كل يوم هنتكلم عن موضوع جديد خاص بصحه طفلك

الكحه فى الاطفال






طبعا الكحه دى خط دفاع طبيعى للجسم عن طريقه بيطرد اى بكتيريا او فيروسات او اتربه من الممرات الهوائيه و بكده بيسهل التنفس

اول حاجه هنعرفها




ايه هيا اسباب الكحه؟؟؟؟؟؟؟؟؟؟؟؟؟؟؟



االكحه ممكن تكون عرض لامراض كتيرة


ممكن تكون مصاحبه لدور البرد العادى


او يكون سببها التهاب شعبى او التهاب رئوى


و ممكن تكون لمجرد ان الطفل شم اتربه او دخان سيجارة او حتى برفان


او ممكن تكون بسبب الهوا البارد او الهوا السخن


و فى طبعا اسباب تانيه كتيرة للكحه زى
حساسيه الصدر و دى بتسبب كحه مزمنه بتكون مصاحبه مع صعوبه فى التنفس


و امراض القلب



و فى اسباب تانيه للكحه المزمنه


زى افرازات الانف الخلفيه اللى بتبقى عند الطفل اللى بيعانى من حساسيه الانف او التهاب الجيوب الانفيه


الافرزات دى بتسبب الكحه و خصوصا باليل لما الطفل بييجى ينام

و كمان الطفل الى بيعانى من ارتجاع المرىء(reflux) ممكن يكون عنده كحه


فى سبب تانى للكحه :


ان ممكن يكون الطفل بلع حاجه و قفت فى زورة
و دى بتعرفيها بانك بتلاقى ابنك فجاه بيكح كحه متواصله
و مش قادر ياخد نفسه او يطلع صوت
و ممكن تلاقى لونه ازرق
طبعا بسرعه تروحى شايلاه و ميلاه على قدام و تخبطى على ظهرةو انتى حاطه ايدك على صدرة


و لو الحاجه دى منزلتش بسرعه تاخديه على اقرب مستشفى


هيا ايه انواع الكحه؟




الكحه ممكن تكون ناشفه و بتلاقى ليها صوت حاد
وممكن تكون كحه ببلغم
طبعا لازم نبقى عارفين الفرق بينهم
ليه؟
عشان علاجهم مختلف تماما
يعنى فى الكحه الناشفه : بيكون العلاج اننا بندى ادويه تقلل الكحه عشان متاذيش الممرات الهوائيه
ولانها بتبقى متعبه جدا للطفل

اما فى الكحه ببلغم
العلاج بتبقى ادويه تدوب البلغم و تزود الكحه عشان تساعد الطفل انه يطرد المخاط لبره

نيجى بقى للعلاج

اول حاجه زى متفقنا ان الكحه دى عرض و ليس مرض
يعنى ايه؟


يعنى لازم نعالج الاول السبب و كده كده الكحه هتاخد وقتها و تروح
حتى لو طولت لاسبوع او اسبوعين
اهم حاجه فى العلاج اننا نعالج السبب



بس فى حاجه تانيه لازم نتفق عليها
متديش ابدا دوا كحه من نسك لازم الاول تستشيرى الدكتور

عشان زى مقولنا يحدد السبب و يديكى العلاج المناسب

ممكن تساعدى طفلك بفى الكحه اللى ببلغم انك تشربيه ميه كتير على قد متقدرى لان الميه هى افضل مذيب للبلغم

زودى من العصاير اللى فيها فيتامين c زى الجوافه و البرتقال

شربيه سوايل دافيه زى الينسون و الكراويه




و بكده خلصت ولو حد عنده اى استفسار انا موجودة

و سؤال الحلقه

بتعملى ايه لما طفلك بيجيله كحه؟
هل بتوديه لدكتور ولا بتديله علاج من نفسك ؟
و كل واحده ابنها جاله دور كحه قبل كده تقولنا الدكتور قالها ايه و ايه الدوا اللى وصفهلهاظ

ياريت يا ام سيمو تتكلمي عن موضوع الحساسية و عايزة اعرف لو الاب جتله الحساسية على كبر هل الطفل ممكن يورثها منه و امه معندهاش حساسية

