون محضره في الدولاب كبرتايه لاني مبنامش غير وانا مستغطيه بصراحه وكمان عشان حتكسف اول ايام انام جمبه كده يعني المهم بنت خالتي قالتلي حاجه اني الصبح لما اصحي احط المفرش التاني اللي هو السكلاما الصبح كنوع من تغيير شكل السرير الصبح وانا عجبتني الفكره اوي وحعمل كده ولما الناس تيجي تبارك ابقي افرش الغالي تاني عشان اقيم طبعا وفي الشتا ححط المفرش القطيفه ووقت النوم نبقي نطلع البطانيه يعني لازم نتعود ان في حاجات للشكل زي الدرابيه والمفرش والمفرش القطيفه مش للاستعمال وحاجات للاستعمال زي البطانيات واللحفه والكبرتايات عشان دي حاجه بتفضل العمر كله ولازم نحافظ عليها انا ماما لحد دلوقتي حجرت نومها كأنها عروسه لسه لازم ننظم نفسنا كويس طبعا وحجره النوم طبعا بتحطي اباجورتين بس انا عجبتني تحفتين زجاج عسلي وفيهم شمعه كبيره مكبكبه بس قصيره حسيت انها مش تقليديه وشكلها حيكون رومانسي اكثر من الاباجورات العاديه المفارش بتاع الشقه حبقي اكملاهلكم بعدين سلام دلوقت والبراويز كمان رتبتاها ازاي

اسبايكى ازيك
انا مع شرباته فى انك ان شاء الله تدى الهدية لخطيبك فى اى يوم تانى غير يوم عيد ميلادة
بصى انا اتفقت انا وخطيبى ان الهدايا بيننا مش لازم تكون مرتبطة بمناسبة معينة علشان ميكونش حرام ومن يومها واحنا بنحاول نبعد خالص عن ايام عيد ميلادنا والمناسبات اللى زى كدة وفى نفس الوقت بنجيب هدايا لبعض وبنفرح بيها اكتر لانها بتكون مفجأة ومش متوقعه زى عيد الميلاد ، انتى بس عديها المرة دى علشان ميزعلش وبعد كدة اتفقى معاة ان الهدايا تكون فى اوقات غير المناسبات دى.
وبالنسبة لفكرة الهدية بيتهيألى البنات فادوكى وانتى اكتر واحدة تقدرى تحددى خطيبك هيفرح بأية اكتر او محتاج ايه
يعنى مثلا انا مرة اشتريت لخطيبى ساعة قيمة ومرة ميدالية فضة وكتير بشتريله امهات الكتب لانه بيحب يقرا اوى خصوصا الكتب الدينية وفكرة البارفان كمان كويسة ولو هو عندة مكتب ممكن تجبيلة اكسسوارات المكتب مج مثلا واقلام شيك ...الخ
فى هدية كمان انا جبتها كانت عبارة عن شميز وجرفتة بتكلف حوالى 200 جنية بس المهم تتاكدى ان الالوان هتعجبة .
ومهم اوى انك تغلفى الهدية كويس ومتنسيش تعطريها وتحطى كرت صغير تكتبى فية كلمين حلوين .
لو افتكرت حاجة تانى هبقى اقولك
سلام

