اللي ولادتهم في فبراير الجاي...حياكم

ummaram:
سلاااام خواتي

باسألكم صادكم تورم القدمين في جهة أكثر من الثانية ؟

لأني صايدني في القدم واليد اليسار بصورة أكبر بكثير من اليمين ونغاغييييز في الليل ما أقدر أتحملها

ولا يروح النفخ حتى برفع القدمين بالاستلقاء

طمنوووني ؟

ummaram

هلا أم مرام
أنا مثلج لاحظت انه ريلي اليسار وارمه أكثر من اليمين و أيدي ساعت أحسبها وارمه يوم البس خواتمي...بس لين الحين مافيه تنغيزات الحمدالله...اليوم يوم بسير الدكتوره ان شاء الله بسألها عن هالتورم..أحيد يقولون انه زلال..يعني ماي...الله يعلم...:)

الحمدلله اني ضحكتك ياأختى تقيه 100 خصوصا احس ان في هالحظه والنفسية تعبانه وانك تفكرين بالقيصرية والتعب بعد العملية الله يسهل عليك انشاء الله .....لكن وبعد ما بتشوفين البيبي الالم والتعب راح يزول باذن الله............

انا احس ان اوراكي ماتساعدني على المشي كأن فيها شد عضلي ولما سألت الدكتورة اليوم قالتلي انك محتاجه كالسيوم ............ المشكله اني لما استعمل حبوب الكالسيوم احس ان الكلاوي تألمني وخبرتها اني راح اعوض بشرب الحليب ......... لكن اعتقد اني بلجأ الى حليب قالتلي عنه الدكتورة غني بالكالسيوم مخصوص للحوامل............

الله يعيني وياكم

مرحبا
من فيكم يابنات تشكي من كلاهاااعندي الم في كلاي فضيع سويت تحاليل بس
من فتره وطلعت سليمه والحين الالم يزييييييد :confused: مدري هو من ضغط الجنين ولا التهاب
وموعدي بعد اسبوع بس مو قاادره اتحمل الالم :sad:

صباح الخير ... اشحالكن جميعا .... بلاكن مستويات عييايز واتشكن .....ما تشوفن شر انشالله ويله هانت صح ؟؟؟

صمت الدروب ...
حبيبتي ليش ما اتزيدين من شرب الماى وانشالله ايسير عنج الالم ... يمكن ايكون التهاب خفيف .... ما عليج شر انشالله وربي ايهون عليج.

انا بقولكم سالفتى .. الله ايسلمكم وايسلمنى كنت امشي ...وتنجسف ريلي واتخرطف واطيح ..... الله ستر ان ها الممشى محد فيه .... والا جان صرت نكته الموسم .... ومن الفشله يلست مكاني واضحك ... بس صدق صدق طيحه اتعور .... الله ستررررر.....

الاسبوع اللى طاف سرت عند الدكتورة وكل شي اوكي الوزن 2 ونص والراس تحت ... بس صرت اضايج من الحركة والضغط تحت ...... وحركة البيبي صارت اتعور ................ هذا شي عادي .؟؟؟


بديت اتملل ...... ابا اربي بسرعه

زوجة راشد اتصور عادي امي تقول ان الطلق يخلي حركة
البيبي تعور يمكن جريب اتولدين ههههههه واصلا المكان صار
ضيج عليه مسكين مايقدر يتحرك عشان جذي
حركته ثقيلة آنه آلام الدورة متعبتني اتروح واتيي وتوني اليوم دخلت الاسبوع
38 يعني بعد يبيلي انطر لأن الدكتوره قالت لي ان الآلام ممكن تستمر معاج
لحد مااتولدين الله يعين نوم ماانام والله من التعب :(


الله يسهل عالجميع يارب ويقومنا بالسلامه
ونشوف اطفالنا في احسن خلق واحسن صحة

صمت الدروب
سلامتج ألف سلامه...حاولي تكثرين من الماي و سيري عند الدكتوره سوي تحاليل مره ثانيه عشان تطمنين...يلا هانت ما بقى شي ان شاء الله :)

زوجة راشد..
بسم الله عليج تحملي يا ماما انتي اي جوتي تمشين به عن يكون هالعاديات اللي تخرطف...لازم تلبسين جوتي رياضه ..وبعدين روحج تمشين ولا حد وياج؟ ما حرج عليج ريلج...ههههه أنا ريلي البارحه عزر الأ أشتري جوتي رياضه من Adidas وسرنا وشترينا عاد اليوم ببتدي المشي الصح ان شاء الله..جوتيه القبلي ظوج لأنه ريلي بدت تنتفخ الحين مادري شو السافه!

