اللي ولادتهم في فبراير الجاي...حياكم

حبيباتي حوامل فبراير

اول شي cute mama انا مستعده بعد ما ارد البيت انشالله عقب ما اربي ببشركم بولادتي "ان شالله تعدي على خير"
وبعدين انا لازم ابدل الميلس لاني برد بيتي عقب الولاده..ما بروح بيت اهلي.. واللي يبي يبارك بييني البيت وطبعا الميلس عندي متبهدل من بنتي شهوده.. وبعدين شفت من فتره في زهرة الخليج صوره لطقه لونه تركواز وبني وايد عيبني وابي اسوي نفس الالوان

عروس حيرانه.. انا بلبس النونو فانيله بكم واوفرول شتوي .. كل شي ابيض في ابيض حتى اللفه والكفر و قفازات

بالنسبه لغرفة البيبي.. انا مو مسويه غرفه للبيبي.. حتى بنتي للحين تنام عندي في الغرفه.. احس حرام اخليها بغرف بروحها وهي توها سنتين.. والحين ريلي يقوللي ويوم بتربين انشالله بنحطهم خلاص اثنينهم في غرفه بروحهم ويوم البيبي ينش في الليل روحيله
قلتله يا ويلي يا ويلي... ماقدر اخليه ينام بروحه في الليل.. قاللي خلاص بنجهز غرفه لشهد لانها خلاص كبرت.. قلتله لا ماقدر اخلي بنتي بروحها.. قاللي ليش بنسوي حضانه عندنا في غرفتنا .. كل عيالنا ويانا.. قلتله ما تبي كيفك سير انت الغرفه الثانيه.. جهزها ورتبها حقك بس عيالي صغار اخاف يرقدون بروحهم.. والله يا بنات ماقدر اتخيل انهم مساكين (بنت عندها سنتين ونونو توه مولود) اخليهم في الليل بروحهم.. حتى لو احصنهم واقرا عليهم ما اقدر.. انا لين الحين احيانا انش في الليل واطالع بنتي تتنفس ولا لأ.. بسم الله عليها..
حتى اني ما اطلع بدونها اللا بس الدوام.. ومحد ياخذها يطلعها بدوني.. ولا اخوي ولا امي ولا اخوه ولا امه ولا حد.. كله اتخيل انها تفلت من ايدهم وتدوسها سياره.. بسم الله.. قلبي عورني

المهم طولت وايد اليوم..
ياللا اخليكم

هلاااااااا حوامل ضموني معاكم لأن ولادتي في فبراير
حسب الموعد اللي عطتني اياه الدكتوره واتمنى اولد قبل الموعد
لأني سمعت ان البكر ممكن انها تقدم عن موعدها وناس يقولون العكس
والله يسهل علينا في وقتنا

عن التجهيزات فكل اموري ماشية تمام وشنطتي وشنطة البيبي خلاص
جاهزين لكن كل مرة ارجع واشك في الملابس اللي شرياهم حق البيبي
لأن الجو باارد ومن اللي قريناه عن احوال الطقس انه بكون بااااااااارد
بشكل مو طبيعي في نهاية شهر 1 وعشان جذي ماني عارفة شنو البس
النونو :(
آنا شريت ملابس طويلة ومشبوكه تغطي اليد والريل غير القفازات والقبعات
والجوارب وبطانيتين وحده خفيفه والثانيه عادية مثل اللي احنا نستخدمهم
ومادري اذا تنصحوني بشي اضيفه

أم شهد... بسم الله على شهد الله يحفظلج اياها!! سبحان الله نفس مخاوفي!!

الحمدلله اني حصلت واحده مثلي.. اشكرج يا ليلى
كنت خلاص بصدق اني عندي وسواس هاهاهاها

انا ابتديت من امس احس بتقلصات قويه.. امس ثلاث مرات تقريبا
بس معقوله التقلصات تبدى في الاسبوع 33؟؟؟؟

يا حليلكن والله

انا الصراحه نفسيتي تعبانه ...

