اللي ولادتهم في فبراير الجاي...حياكم

يالسه أقرا سوالفكم و أضحك أتخيل ريايلنا يدشون هالرابطه بعد و يشتكون منا هههههههه والله الكل يقولي انه هالأوياع تدريب عشان وقت الحد ما يكون كله دفعه وحده يعني هاذي مزه بس الحين ههههه.

أنا يوم أبا أنش من السرير ولا أتحرك وما أروم الين ما أتيود في شي يسندني أذكر رسوم المتحركه زينه و نحول يوم الخنبسانه تنجلب على ظهرها و ماتروم اتنش الين ما يساعدونها تنجلب هههههههههههههه عاد أنا و مخيلتي الواسعه ههههههه

انزين كل وحده فيكم تقول وين بتربي ...أنا ان شاء الله بربي في مستشفى NMC التخصصي الجديد اللي ورا صحارى...حد بيربي في هالمستشفى؟

وعن الامساك كلنا خايفين من هالشي بس أحيد فيه شاي أعشاب يبيعونه في صيدلية المستشفى اللي بربي فيه عن الامساك بس نسيت اسمه بس مب حلول هو مجموعة أعشاب ملينه للبطن. حتى عندم شي ثاني تشربينه عشان الحليب يدر أكثر للي حليبهم قليل.

أنا تاريخ 12 بدخل التاسع ان شاء الله ...يعني الأسبوع الياي...أمممييييييييييييييييييييييييي (أقلد أم خماس) هههههه

يارب هون علينا الطلق و أحسن الخلق....أمييييييييييين :)

يالله يا حلوات كل وحده منكم تطبع هالدعاء وتقراه يوميا....
دعاء الحامل لجنينها

اللهم اجعله مسلما صالحا عابدا ذاكرا..
حافظا للقران الكريم وممن يعملون به..
اللهم اجعله بارا بوالديه وأهله..
اللهم حسن خلقه وخلقه ..
اللهم أعذه من شياطين الأنس والجن..
اللهم سهل ويسر حمله وولادته..
اللهم أقر عيني به..
اللهم ارزقني ولدا واجعله تقيا ذكيا
واجعله سليما معافى ولا تجعل في خلقه زيادة ولا نقصان ..
واجعل عاقبته إلى الخير...
اللهم إني نذرت لك ما في بطني محررا...
فتقبل مني إنك أنت السميع العليم...
اللهم اصلح لي ذاتي وذريتي...
اللهم استودعتك هذا الجنين فحسن في خلقه وأخلاقه يا رب العالمين..
اللهم اني اسألك هون الطلق وحسن الخلق ..
اللهم آمين

ازيكم يا احلي حوامل
شكرا ام شهد
زوجة راشد علي السؤال الحمد لله رحت للدكتوره وطمنتني علي البيبي وشافت الحراره وقالت مافي شئ بس سبحانه الله لما رحته نزلت الحراره علي طول زي متكون خافت منها ههههههههههههههههههههههه

وقالي اني اخري في الولاده يعني اخر التاسع 21_2 انشاء الله

ام رارشد ما تخافي انا متاكد اني البرد بتظل
بس بالمناسه انتوا تلبسوا البيبي كام فانله بكم وكام فانله بنص كم من تحت السلوبيبت وكام بنطلون

ههههههههههههههههههههههههههه
كيوت ماما خمبسانه عاد .... والله ضحكتينى ...... عنى انا بربي فمستشفى ما غيــــــــــــــــــــــــــــره .....