بجد ترتيبك وطريقتك في سرد الكلام والصور حتي وكله كله حلو جدا ما شاء الله

بليز بقي عايزاكي تقوليلي حاجة للاسهال عشان جوجو عندها اسهال النهاردة فجأة كده، وخلتني اغيرلها هدومها كلها مرتين، مع انه نفس الاكل اللي بتاكله عادي كل يوم، يعني مش من الاكل ومظنش انه برد بردو لأني بدفيها كويس وبردو زي كل يوم، وهو مكنش من ساعة ما صحيت لأ ده في نص اليوم كده مرتين ولسه معرفش فيه تاني ولا خلاص، بس عايزة الحق اديها حاجة تمسك شوية عشان مش تبهدل الدنيا.

dandona om jou;14247395:
ياريت يا ام سيمو تتكلمي عن موضوع الحساسية و عايزة اعرف لو الاب جتله الحساسية على كبر هل الطفل ممكن يورثها منه و امه معندهاش حساسية

ان شاء الله يا دندونه اتكلم عليه

CuTie KaTkOoTa;14249510:
بجد ترتيبك وطريقتك في سرد الكلام والصور حتي وكله كله حلو جدا ما شاء الله

بليز بقي عايزاكي تقوليلي حاجة للاسهال عشان جوجو عندها اسهال النهاردة فجأة كده، وخلتني اغيرلها هدومها كلها مرتين، مع انه نفس الاكل اللي بتاكله عادي كل يوم، يعني مش من الاكل ومظنش انه برد بردو لأني بدفيها كويس وبردو زي كل يوم، وهو مكنش من ساعة ما صحيت لأ ده في نص اليوم كده مرتين ولسه معرفش فيه تاني ولا خلاص، بس عايزة الحق اديها حاجة تمسك شوية عشان مش تبهدل الدنيا.

تسلمى يا ايمى يا قمر
الف سلامه على جوجو حبيبتى
ان شاء الله متعملش اسهال تانى بصى اديها رز مسلوق
جزر
بطاطس مهروسه
موز تفاح
وابعدى عن الحاجات المسكرة والبرتقال و الكوسه

لو عايزة دوا ممكن تديها
antinaL SUSP
او KAPECT
مع انى مش بحب ادويه الاسهال

OM SIMO;14249815:

تسلمى يا ايمى يا قمر
الف سلامه على جوجو حبيبتى
ان شاء الله متعملش اسهال تانى بصى اديها رز مسلوق
جزر
بطاطس مهروسه
موز تفاح
وابعدى عن الحاجات المسكرة والبرتقال و الكوسه

لو عايزة دوا ممكن تديها
antinaL SUSP
او KAPECT
مع انى مش بحب ادويه الاسهال

الله يسلمك، اه صح هي عندها انتينال فعلا انا نسياه، والرز موجود والموز متاحيين دلوقتي ، ربنا يخليكي يارب يعملوا نتيجة سريعة بقي

CuTie KaTkOoTa;14249880:
الله يسلمك، اه صح هي عندها انتينال فعلا انا نسياه، والرز موجود والموز متاحيين دلوقتي ، ربنا يخليكي يارب يعملوا نتيجة سريعة بقي

ان شاء الله يجيبو نتيجه والدور ميطولش

ام سيمو جزاك الله خيرا بجد الموضوع اكتر من رائع
انا جودى عندى مشكله معاها اننا الجو برررد جدااا الحرارة تحت الصفر و هى دايما ايديها ورجليها زرررررق على طووول و تلج حتى بلبسها شرابين بردوو تلج و الجوانتى طبعا بتشيله و تحطه فى بوقها و احنا فى الشقة نظام التدفئة مش كويس كمان فالموضوع ده طول الوقت و كمان طالعلها فى رجليها كده فى القصبة زى جفاااف جلد جامد لدرجة انو عامل تعاوير و الجلد كده زى قشر السمك كده شوية و بحطلها من كريم بتاع الدايبرز و بيبى اويل بس مفيش فايددة انا قلقانة و كمان فى بطن رجلها من كتمة الشراب بتطلعلها زى بقع حمرا صغيرة كده ده ايه بقى

OM SIMO;14246599:
حبيبتى الف سلامه عليها
هيا اكيد طبعا ورثت منكو الحساسيه
بس ليه بتديها مضادات حيويه ملهاش اى دور فى حساسيه الانف
الا اذا كانت بتقلب معاها بعدوى بكتيريه و حرارتها بترتفع و كده

