كل يوم هنتكلم عن موضوع جديد خاص بصحه طفلك

dandona om jou;14205861:
طيب اقدر اكله اكل ايه تاني البطاطس اخليه ياكلها ازاي اصلي خايفة احطها مع الجزر يمسكوا بطنوا هما الاتنين و التفاح متقبلوش عصير مش عارفة الكمثرى بردو اعملها في الخلاط و بعدين اصفيها و خلاص ينفع عصير جزر و لا عصاير ايه تاني نتفعله دلوقتي ان شاء الله

لا عادى يا دوندون البطاطس حطيها مع الجزر و الكوسه متخافيش
الكمثرى اسلقيها الاول شويه و بعدين اضربيها فى الخلاط
العصاير عندك الجوافقه و الرمان بس خففيه
و ينفع عصير جزر مينفعش ليه؟



[QUOTE=melomemo;14206723]
[/QUOTE

ميرسى يا ميمو يا قمر
و جزاكى الله خيرا على ردك

بسم الله الرحمن الرحيم
موضوعنا انهارده ان شاء الله عن
الحساسيه فى الاطفال



يعنى ايه حساسيه؟

يعنى ان الجسم يتعرف على ماده معينه على انها ماده غريبه او ضاره للجسم
فيكون ضده اجسام مضاده و يفرز ماده الهيستامين

هيا دى اللى تعمل اعراض الحساسيه
الماده اللى بتسبب الحساسيه دى ممكن يتعرضلها الجسم عن طرق كتير
اللمش او الشم او البلع او الحقن

ايه اكتر الحاجات اللى ممكن تسبب الحساسيه؟
الاتربه و الحشرات و فرو الحيوانات
ممكن الحساسيه تبقى فى الجهاز التنفسى زى حساسيه الانف

ممكن تكون فى الجلد زى الاكزيما
وممكن تكون فى الجهاز الهضمى زى حساسيه الاطعمه
ولو الحاله جامده ممكن لاقدر الله يسبب صعوبه فى التنفس و اختناق
ودى بتبقى حاله خطيرة لازم تروح المستشفى


الاكزيما(حساسيه الجلد)


ايه هيا الاكزيما؟


مرض جلدى بيظهر فى الاطفال وخصوصا اللى عندهم تاريخ مرضى فى العيله

ممكن يبقى خفيف جدا مش محتاج اى علاج
وممكن يبقى جامد جدا

عبارة عن طفح جلدى بيظهر على جلد طفلك خصوصا فى الوجه
على خده و على قورته
و ساعات بينتشر لايديه و رجليه و كل جسمه

وكل ميكبر سن الطفل بيقل ظهورة فى الوجه

شكله عامل ازاى؟
بتبقى على هيئه بقع حمرا كبيرة و ناشفه وساعات مقشرة
ومصاحبه بحكه شديده

اسبابها ايه؟

لحد دلوقتى محدش يعرف سببها الرئيسى بس فى عوامل بتزوده
من اهمها جفاف الجلد
و هى مرض مش معدى الا اذا كانت مصاحبه بعدوى بكتيريه
و غالبا بتروح بتقدم عمر الطفل او عند البلوغ

ايه علاجها؟

طبعا متديش اى علاج من نفسك لازم تعرضيه على دكتور
لو كانت الحاله بسيطه و مجرد خشونه
غالبا بيبقى مش محتاج غير كريمات للترطيب

ولو الحاله كانت شديده بتحتاج لمراهم فيها كورتيزون
و ادويه مضاده للهيستامين

و فى بعض الحالات بتحتاج مضاد حيوى

اهم حاجه غسيل وجه الطفل بميه دافيه من غير صابون
ونقص ضوافره دايما عشان ميهرش فيها



حساسيه الطعام:


طبعا اكتر حاجه بنخاف منها لما ندخل اكل جديد للبيبى انه يسببله حساسيه

طيب ايه اعراض الحساسيه دى؟
طفح جلدى
التهاب فى الشفايف و اللسان
مغص
ترجيع
اسهال
وغالبا الاعراض دى بتظهر فى خلال ساعه
وخللى بالك ممكن طفلك يظهر فجاه حساسيه لحاجه حتى لو كان اكلها قبل كده