أنا بعد سرت عند الدكتوره البارحه و طمنتني الحمدالله البيبي نزل الحوض..و وزنه 2.5 تقريبا بس شكلي أنا زاد وزني شويه في أقل من شهر زدت تقريبا كيلوين و نص...هو كله على بعضه بوصل ال 10 كيلو. الدكتوره قالتلي دمي نازل و تباني أرفعه هالاسبوع..لازم آكل كل شي يرفع الدم..دمي واصل 9 :( و حبوب الحديد مادانيها تسببلي لوعه و ترجيع..بس ان شاء الله أنا من البارحه فليل بديت أعدل في أكلي و باكل جبود و خضار و بشرب عصاير تساعد على رفع الدم ان شاء الله.

أوكي بخصوص الحلبه ويا الحليب و عسل...هي لها فوايد كثيره للحامل والمرضعه..منها تنظف البطن و الرحم و مفيده للبيبي بعد...وتزيد الحليب في صدر الأم..

أقول وين " نعانع " مسكينه هي بدت هاي الرابطه و اختفت....يزاها الله خير جمعتنا في مكان واحد و خلتنا نستفيد من بعض :)

المهم...الله يسهل علينا...اللهم هون علينا الطلق و أحسن الخلق...آمين
:)

وزجة راشد ربنا معاكي يا قمر وان شاء الله يكون خير معاكي
وحاسبي وانتي ماشية ربنا يسترها معاكي
كيوت مام حاولي تزودي الحديد بأي طريقة ان شاء الله ما يصير لك غير الطيب
أنا بقى خلاص بدأت العد التنازلي
أبقة أسألوا عليا
يعني كلها اسبوعين
بس موضوع التورم دا كان عندي في ابني محمد
وكان طبيعي ولا زلال ولا حاجة فمتخفيش
جايز ولد
انا في حملي دا مش وارمه الحمد لله
وان شاء الله خير وربنا يسهلها على الجميع
بحبكوا كلكم وديروا بالكم على روحكم

كيفكم انشاء الله بخير

زوجة راشد سلامتك والحمد لله ان ربنا ستر ما تشوفي شر ابدا

صمت الدروب الف سلامه عليك يمكن عندك برد واخداه في جنابك وعلشان كده تحسي انها الكلي ادفي كويس وبرضه كتري المياه


عاوزه اسالكم سؤال بس عارفه انكم تضحكوا عليا لو سألته بس هسأله وخلاص


كل ما حد يكلمني يقولي اول ما تشوفي علامة الولاده روحي علي طول المستشفي وانا اتكسف اقوله اني اصلا معرفش يعني ايه علامة الولاده شفتوا خيبه اكتر من كده ههههههههههههههههههههههههههههههههههههههههه

مرحبا حوامل فبراير

قولوا الحمدلله على كل حال بعد احنا احسن من غيرنا في بعض حريم من يحملون الى من يربون وهم في المستشفي منومين بعيد الشر عني وعنكم................آمين

زوجة راشد

ماتشوفين شر انشاءالله وحاسبي وانتي تمشين وتدفين عدل امس انا مشيت بحوش البيت واليوم انا تعبانه زكمه وعظامي تألمني مع اني محتاطة بس الجو ما يرحم...............

صمت الدروب

انا في حملي الثاني كنت اعاني من الم في الكلاوي وكان بسبب ضغط البيبي مع اني كنت اكثر من شرب الماء.......... وبعد ما ولدت الحمدلله رجع كل شي طبيعي ............. اما حملي الحين عادي ماأحس بشي بس لما استعمل حبوب الكالسيوم اتألم من كلاوي كثير وامتنعت عنهم بس هذي الايام شكلي محتاجة كالسيوم لان اوراكي تألمني مع اني اعوض بالحليب ومشتقاته ..........بس ماكوفايدة.............

عروس حيرانه

الام الولادة تعرف نفسها بنفسها اهي تبتدي نفس الام الدورة بس بشكل اقوى وتشتد مع الوقت ..........وعن تجربة انا في حملي الاول ماحسيت بألم نزل علي دم على طول في البيت ولما رحت المستشفي كان الرحم مفتوح تقريبا 2 سم وعطوني طلق صناعي بالوريد علشان يحمي الطلق لاني بكرية......... اما في الثاني حسيت بألم كأن الدورة وتحملت على نفسي وبعد 5 ساعات تقريبا اشتد الألم ولما رحت المستشفي كان الرحم مفتوح 4 سم ولا احتجت الى طلق صناعي.......... عاد انتي وحظك شوفي كيف راح يكون بداية الطلق عندك...........