هي كبارتايه قطن ميه في الميه وفيها خدايتين بس خلي بالك في منها انواع بتبدأ من 100 ودي بتنتسل مع الوقت ماما جربتها اما اللي انا جبتها بتعمل 200 بس شيك وشكلها غريب
اما البراويزفجبت لانتريه تلاته واحد طويل واتنين مدورين حطيت الطويل في النص والمدورين واحد من كل جنب هما نحاس احمر معمول عليه ورد بارز
الصاله الصغيره جبت ليها ساعه خشب بس مش صندوق لا هي عامله زي برواز مكتوب فيه الحمد لله محفور وفيها عقارب ساعه يعني بس اكتر منها برواز
الطرقه عندي سته متر فجبت تلات براويز واحد طويل واتنين مربعين وهما كان مرسوم فيهم شغل اسلامي وعلمت الضاءه الطرقه فانوس و2 ابليك اسلامي الطراز لان الصاله انا عامله فيها مجلس ايلامي فحبيت تكون الطرقه امتداد ليها وحطيت البراويز مدرجين يعني واحد مستطيل جمب الابليك الاول عالي وبعدين المربع في النص اوطي وبعدين المستطيل التاني حطيته قرب الابليك التاني اوطي من اللي في النص السفره مش حطيت فيها حاجه يعني اعتمد فيها علي طريقه ترتيب السفره اكتر وعند الستاير ووهي ركن لاقيته فاضي خالص فباب جابلي كنبه صالون انتيك اللي هي مذهب صغيره ححطلكم صورتها لو عندي وحطيتها بطريقه مايله ووراها اباجوره طويله بحيث اضائتها تنزل عليها اصلا الصاله عندي شكلها حرف Lبس فين طرفين الحرف فيه عندي عمود مربع شكله كان بايخ فجبت بروازين منظر طبيعي اطارهم مذهب حطيتهم فوق بعد واحد مستطيل فوق والتاني مربع تحت اما الصالون حطيت برواز كبير سيرما بين الاتنين ابليك اما المفارش انا جبت مفارش دي حسب راحتك بس للسفره مجبتش مفرش كبير لا جبت مفرش هندي صغير مطرز لان الكبير بطل وللشتا بابا كان جايبلي مفرش قطيفه من باكستان من 4 سنين ححطه علي السفره والصالون جبت مفرش هندي بس مش مطرز معتمد علي شغل السيرما والخيوط علي قماش التل علي فكره المفارش في السوق تشكيلات حلوه جدا اما الانتريه فلان الترابيزه عندي دورين فمجبتش من فوق مفرش جبت مفرش صغير للدور التاني عشان ححط البونبنيره في الدور التاني فتبقي باينه من فوق
فرشك لشقتك انا عن نفسي افضل اعتماد الشكل الكلاسيكي في ترتيب الاثاث افضل عدم وضع الاثا مستقيم بل استغلال الاركان ووضع الاثا بطريقه زاويه بيكون اشبك اليجاد لا افضل السجاد الكبير لان السجاد الصغير يظهر اناقه السيراميك والمكان
المفارش يجب ان تكون صغيره حتي تظهر النقوش في جسم الاثاث
اما الطريقه المودرن لا احبهاالاضاءه اعتماد الاضاءه الخافته الجانبيه اكثر من الرئيسه

تسلمى امة الله على الرد افكارك حلوة اوى عن ازاى تفرشى السرير
ربنا يهنيكى وتحققى كل اللى انتى بتفكرى فية .

هو انا لازم افرش فى اول يوم ميلاية بيضا او روز ؟
انا جبت اللونين دول بس جبت واحدة تانية لونها مابين كاكاوى ودهبى كدة وكان نفسى افرشها لانها قيمة جدا وشكلها ملوكى ماما جابتهالى ب380 جنية لكن البيضاعادية ب190 هى حلوة مش وحشة بس التانية اجمل وارقى .


من فضلكوا ممكن اطلب منكوا حاجة
عايزة اعرف انتوا جبتوا كاسات وكوبيات ومجات اد ايه ؟
كام طقم للنيش وكام طقم استعمال ؟والاسعار كام تقريبا ؟
يارب متنسوش تردوا عليا .

وعايزة كمان اعرف اسم غسول للمنطقة الحساسة يكون متجرب؟ بلييز

اولا الصيني والمطبخ عندي انا كان علي العريس انا نقيت وهو اشتري بس حسب امكانياته يعني هو لما كانت تعجبني حاجه وفي مقدوره يجيبها ولو مش في مقدوره كان يقولي طيب شوفي حاجه تانيه فكنت افهم واراعي اما موضوع الغسول في موضوع لبنت عذاري حدور لك عليه واقريه حيفيدك جدا http://www.3roos.com/forums/showthread.php?t=165285