والله ايسهل عالجميع

هلا حمولات
ايوه ابي نشاط

Cute mama ضحكتيني م الخاطر... انا الحين في الدوام ويالسه اضحك واتخيل نفسي خمبسانه هاهاها
الموظفين يطالعوني اكيد يقولون ياحليلها استخفت

عروس حيرانه سلامات وماتشوفين شر وزين ان الدكتوره طمنتج على بيبيج :)

زوجة راشد .. اشحالج حبيبتي.... هيه والله بردانه ومن جم يوم شفت بنات لابسيين شال صوف فوق العباه وعيبتني الحركه ورحت اشتريتلي شال صوف .. ملقوفه ماصدقت ان جونا استوى برد فقلت البس شال صوف هاهاها

ما اعرف اسوي الحبه الحمرا... قولولي كيف لان زوجة ابوي سوتلي حبه حمرا بعد ماربيت بنتي شهد بس ماحبيتها ابدا.. يمكن في طريقه ثانيه

المهم الرضاعه ماتعور.. اهم شي في الموضوع شيين ... حلوه شيين
اولا بعد الرضاعه مباشرة تشربين جلاصين كبار واحد ماي والثاني عصير او حلبه مغليه مع حليب وعليها عسل اسود... ممتازه وتدر حليب ولا تقولون الريحه ومادري شو اهم شي البيبي صح ولا لأ؟؟؟
ثانيا اي احد يقولج نظفي ثم البيبي بزيت او جلسرين او او او او لا تسمعين كلام اي احد.. لان عمتي يوم كنت ارضع بنتي كانت تقوللي لازم تنظفين ثمها بجلسرين وسوتلها مره ثمها .. وياويلي على اللي استوى.. بنتي صابها فطريات في ثمها وانتقلت لصدري .. وصدري التهب وكنت اتعالج شهرين من الم فظيييييييييييييييييع كأن زجاج مكسر يتحرك في صدري يوم ارضعها والدكتوره قالتلي حليب الام طاهر ونظيف ومايحتاج تنظفين فم البيبي... فم البيبي بس يتنظف بقطعه شاش مبلوله ماي لو ترضع حليب صناعي. بس حليب الام مايحتاج... والله اني اتعذب وايد من الالم.. كنت اصيح كل ما ارضعها.. بس لما تخلصين رضاعه اغسلي صدرج بماي بسسسسس بدون صابون ولا شي
وبعدين اتعلمي كيف تمسكين ولدج وترضعينه لان لو الطريقه الرضاعه غلط تسبب جروح في حلمة الصدر.. لازم تكون الحلمه والهاله كلها في فم البيبي ويكون جسمه لاصق فيج واحسن لو تحطين مخه على فخذج عشان تسندينه وتسندين ايدج عشان ما تتعبين خصوصا مع الوقت يوم يكبر شوي انشالله

الله يسهل علينااااااااا

الله يعيننا

السلام عليكم
إليكم أحدى وصفات الحبه الحمرا لكل من طلبها
الله يقومكم بالسلامه



اليوم بقولكم طريقة الحريروه
المقادير
حبه حمرا -حلبه-زعفران -سمن -طحين -فلفل اسود-قرفه-سكر
الطريقه تحطين نصف جدر صغير ماي وتحطين القرفه في الماي لين يغلي وطلعين القرفه وتحطين الزعفران في الماي يفور وبعدين تحطين فنجان سمن والسكر وبعدين تحطين فنجانين حبه حمرا والحلبه نصف فنجان وتخلينه لين يغلي
ويعدين تيبين ملعقه طعام طحين وماي في طاسه صغيره وتخلطينه وتضيفينه على الحلبه والحبه الحمراالي على النار وااااااااااخر شي الفلفل وبعدين تصبينه في الدله
وعليكم بالعافيه

منقووووووووووول

و هذا رابط ثاني للطريقه اللي يسووبها الحبه الحمرا

http://www.3roos.com/forums/showthread.php?t=159399

هلا حبوباااااات شخباركم ؟؟

والله الاوجااع تاعبتنا كلنا من ضغط البيبي الله يعينا بس
مدري كيف نولد مع هالبرررد