لين الحين ما خلصت كل شي :sad: بس بسير اخذ حبه حمرا وبعلم الخدامه اتسويها

وبالنسبه للمشي احيانا امشي ويا ريلي عالبحر واحيانا في الجمعيه بس ريلي قال لي امشي عالاقل ربع ساعه بس هو ما يعرف الحال ..الله كريم

واللي اثث حجره البيبي من ايكيا مبرووك عليه الصراحه روووووووعه كان خاطرنا ناخذ بس المشكله في الحجره ..فقترحت عليه ناخذ المنز اللي على شكل سله خفيف وحلو ونقدر نحطه عالشبريه عدالنا ..لاشبريتنا واايد عاليه وبتعب اذا كان المنز بعيد بتعب من النزله والطلعه (w) فاحسن يكون البيبي عدالي فليل
واللي بتربي اول مره مثلي وما تعرف كيف بتسبح البيبي شي في بيبي شوب شرات الكرسي تحطونه في الحوض وتسدحون البيبي وتسبحونه احس انه اسهل لان احتمال ما اسير عند اهلي ما يبغي ريلي واذا سرت بيلس اسبوع لا اهل امايه اكيد بيزوروني بس بعد ما ابا عندي اخوان صغاريه وبيلعوزون البيبي ......


ابغي اسألكم شوه احط فس شنطة البيبي ؟؟
غير الملابس وابغي اعرف مستشفى الوصل يلبسون البيبي لبس من عندهم







:sad: والله يستر وايد خايفه من الولاده الصراحه الله يسهل علينا

هلا حوامل
بدأ خلاص العد التنازلي الله يسهل علينا جميع ومخبيش عليكم انا كل يوم بحس بخوف عن اليوم اللي قبله وخايه اني اولد قيصري وفنفس الوقت خايفه من الطبيعي والي الان ماحدد مكان الولاده انا مرتبطه بالطبيبه اللي اتابع معها وهي تقول مفيش مشكله لو طبيعي تولدي عندي في المركزبتاعي هو مش مستشفي بس فيه كذا حجره ولو قيصري يبقي في مستشفي والله كتير خايفه ومحتاره ولسه ما جهزتش شنطة البيبي ولا شنطتي

ام شــــــــــــــــــــــــــــــــــــــــــــــــهد
والله كتير ضحكتيني كيف يعني تنامي انتي وزوجك والبنت والنونو في غرفه واحد لازم تجهزي غرفه علي الاقل لشهد وبعدين تنقلي النونو معاها لما يكبر شويه وممكن تجيبي جهاز مراقبه وكاميرا علشان تطمني عليهم

كملن شكرا علي ردك بالنسبه الي لبس البيبي بس والله محتاره في ناس تقول لازم تتقلي للبيبي جامد يعني علي الاقل شايه كت وفانله نص كم وكمان واحده كم وبعدين السلوبيت او احنا عندنا يقول في الاول نلبس البيبي الجلبيات المفتوحه من الخاف وعليها بنطلون والله احترت من كلام الناس ومش عارفه اعمل ايه واخذ معايا ايه بالضبط كمان انا شاريه اشياء ابيض بس مش ساده يعني فيهانقوش بالوان هاديه لبني تنفع ولا لازم الابيض

مرحبـــــــــــــــــــا أخواتي الحوامل

والله بودي أكتب لكم أشياء وايد بس ألم في راسي وزكام ذابحني :angry:

تنصحوني أشرب بندول وإلا مايصير لأن مب قادرة بينفجر راسي:sad:
وبسألكم سؤال عادي اليوم من الصبح ليما الظهر ماحسيت بحركة بس بعدين حسيت بالحركات العاددية اليومية للبيبي ؟؟؟؟؟

بمووووووت من الكحة اللي هالكتني ووجع البطن والحوض ما دري هالتقلصات وقتها طبيعي بالأسبوع الـ34 ؟ وهل نعتبر دخلنا التاسه (رسمياً) ولاّ لأ؟

خواتي شسوي صايدني مثل خرخشينة وجع راس مو قادرة أتحمله .. مادري أقوم أسوي لي شاي لوووومي أسود؟ خرخشينة ترى شاي اللووومي الأسود (زيق برقعه) لوجع الراس .. بس متعييييرة أقوم أسوي لي.... وإذا سويت بعزمش عليه يمكن يكون حل لهالصداع .. لأني بصراحة خايفة أشرب بندول ما تدرين يمكن الضغط نازل مرتفع واحنا نتصرف بعافيتنا ..