طبعا هيا لسه صغيره على انها تستعمل بخاخات للانف

حاولى بس تدفى المكان اللى بتبقى موجوده فيه كويس ومتعرضيهاش لتيارات هوا بارده
و شوفى ايه اللى بيسببلها الحساسيه و ابعديها عنه

وربنا يعافيها و يحميهالك يا قمر

مرسي يا ام سيمو على ردك هي فعلا كانت حرارتها بتزيد علشان كده الدكتور كتبلها مضاد حيوي ومرة كمان كان دوا الحساسيه ماجابش نتيجه معاها والافرازات كلها نزلت على صدرها والدكتور كان عايز حاجه تنشف الحاجات دي بسرعه علشان مايأثرش على صدرها
وانا والله محبوسه بيها مش عارفه اخرج ولا حاجه وبرده بتعيا الحمد لله على كل شيء

ليا سؤال معلش انا كنت عند الدكتور النهارده وقالي عندها احتقان في الزور وهي صوتها رايح كده حبه كتبلي على مضاد حيوي اسمه كيورام 5سم 3 مرات في اليوم ولما شفت النشرة بتاعة الدوا لقيت الجرعه دي بتاعه سن من سنتين لسبع سنين ومكتو ب مايتاخدش قبل 9شهور وهي عندها 6شهور مش عارفه بقى حاسه الجرعه كتيير اوي ولا ايه؟؟ يعني 15مللي في اليوم؟ ياريت تطمنيني:)

أم سيمو شكرا على موضوعك ابنى عنده كحة من يومين وكانت جامدة شوية المهم اتصلت بدكتورة مؤقتا عما نروح نكشف المهم قالت مفيش حرارة اديتنى دوا اعشاب اسمه prospan وكمان مع المحلول الملحي واستمريت عليهم والحمد لله الكحة خفت شوية بس صدره فيه خرفشة جامدة هوا دا بلغم صح ... ان شاء الله معادنا بكرة فى المستشفى فحص كامل ... انا اديته امبارح ينسون مع الدوا وربنا يشفيه يارب ... وبجد اسلوبك فى الكلام جميل ومعلش هطلب منك تتكلمي عن الأكل لان انا محتارة ومستمرة فى سيريلاك الرز والبسكوت وبس مش عارفه ادخل ايه تانى وكل اللى بجيبه مكتوب عليه من 4 شهور

ماشاء الله اللهم بارك
وحشتينى والله ياام سيمو وانا ماكنتش بدخل الايام اللى فاتت بس جيت لقيت مواضيع جامدة ومفيدة جدا يارب ماتشوفى شر ابدا ف سيمو القمر
طرحك رائع جدا ودايما بقول بتوجزى وتوفى فعلا ماشاء الله ربنا يريح قلبك

اما بالنسبة للواجب ههههههههههههههه بس بجد فكرة هايله ومختلفه وحلوة طرح الاسئلة ف ااخر الموضوع
و سؤال الحلقه

بتعملى ايه لما طفلك بيجيله كحه؟
هل بتوديه لدكتور ولا بتديله علاج من نفسك ؟
و كل واحده ابنها جاله دور كحه قبل كده تقولنا الدكتور قالها ايه و ايه الدوا اللى وصفهلهاظ

لما بتيجى بنتى كحة بشوف نوعها زى ماانتى قلتى وبلاقيها ناشفه بحاول اشربها سوايل غصب عنها ههههههههه لانها مش بتحب السوايل ابدا معرفش ليه؟؟واحاول ادفيها وابعدها عن تيارات الهوا سواء سخن او بارد وبغير الملايات على طول واكياس المخده واهوى الاوضه والشمس طالعة وبشربها مية
بتهيالى بس كده لانى مش محبذة الادويه نهائى خالص الا لو قدر الله حاجه زادت عن حدها

لو زادت بقى وببلغم وكده لازم اوديها للدكتور مااديش اى حاجة من نفسى خالص حتى لو ايه؟ولازم اعرف نوع الدوا وبدى الدوا اللى بعيد عن المضادات الحيويه الجامده طبعا بعد راى الدكتور وبدعى هههههههههه ان ربنا يشفيها وبس كده