طيب ازاى اقدر اتفادى الحساسيه دى؟

انك لما تبتدلى تدخلى اكل جديد تبداى بكميه قليله و لمده 3 ايام
عشان لو ظهرت اى اعراض تعرفى ان الاكل ده هيسببله حساسيه و توقفيه
ممكن ترجعى تجربيه تانى بعد شهرين


ايه اكتر الاكلات اللى بتسبب الحساسيه؟

بياض البيض
اللبن البقرى
القمح




و مازال للموضوع بقيه

في انتظار البقية يا ام سيمو يا قمراية

موضوع الحساسية ده من أهم المواضيع فعلا.. جزاكي الله كل خير والميزان مش راضي يقيم حاجه رخمه..

~OM-ADAM~;14213609:
موضوع الحساسية ده من أهم المواضيع فعلا.. جزاكي الله كل خير والميزان مش راضي يقيم حاجه رخمه..

dandona om jou;14213572:
في انتظار البقية يا ام سيمو يا قمراية

تسلمو يا بنات

موضوع الحساسية ده مهم قوى بالنسبالى لان الدكتور بتاع دودى قالى انوا قابل للحساسية عن طريق الوراثه خصوصا ان ولاد عمه كلهم وعمته عندهم وعنده بوادر ليها فربنا يستر عشان كده ياريت تكمليه وربنا يجعله دايما فى ميزان حساناتك

sally2007;14219122:
موضوع الحساسية ده مهم قوى بالنسبالى لان الدكتور بتاع دودى قالى انوا قابل للحساسية عن طريق الوراثه خصوصا ان ولاد عمه كلهم وعمته عندهم وعنده بوادر ليها فربنا يستر عشان كده ياريت تكمليه وربنا يجعله دايما فى ميزان حساناتك

ربنا يسلمه و يعافيه ان شاء الله يا سالى
انا كمان عندنا الحساسيه دى وراثه فى العيله انا و جوزى عندنا حساسيه فى الانف و و اكتر عيلتنا كده
ربنا يعافى ولادنا ان شاء الله
انا هكمل الموضوع و هتكلم باذن الله عن حساسيه الانف و الصدر

هنكمل كلامنا عن موضوع الحساسيه



حساسيه الانف


















حساسيه الانف من اكتر انواع الحساسيه انتشارا
و اعراضها بتبقى قريبه قوى من اعراض دور البرد
و على فكرة الطفل اللى بيصاب باكزيما جلديه و هو صغير بيكون عرضه اكتر انه يصاب بحساسيه الانف لما يكبر
و طبعا الوراثه ليها دور كبير جدا
يعنى لو الاب و الام عندهم حساسيه بتزود فرصه اصابه الطفل بالحساسيه






ايه اعراضها؟






بتلاقى الطفل دايما بيعطس و عنده رشح و مناخيرة مسدوده



و يحس باكلان فى مناخيرة و زورة و ساعات عينه


ممكن يصاحب الاعراض دى احمرار فى العين و دموع


وساعات بيسبب كحه خصوصا فى الليل


ممكن يكون الطفل بيشخر بالليل و فاتح بقه



ممكن الاعراض دى تكون موجوده طول السنه و ممكن تبقى فى اوقات معينه كل سنه و خاصه فصل الربيع او الشتا


و لو بصيتى ع الغشاء المخاطى داخل الانف هتلاقيه لون مزرق


و على فكرة مش كل اللى عنده حساسيه فى الانف بيكون عنده كل الاعراض دى
لا ممكن يكون عنده حساسيه على خفيف متحسيش بيها

طيب ايه العلاج؟






اهم حاجه انك تبعديه عن الحاجات اللى بتعمله الحساسيه زى الاتربه و فرو الحيوانات و الادخنه