دعواتي لكم جميعاً بالسلامة واعتنوا بأنفسكم يا حوامل والله يعيننا على الجاي من التعب والثقل والإرهاق,,

ummaram

الف سلامه عليكي يا ام مرام

هلا حوامل كيف الحال انا مثلكم من اصحاب الكرش يعني حامل في الاسبوع 35 وانتظر الفرج وفي هذه المرحله التعب بيزيد والثقل وصابني برد والتهاب من ثلاث اسابيع واخذت مضاد و وشراب سعال وكل شئ وما فاد ولاكن من يومين كلمتني أختي ونصحتني أشرب الحليب الساخن مع الزنجبيل وفعلا يومين والكحه راحت مني كنت مو مقتنعه لاكن جربت واستفدت أكثير والي فيها كحه أنصحها تجرب مو خسرانه شئ والزنجبيل ما يضر البيبي والف سلامه عليكم بااااااااااااااااي شكلي طولت عليكم

حبيباتي مخرخشه وام مرام سلامتكم الف سلامه... بالنسبه للبانادول ممكن تاخذون حبه واحده البانادول العادي.. بس لا تاخذون اكسترا ولا cold and flu بنادول لان دكتورتي قالتلي هذيلا خطر على الحامل.. الله يعينكم.. اشربو شاي وعليه ليمون وعسل وايد مفيد وريحو لا تتعبون اعماركم...

عروس كتكوته شكرا على نصيحه الكرسي.. وانا استعملته يوم ربيت بنتي شهد ووايد مفيد وما تخافين ان البيبي ينزلق من يدج.. بس بقولكم سر.. انا اخذت الكرسي من مركز اللولو.. كان بعشرين درهم بس .. يعني ارخص من البيبي شوب بوايد.. قلت اخبركم عشان انا ادري انكم خسرتو بيزات وايد لين الحين... واللي في مركز اللولو احسن بوايد تدرون ليش.. لانه عباره عن كرسي مريح جدا للبيبي وظهره شبك يعني الماي والصابون ما بيتجمعون فيه.. وايد حلو
يللا يا حوامل سيرو خذو منه.

عروس حيرانه.. والله الافرول او السالوبيت احسن بوايد من الجلابيات.. صدقيني عن تجربه.. وايد يدفون البيبي... وبالنسبه لكمية الملابس الجو الحين في مصر وايد برد.. لازم تدفينه عدل.. ولاتنسين تغطين راسه.. ومب لازم ابيض.. بس هاللون اللي انا احبه للاطفال عشان جي اخترت ابيض

همسه حنون,,, سلامتج وصج كلامج عن الزنجبيل.. بس مب حار على الحمل؟؟

السلام عليكم امهات فبراير ..... اشحالكم.... عساكم بخير وصحه

والله الكحه والزجام كل حد يشتكي منه ... والمشكله احس انه ايروح يومين ويرجع .... الله ايهون عالجميع يا رب ... والبنادول شرات ما قالت ام شهد عادي ... بس انا كنت اخذ حبتين مب حبه ومن النوع العادي ...

جنه القلب ...
هلا ومرحبابج في رابطتنا الحلوه ...
عروس كتكوته ....

الله ايبارك فيج حبيبتي بس انا فرشت الغرفه عسب ما اكود عندي اغراض البيبي فغرفتى والا مستحيل ارقد البيبي بروحه فغرفه حتى يوم شرينا الغرفه ريلي يتحرا برقد البيبي بروحه قالى شو احنا اجانب وحرام عليج نونو بروحه ووين بتسمعينه وانتى راقده ومن هالكلام .....

ويبالج ضرب انتى يالخوافه .. من اشو خايفه شي بتمرين فيه وبيصبح من الماضي اشحقه اتشيلين همه .... انا وياج صح الم وتعب .. روح تظهر من روح على قولتهم ... بس كلها ساعات واتعدي ... اتوكلي على ربج ودووم ادعي في صلاتج ان الله يرزقج الولاده الطبيعيه السهله ويفرحج بشوفة النونو
بعدين ترا تونى اقرا موضوع وحده على العام فهالقسم اتقول انها ربت ومول ما حست بالم ومستغربه من الحريم اللى ايقولون الم وماادري شووو ..... فكل شي نسبي.. لا اتحاتين والله ايسر عليج وعلينا يا رب .
مخرخشه
سلامات وما اتشوفين شر ... وحركة البيبي عادي ايتم فتره ومن عقب يتحرك ... انا هذاك اليوم الين جريب العصر ما حسيت باى حركة وقمت احاتى بس عقب عادي الحمدالله .
عروس حيرانه
احس الافرول الكامل احسن وادفئ شي وخصوصا باول الايام ... وحتى الملابس الداخليه واللى اتيي شبك صوب الحفاظ احسن شي ... البيبي بالجلابيه يتلعوز واحس يضايج ...
ام مرام
انا بالاسبوع ال34 واحس بهالتقلصات ....فاحس عادي تهيئة للحدث الكبير :)
ام شهد ...
عيل يبالنا سيره لمركز اللولو .. وصدق مرات اتحصلين اشيا فنانه في اماكن ما تتوقعينها