عروس حيرانه الحمد لله سلامتك حبيبتي ماتشوفين شر
..
Cute mama ههههههههههههه خطيييره والله انك صادقه اشكالنا تضحك وحالتنا حاله خخخخ
الحمدلله متى نولد بالسلامه بس
جزاك الله خير حبيبتي ع الدعاء
..
مخرخشه انااا مثلك مارحت لاحد في العيد بس اهلي مالي خلق وحدي مكسرر جسمي انام واصحا تعبااااانه ماكأني نمت ولا ريحت
..
بالنسبه للامساك اعشاب نورماكول زززينه له من الشهر التاسع عطتها الدكتوره اختي
وحتى بعد الولاده عشان الخياطه والالم وارتاحت معها هي تذوب في مويه وتشربينها
...
يوم السبت عندي مراجعه وتحاليل السكرر مالي خلق اسويه يلوووووووع الكبد اجيهم
صايمه 8 ساعات واشرب كاس مااااي نصه سكررررر وااي بطني وتقول هاتي معك ليمون
عشان ماتستفرغين الله يعين
..
layla2005 مشكووره اختي ع الوصفه والرشاد له اكثر من طريقه ممكن
يعجن مع تمر اويخلط مع الحليب او مثل الطريقه اللي قلتيهااا

اشوفكم ع خير

العفو صمت الدروب و الله يعافيك و يقومك بالسلامة

مرحبا حوامل فبراير


صراحه وحشتوني وايد وايد انا كنت مسافرة عند اهلي في اجازة العيد علشان كذا ماشاركتكم من فترة ........

بالنسبه عن الامساك انا انصدت في ولادتي الاولى كان شي فضيع كأن صار فيني طلق ثاني في البيت امساك وخياطة ما فاد لا سلطات ولا عصاير .......... اما ولادتي الثانية بعد ما طلعت من غرفة الولادة على طول طلبت من الدكتورة ان تكتبلي ملين والحمد لله ما صار فيني نفس الشي.........


بالنسبه عن تشققات الحلمة حدث ولا حرج بعد كانت بالنسبة لي حوسة في ولادتي الاولى حتى الدم كان يطلع من الحلمات لاخبرة ولاهم يحزنون المهم امتنعت عن الرضاعة يومين وبعد جرءة رجعت مرة ثانية بعد ما استعملت كريم اسمه بيبنتين كان ممتاز............... اما ولادتي الثانية طبعا قلت توبه وبتديت من الشهر الثامن ادلك الحلمة بزيت زيتون ليليا ... وعدت على خير......

وسلامتكم

وينكم؟؟ ولدتوا؟؟ :dd:

[grade="00008B FF6347 008000 4B0082"]مرحبـــــــــــــــــــــــا حــــــــــــــــــوامـــــــــــــــــل

:qaq: والله قصصكم تنكّت ..

اللي صايرة خنفسانة واللي ماتتحرك :dd:

بعدين بتصير كل هذي ذكرى إن شــــــــــــاء الله

ونولد وتصير من الماااااااااضي :yes:

بسألكم حوامل بديتون تتمشون وإلا للحين ؟؟

:sad: وكأن راح البرد لأن احنا في البحرين من كم يوم طلعت الشمس:angry: والله خايفة يروح البرد ونخســــــــــر ياحوامل:sad: ادعو ربكم يخلي البرد كم شهر بس ..

ما أبي أحزّنكم بس ماعندي أحد أفضفض له غيركم وطبعا أنتوا تعرفون الحااااال :shy: أدها وأدووود :shy: [/grade]

مرحبا ياحلووين

حبيبتي عالم الهدوء الحمدلله ع السلامه وانتي بعد واحشتنا

مخرخشه ان شاء الله نولد ع خير ونتذكر هالايام بالنسبه لي انا عادي اطلع بس مو ذااك المشي يعني ع خفيف موعد ولادتي ان شاء الله ع كلام الدكتوره 22 فبراير بس ممكن اولد قبل
كعادتي مااولد ع الموعد اللي يقولونه ههههههه
والله حتى احنا بدا يخف البرد وانا ماخذه ملابس شتوويه الله يعين لا ماعليك اختي خذي رااحتك
احنا قدها :shy:
..
رحت للمستشفى وسويت تحاليل السكر والدم وللحين مااخذت النتيجه
بس وبعد اسبوع عندي التراساوند باقي اسبوعين وادخل في الشهر التاسع
..
وووين الباقي وين يختفوون لايكون ولدوا جد :qaq:

مسا الخير.....