وبصراحة ماصادفش انى رحت لدكتور ف كحة الحمد لله ربنا يحفظ ولادنا من كل شر

Bossy22;14250882:
ام سيمو جزاك الله خيرا بجد الموضوع اكتر من رائع
انا جودى عندى مشكله معاها اننا الجو برررد جدااا الحرارة تحت الصفر و هى دايما ايديها ورجليها زرررررق على طووول و تلج حتى بلبسها شرابين بردوو تلج و الجوانتى طبعا بتشيله و تحطه فى بوقها و احنا فى الشقة نظام التدفئة مش كويس كمان فالموضوع ده طول الوقت و كمان طالعلها فى رجليها كده فى القصبة زى جفاااف جلد جامد لدرجة انو عامل تعاوير و الجلد كده زى قشر السمك كده شوية و بحطلها من كريم بتاع الدايبرز و بيبى اويل بس مفيش فايددة انا قلقانة و كمان فى بطن رجلها من كتمة الشراب بتطلعلها زى بقع حمرا صغيرة كده ده ايه بقى

طبعا كل ده بسبب البرد لان بشرة الطفل بتبقى حساسه جدا للتغيرات الجويه
التقشير و الزرقان كل دى لان بشره بنتك حساسه للجو البارد
اهم حاجه انك تدفيها كويس اوى على قد متقدرى
و استمرى كل يوم على ترطيب بشرتها بلوشن مرطب زى جونسون او سيباميد
و بعد متحميها ادهنيلها ببيبى اويل بس اللى من غير روايح
خليكى على كده طول فترة البرد

رجائي رضا ربــــي;14252602:
أم سيمو شكرا على موضوعك ابنى عنده كحة من يومين وكانت جامدة شوية المهم اتصلت بدكتورة مؤقتا عما نروح نكشف المهم قالت مفيش حرارة اديتنى دوا اعشاب اسمه prospan وكمان مع المحلول الملحي واستمريت عليهم والحمد لله الكحة خفت شوية بس صدره فيه خرفشة جامدة هوا دا بلغم صح ... ان شاء الله معادنا بكرة فى المستشفى فحص كامل ... انا اديته امبارح ينسون مع الدوا وربنا يشفيه يارب ... وبجد اسلوبك فى الكلام جميل ومعلش هطلب منك تتكلمي عن الأكل لان انا محتارة ومستمرة فى سيريلاك الرز والبسكوت وبس مش عارفه ادخل ايه تانى وكل اللى بجيبه مكتوب عليه من 4 شهور

ال بروسبان كويس اوى لان تركيبته اعشاب
معلش الخرفشه دى بتستمر فترة بعد دور الكحه متخافيش هى شويه وقت وهتروح اهم حاجه تشربيه ميه و سوايل دافيه
بالنسبه للاكل انا اتكلمت عنه قبل كده بالتفصيل فرى كده فى الموضوع هتلاقيه :):)
ولو عندك اى استفسار او لقيتى حاجه انا متكلمتش فيها قوليلى يا قمر
والف سلامه على عيسى

مرسي يا ام سيمو على ردك هي فعلا كانت حرارتها بتزيد علشان كده الدكتور كتبلها مضاد حيوي ومرة كمان كان دوا الحساسيه ماجابش نتيجه معاها والافرازات كلها نزلت على صدرها والدكتور كان عايز حاجه تنشف الحاجات دي بسرعه علشان مايأثرش على صدرها
وانا والله محبوسه بيها مش عارفه اخرج ولا حاجه وبرده بتعيا الحمد لله على كل شيء

ليا سؤال معلش انا كنت عند الدكتور النهارده وقالي عندها احتقان في الزور وهي صوتها رايح كده حبه كتبلي على مضاد حيوي اسمه كيورام 5سم 3 مرات في اليوم ولما شفت النشرة بتاعة الدوا لقيت الجرعه دي بتاعه سن من سنتين لسبع سنين ومكتو ب مايتاخدش قبل 9شهور وهي عندها 6شهور مش عارفه بقى حاسه الجرعه كتيير اوي ولا ايه؟؟ يعني 15مللي في اليوم؟ ياريت تطمنيني

لا اطمنى يا جميل الجرعه كده مظبوطه 5 سم كل 8 ساعات
لتركيز curam 156
و على فكرة مش كل اللى بيبقى مكتوب فى النشرة بيبقى مظبوط
هتلاقى اصلا فى ادويه مكتوب عليها بعد 6 سنين و هى بتستخدم قبل كده عادى