كيوت ماما وينها مختفيه مالها شـــــــــــــــــــوف......

يله من رخصتكم ....وايد هذربت ...

كيوت ماما اهني يالسه أقرا سوالفكم...يبالنا رابطه ثانيه للزكام والكحه و آلام الحوض هههههههه

أنا الحمدالله خف الزكام عني بس ساعات فليل يرد شويه قبل النوم لازم اتمشكل ويا خشمي واحد مسدوود والثاني يحرجني من التنفس ههههههههه حاله....لا والأخس من شي انه هذا يسبب النخير..و أنا من النوع اللي ما أناخر بس فشييييييله شو أسوي والله قمت ما أحس بعمري من الثجل....حتى ريلي سجل صوتي مره ههههههههههه ويهي عورني ...و أونه بيطيب بخاطري و قالي إني
" دينصورته المفضله" وايد قاصين علينا هالرياييل ! :)

صراحه أنا هاليومين بديت أحس بألم الظهر أكثر و أحس الحركه عند المثانه...و بغيت أسألكم...حد فيكم يحس بالبيبي يوم ايه "بوشاق" و على قولت المصريين حزووئه؟
يعني يتم البيبي يدق بطنج دقات متتابعه منتظمه لفتره معينه...أنا قريت في كتب أجنبيه انه هذا هو ال Hick ups أو بوشاق بلغتنا...بس ساعات أخاف من هالحركه اتم أتنفس و اشرب ماي عشان البيبي يوقف....طمنوني حد يصيرله هالحركه؟

انزييين خبروني منو فيكم يداوم و امنو فيكم ربة منزل :) ...أنا صراحه استقلت بعد ما اتزوجت يعني من سنه و نص...و أنا مشتغله 8 سنوات في مجال العلاقات العامه والترويج و المعارض :)

هلا كيوت ماما وزوجة راشد... انشالله بخير دوم يا رب

انا احس بالبيبي يوم اييه hick ups اموت على نفسي من الضحك عليه.. ياحليله مختنق داخل ومب قادر يتحرك في اي مكان عشان تروح منه.. فديته

وبالنسبه لسؤالج.. انا اشتغل للحين... احيانا افكر اني اهد الشغل.. بس تدرون الحياة استوت وايد غاليه .. شو نسوي بعد :) بس والله الشغل والحمل وايد صعب خاصة في الاشهر الاخيرة.. وانا الحين ودي في جم يوم اجازه بس عندي وايد شغل وماقدر اربي بدون ما اخلص كل شي عندي..

يللا منو غيري يشتغل؟؟

هيه انا خاطري اسير بيت يدتي .. ابي اتغدى بياح مشوي في التنور وهم عندهم تنور.. ويا عيش وشويه دهن.. بس منو بياخذني من بوظبي للشارجه الحين... اااااااوووووووووووفففففففففف

هههاااااااااااااااا

انا كمان يحصل معي نفس الحركه يا كيوت واضحك ايضا بس يا تري ايه سببها

انا كمان صارت معي واشعربه الحازوقه والم الظهر والتعب وانا ربت بيت وعندي طفلين والثالث في الطريق

مرحبا حوامل فبراير

شخباركم انشاء الله طيبين كلكم وماتشوفون شر للي فيها زكمه وكحه الله يعينكم اضم صوتي مع الباقيات ان الزنجبيل والحليب الساخن ممتااااااااااااااااز وانا جربته بعد رمضان جاني نفس الشي مع حرارة في بداية المرض لكن لما اشتد علي طبعا مااستغنيت عن المضاد الحيوي ودوا الكحه هذا طبعا بعد استشارة الدكتورة..............

