مجلس امهات شهر مايو 2006 حياكم

هلا نبض شخبارج؟؟
انا الحين طالعة بس حبيت اسلم عليج قبل ما أمشي
الحمدلله مدمنة نوم ولا محرومة نوم،،،،احنا بعد مالنا غناة عنج
وانتي تتدلعين علينا عشان تشوفين غلاج عندنا
يالله يوني مع الف سلامة أشوفكم بعدين

مع السلامة الغالية

السلام عليكم

ام جوااااد
من قالج تقعدين قبلي اخرلج مره .. تره انا قاعده من 5 وربع الصبح بس مادخلت النت ورحت بيت اهلي ونمت عالساعه 8 يعني مامداني ادخل .. عاد اقولج لا تتأخرين علينا
مراوي يبيلها طق .. اشوف مالها طاري


نبض
شلونج وشخبارج اشوه رضيتي علينا .. اقول بسج دلع
ومن ناحية النوم انا مثلج امس كنت نايمه الظهر وقعدت عالساعه 4 ونص العصر وماصارت الساعه 7 بس انبطحت اريح ظهري الا وانا نايمه حتى اقول حق امي صج انا ما استحي وين ما احط راسي ارقد


ام هديل وام راشد وسندس
شخباركم

هلا فيكم بنات اشلونكم انتو واشلون البيبيات عسى مو متعبينكم
مراوي شلونج مالج حس ولا خبر تناظرينا من بعيد عسى المانع خير بس؟؟؟
دلوله شكرا على السؤال انا الحمد لله ... انتي شلونج وبسج نوم عسى مو قارصتج ذبابه تسي تسي ههه امزح معاج بعيد الشر عنج
نبض هلا فيج زود يلغاليه اشلونج انتي
ام جواد حبيبتي شلونج اجوفج قاعده من وقت بس انه اخر وحده فيكم تقعد خخخخخخ شسوي نوم بليل ماكو اطلع حرتي الصبح واليوم هايته خبرج فيني

انزين بنات خل نفتح موضوع خفيف الا وهو سؤال كل وحده تكتب شنو اخر شي شرته لها وللمولد؟؟؟

هلا أم هديل ..الحمد لله انا زينه..ويسرج الحال و بعده صراع النوم مازال مستمرا..
بالنسبة لي آخر شي شريته للبيبي:لفتين زياده و خذت مراضع،ودله للماي عشان يتم حار للنونو(شريت مراضع عشان صراحة أخاف ما يقدر يرضع عدل و إلا .... فخذت احتياطي و شريت،وعشان بعد للماي تدرون الياهل واايد تييه الحازوقه..
و آخر شي شريته لي:أممممممم خذت صابون للجسم من ماركس و سبنسر(هههههههههههههههههه)
و الحمد لله خلصت سكرت شنطة النونو و طبعا حاولوا ترتبوها انتو و أزواجكم عشان تحسوا بمتعة كبيرة مثل إللي حسيتها.. بس شنطتي بعدني ما سكرتها أقصد ما رتبتها للحين أتريا ملابس النوم إللي فصلتهم للمستشفى يخلصوا عشان أتفيج و أرتب شنطتي..

تدرون اليوم أحس بإرهاق شديد و تعب و أحس كل ما أنام أقعد أفكر بالولادة و تيني الصيحة:confused::confused::confused: بس عقب أتخيل شكل النونو و تييني ضجكة :shy::shy::shy:حتى أخاف زوجي يشوفني و يقول تخبلت الحرمة:pain::pain:

صباح الخير جميعا

اعذروني عالتأخير الحين اقولكم ليش

يوم الثلاثاء طلعت الشرقيه عشان ادور سرير للبيبي و رجعت بخفيي حنين ماعجبني شي و ضاع نص الوقت على سالفه الشوارع المسكره اللي مايحطون لها دليل تحويلات .. مغير ندور وين ممكن هالدرب يوصلنا

وطبعا رجعت الساعه 12 بالليل هلكانه من التعب ماقدر اكتب شي فنمت على طول

ويوم الاربعا بعد رجعت من الدوام و نمت عشان العصر وراي جامعه و رجعت من الجامعه دايخه و نمت

و اليوم الخميس قاعده من الصبح و مو ناويه اروح بيت ابوي عشان عندي اكمل تنظيفات الشقه اللي بديتها الاسبوع اللي فات و العصر ابي اروح السوق اشتري لي اغراض

و بالنسبه للتوزيعات تقريبا قررت شنو الشكل اللي ابيه باقي اقرر شكل الستاند اللي بحطهم فيه

و بس :)