مضادات الهيستامين بتساعد فى تحسن العراض


بعض الادويه القابضه للاوعيه الدمويه فى الانف


و فى حالات بتتعالج بكورتيزون سواء كان عن طريق الفم او بخاخ موضعى

CuTie KaTkOoTa;14194304:
:adore::adore::adore: هييييه بتبسط اوي لما حد يشكر في الدكتور ده لأني بجد بشوفه محترم وذوق وكويس وشاطر وطيوب اوي واحلي حاجة عندي واهم حاجة انه بيعرف يتعامل مع الاطفال بجد حلو جدااااااااااااا، غيره دكاترة كبار وقدام وزي الزفت عشانانا مخنوقة من واحد رحتله قبل كده في الاول خالص.

متشكرين قوى ياام سيمو انا فعلا ابنى على طول عينة بتاكله وبيحاول يهرش مناخيرة ومزكم اغلب الوقت ودايما مناخيرة بتنزل ماية فاهمة قصدى فل كده يبقى عنده حساسية ولا لا؟

بسكوتة حبيبي;14224477:

حبيبتي ممكن بعد إذنك تبعتيلي اسم الدكتور ورقمه على الخاص لحسن أنا دايخة على دكتور أطفال كويس لغاية ما فقدت الأمل خلاااااص

أم سيمو ربنا يبارك فيك يارب ويحفظلك بنتك وييسر لك دراستك يارب

حاضر يا جميلة، بس خللي بالك هو مش عيادة دي مستشفي تبارك فرع عين شمس، انتي ممكن تيجي هناك ولا بعيدة عليكي؟

قوليلي لو كده ابعتلك نمرته ونمرة المستشفي بردو

ربنا يجعل الموضوع الجميل ده فى ميزان حسناتك يا ا سيمو

حور كملت الـ 8 شهور ومش بتحبى ولا طلعت سنان و وزنها 7 كيلو ممكن تطمنينى عليها
وبالنسبه للفيتامين" بيديكال" بصراحه بستمر عليه كام يوم كده وبعد كده بنسى هو كده غلط؟؟؟

CuTie KaTkOoTa;14227449:
حاضر يا جميلة، بس خللي بالك هو مش عيادة دي مستشفي تبارك فرع عين شمس، انتي ممكن تيجي هناك ولا بعيدة عليكي؟

قوليلي لو كده ابعتلك نمرته ونمرة المستشفي بردو

موضوع الحساسيه ده مهم فعلا انا بنتي عندها 6شهور ومن قبل ماتكمل الاربع شهور يعني من اول الشتا كده هي مناخيرها مخنفره جامد وفيها افرازات كتير جدا بعملها بالشفاط وبستغرب بجد من كم الحاجات اللي بتطلع وبقت بتشخر وهي نايمه بصوت عالي:( وبتقعد تدعك في مناخيرها وعنيها لما وشها يحمر المشكله ان لما مناخيرها بتعمل كده تاني يوم علطول الاقيها بتكح وصدرها بيخرفش كده والدكتور قالي ده صدرها هايبر اكتيف ويقعد معاها الدور شهر وتخف اسبوع وترجع من اول وجديد والدكتور خوفني وقالي كده غلط على صدرها خلصت ازايز فنستيل ومش محوق وخدت لبوس منوفلين ودوا فنتولين وفلو كالم ومضادات حيويه قد كده ومش بتخف من اول الشتا مش عارفه دي حساسيه ولا برد؟؟
مع العلم ان انا وباباها عندنا حساسيه الانف طول الشتا برده وبنستخدم بخاخه رينو كورت دي حتى كنت بستخدمها وانا حامل
ايه الحل بقى ولا هيا كل شتا هيحصلها كده؟؟

بسكوتة حبيبي;14235071:

طب يا حبيبتي هو مش بيروح فروع لتبارك تانية أنا ساكنة في مصر الجديدة بس مفيش مشكلة أروح لعين شمس لو هو مش بيروح فروع تانية
بس أنا كنت عايزة أسألك انت كنت بتابعي معاه وجوجو لسه مولودة أصل أنا متهيألي لازم يبقى للبيبي فايل عند الدكتور عشان الوزن والتطعيمات وكده
على العموم يا حبيبتي ابعتيلي اسمه وهقول لجوزي عليه
وجزاك الله خيراً معلش تعبتك معايا

