اللي موعد ولادتها شهر يوليو ..تدخل وخلنا نكون رابطة امهات يوليو

هلا بكم ياحوامل الرابطة وش اخباركم

انا اسفه اليومين اللي فاتوا ما دخلت اكتب بس قريت وطلعت بصراحه متضايقه من ولدي الله يهديه جنني وماني عافه وش اسويلية واليوم كتبت موضوع في ركن الطفل وانشاء الله الآقي الحل المناسب معه

حلوووة : سلامتك يالغاليه طمنينا عليك

الجميله : ماشاء الله بس ليه دائما تشيلين ولدك ترى ماهوزين علشان ظهرك اشتري عربيه وجلسيه فيها خليه يتعود انا بنتي ماقد شلتها من اول ما جبيتها مع انها صغيره 10 شهور كله في العربيه وابوها او الشغاله يدفونها ...


كتكوته : هلا فيك عاد استحملي هذا دلع بنات لمن تشرف نتفي اذانيها علشان تجلس عاقله ...هههههه الله يخليها لك ولأختها ..

ام شوق : يادلوعه ترى حمل البكر يجنن استمتعي ولا تخافين مرة ترى والله اسهل واروع حمل بيمر عليك ... اسئلي مجربين واللي تقولك لا تعب وموت ترى دلـــــــع .

والباقين وش اخباركم ..

كيف حالكم يارابطه شهر يوليو الا ابي اسال يوليو هو نفسه جولاي :o لاننا بالسعوديه تعاملنا بالهجري بس اعرفها بالانقليزي المهم انا انشاء الله ولادتي في 4 جولاي واخر دوره جتني 14 سبتمبر والله لايوريكم اشهري الاولي كان على طول نزيف بس الحمد لله راح النزيف بعد الشهر الثالث اللهم لك الحمد والشكر واظن اني الحين بالشهر السابع والله العالم واسال الله انه ييسر لنا ولكل حامل الولاده

سلام يا حلوات وبنات يوليو شخباركم وشعلومكم ان شاء الله طيبات

انا بخير والحمدلله رغم ان بنتي هالايان وايد تصيح وعلى اي شيء تقعد تصيح كنهم طاقينها بعصا ...والله يا بنات اني قمت احاتي لا تسوي فيني هالشيء لين اولد ....

الحمدلله على كل حال بس المشكلة احس اني صايرة قاسية معاها شوي مادري ليش ؟؟

وغير جذي تراني سويت تحليل دم لاني هالكم يوم كله دايخة ...ومايندرى النتيجة عندي موعد على الاسبوع الجاي ..خلوها على الله بروحي غبت يوم علشان التحاليل وفيها خصم من الراتب او من الاجازة السنوية ..وانا طلبت من الراتب لاني جمعت السنوية مع اجازة الوضع ...تخيلو ...وناسة ..المهم ان مديري قالي ليش جمعتي الاجازتين مع بعض ..قلت له محتاجتهم مع بعض ...كلاني ...قالي ..وانا من اقعد مكانج ...قلت له مادري دبر نفسك ....ههههههههه

حلوة بحرينية : ما تشوفين شر يالغاليه ...وهالالم تراه طبيعي ...بس اذا زاد روحي دكتورة لا تسكتين ...مع العالم ان جاني الم اليوم في بطني بس من تحت ..والله اني مت تخيلي وانا في الدوام وواقفة ماكنت قاعده ...خفت اطيح من قوة الالم ..تحملت وصبرت والحمدلله راح ...على قولتهم ضريبة حمل ...

جميلة : اذا على الحكة الله يعينج ولا تسكتين عليها تراها مب زينة ...هاذي حساسية حمل ...وحاولي تعالجينها ..انا في بنتي جاتني حكة ...بس كانت خفيفة ما تبي علاج ..وفي هالحمل بعد ..في بنتي اذا كلت مانجا ...تخيلي جسمي يستوي بقع حمراء واحك بطريقة مجنونة بس الحمدلله ما وصلت لدرجة اني احك بالسكين ...يعني على ما اظن ان حالتي اخف من حالتج عموما طمنيني عليج يالغلا ..

