هام للبنات المصريات

والهدية دي عشانك

bridetobe

الف الف الف مليون مبروك يا عروسه وربنا يتمم بخير والله والله فرحتلك مووووووت

يلا شيدي حيلك علشان تخلصي بقيت اللي وراكي

انا فعلا قربت جدا واعصابي باظت جدا خصوصا اني كل ما اخلص من حاجه الاقي لسه فاضل مليون حاجه تانيه يلا ربنا يستر وتعدي على خير

ريهام انتي تامري يا جميل وممكن زي ما هاله قالتلك تشوفي ماي ليدي او ندا ماي ليدي بصراحه شغلهم حلو قوي وقماش الفستان عندهم يجنن بس موديلاتهم معظمها سيمبل ومافيهاش تطريز كتير فانتي بقى حددي على حسب ما تحبي

التليه اللي انا رحته عنوانه يا سيتي 30ش عبدالرحمن صدقي خلف جامع السلام من حسنين هيكل عباس العقاد

انا اتفقت على الفستان عندهم خلاص

ولو احتجتي اي حاجه تانيه اطلبي على طول

مصراويه

ازيك عامله ايه وحشاني انا الحمد لله انهارضه اتفقت على الفستان خلاص ولما هاكلمك هاقلك عملت ايه في بقيت الحاجات بس انا اليومين دول مشغوله بجمع شوية حاجات اوديهم الشقه وكمان بشوف النجف والستاير بس ان شاء الله اكلمك بكره

هاله

انا بجد مش عارفه اقلك ايه انت هايله
انا فعلا رحت لمدام حنان واتفقت معاها خلاص ومبسوطه منه جدا وان شاء الله يطلع الفستان حلو والفضل كله بعد ربنا ليكي يا احلى هاله في الدنيا طبعا هاكلمك احكيلك بالتفصيل تصدقي يا هاله كنت هاكلمك اول ما رجعت من بره بس الوقت كان متاخر الساعه كانت حوالي 12 ونص بالليل قلت معلش استنى للصبح وبعدين اكلمك بجد بجد يا هاله ما تعرفيش انتي ريحتيني
اخيرا دلوقتي اقدر افضى للحاجات التانيه اللي ورايا

بصي يا سيتي بالنسبه للجيرب انا شخصيا شايفه ان الطبيعي اشيك وارق واحلى كتير من الصناعي وفي محلات كتيره حلوه في المهندسين والزمالك ومصر الجديده كمان تقدري تلاقي عندهم اشكال حلوه وطبعا ممكن تشوفي كمان الموديلات اللي تبع الدار ساعات بيبقى فيها حاجات كويسه او شوفي صوره تعجبك في اي مجله او على النت وخديها معاكي وشوفي المحل يقدر يعملهالك بكام

عارفه يا هاله الشارع اللي فيه مسرح التليفزيون وانت جايه من صلاح سالم كملي قدام شويه افتكر اني شوفت هناك محل ورد شيك وشكله عنده انواع كتير حلوه وفي واحد مشهور في المهندسين اسمه جاردينيا اعتقد في جامعة الدول قريب من البطل احمد عبد العزيز ولو افتكرت حاجه تانيه هاقلك على طول

اقلكم سلام دلوقتي لحسن الفجر قرب وانا خلاص مش قادره

مصراوية

خلاص سماح مش زعلانة منكم :smile:

وميرسي على الهدية عقبال يا رب ما نردهالك في الأفراح ان شاء الله

ايمي

الف مبروك على الفستان ان شاء الله هيكون أحلى فستان عروسة ربنا يتمم لك بخير:clap::clap: طب والميك أب هتعملي ايه فيه؟

على فكرة انت فرحك كم في يوليو؟

وربنا يعينك على الباقي أنا كمان بيجيلي نفس الاحساس لما أحس اني خلصت حاجة تطلع لي مليون حاجة:pain:

انا كمان نفسي في الجيرب الطبيعي انا بأحب الورد قوي وخصوصا الأبيض بأموت فيه والأحمر (منتهى التناقض مش كده):D2

عموما لو تعرفوا حد في مصر الجديدة يا ريت تقولولي عليه

كمان بالنسبة للتصوير تعرفوا مين كويس؟

أنا أعرف آفو اللي في ابراهيم اللقان في روكسي شفت له حاجات حلوة قوي وهو اصلا للعرايس وبس ، لو تعرفوا حد كمان كويس قولولي