بعتلك خلاص يا جميلة

هي أم سيمو فين مش باينه؟ دلوقتي يا قمرات آدم له كام يوم طول الوقت قاعد يعيط و يزن ولازم اشيله وألف بيه في الشقة علشان حاجه تشغله ويسكت ولو نام ع رجلي وجيت احطه في سريره يصحي يعيط وكده طول اليوم مش عارفه ليه كل العياط ده

ازيكم يا بنات وحشتووووووووووونى اوى
انا اسفه جدا جدا انا كنت عند ماما اليومين اللى فاتو دول و لقيتهم قاطعين النت عشان كده مكنتش بدخل

sally2007;14226753:
متشكرين قوى ياام سيمو انا فعلا ابنى على طول عينة بتاكله وبيحاول يهرش مناخيرة ومزكم اغلب الوقت ودايما مناخيرة بتنزل ماية فاهمة قصدى فل كده يبقى عنده حساسية ولا لا؟

ايوة يا سالى الاعراض دى كلها اعراض حساسيه
ممكن فى الفتره دى تديله فنيستيل هيقلل الموضوع معاه شويه

katkooota_7aboooba ام حــور;14230018:
ربنا يجعل الموضوع الجميل ده فى ميزان حسناتك يا ا سيمو

حور كملت الـ 8 شهور ومش بتحبى ولا طلعت سنان و وزنها 7 كيلو ممكن تطمنينى عليها
وبالنسبه للفيتامين" بيديكال" بصراحه بستمر عليه كام يوم كده وبعد كده بنسى هو كده غلط؟؟؟

ربنا يخليكى يا ام حور
بنسبه لحور متقلقيش فى اطفال بيتاخرو فى التسنين عادى ممكن لحد سنه من غير قلق
و الحبو اصلا مش من مراحل النمو العصبى للطفل لان فى اصلا اطفال مش بتحبى بتمشى على طول
وان مشيتى تبع الكتاب هتلاقى مكتوب ان الحبو يبدا من تسع شهور

فمتقلقيش خالص يا قمر

و بعدين مستعجله على ايه بجد لما تحبى هتقولى يا ريتها فضلت قاعده فى مكانها:lol:
انا بنتى لسه باه من 3 ايام عدو عليا كانهم 3 سنين

بجد كارثه انا ماشيه وراها و مش بعمل اى حاجه تانيه غير انى براقبها

بالنسبه للبيديكال انتى اصلا ممكن تستغنى عنه لو انتى مواظبه على تعريضها للشمس كل يوم
و بتديها الاكل اللى فيه فيتامين د زى صفار البيض و الكبده

لو انتى مش بتعملى كده يبقى الافضل انك متنسيش تديها منه كل يوم
حطيه قدامك فى مكان تكونى بتقعدى فيه كل يوم عشان تفتكرى

بسبوسةميدو;14237918:
موضوع الحساسيه ده مهم فعلا انا بنتي عندها 6شهور ومن قبل ماتكمل الاربع شهور يعني من اول الشتا كده هي مناخيرها مخنفره جامد وفيها افرازات كتير جدا بعملها بالشفاط وبستغرب بجد من كم الحاجات اللي بتطلع وبقت بتشخر وهي نايمه بصوت عالي:( وبتقعد تدعك في مناخيرها وعنيها لما وشها يحمر المشكله ان لما مناخيرها بتعمل كده تاني يوم علطول الاقيها بتكح وصدرها بيخرفش كده والدكتور قالي ده صدرها هايبر اكتيف ويقعد معاها الدور شهر وتخف اسبوع وترجع من اول وجديد والدكتور خوفني وقالي كده غلط على صدرها خلصت ازايز فنستيل ومش محوق وخدت لبوس منوفلين ودوا فنتولين وفلو كالم ومضادات حيويه قد كده ومش بتخف من اول الشتا مش عارفه دي حساسيه ولا برد؟؟
مع العلم ان انا وباباها عندنا حساسيه الانف طول الشتا برده وبنستخدم بخاخه رينو كورت دي حتى كنت بستخدمها وانا حامل
ايه الحل بقى ولا هيا كل شتا هيحصلها كده؟؟