والف سلامه على بنوتك القمر ربنا يحميهالك و يشفيها يا رب

@زهرة دبلانة@;14254673:
ماشاء الله اللهم بارك
وحشتينى والله ياام سيمو وانا ماكنتش بدخل الايام اللى فاتت بس جيت لقيت مواضيع جامدة ومفيدة جدا يارب ماتشوفى شر ابدا ف سيمو القمر
طرحك رائع جدا ودايما بقول بتوجزى وتوفى فعلا ماشاء الله ربنا يريح قلبك

اما بالنسبة للواجب ههههههههههههههه بس بجد فكرة هايله ومختلفه وحلوة طرح الاسئلة ف ااخر الموضوع
و سؤال الحلقه

بتعملى ايه لما طفلك بيجيله كحه؟
هل بتوديه لدكتور ولا بتديله علاج من نفسك ؟
و كل واحده ابنها جاله دور كحه قبل كده تقولنا الدكتور قالها ايه و ايه الدوا اللى وصفهلهاظ

لما بتيجى بنتى كحة بشوف نوعها زى ماانتى قلتى وبلاقيها ناشفه بحاول اشربها سوايل غصب عنها ههههههههه لانها مش بتحب السوايل ابدا معرفش ليه؟؟واحاول ادفيها وابعدها عن تيارات الهوا سواء سخن او بارد وبغير الملايات على طول واكياس المخده واهوى الاوضه والشمس طالعة وبشربها مية
بتهيالى بس كده لانى مش محبذة الادويه نهائى خالص الا لو قدر الله حاجه زادت عن حدها

لو زادت بقى وببلغم وكده لازم اوديها للدكتور مااديش اى حاجة من نفسى خالص حتى لو ايه؟ولازم اعرف نوع الدوا وبدى الدوا اللى بعيد عن المضادات الحيويه الجامده طبعا بعد راى الدكتور وبدعى هههههههههه ان ربنا يشفيها وبس كده

وبصراحة ماصادفش انى رحت لدكتور ف كحة الحمد لله ربنا يحفظ ولادنا من كل شر

وانتى والله يا رورو وحشتينى و والله كنت لسه على بالى بقول مبقتش اشوفك

و شطورة انتى الوحيده اللى عملتى الواجب:thumbs_up::thumbs_up::thumbs_up:

و ربنا يبعد عنها كل شر و متروحيش ابدا لدكتور

ام سيمو معلش انا مكنش اصدي حساسية هو جوزي عنده جيوب انفية طبعا انتي عارفة وقتها بيكون امته وقت بداية الشتا لما يكون في حاجة ريحتها جامدة اوي و في اوقات تانية كمان بس الصراحة مش فاكرة بس هيا جتله على كبر عايزة اعرف ممكن الطفل يورثها دي و لا ايه الوضع

ام سيمو دلوقتي انا ان شاء الله يوسف هيتم الخامس ان شاء الله و يبدأ في السادس اعمله اكل ايه و عصاير ايه و شرب ايه عايزة اعرف بالتفصيل الممل بالله عليكي يا حبيبتي

dandona om jou;14258120:
ام سيمو معلش انا مكنش اصدي حساسية هو جوزي عنده جيوب انفية طبعا انتي عارفة وقتها بيكون امته وقت بداية الشتا لما يكون في حاجة ريحتها جامدة اوي و في اوقات تانية كمان بس الصراحة مش فاكرة بس هيا جتله على كبر عايزة اعرف ممكن الطفل يورثها دي و لا ايه الوضع

ام سيمو دلوقتي انا ان شاء الله يوسف هيتم الخامس ان شاء الله و يبدأ في السادس اعمله اكل ايه و عصاير ايه و شرب ايه عايزة اعرف بالتفصيل الممل بالله عليكي يا حبيبتي

بصى يا دودو فى فرق بين حساسيه الانف و التهاب الجيوب الانفيه
التهاب الجيوب الانفيه ممكن يكون بسبب الحساسيه و ممكن يكون ليه اسباب تانيه كتير
لو جوزك عنده حساسيه الانف ممكن يورثها لابنك بس الاحتمال اقل لانك انتى مش عندك
ان شاء الله ربنا يعافيه
ابنك هيتم 5 شهور يبقى زى مانتى مش هتزودى حاجه فى الاكل و متزوديش عن وجبه واحده فى اليوم زى متفقنا
لما يتم ان شاء الله 6 شهور تبداى تدخلى صفار البيض و الجبنه المثلثات
نفس الحاجات اللى بتاكليهاله دلوقتى زى مقولنا قبل كده يا قمر