معليش هذرت عليكم كثير والله يسهل على الجميع انشاء الله..............

وسلامتكم

هلا وغلا بخواتي الحوامل الله يسهل علينا وعليكم ويهون الجاي من التعب والثقل آآآمين بحق محمد وآله الطاهرين

زوجة راشد

ذكرتيني بروحي لما كنت في الشهر السادس تقريبا وحصلت لي طيييييحة عدلة أني بالكرسي في الدوام هههههه تخيلوا وضعي وأني عاااالقة بين الكرسي والطاولة ولا قادرة أقوم ولا اكمل الطيييحة للأرض .. وتميت أضحك لكن الوجع كان شي رهييييب والحين قاعدة أتابع مع دكاترة العظام سالفة وركي لأنهم ما يقدرون يسووون لي أشعة وانا حسيت اني تعور الورك عندي بشكل ما قدرت أمشي مثل خلق الله ...

المهم اتحملي تلبسين إلا جواتي مريحة .. أنا شخصيا ما ألبس في الحمل إلا Hush Puppies الحوتي والله يعزكم النعال لأنهم مريحين وواسعين يعني شوفي النعوول الطبية ولبسيها وحاسبي في المشية مو تسوين روحش بهلوووااان هههههه وألف لا باس عليش وأهم شي هل اتطمنتين على البيبي أو لا ؟ ؟

خواتي بخبركم اليوم اشصار واياي في عيادة الحوامل لأني رجعت بمفاجآآآآت

1) اتضح أن عندي زلال قي عينة الله يعزكم البول بدرجة حوالي 3 ( يعني سكر زايد )
2) التورم الزايد عندي في جسمي وخصوصا في قدمي اليسار ويبي ليي أرفع القدمين خلال اليوم لتجنب هالحالة اللي حتى النوم ما أقدر أنام بسببها
3) عملت لي الدكتورة ultra sound وطلع ان البيبي سابق في النمو بأسبوعين معناها تعديل تاريخ الولادة إلى 1 /2 بدلا من 17/2 تخيلوااااا يعني الحين أني في العد التنازلي .......!
4) وضعية البيبي الرأس نااازل لكنه للحين ما دخل في الحوض...
5) الليلة أصوم إلى بكرة الصبح يعاد لي تحليل السكري ويعملون لي تحليل بصيام وبعدها بأربع مرات كل ساعة تحليل وشربي العصير اللي يدوووووخ واللله يسترررررر


تعببببببت


بوقققف شوي عن الكلام ....

إي تذكرت اني لحين أحس ما كملت شغلات البيبي

اشرايكم نشتغل على إعداد قائمة بالأغراض اللي يفترض نجهزها للبيبي ولنا ؟

تحياتي لكم جميعا

ummaram

مسا الخير


اليوم مستويتلكم خفاااش خخخخخخخ


اشحالكن


صمت الدروب

ما اتشوفين شي ...وعليج بالماي والعصاير خلج مثلي دووووووم اتحوط بغرشه المااي



كيوت ماما

احسن لج النعول السطاحيه ..بس لا تلبسين جوتي ..سبحان الله ينفتحن عليج الخيوط ويسون لج مشاكل ...


زوجه راشد
الحمدلله عالسلامه ..الله سلمج وسلم البيبي تحملي على عمرج انا الشهر اللي طاف زين ما تخرطفت من عالدري لا وامايه في السياره تترياني عاد حلصت محاضره منها وبالنسبه لحركات البيبي تعورني احيانا واحيانا حركاته قويه قال ريلي البيبي بيكون هادي هذا ولا شي ههههههه مب شرات اختي اللي لعوزت امايه



عروس حيرانه
انا ما بسير المستشفى الا يوم ينزل الماي ما ابغيهم يعذبوني





(f)

هذا وضع حملي حاليا والله يسهل على الجميع انشاءالله................

[COLOR="Magenta"]:sad: شخباركم

وسلامات للي مزكمة ومسخنة ..

وسلامات يازوجة راشد وسمحوا لي صار لي كم يوم مادخلت لأن صار عندنا عرس وانشغلت شوي <<<محد سأل عني:sad:

والله انا اكتب وانا منسدحة على السرير بيد وحدة ما اقدر تعبانة وجسمي كله متنفخ وكل اللي يشوفني يقول شكلك الليلة بتولدين:confused: وأنا احس إنّي بطول ساعات وساعات أقول الليلة شكلي بولد(n) ..