بالنسبة عن ( البوفاق ) احنا انسميه كذا اتصدقون مع ان هذا حملي الثالث الا اني ماركزت الا في هذا الحمل بعد ما فطنتني اختى ان البيبي يصير له وهو في بطنك (بفاق) صراحه فعلا يصير فيني نفس الشي تقريبا مرتين في اليوم وبعدها يروح بروحه................

المفروض احنا نبتدي الشهر التاسع في الاسبوع الــ 37 يعني على وشك وجربنا والله يسهل على الجميع...........نسيت ارحب بالعضوات الجدد في هالرابطة وحياكم معانا .............

بالنسبه عن التبشير بالولادة راح اوصي اختي تدخل على التجمع وتخبركم باذن الله.............

انا لحد الان ما سويت شنطة المستشفي ولا غسلت ملابس البيبي انشاء الله خلال هاليومين بجهز عاد بسي كسل.............

اختى كيوت ماما
شوفي طول ماانتي خايفة تعزلين بنتك عنك في غرفة لحالها بتتعبين كثير لما تكبر راح تتعود عليك وماتقدر تفارقك, شوفي انا اول بنت ضلت عندي في الغرفة مدة 3 سنوات الين ماجبت البنت الثانية طبعا انعزلت عن ريلي في غرفة الحالي معاهم الين تقريبا 6 شهور وبعدها حطيت جهاز مراقبة وكنت احاتي كثير لكن بعد تعود ارتحت وايد ورجعت لغرفتنا المستقله انا وريلي............

انا كنت موظفة في وزارة لمدة 3 سنوات لكن بعد ماتزوجت وتغربت طبعا استقلت من الوظيفه والحين انا مرتاحه في البيت لو يخيروني بين الوظيفة والبيت طبعا البيت وبكل فخر لان زوجي والبيت والتربية يبغالها تفرغ تام .......... والله يعين الموظفات.........

هذرت عليكم كثير عاد السموووووووووحه

بخصوص الحازوقة أو البوفاق مثل ما نسميها في البحرين .. كل يوم تصيد البيبي في بطني وأتأذى لأنها تضايقني وخصوصا لما أحط باااااالي وبالها

يا خوات أني معانية من الكحة والتهاب الجيوب الأنفية و الصداع .. والحل كان :


شاي لوووومي أسود ( ليمون مجفف) بالظهر ,, وع العشا شربت ماي النشا اللي يطلع مع سلق المعكرونة وكان لذييييذ وخليت الجهال يشربون منه بعد تراه زيييييق برقعععععة كلللش مفيد .. صوتي أخيرا طلع والكحة خفت وااااجد،، فعليكم به

وبخصوص نقل الأطفال لغرفة منفصلة .. تمت طفلتي الأولى معانا بغرفة النوم إلين ما صار عمرها خمس سنوات تصوروا وبعدين نقلناها مع اختها اللي صار عمرها سنتين تقريبا وكانت المسألة صعبة في البداية ولا يهنا لينا نوم لا أني ولا أبوهم ( قلب الرووووبة) لأننا نحاتي وكل شوي نقوم نطل عليهم ونلحفهم ونسمع أصوات ونتهيأ أصواتهم .. لكن بعدين خلاص تعودنا وهم كذلك تعودوا .. وطبعاً بتمرون بمأزق انهم لما يمرضون وتجيبونهم عندكم بغرفة النوم ينامون معاكم بتشوفون انهم خلاص يبون كل ليلة يستمر الوضع على هالحااااال .. بس لازم ما تسمحون ليهم ولا تتنازلون تراكم بتبدأون الدرس من أوووووول..

أنا الحين عندي طفلين بغرفة منفصلة والطفل الجديد بيكون معانا في غرفتنا إلى أن يبلغ ( أشده) :) وبعدين بطرشه مع السرب ههههه

لكم التحية

ummaram

هلا كيفكم اليوم وكيف التعب معاكم اما عن طفلي الاول عزلته في غرفه خاصه وعمره سنتين واما بنتي لما كان عمرها سنه ونصف صحيح الوحده ما يجها نوم وتحاتيهم وكل ساعه صاحيه وبتروح لهم لاكن اشعر افظل لما بيكبر يتعلق أكثر ويتعب اكثر وطفلي هذا ان شاء الله نفس ربعه سنتين أو اقل وعن الكحه صراحه انصحكم بالزنجبيل والحليب جدا ممتاز والله يسل علي الجميع