ماشاء الله عليكى زوقك يظهر انة هايل واضح اوى من كلامك .
اكيد البراويز دى كلفتك كتيرانا يادوب اشتريت برواز واحد ب250 بس فرصة الاختيار قدامى قليلة اوى لان طبعا طنطا مش زى القاهرة واسكندرية
انا اكبر مشكلة عندى دلوقتى هى الالوان خايفة اختار لون ويطلع غير الدرجة اللى انا عيزاها او يطلع مش حلو فى الاخر .
صحيح اية رايكوا الافضل ان انا اعمل الشقة كلها لون واحد ولا اعملها كل غرفة لون ،يعنى مثلا الصالة احنا فى شقة بابا عاملين جدار دهان اسبونشى كاكاوى وباقى الجدران درجة افتح قريبة من البيج وعاملين كل غرفة بلون يعنى انا اوضتى لونها بينك بس درجة حلوة اوى واوضة بابا وماما لونها روز زى اللى فى الجنب دة(البلوكات اللى فيها اسماؤنا ) واخويا اوضتة لونها واخد درجات الازرق وهكذا ، انا بصراحة عاجبنى نظام شقة بابا وكنت بفكر اعمل شقتى زيها ورجعت قولت لا اعملها كلها لون حلو بدرجات مختلفة ورجعت احترت فى اللون ياريت تقولولى رايكوا بس انا عاجبنى اوى الدهان الاسبونشى وعايزة اعملة ونفسى اعمل اوضة الاطفال بورق حائط .

هوبه وشرباته وندا


ميرسى ليكوا يا قمرات على الافادة ومظبوط كلامك شرباته بس معلش المرة دى

هعديها عشان ميقولش انى بتلكك لانه فى عيد ميلادى جابلى موبايل

وانا مكنتش اعرف حرمانية دا

بصي يا ندي يا قمر موضوع الالوان بيختلف من واحده لواحده انا كنت عايزه اعمل الصاله لون والاوض لون تاني بس لما وضحت الالوان لخطيبي حسيت انه مش حيفهم يوصل فكرتي للصنايعي فطلبت انه يعمل الشقه سيمون فاتح وخلاص لاني خفت يطلع مش زي ما انا عايزه اما البراويز لأ مش غاليه بالعكس التلاته اللي في الطرقه مكلفونيش كلهم علي بعض اكتر من 60 جنيه والساعه كانت بحوالي 60 جنيه والثلاثه النحاس ب200 علي بعض والبرواز السيرما ب150جنيه والبروازين اللي في عمود عملم االاتنين 50 لاكن برواز واحد 250 كتير بصراحه انا جبت بواز واحد كبير اللي هو بالسيرما لاكن الباقي تراوح بين المتوسط والصغير بيكون اظرف من الكبير

اسبايكى
ماشى ياقمر وبعد كده اتفقوا انكم ماتعملوش فى المناسبات دى خلاص وبعدين تعرفى هاتبقى احلى لما يعرف ان انتى بتفكرى فيه فى اى وقت مش فى يوم معين وبس وكمان غير المفاجاه وغير انه هيكون مبسوط اكتلر وانتى كمان عارفه ليه لانكم مابتعصوش ربنا فهو هايسعدكم اكتر ان شاء الله وبعدين من ترك شيئا لله ابدله الله خيرا منه صح ربنا يسعدك ويهنيكى ويباركلك يارب

نداااااااا
لاتعليق انا حبيتك فى الله من كلامك بس ربنا يسعدك انتى وزج المستقبل وعايزاكى كده على طول

بناااااااااااااات

هو انتو بتجيبوا مفارش زينه اد ايه ؟؟؟؟؟؟؟؟ عموما انا جبت واحد دهبى ومافرشتوش كتير والله حرام اكتر من واحد ملوش لازمه اصلا وبيتبهدل كمان يعنى انا مثلا كنت بفرشه فى العيد وكان عندى واحد بامبه وواحد دهبى تانى من السعوديه بس للسراير الاطفال دول اللى كانوا بيفضلوا علشان محدش كان بيدخل الاوضه غير نادر اوى المهم يعنى كان جوزى ييجى يقول ايه ده ايه الجمال ده الله وفى ثوانى يقولى يلا شليه علشان عايز اناااااااااااااام يا اما يترمى على الارض لحد الصبح