هلا وغلا حوامل...شخباركم؟؟
مـــــــــــــراوي هلا حبيبتي،،،طولتي علينا،،الحمدلله إنك بخير وصحة
أنا راح عن بالي أقولك على سالفة الشوارع المسكرة،،لأن قافلين غالبية الشواراع واذا ماكنتي من المنطقة ماتعرفين من وين تطلعين ولوين بتوصلين
وين رحتي بالشرقية؟؟بس الدمام؟؟
........................
نبض ،، دلولة ،، أم هديل
شخباركم ؟؟ا انشالله تمام؟؟
أنا والله أمس طلعت الظهر على بيت خالتي،،ورجعت المغرب ورحت بيت أهلي،،،وماجيت الا متأخر،،وماكان فيني طاقة أدخل المنتدى
تصدقون؟؟ الاحظ هاليومين إن نومي الحمدلله معتدل شوي،،وصايرة أنام لي كم ساعة متواصلة،،أحس هالشي وااايد مريحني ومنعكس على نفسيتي
انشالله دووووووووووووم لنا جميعا،،،ودي انام وأنام وأعوّض الأيام اللي مانمتها الاسابيع اللي راحت>>>>صج ما أنعطي وجه،،طمّاعة
.......
انشالله ألحق عليكم اليوم،،،لأن بطلع على الظهر باروح بيت أهلي ومابرجع الا بالليل
ســــــــــــــــــــــــــــلام عـــــــــــــســـــــــــولات

هلا ام جواد شخبارج انشاء الله بخير
اشلونكم بنات ومراوي حمد الله على السلامه
انا اليوم كلعاده من الصبح في بيت عمي وتوني رديت من شوي انزين ام جواد ما رديتي على اخر سؤال لي شنو اخر مشترياتكم للبيبي ولج انتي اخر قطعه يعني خخخخخخخخخخخخخخخ
اجوفكم على خير

صباح الخير بنوتات...شخباركم؟؟انشالله كلكم بخير؟؟
أم هديل هلا وغلا..شو الأخبار؟؟وحشتينا..انا الحمدلله بخير وأسأل عنج
اممممممممم شنو آخر شي شريته للبيبي...كان يوم من يومين يوم أطلع،،وشريت له بساط كان مررررة عاجبني،،وايش بعد ايش بعد
ايــــه وشريت له مراضع زجاج
انتي لو مخلية سؤالج لليوم ،،لأني باروح السوق مع ريلي العصر ويعني في احتمال ،،الا اكيد أني لازم بشتري شي
هو عن حساب بنطلع نروح محل عطورات،،بس تعرفين رجلنا لوين تسحب دائما،،،وانتي؟؟
...........................
دلولة ،، مــــراوي،، نبض
شخباركم عسولات وشخبار كتاكتيكم وأرانبكم؟؟كويسين انشالله؟؟
..............
دلولة من عجايب الدنيا السبع أني صاحية بدري لأن اختي بتجيني من الصبح عشان مسوية بحث وتبي تخلصه
بس مع ذلك قعدت قبلج

صباح الخير جميعا

اليوم الجمعه ودي اطلع اتسوق لاني احس صرت في العد العكسي و انا للحين ماسويت شي

ماشريت اغراض الحمام و الشامبو و الكريمات حق البيبي ولا حقي

مافصلت لي قمصان نوم حق المستشفى

ماسويت التوزيعات

مارتبت الشناط

<<<< يعني شسويتي بالله !!!

وقتي كله يضيع بسبب الجامعه سبت و اربعا و باقي الايام زوجي يطلع النادي مايخلص الا بالميت عالساعه 8 يعني عبال مايرجع البيت و نطلع نتسوق مايمدينا نمر الا محل واحد ولا محلين و الا سكرو

امس كان المفروض العصر بروح السوق مع امي بس قلت لكم كان عندي شيل و حط حتى المسكينه امي الله يطول لي بعمرها و يعطيها الصحه و العافيه جت عندي عشان تساعدني بس تعبنا و ماقدرنا نطلع السوق العصر

بشوف شنو اقدر اسوي اليوم و اعلمكم بالليل

الحين عندي وظيفه حق الجامعه لازم اسويها

الله يعينك حبيبتي
جامعة وحمل أحسها صعبة،،حاولي تقسمين وقتك هاليومين حتى تخلصين بدون ماتعملي لحالك خربطة وربكة
وانشالله فترة وبتعدي

مثل ماقلت لكم الجمعه كل الانشطه و المحلات تكون مسكره

فماكان في شي اقدر اسويه غير اني رحت بيت ابوي العصر و شفت الاغراض اللي شريتها

رتبت شنطه البيبي حطيت له 3 بدلات و فوطه حمام و فوطه لف خفيفه حق اذا برضعه اتغطى فيها وهم ممكن ينلف فيها

حطيت قماط و شرشف حق المفرش و طبعا المفرش باخذه معاي و رضاعه صغيره و مشط

طبعا الكريمات و الشامبو و الصابون لحين ماشريته بس مادري هل نودي احنا هالشغلات مع الحفاضات ولا المستشفى يوفرونهم لنا