حبيبتى الف سلامه عليها
هيا اكيد طبعا ورثت منكو الحساسيه
بس ليه بتديها مضادات حيويه ملهاش اى دور فى حساسيه الانف
الا اذا كانت بتقلب معاها بعدوى بكتيريه و حرارتها بترتفع و كده

طبعا هيا لسه صغيره على انها تستعمل بخاخات للانف

حاولى بس تدفى المكان اللى بتبقى موجوده فيه كويس ومتعرضيهاش لتيارات هوا بارده
و شوفى ايه اللى بيسببلها الحساسيه و ابعديها عنه

وربنا يعافيها و يحميهالك يا قمر

~OM-ADAM~;14246139:
هي أم سيمو فين مش باينه؟ دلوقتي يا قمرات آدم له كام يوم طول الوقت قاعد يعيط و يزن ولازم اشيله وألف بيه في الشقة علشان حاجه تشغله ويسكت ولو نام ع رجلي وجيت احطه في سريره يصحي يعيط وكده طول اليوم مش عارفه ليه كل العياط ده

تسلميلى يا بوسى يا قمر على سؤالك عنى

انا للاسف كل سبت وحد مش هبقى موجوده عشان بروح لماما
و بعدين هو الواد ادم ده مدوخنا كده ليه مش هيبطل عياط بقى

لاحظيه كده يمكن تكون فىه حاجه وجعاه او مثلا لا قدر الله داخل على دور برد ولا عنده مغص
و اتاكدى انك مدفياه كويس
و خديه فلى حضنك لما يعيط و اقريله قران
على فكرة انا الايام دى برضه لما بنيم سما فى سريرها بتعيط بس لما باخدها فى حضنى و انيمها جنبى بتنام كويس
فقولت ممكن تكون بتبرد فى سريرها

صحيح يا ام سيمو تايا عماله ترجع لبن وتقشط كتير اوى مش عارفه لييه

M!ss Tuky;14246896:
صحيح يا ام سيمو تايا عماله ترجع لبن وتقشط كتير اوى مش عارفه لييه

بصى يا توكى فى اطفال بيبقى عندهم الصمام اللى مابين المعده و المرىء اللى بيمنع رجوع اللبن من المعده للمرىء لسه ضعيف مجمدش اوى
عشان كده دايما بيبقى عندهم ارتجاع ممكن تكون تايا كده
و دى حاجه عاديه اوى و الصمام ده بيجمد مع الوقت غالبا عد 6 شهور و فى بعض الاطفال بيطول عندهم لحد سنه
تابعى وزنها باستمرار لو معدل الزياده طبيعيه يبقى مفيش اى قلق
و اهتمى دايما انك بعد الرضاعه متنيميهاش على ظهرها
و لو عرفتى ترفعى السرير بتاعها شويه من عند الراس يبقى احلى

و اتاكدى انك مش بترضعيها زياده لان زباده لرضاعه بتسبب قشط كتير
لو لقيتى الموضوع عندها زياده عن اللزوم او وزنها بيتاثر فالاحسن توديها لدكتور





بنات انا كنت هكتب موضوع انهارده عن حساسيه الصدر استكمالا لموضوع الحساسيه
و بعدين رجعت فى كلامى
لان حساسيه الصدر منقدرش نشخصها قبل سنتين من العمر واحنا هنا كلنا اولادنا اقل من سنتين
فهتكلم انهارده عن الكحه
و طبعا لو حد عايزنى اتكلم عنها يقولى وانا انزل عنها موضوع بالتفصيل

ايوة يا ام سيمو اتكلمي عن الكحة لان ابنى عيسى من امبارح بيكح جامد ومخنفر بس مفيش حرارة الحمد لله وربنا يجازيكي كل خير