ياللا طمنوني عليكم..[/COLOR]

هلا حوامل شخباركم مو بس انا الي تعبانه كلكم بتربو اليله ههههههههههههه لاني عندي مراجعه عند الكوره فقالت لي انت مو مطوله شكلك اسبوع بالكثير وتولدي رأس البيبي نازل في الحوض وما ادري ليه خفت يوم قالت لي بتولدي وسلامات يازوجه راشد

هلا حبيباتي

سلامتج يا عالم الهدوء وصمت الدروب من الالام والله يساعدكم

زوجة راشد ما عليج شر من الطيحه.. الله يعينج..

حبيبتي كيوت ماما.. انتبهي على دمج.. ترى الدم وايد ينقص بعد الولاده

ام مرام سلامتج من التورم والزلال... انتبهي على عمرج

اما بالنسبه لالم الحوض هذا عادي من ضغط البيبي.. انا نفس الشي وما اقدر امشي.. وقالتلي الدكتوره من البيبي.. ترا يا ام شهد انتي حامل ولا نسيتي هاهاها

انا بعد تعبانه وماعرف انام عدل ويوم انش اكون نعسانه.. وانا الحين في الدوام بس مب قادره اقاوم النوم
بخبركم.. في برنامج على MBC عن الحمل والولاده.. اظن انها حلقه اسبوعيه.. انا شفت واحده يوم السبت الساعه 8 مساء بتوقيت الامارات والحلقه اليايه عن الولاده وكيفية تحمل الالم.. شوفوها

وبسسسسسسسسسس خلاص مليت وابي اربي.... تعبت

هيه نسيت .. حبيبتي مخرخشه شو اخبار العرس.. انشالله حلو
يللا اخليكم
باي

صبحكم الله بالخير يا حلووووات .... مشكورات فديتكن ع الاهتمام والسؤال ... والحمدالله مثل ما قلتوا عدت ع خير ...
جنة القلب ...
الله يسمع منج واربي قريب ... ومثلج احس بالالام الكريهه الدورة ..الله ايهون علينا كلنا يا رب
كيوت ماما ...
يبوج ما البس جوتى... البس نعال سطاحي من الدو خفيف والا من هش بابيز ... وع سالفه نقص الدم .. عابلي بعمرج من الحين لانى اللى اعرفه ان الدم ينزل بعد الولاده ...كثري من الجبده والجرجير واشربي عصير الرمان وايد زين ...واستحملي الحبوب ...شو بتسوين ...وما تشوفين شر انشالله ... ولازم وزنج بيزيد لان الحلبه اتزيد الوزن ... فاتحذري منها .
تقيه100
خلاص بنبدا نحتريج وانشيك عليج كل يوم .... ربيتى والا بعدج :) الله ايقومج انتى والنونو بالسلامه يا رب
عروس حيرانه ...
اشحالج حبيبتي ...ضحكتينى .. الحين انتى ع وش ولاده ع قولتكم وما تعرفين علامات الولاده ....يادي الكسووووف يا بنت رابطتى ..:) عالم الهدوء ماشالله عليها ردت عليج .. انا حاطة الشي فبالي من قبل .. يا ماى الجنين ينزل ... يا كرمتى دم ... يا الم الدورة بطن وظهر بشدة وما يروح .... الله ايقومج بالسلامه يا رب
عالم الهدوء ..
حتى انا والله وركي ايعورنى وخصوصا اذا كنت يالسه فتره ونشيت ع طول ...والله ماارووم امشي براحه الا بعد فتره .. شكل عظامنا رايحة فيهااااااا خخخخ
ام مرام ....
الشر ما اييج حبيتى ... وشو عن سالفه الزلال ... طمنينا عليج ...ودام الدكتورة جدمت لج موعد الولاده شووو تتريين ... سيده عالسوق خلصي اغراض البيبي .... وخبرينا شو صار وياج فالتحليل
عروس كتكوته ...
اشحالج يا الخفاش :) ..... يا خبيرة انتى :) ... ما بتروح الا يوم بينزل الماى ... اتخبرج يا خوفي انا وانتى ومنو بعد اظن كيوت ماما امهات يداد واول مره انحمل ... من ايينا العوق نركض عالمستشفى ....ترا مب لازم ينزل الماى اللى اعرفه مرات الوحده اتكون 4 و5 سم والماى ما ينزل ويفتحون لها الماى فالمستشفى .... فاتحملي .. انا وياج في ان المستشفيات ايلعوزوون الوحده يوم اتسيرلهم من وقت .... بس بعد عدم الخبره تلعب فينا دور ... والله ايسهل علينا جميعا