ليل المجاريح : عندي وعندج خير ...بنتي مطلعه عيني بصياحها ..بس تكسر خاطري وايد ..الله يعين بس ..والحمدلله على كل حال ...

والباقيات الحلوات شلونكم وشخباركم

وولكمووو للاعضاء الجدد ..الله يهون عليكم ان شاء الله ويخفف عليكم وعلينا يارب ...وان شاء الله تستفيدون منا ونستفيد منكم ...

صباح الخير يا رابطة شهر يوليو

1- بنت الكويت 84 في 9 يونيو 2006

2- ماروكووو في 1 يوليو 2006

3- مس نوار في 1 يوليو 2006

4- نور ينور قمر في 3 يوليو 2006 - ولد

5- سوااااري في 4 يوليو 2006

6- كتكوتة نايمة في 7 يوليو 2006 - بنت

7- حبيبة ريلها في 7 يوليو 2006

8- شوق العين في 8 يوليو 2006 - ولد

9- أم الحلوووة 11 يوليو 2006

10- حلوووة البحرينية 11 يوليو 2006 - يمكن بنت

11- عيون الافعى في 12 يوليو 2006 - بنت

12- أم رغووودة في 12 يوليو 2006

13- flower_world في 12 يوليو 2006 - ولد

14- أم شوووق في 12 يوليو 2006 - ولد

15- طفلة غلا في 13 يوليو 2006

16- asmaa_kh في 14 يوليو 2006

17- سوسكا في 15 يوليو 2006

18- FLoOoOoOoNA في 15 يوليو 2006

19- jafa في 17 يوليو 2006

20- أم سيف 2006 في 18 يوليو 2006

21- راضية بقدرها في 19 يوليو 2006

22- دفء الجليد في 20 يوليو 2006 - ولد

23- توتة في المريخ في 20 يوليو 2006 - ولد

24- أم أحمد 25 بدش التاسع ان شاء الله تاريخ 20يوليو 2006

25- بسمات و ضحكات في 22 يوليو 2006 - ولد

26- شذى في 23 يوليو 2006

27- ليل المجاريح في 23 يوليو 2006 - ولد

28- الجميلة 78 في 24 يوليو 2006 - ولد

29- الأمل الجديد في 24 يوليو 2006

30- الحالمة بالحب في 24 يوليو 2006

31- دمعة شتاء في 25 يوليو 2006

32- قطر في 26 يوليو 2006

33- عبق الريحان في 28 يوليو 2006

34- ام حسام في 29 يوليو 2006

35- أم طيف ورهف في 29 يوليو 2006

36- ayyat في آخر شهر يوليو

والله يتمم علينا بخير ...
ونسمع عن الباقي وشنو حاملين ....

حبيبتي ندودة المزيونة أنا حسبت لك موعد الولادة على التاريخ الي عطيتني ايه لآخر دورة وهو 14 سبتمبر فرايح يكون تاريخ الولادة 21 يونيو 2006 ... بس إذا كان أني غلطانة في موعد آخر دورة لك وأنت متأكدة من أن تاريخ الولادة 4 يوليو 2006 يعني الدورة كانت معك بتاريخ 27 سبتمبر ... أرجو منك التأكد حتى تتأكدين من تاريخ ولادتك ...

وأهلا وسهلا بك معنا في رابطة شهر يوليو ....

سلامي وتحياتي ...

حبيت اصبح عليكم
اليوم انا قاعده من صباحة الله خير
فيني نشاط وحيويه ابي اسوي شي مفيد ومااعرف شنو!!!
هههههههههههه:dd:<<<<<<<<<متفيقه

السلام عالجميع ..

وشلونكم وشلون الحمل والتعب معاكم ..

حوامل بغيت اقولكم شئ يجيني هاليومين بزيادة ...

صار نومي ثقييييييل حيل ومااصحى الا اذا رحت للحمام - الله يكرمكم -

وغير هذا ان نفسيتي حيييييييييييل تعبانة وكل شوي تجيني رغبة وابي اصيح واصيح

من قلب تقولون طاقيني طق اليهد .. وزوجي آآآآآه على زوجي صايرة كارهته حيل ومااتحمل اشوفه

ولااقعد معاه ولاانجذب له بااي شئ وبنتي من اشوفها تكسر خاطري وتجيني وساويس عالبيبي

ولااادري هالحالة طبيعية والا لا ... اتمنى تقولوا لي ...