لا انا موجوده ما ربيت بعدني ........الله يعين من هاللحظه

يالسه اكتب والبيبي يتحرك واايد شكله ملان

تعرفن انا وااايد افكر .......ريلي ما يحب الازعاج واخاف البيبي باجر يصيح وايد

وانا يالسه في حجره وحده بس وما ابغي ريلي يبتعد عني بصراحه ......كله يقول لي اذا صاح


واذانا بسير حجره اخويه .....اللي عندها حل لهذا الموقف تخبرنا ....الله يعين من المسوؤليه :(

سلااااااام حوامل شخبااااركم انشالله طيبين

صامدون ها؟

مخرخشة الله يعينا على العيارة أكو البرد شكله شرد من البحرين واحنا ما استغليناه للمشي

أصلا من قال اني اقدر أمشي إلا لما أكون في حالة نسوق

خبركم الحين معرض الخريف عندنا في البحرين فزوجي يقول لي انتين تصيرين سيكل في التسوق

لكن خله يقول خلاص انتهينا من التسوق أصير حالتي حالة وتعبانة ومالي خلق أمشي البارك إلى السيارة هههههه

بس المشي يا جماعة يخليني أحس بضغط كبير على الحوض ولأام شبيهة ببداية التقلصاات ؟ تحسون مثلي ؟

أفيدوني شخبار تجهيزاتكم ؟ أني انتهيت من إعداد التوزيعات والعربة والبوابة باقي تزيين إسم المولود بس

أما المفرش للحين ما رسيت على بر .. وخايفة أولد قبل ما أكمل تجهيزاتي.. وأني موعدي 17 فبراير في الغالب

طوووولت عليكم سامحوني بس الدردشة معاكم حلوة يا حوااااامل

ummaram

هلا يا حوامل

اولا مشكورين على طريقه الحبه الحمرا

وانا تقريبا خلصت تجهيزاتي وانشالله بجهز الشنطه اليوم
بس ابي اغير فرش الميلس وبشوف لو ريلي بياخذني محل المفروشات ولا كيف

المهم انا خلاص مب قادره اتنفس تعبت وخاطري اربي اليوم قبل باجر

بخليكم
يللا باي

مراحب يا حلوات .........اشحالكم واشحال الكرووووووووووووووووووش .........

عن سالفه البرد ... من اللى قريته ان البرد بيستمر على الاقل الين شهر 3 ونص اربعه .....فيعنى لا تخافون .. ماراح يطيح شي فجبدنا :)


عن سوالج يا مخرخشه انا امشي ...والتقلصات اتزيد بالمشي واحس كانه شي بيطيح ....بس ايي على نفسي واكمل
امشي ساعه الا ربع باليوم ... وبامانه مب كل يوم يعنى كل ما فضى ريلي .... واركب الدري فبيتى اكثر من 5 مرات فاليوم... طالع نازل ... احس اوكي حق عظام الحوض
وامس كان عندي موعد فمستشفى دبي والحمدالله طمنونى ....كل شي تمام ... بس من غبائي نسيت اسالها كم وزن البيبي :(

عروس كتكوته ....
الله ايعينج ... الياهل لازم بيصح عيل وبيأذي امه وابوه ..... ما عليج من كلام ريلج .... عقب غير ... عقب من يصيح بروحه بينش وبيشله عنج ...
عنى انا .. فرشت غرفه ثانيه للبيبي من ايكيااااااااااااااااا... وايد مستانسه عليها .... بس بعدنى ما سويت ديكورات لها ...بس حاطه الاثاث ومستانسه عليه خخخخخ

ام مرام .... ضحكتينى ياختى كلنا جذه .. يوم للسوق نشاط وهمه ومن انخلص بس نبا السياره وآآآه وآآآي .... يله هانت ........ما بجي شي



اقول مب جني رمست وايد ..... بس على قولة ام مرام الدردشه وياكم حلوه .....يله بسير اصرط لي ريووووق ...