ربنا معكم جميعا ان شاء الله وربنا يتمم لنا كلنا بخير يا رب

وادعولي الخياطة تشد حيلها وتخلص أحسن أنا كمان خلصت وزهقت

يلا سلام دلوقت علشان لسة ما بدأتش شغل:smile:

السلام عليكم و لارحمة الله و بركاته
احلى سلام على اخلى عرايس فى مصر و العالم كله
بجد بجد وحشتونى كلكم
اعذرونى على غيابى المده دى كلها اصل بعيد عنكم و عن السامعين الكمبيوتر بتاعى جاله فايرز و دمرلى الجهاز و فان و فان على ما صلحته و كدا بقى بس اول ما النت اشتغل جات جرى اشوف اخر التطورات عندكم و لقات ما شاء الله اخر نشاط و حيويه و رغو التعب و القلق اللى انا حساه منكم فى كلامكم الا انكم خلتونى هموت و اجرب الاحساس دا
امانه عليكم كلكم تدعولى ان ربنا يزقنى الزوج الصالح عاجلا

الف مبرووووووووووووووووووووووووووووووووووووووووووووووووووووك
ليكى يا قلب العصفور و يارب يارب يارب يتملك على خير ان شاء الله و عقبالى اناكمان

كنت عاوزه اقول رأى فى فستان الفرح بمناسبة انكم كلكم بتحهزو ليه حاليا بما ان الفستان مهم جدا و فى نفس الوقت حرام يبقى غالى التكاليف لانه فى الاول و الاخر هيتلبس مده بسيطه و بس انا برجح انه يبقى تاجيير بس طبعا الاتاجير بيبقى مستهلك و كمان فى الغالب مدلاته قديمه بس فيه فى جرنال الوسيط بيعلنو عن فساتين اتلبست مره واحده و طبعا جديده و موديل حديث من وجهة نظرى ممكن تلاقو فيه اللى انتم محتاجينه

دى وجهة نظر مش اكتر

كمان بمناسبة عطر الفراش فيه شركه اعرفها بتعمل عطور تركيب للعروسه تعطر بيها البيت و كمان بيعملو للعروسه تركيبه تدهن بيها جسمها تفضل ريحة جسمها معطره لمدة 3 او 6 شهور مش متذكره بظبط
اللى عاوز رقم تلفونها او العنوان يقولى و ممكن تسئلو على عطر الفراش عندها انا معرفشى اذا كان موجود و لا لأ
بصراحه انا معرفشى عطر الفراش دا غير منكم هو بيستخدم ازاى؟

صباح الخير يا عرايس:smile:

عاملين ايه ؟ كلكم

teawater2002

وحشتينا فينك الف سلامة على الجهاز بتاعك

عقبالك يا رب في القريب ربنا يعطيك زوج صالح يهنيك ويسعدك ان شاء الله انت وكل البنات

بصراحة معك حق في موضوع الفستان بس أنا عن نفسي مش أقدر اعمل كده لأنه هيكون ان شاء الله ذكرى حلوة العمر كله انا عارفة ان ده رأى غير عملي بس ما فيش فايدة فيا:smile:

عطر الفراش ده يا ستي عبارة عن عطر سائل في زجاجة شفافة اللي عنده لونه زى لون السوبيا أبيض غامق شوية ريحته هايلة و:up: والزجاجة فيا بخاخة وبيترش على المفروشات زى سبراى وطبعا في منه أنواع بس أحلاهم اللي فيه المسك حلو قوي أنا كنت جايباه من مكة كل ما أشمه أفتكر مكة على طول

يا ريت تبعتيلي رقم اشركة اللي بتقولي عليها أو اسمها لأن متهيألي الواحد بعد التعب وشغل البيت والشغل بره يكون من حقه يدلل نفسه بحاجة زى دي :cool2:

يلا سلام دلوقت وهارجع لكم بعد شوية ان شاء الله

السلام عليكم ورحمة الله وبركاته

أخواتي العزيزات

ازيكم يا غاليات؟؟؟ كلكم واحدة واحدة، مش عاوزة أنسى حد

مصراوية و ايمي و هالة و قلب العصفورة و فوانيس اللي بتنورنا دايما و bridetobe و teawater و the cat و كل البنات اللي انضموا لنا