مساء النور على الحلوات :

دفء : انا خلاص شبه منهاره طفشت من ولدي والله نسيت ادلع نفسي حتى اكلي كلام فاضي .. من كثر التفكير فيه

كتكوته نايمه : عندي لك فكره اذا حاسه بنشاط وش رايك تسوين رياضه وبعد ما تخلصين نظفي البيت كله لوحدك بدون مساعدة وجهزي العشاء لزوجك بس لو صار فيك شئ مالي شغل بس قولي نشاط زايد

راضيه : هلا فيك عزيزتي اني في كم شهر بالضبط واعتقد اللي فيك وحم عادي فيه حريم يتحمون من فترة للثانيه ويموتون بالنوم بس عادي نامي كل ما حسيتي برغبه في النوم وزوجك لازم يعذرك يعني بدون دلع لين تولدين هذي فرصتك طلعي كل اللي في نفسك ههههه

حلووووووة عزيزتي شاكرة مرورك على موضوع ولدي ومشاركتك ..

شخباركم:
ليل المجاريح: انا نفسج طفشت من ولدي، الدكتور يقول لي عوديه ما يشرب حليب بالليل لما يصحى/ واول ما جربت اصابني انهيار صعبي بنص الليل هههههههههههه على طول عطيته الحليب
راضية بقدرها: انتي باي شهر، النوم شئ عادي تحتاجه الحامل بس باول الاشهر!!!!
كتكوتة نايمة: الله يعطيج النشاط على طول انشاء الله، فكري بالمستقبل بخلص وقتج انشاء الله ههه
حلوة بحرينية: اخبارج يالغالية ، انشاء الله تمام
دفء الجليد: والله لو احكي لج عن الحكة ما بتصدقين، اقولج مستغربة بموت من نفسي، تعرفين اقوم بالليل بس اتحكك وارجع انام، والله العظيم لدرجة الدم يطلع مني،، ليش ما اعرف، رحت الصيديلة وخذيت لي دوا بس ما نفع بنتظر السبت بروح للدكتورة ما فيني تعبت والله من هالحكة!!!!!!!!!!!!!! انا بكتب موضوع بشوف فيه امهات نفسي والا لأ!

اهليييييييييييين حلوه البحرين لا انا متاكده من تاريخ دورتي ويوم رحت المستشفى عطيتهم نفس التاريخ وهم الي قالوا لي انها في 4 جولاي والله العالم

هلا بنااات شخباركم
انا الحمدالله بخير ......دخلت السادس 12_3 ......والله من الحين وانا خايفه من الولاده ختى قمت احلم فيها بليل ..
ادعوووووووولي
حلوووه البحيرينيه ..شكرا ع السؤال الغاليه

سلااااااام بنات شخباركم وشعلومكم ..انا بادخل السادس بعد ثلاث ايام ...الله وناسه ...بيبقى لي 3 شهور واولد


الحمدلله الايام قامت تمر بسرعه ...

اقوول الوقت عدى ومضى وانا لين الحين ما تجهزت للولادة ..يعني لازم اشتري للنفاس وللولادة والخ الخ ...

شوفو اللي ناوية اشتريهم باقولهم لكم وانتوا قولولي رايكم

1- مهادات طفل
2- ملابس اوفر هول للبيبي (( انا اسميهم الارانب ))
3-قحافي للبيبي ((غطاء الراس ))
4-ملابس داخلية
5-كيس للطفل
6- شنطة كبيرة للزيارات الثقيله (( لبيت الاهل اللي الزيارة تاخذ وقت ))
7- شنطة صغيرة (( للسوق ))
8- دلاغات للبيبي
9- قفازات للبيبي
10-شامبو وصابون وكريم الخ الخ
11- مراضيع للبيبي
12-صدريات للبيبي
13-مصاصة في حال كان البيبي كثير البكاء (( لهاية كما يسميها البعض ))
14-بدلة كشخة للبيبي في حال الخروج لاماكن كشخة
15-صابون غسيل ملابس البيبي
16-غطاء للمرضاعه عن العين والحسد
17-فوط