سلام عليكم يا حلوات....والله سوالفكم حلوه ما تنمل...خاصة انه كلنا نمر بنفس الأوياع و آآييي و أأوووه هههههه :) لا بعد أحلى شي يوم ندلع على ريايلنا "آآيييي تعباااانه ...ساعدني أقووم ههههه عاد تعرفون انتو سالفة الخنبسانه اللي اطيح على ظهرها و ماتروم تنش ههههههههه :)

زوجة راشد:
أنا و أنتي مأثثين غرفه يديده حق البيبي من أكيا بعد هههههههههه ومستانسه عليها وايد الحمدالله... الله يعطينا خيرها و يكفينا شرها :) وانتي بتربين في ال nmc ولا أنا غلطانه؟

أم شهد
الله يعينج والله على تغير الميلس..يقولون انه لازم هالفتره ما نعتمد على ذوقنا وايد لأنه بعد الولاده انشوف كل شي غير و نبا كل شي يديد بعد ..مادري لو هذا صدق :) فأحسن تريي بعد الولاده اذا ما كنتي مستعيله وايد...إلا اذا متوقعه ضيوف بيونج البيت فترة النفاس فهاذي سالفه ثانيه :)

عروس كتكوته
ان شاء الله يوم بيي البيبي كل شي بيتغير و بيقوم هو بنفسه عشان البيبي...عاد الريايل يوم يحبون عيالهم غير عنا نحن الحريم...بعد فتره الأم تلبس البيبي شويه من التعب لكن الريل بتشوفينه دوم متشوق يبا البيبي لأنه مب 24ساعه وياه :)

يااااه متى بس اي اليوم اللي أغمض فيه عيني و بطلها وشوف بيبي احذالي.. (((امسويه دليت حق لحظات الولاده ههههههههههه))

هيه صح اذكرت...اللي بتربي اتوكل حد من خواتها ولا اربيعتها تدخل هالرابطه واتبشرنا أوكييي :)

هلا حوامل يعني ما حد جاوب علي سؤال ايه الملابس اللي نلبسها للبيبي اول ما يتولد
بالنسبه للمشي والله لسه ما بديت بس انا ساكنه بالدور الخامس يعني لما اخرج مره او مرتين بالاسبوع احس انه كتير ارهاق

مرحبا حوامل فبراير

شخباركم انشاء الله مرتاحين ومستعدين للعد التنازلي للولادة .................. صراحه اللي بتربي اول مرة بكون الوضع عندها وناسة لانها ماتدري شراح يجيها بسسسسسسسس اللي مجربه الطلق والربا وصياح البيبي طول الليل ودها ان البيبي يظل ببطنها ما يطلع ......... المهم ما ابي اخوفكم هذي هي الدنيا يوم راحه وعشرة شقه .........خخخخخخخ

بالنسبه لولاداتي الاولية كنت في غرفة لحالي مع البيبي ظليت على هذي الحالة 6 شهور لان زوجى اساسا شغله شفتات فكان صعب علي ان انام وياه مع البيبي في غرفة وحدة ......... وبما ان بناتي كبرو وعندهم مدارس ولا اقدر اروح عند اهلي في البحرين بعد الولادة فحاليا اجهز الغرفة لاستقبال الوالدة الله يطول في عمرها انشاءالله معا البيبي..............

المشي فعلا مثل ماقلتو تجيج همه موطبيعية للسوق بس من تدخلين البيت اتحسين انك ماتقدرين تتحركين ........... انا حاليا اتمشي في البيت نص ساعة تقريبا ويعتمد على الجو اذا كان بارد صراحه ماأمشي وهذي الايام الجو فضيع بعد البرد الي جانا..............

وسلامتكم