معلش انا مقصرة معاكم قوي بس و الله ربنا اللي يعلم مشغولة في ركني من ناحية و من ناحية تانية بدأت تيرم جديد في الجامعة و من ناحية تالتة عندي مشاكل في البيت بسبب موضوع ارتباط عاوزين يبوظوه بالاتفاقات المادية العقيمة دي من قبل حتى ما يبدأ. ربنا يصبرني على مشاكلهم و يعدي الفترة دي على خير لأني بصراحة نفسيتي تعبانة قوي و لولا وجودي هنا في المنتدى كان زماني اتجننت أو اكتئبت لكن الحمد لله على كل حال و ربنا يصلح لي الحال و يوفق الجميع يا رب و يتمم لكم جميعا على خير يا بنات

أسيبكم دلوقت و يا رب أرجع قريب و اسمع عنكم كل خير

تحياتي و سلامي للجميع و متزعليش مني يا هالة لكن الظروف هي اللي منعاني من التواجد معاكم على طول

الف مبروك مقدما يا أمولة

ربنا يعينك ويهديهم لك

أقولك على سر (بشرط تكوني صليتي الاستخارة) صلي صلاة الحاجة ان لو الموضوع فيه خير ربنا يسهل ويعدي على خير ويكمل ان شاء الله ، لو مش عارفة كيفية صلاة الحاجة قولي لي وأنا أبعتها لك وربنا معك ان شاء الله يتمم بخير

السلام عليكم ورحمة الله وبركاته

حبيبتي bridetobe

تسلميلي و تسلملي دعوتك. أنا صليت بدل صلاة الاستخارة ألف!! و الله يا بنتي صليتها كتير قوي و كل مرة أشعر نفس الشعور، إني عاوزة الشخص ده و مستعدة أتحمل معاه أي مشاكل، لكن المشكلة في أهلي معقدينها و بدون داعي و مش عاوزين يسمعوا حتى لرأي أي وسيط، و من بداية الموضوع من قبل حتى الفاتحة و الا خطوبة، بمعنى آخر سياسة تطفيش و بدون مبرر واضح.

أنا معرفش صلاة الحاجة دي، ممكن يا ريت تبعتيهالي؟؟ متشكرة قوي يا برايد تسلميلي انتي و كل البنات ربنا يخليكم ليا. أنا منتظرة منك صلاة الحاجة و ربنا يسهل و الموضوع يمشي

السلام عليكم ورحمة الله وبركاته

إزيكم يابنات ياعسل وحشتوني جدا جدا جدا جدا جدا جدا جدا جدا جدا

أنا اسفة إني إتأخرت عليكم بس والله غصب عني أنا مابجيش البيت

إلا على النوم طول اليوم بلف أنا وخطيبي على الحاجات اللي نقصانا

وعلى أهله وأهلنا خصوصا إنه لسة راجع من الكويت مابقالوش إسبوع

خلاص بقى أنا اسفة ماتزعلوش ووعد مش هعمل كدة تاني....


بببببببببححححححححححبببببكككككككمممم

1-bridetope
شكرا على ذوقك ورقتك معايا

ألف ألف مبروك ياعمري على حجزك القاعة أنا سمعت إن دار الإشارة

لذيذة وشيك وإن شاء الله يطلع فستانك وميكياجك وتسريحتك تحفة

وتبقى ليلتك ولا ليالي ألف ليلة وليلة ربنا يهنيكي يارب.

bridetobe
لوعايزة عنوان محل ورود كويس للجيرب في محل رائع في مدينة نصر بس

مش فاكرة إسمه بس هو في عباس العقاد بعد البنزينة اللي في نص

عباس العقاد مش اللي في أوله يارب تلاقي حاجة تعجبك عنده.

2-مصراوية
أنا هبتدي أزعل منك مافيش بين الإخوات شكر أنا نفسي أخدمك إنت

والبنات أكتر وأكتر إنت تأمري ياقمر.