الاغراض اللي انا احتاجهم :
1- فرشاة اسنان جديدة
2- معجون
3- مشط للشعر
4- كريم مرطب للجسم
5- فوط صحية
6- كريم لتشققات الصدر
7- مشد للبطن
8- ملابس مريحة لنوم مع ازرار من الامام ((لرضاعه)
9- جلابيات النفاس
10- ملابس داخليه مريحة وقطنية
11- مرهم مخدر (((واعتقد انتوا عارفين ليش بس شكلي باقول للدكتور او الدكتورة يوصفونه لي ))
12- صابون وشامبو
13- لحاف للسرير يكون كشخة ومريح في نفس الوقت لاستقبال الضيوف في المستشفى او البيت
14- طقم فناجيل وبيالات ودلال وصحون تقديم للضيوف
15- مفرش للطاولة
16-توزيعات وحلويات


وبس اللي تشوف اني نسيت شيء خلها تقولي وتذكرني ...لاني اطبع لي لسته بهالاغراض علشان مانسى شيء مابي وانا في الوقت الحرج واتذكر

عموما هاذا اللي عندي اليوم

انتظر ردودكم واخباركم

هلا بالجميع ..

انا معاكم بنفس الرابطة وبنفس الشهر وباقي لي يومين وادخل السادس والله يسهل عالجميع ..

حوامل .. ماقلتوا لي .. تجيكم نوبات امساك والا لا ؟؟ وش سويتي لما جتك الحالة ؟؟

ندودة المزيونة: مرحبا بج معانا والله يكمل لج على خير
فلور وورلد: انا نفسج الحين من شهر تقريبا قمت افكر بالولادة، والا اول ما حملت ما فكرت بها الشئ تعرفين لأن الموعد شوي شوي يقرب,,والله يسهل علينا جميعا يا رب
دفء الجليد: انا اشتريت شوية اغراض احس فيه وقت ومو مستعيلة وايد مثل حملي الاولي، وانشاء الله لاحقين على الاغراض,بس الاغراض اللي كتبتيها كلها ضرورية ما اعتقد انه في شئ كمالي، والله يفرحج يا رب
راضية بقدرها: الامسال شئ طبيعي بس عليج بالسوائل
الباقيات اين انتم شدو الهمة نبي سوالف لين ما نولد

ليل المجاريج: وييييييييه ماتدرين انا من كثر مااتحرك في البيت وانظفه بروحي تعبت واااايد لدرجة ان راس البيبي كان نازل وكان يجيني نفس الطلق حتى الدكتوره قالتلي لاتتحركين وخلي اي حد ينظفلج البيت لأن خدامتي مسافره وعقب اسبوعين بترجع...وبعد مااتوب كله اتحرك في البيت راكبه الدرج ونازله تجيني ايام ظهري يذبحني من الألم بس شسوي من بينظف البيت كله بيتراكم علي عقب....بس ضحكتيني يوم قلتي (اذا صارلك شي انا مالي شغل):dd:

الجميله78 : انا اقول روحي عند الدكتوره في اقرب فرصه ممكنه اخاف تزيد عليج الحكه مثلي قبل مع ان الدكاتره مايقدرون يخففون الحساسيه احتمال لاسمح الله يولدونج قبل موعدج بـ3 او اربع اسابيع في حالة اذا زاد عليج وايد....الله يعينج صراحه... حاسه فيج والله...((((تحممملي تاخذين حبوب فيها كورتيزون دكاترة الجلد يعطون الحامل ماعندهم مانع بس والله ولاتخفف الحساسيه ولا شي بالعكس النفسية تتعب من الانتفاخ اللي بيصير من هالادوا )))

راضيه بقدرها:تدرين شتسوين علشان يخف الامساك اشربي ماي دافي قد ماتقدرين بتحسين بالفررررق...هذي الطريقه انا بنفسي مجربتها خبرج من الحديد اللي ناخذه.