لين العظام فى الاطفال


طبعا من الامراض الاكتر شيوعا فى السنين الاولى فى عمر الاطفال
و من اكتر اسباب المرض ده
نقص فيتامين د
طيب هو احنا ليه بنحتاج فيتامين د؟


لانه ضرورى لامتصاص الكالسيوم و بالتالى من غيرة الجسم مش هيمتص
الكالسيوم و هيعانى من اعراض نقص الكالسيوم

فيتامين د بيبقى موجود فى الجسم فى صورة غير نشطه تحت الجلد


و لما الجسم بيتعرض لاشعه الشمس بيتحول للصورة النشطه



ازاى اعرف ان ابنى بيعانى من نقص الكالسيوم؟

فى اعراض كتير للمرض ده منها حاله ضعف عام فى الجسم
و تغيرات فى العظام زى



النتوئات اللى بتبقى فى نهايه العظام الطويله زى اللى فى مفصل الرسغ و القدم


النتوءات اللى بتبقى موجوده فى القفص الصدرى






البروز اللى بيبقى فى مقدمه الراس
وممكن تلاقى محيط الراس نفسه كبير
و الفتحه اللى بتبقى فى الجمجمه من قدام بتبقى واسعه و بتتاخر فى القفل و الطبيعى انها بتقفل بالكتير عند سنه ونص


فى اعراض تانيه زى تاخر الجلوس و المشى وتاخر ظهور الاسنان



لو تجاهلنا العلاج المرض ده بيودى ان العظام تبقى هشه وبالتالى هتبقى معرضه للتشوهات و التقوس و الكسور



لو شكيتى فى اى عرض من الاعراض دى هتحتاجى تعملى فحوصات عشان تتاكدى
من الفحوصات دى:


نسبه الكالسيوم و الفسفور فى الجسم بتقل
و الالكالين فوسفاتيز بيزيد
ممكن تحتاجى اشعه


الوقايه؟


طبعا اهم حاجه فى الوقايه انى اوفر للطفل احتياجه من فيتامين د


و لان الطفل اللى بيبقى معتمد اعتماد كلى على لبن الام بيقى اكتر عرضه
لان لبن الام بيبقى فيه كميات قليله جدا من فيتامين د

عشان كد لازم اوفرهوله طب ازاى؟

اول حاجه انى اعرض ايديه و رجليه لاشعه الشمس ربع ساعه كل يوم قبل الساعه 12 او بعد الساعه 4




اهتم بالاكلات الغنيه بالكالسيوم و فيتامين د
زى الاسماك و الالبان والبيض و اللحمه و الكبده
طبعا مع مراعاه الاكلات المناسبه لكل سن





طيب انا معنديش وقت انى اعرضه للشمس


او انا بيتى مبيدخلوش شمس


فى الحاله دى هتحتاجى تديله جرعه وقائيه



من فيتامين د يوميا








طيب لو فعلا الطفل عنده لين عظام هتحتاجى تتابعى مع دكتور عشان يحددلك الجرعه العلاجيه



و غالبا بيتم الشفاء فى حدود اسبوعين او شهر بالكتير




و سؤال الحلقه
هل انتى مواظبه على تعريض طفلك للشمس
و لا مكتفيه بالفيتامين
و لا مش بتعملى الاتنين

انا للاسف شقتى مفهاش بلكون وكمان الشمس مبتدخلهاش فعشان كده بديلة فيدروب ومواظبة عليه
تسلمى ياقمر على الموضوع المهم والمفيد

شكرا يا أم سيمو انك اتكلمتى عن فيتامين د لانى كنت لسه هقولك عليه سبحان الله :)
أول لما ولدت عيسى كانت الرضاعة طبيعي دكتورة فى المستشفى كتبتلى فيتامينات ليه من ضمنها كان فيتامين د وبعد ما دخلت الصناعى وقفته لان الصناعى فيه فيتامين دال والحمد لله الشمس بتدخل للبيت وبعرضه ليها بس بيكون لابس هدوم بكم وبطلون هوا لازم يكون مكشوف ؟