عندك حق يا شرباته بس برضه عشان راحتي انا النفسيه في شكل الشقه احب حجره النوم بالذات وانا داخلاها يكون شكلها مريح

والله يا امه الله مش عارفه اشكرك ازاى انتى قولى لى ازاى؟

ربنا يكرمك ويوفقك فى حياتك ياااااارب

مش عارفة يا شرباتة يمكن فعلا احنا بنزودها شوية فى حكاية المفارش دى بس اصل المفرش هو اكتر حاجة بتدى شكل حلو لغرفة النوم ، انا هدخل ان شاء الله فى الشتاء والمفروض ان المفرش طبعا هيكون قطيفة رغم انى بشوف ان المفرش الصيفى الساتان بيكون شكلة افخم كتييير تفتكروا ينفع افرشة فى الشتاء ؟؟
على فكرة انا كمان حبيتك اوى فى اللة، وفى انتظار نصايحك الحلوة ذكرينا ان الذكرى تنفع المؤمنين .

متنسوش تردوا علي اسالتى عن اطقم الكوبيات والكاسات .

amt_allah:
انا جيت يا بنات بصم الملايات اولا الفوط نوعي من الاحجام يعني محتاجه مثلا 2 بشكير كفايه اوي ممكن واحد الفوط محتاجه حجم صغير للوجه ومحتاجه حجم متوسط عشان وانتي طالعه من الحمام تلفيه علي شعرك

بصوا كمان فيه فوطه مخصوص للشعر هى موجوده فى محلات محلات بس حتى لو مش لقيتوها (لانى انا شارياها من زمان جدا) هى فكرتها بسيطه قوى

اى فوطه وش عاديه واعمليها على شكل مثلث بحيث جنبين يكونو مقفولين وجنب واحد بس مفتوح
تحطى قاعده المثلث على شعرك وتدخلى شعرك كله فيه :qaq: "ياااااارب تفهمونىىىى"

وبعدين تلفى شعرك فى الفوطه وتلفيها على راسك فيطلع شكلك اقرب للعمامه كده

يا ترى فاهمنى؟؟

ندا هو انتى مش على الماسنجر ليه؟؟

امه الله انتى ليه مش جايبه بطانيه للفرش على السرير بيتهيالى انها مهمه قوى خصوصا عندكم فى الاسكندريه

على فكره يا امه الله المنشيه عندكم جميله قوى والقماش فيها والانجيرى روعه ممكن تقولى لنا على المحلات هناك؟

وعايزه اسالك على صايغ كويس عندكم لانى نفسى قوى اجيب حلق دهب وهنا فى القاهره ما فيش حاجه عاجبانى لكن مره كنا فى المنشيه لقيت محلات تهبلللللللللل

امه الله انا اسالتى كتير ولا حاجه؟؟

ندا بالنسبه للكوبايات انا هقولك على حاجه ظريفه انتى تجيبى 12 كوبايه الى هما الكرستال الغاليين

وفيه فى كارفور طقم 18 قطعه تقريبا الى هما على حزهم ذهبى

وهاتى 6 ماجات الى هما زجاج وايديهم معدن بصرااااحه تحفففففه

وهاتى طقمين قهوه مشكلين

وهاتى طقم 6 كاسات مياه

وهاتى بقى كوبايا زجاج للاستعمال اليومى

وممكن تجيبى مجين مع بعض لكى ولجوزك يكونوا شكل بعض

بالنسبه بقى للمفرش انا راى انك طبعا تفرشى مفرش العروسه من غيررررررر اى شك ده للشتا وللصيف ولكل الاوقات

انا بقى عايزه اسالكم ما حدش فكر يشترى مفرش كروشيه او حتى يعمله؟

او مفرش لاسيه؟

انا بعمل مفارش لاسيه صغيره كده للصاله والسفره وبصراحه شكلهم تحفففففففففففه