بتكلم عن نفسي شوي...انا هالايام مسويتلي لستة اغراض حق تجهيزات البيبي واغراضي
خذتلي جلابيات حق الولاده فظيعه هي اصلا خاصه للولاده فيها فتحتين للرضاعه
وملابس حق البيبي
بس باقي الاغراض بكملهم عقب
أحس انه تو الناس
وااايد افكر شنو بسوي في غرفة المستشفى احب السمبل ماحب العفسه بتكون اعصابي تعبانه فأبي الوان فاتحه وفرايحيه (((والله تبون الصج انا كلش مب عاجبتني الغرفه اللي فمستشفى حمد الوانها كئيبه وديكورها يجيب الاعصاب احس اني بتم كله متنرفزه)))صج انها بس يومين.. بس بعد مااقدر جان زين لو يغيرونها ويسونها بيضا لون المستشفيات الثانيه واحنا اذا نبي نعدلها على على كيفنا...

شاكرة لكم نصايحكم يالغلا وانا اجربها بس زي ماقالت اختي كله من

الحديد اللي ناخذه .. الله يعين ...

بالنسبة للمشتريات انا قلت بس اعرف وش جنس المولود وبااذن الله ببدي في التجهيزات ..

مساء الخير يا الغاليات شخباركم اليوم ....

ويش أقول بصراحة أنا وااااايد تعبانه وأحس نفسي ما لي خلق أبد ... اليوم الصبح دخلت الحمام (انتم بكرامة ) أفرازات مع دم ينزل علي وألم في ظهر موت ذابحني .. أدعو لي الله يفرج لي ... ويتمم لي على خير ....

من جد تعبانه ... وما أعرف شنو اعمل ....

صباح الخير يابنات وحشتوني مووت :

ماشاء الله وصلتوا لمرحله اغراض البيبي والله عن نفسي باقي لي اسبوع وادخل السادس وتعبانه عندي الم في جنبي اليمين واسفل الظهر لدرجه احس انه طلق ورحت للدكتورة وقالت لي وزنك زايد 2 كيلو في 10ايام وسبب لك ثقل اسفل الظهر وبالنسبه للألم اللي في الجنب احتمال تشنج في العضل وقالت لي لازم الكالسيوم حبه مرتين يوميا وامشي واتحركي علشان خايفه الضغط يرتفع لانه اعلى شئ في الطبيعي .. والله خايفه مره وش اسوي ؟؟

وبالنسبه لاغراض البيبي ماراح اشتري كثير عندي شوي بس اشتري الداخليه وافرولات للخرجات واذا احد جاء عندي وبعدين بدري لمن اوصل الشهر الثامن اروح اشتري منها اتمشى واتسلى

بنات انا ملاحظه انه عندكم في الإمارات تهتمون بترتيب غرفه المستشفى تاخذون مفرش وتزينون الغرف ليش احنا ما نسوي كذا بس نختار المستشفى خاص او حكومي وبعدها نولد وثاني يوم وانتي في بيتك وهناك يزوروني في بيتي يعني ارتب غرفتي وخلاص

المهم امس كتبت لي الدكتورة على كريم لبطني علشان الحكه والشد اللي احسه في الجلد وهويحتوي على زبدة الكاكاو والجلسرين والكولاجين يريح وعطيك نعومه للجلد وما تحسين بحكه جربته قبل النوم رووعه وتقول يخفف من التشققات الجديده اللي ممكن تطلع ...

بنات وش اخباركم وين باقي بنات الرابطه اللي اضافوا اسمائهم وراحوا .......................................؟؟

الـــــــــــــــــف سلامـــــــــــة عليج يالغالية : الحلوة البحرينية ( ما تشوفين شر ابد انشاء الله)
انزين راجهي الطبيبة احسن لج، لأن الحين انتي ما شاء الله بالسادس والمفروض ما ينزل منج دم، بس شكلج تشتغلين !!!! ومرهقة نفسج..
الله يبعد عنج الشر انشاء اللهحبيبتي طمنينا عليج اول باول علشان نعرف اخبارج
وسلامتج الف سلامة

الله يسمك من كل شر يا أختي الجميلة .......

أن شاء الله خير إذا زاد علي الأمر وا استطعت أني أتحمل الألم رايح أروح المستشفى ...

تسلمين يا الغالية .....

الظاهر أن اليوم عيد ميلاد ولدك ... كل سنة وهو طيب ... وعقبال العمر كله يا رب ....