بالنسبة للقاعة أنا إخترت قاعة طيبة لأن القاعات هناك على حسب عدد

الأفراد وهي بتستوعب لحد230فرد وكلها بتطل على النيل ومساحتها

معقولة والتربيزة بيقعد على10 أو8أفراد على حسب المدعوين وبعدين

الفندق نفسه مدخله روعة والريسبشن بتاعه حكاية وفي هناك

ناس متخصصة في كل حاجة تخطر في بالك بخصوص الفرح

3-هالة
الله يبارك فيكي ياقمر ويخليكي لية وفعلا في موضوع مجدي وسيد أنا

بدأت أتردد وأخدت عنوان واحد إسمه صالح سليم في مصر الجديدة

وكلمته النهاردة ومعادي معاه بكرة هشوف إيه نظامه؟؟لوحبيتي تعرفي

عنوانه قوليلي وانا لما أرجع بكرة هقولك عملت إيه وهياخد كام وستايله

إيه؟بالنسبة للفستان عندك حق بس أنا روحت عند ندى وإخترت فستان

وقالت هيكلف20000وده بصراحة أوفر معايا قوي

هالة حبيبتي إذا إحتجتي أي حاجة أو خدمة عيني ليكي والله مش

عزومة مراكبية ياريت تعتبريني أخت ليكي

وبالنسبة للجيرب أنا أعتقد إن الطبيعي أشيك وأفخم بس ممكن تدخلي

معاه لولي وفي محل في مدينة نصر زي ماقولت لbridetobe

وأي خدمة ياقمر:smile:

4-إيمان
ياعسل ياقمر أنا مش عارفة أقولك مش عارفة أقولك إيه إنت إحرجتيني

بذوقك وشياكتك معايا تسلميلي يارب أنن على فكرة أنا إتفقت مع مدام

سهير إمبارح على الفستان وهيكلفني 5000بس برضه هروح الإتيليه

اللي قولتيلي عليه

إيمي ياقلبي ربنا يعينك على الشقة لو حبيتي أي مساعدة من أي صورة

أنا روحي ليكي والله وأي خدمة ياعسل

ااااااااااااااااااااااااه نسيت:o

نسيت أقولك ياأيمان ألف مبروك على الفستان وأن شاء الله تطلعي

أميرة في فرحك إنت تستهلي كل خير ياحبيبتي

teawater2002
حمدلله على سلامتك ياجميل بس ياريت ماتبعديش عننا أكتر إنت

بتوحشينا قوي بجد بالنسبة للفستان إنت عندك حق بس إنت عارفة

أنابحلم بالفستان وأنا عندي 8سنين وممكن أتنازل عن كل حاجة إلا

عنه.

ريهام نعمان

بصراحة بصراحة
كلك ذوق واخلاق

تسلمي علي ردودك الذوق علينا كلنا دي

والله باين عليكي جدعة اوي
ربنا ان شاء الله يسهلها لك ويوفقك في الفستان والكوافير والمكياج


بس ياريهام
مش فاكرة


يا في الموضوع هنا او في موضوع تاني


اها


اه
افتكرت

كان في مشرفة في الركن هنا اسمها غرام
هي

من مدينة نصر

راحت له وما عجبهاش شغله خالص صالح سليم اللي هو في مصر الجديدة عند كلية البنات

وعملت في كوافير عند السراج
راح له فندق كتراكت بيراميدز وطلب 1200

وفاصلته ووصلتهم ل 700


بس بتقول لي كان تحفة وحلو اوي

انما قالت لي ان صالح سليم مش اد كده

برضوا انتي شوفيه
هي راحت يوم من الظهر
وشافت العرايس اللي بتطلع منه عنده

وانتي ان شاء الله ربنا معاكي



امل عادل

فينك يا بنتي من زمان
ان شاء الله يا امل ربنا معاكي وفي البيت يوافقو ع العريس

بس اهم حاجة انتي صممي علي رايك

وما تتنازليش عنه
وصممي علي قراراك

وربنا يهديكي في النهاية للصالح يارب



وعلي فكرة يا بنات
بالنسبة للجيرب

في محل شيك اوي اوي
في المهندسين

بس مش فاكرا اسمه اوي

ولا مكانه:shy:

بس هو في المهندسين
قبل شارع جزيرة العرب بل نادي الصيد

شفته وانا راكبة التاكسي


بس شيك اوي اوي تحفة:up:

وشوفوا في الموقع ده


موقع لكل المحلات اللي فيها كل حاجة تخص الفرح للعرايس في مصر
فيه افضل محلات للجيرب في مصر


تدوسوا في الشمال علي
decoration
وبعدين

flower

وبعدين هتلاقي اسماء كل المحلات اللي بتعمل جيرب في مصر
بس طبعا الحاجات اللي هي التوب الغالية وبس

بس اعتقد الجيرب مهما غلي مش هيكون جامد سعره اوي يعني


بس ياتري يا بنات الجيرب سعره بيكون في حدودو كام؟؟؟

وكمان المصور اللي بيجي لك الفرح؟؟؟؟؟