ذكروني في شي مهم نسيت احطه؟

هلا مــــــراوي
اليوم ماكو الا أنا وانتي،ماحد دخل من الجماعة ابد
والله برافو عليك رتبتي شنطة البيبي من الحين،،،تصدقي يبي لي عاد أتشجع وأرتبها
ماعندي فكرة فما اقدر اساعدك انشالله البنات يفيدونا
واعتقد ان الحفاظات بتكون من المستشفى نفسها،،بس ما ادري عن الكريمات،،،بس حبيبتي المستشفى اذا كان خاص راح يعتنون فيه بالكامل وماراح تمسكينه وتجهزينه الا وقت الطلعة او الرضاعة،،هذا اذا كا نظامكم مثلنا

هااااااااااااي بنات
صباح الخير ياكسالى،،،شخباركم؟؟
حاسة فيكم النوم صاير حلوووو واااااايد وماينشبع منه
نوم العوافي يا أحلى حوامل

صباح النور ..
هلا أم جوااد اشحالج..صح النوم حبيبتي تو الناس إنتي و مراوي للحين ما رتبتوا الشنطة..أنا حمد لله رتبتها و خلصت ،
كم يوم تقعدوا بالمستشفى؟؟إحنا إذا خاص ثلاث أيام وإذا حكومي و كانت الولادة طبيعية يقعدون الوحده يوم..
أنا طبعا جهزت الشنطة و حطيت فيها:3 بدلات طبعا هذي حق النهار و ثلاثة حق الليل مع القماط مالها،حطيت 6 فوانيل داخلية لأن الياهل أول ما ينولد مرات يكون عنده خروج وايد و مرات يرجع فبتحتاجوا لبسات احتياطية،حطيت 2 لفة خارجية إللي تنلف ع الياهل،سليب باق و طقم بدلة و قبعة و لفة و زلاغ(هذي حق اليوم إللي بطلع فيه من المستشفى)
حطيت مرضعة احتياط(المستشفى هو إللي يوفر الحليب للياهل و البامبرزات و إذا كان ما يوفرها بس من ينولد بخلي أي أحد يروح يشتري لي بامبرزات..حطيت بعد مشط صغيروون:smile::smile:حطيت فوطة وسط(إذا بدلت له البامبرز)و حطيت 3 فوط حجم صغير(لا سمح الله إذا رجع أو عشان أحطها على كتفي إذا سندته عقب الرضاعة:pain::pain:
وبالنسبة للصابون المستشفى عندنا هو إللي يهتم بالياهل لحد ما نطلع..

و إذا تذكرت شي ثاني بخبركم..

تدرين نبض نبهتيني لشغله

انا حطيت 3 بدلات على اساس اني بقعد يومين او 3 فوحده احتياط

بس الحين فكرت معقول الياهل بيقعد طول اليوم على بدله وحده و ثقيله عليه لانهم كلهم اللي حطيتهم بدل فشخره يعني اللي قدام الناس

مسكين يبيلي احط له شغلات خفيفه حق الصبح او حزه النوم

يبيلي اسال المستشفى عن سالفه الغيارات و الكريمات لاني اعرف حق الحكومي بس الخاص ماعندي فكره شلون نظامهم و انا ان شاء الله بولد في المستشفى اللي اتابع عنده

هلا بنوتات...
مراوي ونبض شخباركم؟؟
انا يانبض انشالله برتب الشنطة على نهاية هالأسبوع...ومابتعب فيها لأن ماشاء الله ليكم خلصتوا ترتيب،،فراح نستعين فيكم
بالنسبة لي ،،المستشفى اللي راح أولد فيه الظاهر يقعدون فيه يومين،،،والعناية بالياهل تكون من صوبهم،،ويجيبونه بالطلب ووقت الرضاعة ومايخلونه ينام معاي
على أساس يريحون الأم يعني،،،فالغيار والغسيل والحمام كله عليهم

دلولة وأم هديل ...وينكم ؟؟مالكم حس

والله اني للحين ما جهزت الشنطه كله احس انه بعدهي وقت مع العلم اني دشيت الثامن

هلا سندس
الحال من بعضه انا بعد ماجهزتها ولا شي
كسل بعيد عنك

سوري بنات على التأخير بس اهم شي اتواجد معاكم
الخميس والجمعه اكون مشغوله كثير
اجوفكم قمتو تتكلمو عن تجهيزات الشنطه .. انا عن نفسي كلشي شريت للبيبي بس للحين ما حطيته بالشنطه الخاصه فيه .. لما اكمل اغراضي راح اجهز اغراضي واغراض البيبي بلشنطه وعفيه عليكم جهزتوا كل شي