طيب دلوقتى الجو فى دبى قلب خالص والشمس مبتظهرش أصلا أعمل ايه؟ هل الفيتامين فى اللبن الصناعى يكفي ؟

انا رحت النهارده للكشف على عيسى والحمد لله مطلعش حاجة فى صدره بس الدكتور قالى حافظى من الاتربة والعطور وكدا عشان لا قدر الله متنزلش على صدره وعملوله شفط لمناخيره وقالي استمر على البروسبان 4 ايام كمان ,,, الحمد لله

طيب معلش يا أم سيمو هطول عليكي لما أسلق الخضار فى تكون فى ميه ولا شوربة طيب لو شوربة ويكون فيها بهارات مش هيكون غلط ؟ ^o)

OM SIMO;14254787:

لا اطمنى يا جميل الجرعه كده مظبوطه 5 سم كل 8 ساعات
لتركيز curam 156
و على فكرة مش كل اللى بيبقى مكتوب فى النشرة بيبقى مظبوط
هتلاقى اصلا فى ادويه مكتوب عليها بعد 6 سنين و هى بتستخدم قبل كده عادى


والف سلامه على بنوتك القمر ربنا يحميهالك و يشفيها يا رب

شكرا يا ام سيمو طمنتيني والله الحمد لله :)وشكرا على الدعوة الجميله دي ولك مثلها يارب

جزاكي الله كل خير يا أم سيمو.. دلوقتي أنا شقتي مش بيدخل شمس مباشرة كده خالص.. قلت للدكتورة تكتب لآدم فيتامينات قالت هو بيعرق كثير قلتلها لا قالت خلاص مش محتاج فيتامينات لأن فيه علامات معينة بتقول انه محتاج فيتامين هو كده كويس.. هو دلوقتي بيرضع طبيعي بس الحمدلله أعمل ايه معاه اجيب من نفسي وأديله ولا ايه؟

Bossy22 ام سيمو جزاك الله خيرا بجد الموضوع اكتر من رائع
انا جودى عندى مشكله معاها اننا الجو برررد جدااا الحرارة تحت الصفر و هى دايما ايديها ورجليها زرررررق على طووول و تلج حتى بلبسها شرابين بردوو تلج و الجوانتى طبعا بتشيله و تحطه فى بوقها و احنا فى الشقة نظام التدفئة مش كويس كمان فالموضوع ده طول الوقت و كمان طالعلها فى رجليها كده فى القصبة زى جفاااف جلد جامد لدرجة انو عامل تعاوير و الجلد كده زى قشر السمك كده شوية و بحطلها من كريم بتاع الدايبرز و بيبى اويل بس مفيش فايددة انا قلقانة و كمان فى بطن رجلها من كتمة الشراب بتطلعلها زى بقع حمرا صغيرة كده ده ايه بقى

بوسي جربى لوشن موستيلا أكتر من رائع فيه منه شاور جل ولوشن هوا مستورد وصنعه فرنسا

ام سيمو جزاكى الله كل خير انا فعلا والله كن في بنوته قدامى ف مكان ما ربنا يعافيها ويعافينا رجليها كانت مقوسه زى الولد الى انتى حطاه وكنت محتاجه اعرف من ايه وافادتيني بجد

انا بدى ل تايا فيدروب ده الدكتور قالى اديلها 6 نقط بعد سن شهرين ولحد دلوأتى بديهولها

ويا بوسي انا الدكتو ر كتبهولى من غير ما يسألنى بتعرق ولا لا لان تايا ف اغلب الاوقات مبتعرقش بتعرق ف اوقات معينه وعرق غير ملحوظ

والدكتور ادالى كمان حديد اسمو هيدروفيرين بديلها نص قطاره بس موقفاه شويه حاليا عشان عاملها امساك

وبالنسبه للشمس ف حماتى فوقي وعندها شمس لما بتيح الفرصه ليها بتاخدها تعرضها للشمس بصراحة الفرصه بقي انها تصحي بدرى وده غالبا مبيحصلش لانها مبتنامش بدرى :D

وبردو عشان الشتا ومفيش شمس اليومين دول والجو تلللج

ف مش موافقنى الفتره دى