مخرخشه ....
اشحالج حبيبتي .... سلامات ما تشوفين شر ... بلاكن كلكن متورمات ... وشخبار العرس ... واكيد طلعتى احلا وحده بكرشه خخخخخ ...طمنينا عليج
همسة حنون ...
الله ايسلمج حبيبتي ....ويله هانت ... شكلج بتربين اول وحده فينا .:)
ام شهد ...
الله ايسلمج والشر ما اييج انشالله ...انا اشد عنج بموت من الرقاد ....واخيرا سرتى عند الدكتورة ... دوم احس انه مالج بارض اتراجعين عند الدكتورة وياختى مالومج ... دوام وبيت وبنوتج ...الله ايعينج والله .. وحتى انا مليت ابا اربي .. وعن سالفه البرنامج شفته .. وايد وايد حلوووووووو ....واتريا الحلقه اليايه انشالله


اسمينى ما خليت حد في حاله ...خخخخ ... وايد رمست وخربطت ...يله بسير اتريق ...اشوفكم ع خير

حبيبتي زوجة راشد
اتريقيلي وياج بالعافيه عليج... انا اكلت اول ما داومت الصبح والحين يوعانه بس مابي اكل شي .. ابي اسير اتغدى في بيتي..

بخصوص الولاده انا خايفة من شي واحد بس.. انه يبتدي بنزول الماي بدون الم.. ويا ويلي لو استوى جي وانا في الدوام.. الكل بيعرف بالسالفه مادري شو بسوي.. انا مجهزة كوتكس من الحجم العود بس شو اسوي لو الماي نزل وانا على الكرسي ولين اركض على الحمام بخرس المكان كله .. مب بعيده عليهم يرموني من الدريشه.. كل يوم افكر في نفس السالفه.. يا رب لو استوى اي شي اكون في البيت بكرامتي بدل الفضايح هاهاهاهاها
اموت من الضحك يوم افكر في السالفه

اتريقي براحتك زوجة راشد انا عارفه انها حاجه تتضحك بس اعمل ايه والله ما عندي فكره فعلا

قولولي صحيح يا حوامل بدأتوا المشي ولا لسه انا بقول كفايه عليا صعود ونزول السلم لاني ساكنه بالسادس
كمان قولولي هو الشهر التاسع يبدأ في الاسبوع 36 ولا 35

هلا شخبار التعب معاكم عروس حيرانه يبدا الشهر التاسع من الاسبوع36 اليوم ذهبت لدكتوره الى بولد عندها فقالت كل شيء سلم والبيبي خلاص نزل الحوض وعن الام الطلق فقالت هذا طلق كاذب بيجي ويروح لاكن اذا شعرت انه زاد او صارت المسافه قصير تعالي على طول وعندي سؤال وابقي كل وحده تقول رايها هل ترغبين ان يدخل معك زوجك وقت الولاده وهل شعور ك غير لما يكون زوجك معاك لاني وبصراحه ولدت مرتين وزوجي بعيد عني وهذا المره انا اريده يخل وهو مو راضي ارجوكم وصفو لى شعوركم

لحظة


عروس حيرانة ساكنة .. بالسااااادس ؟؟؟؟؟

الله يسااااعدش بصراحة أني ساكنة دور أرضي وكله أتشكى من التعب اشحالتش انتين ؟؟

أم شهد

موتيني من الضحك على سالفة الماي ونزوله المفاجيء

تدرين اني بولادتي الثانية كنت أتسوق ليلتها في مجمع السيف عندنا للساعة عشر الليل ووصلت لدرجة بعد ما قدر أواااصل مشي بنوووووب وقلت لزوجي يللللا خل نرجع مو قادرة أتحمل وبالفعل رجعنا وتميت أطالع معاه التلفزيون وكان معانا حمواتي قاعدين للساعة واحدة إلا شي ولما خلصنا دخلت تحممت وطلعت والكل طبعا نايم إلا أني والأرق وأني قاعدة أجهز المسج للولادة كأنه حاااااسة ....... والا البيبي تحرك حركة سرررررريعة في بطني وحسين بشي سااااخن ينزل وعلى ما قلتين غرررررقت المكان وحتى المشي صار غير آآآآمن بسبب الفيضانات .. لا والنكتة أني أخررررر وزوجي وراي بممسحة الماي على الأرضية عن الزلق ههههههههه

وتصوري كل هذا بدون ألم يدون شي .... ورحت المستشفى تميت نص ساعة زين ما سووووني عملية قيصرية لأنه الحبل السري كان ملتف على البيبي ولكني وولدت باعجوووووبة والحمدلله والله يسهل علي وعليكم ياااارب...

ummaram