لمتنا السورية اهلا وسهلا فيكم لشهر محرم1432

شامة;13891443:
سلام لاحلى بنات واحلى تجمع
اسفة عالغيبة بس والله كنت غاطسة بالمرض الله يعافينا ويعافيكم شهودي قضتني اسبوع مطنطن وبعدها استلمت انا الغريب الله لا يريكن وخصوصي مع مذاكرات الولاد مضطرة ابقى قاعدة مع وجعي وتعبي كرمال سمعلن ودرسن
حبيباتي كل عام وانتو بألف خير بمناسبة السنة الجديدة الله يجعلها سنة خير عالجميع
يارب
لؤلؤة كيفك حبيبتي سلامتك وسلامة يوسف قال صار احسن بأذن الله
دمشقية عليك العافية وسلامة قلبك
ليان كيفك يارب بهالسنة تصيري ماما ونشوف عأيدك بيبي
كاتي سلامات شو سمعت في اكلات طيبة شو القصة
سورية شامية لولية شو اخباركن يارب تكونو بخير
بيرل مونو ياسمين بانتظاركم

شامة;13891636:
لولو وباقي البنات لكم اخر اخباري الخميس نزلت لعند ماما وطلعنا سوا عند تيتي وانبسطنا بالسهرة وكانت شهد بدت تتحسن
والجمعة قلت الحمد لله صارت احسن وعملنا اكلة كباب بالشمسات غير شكل وكملنا بقية النهار بالبيت وبالدراسة والمسا قلي الكريم خدي بلش جسمي يجعني وبلشت معي بردية وكل الليل ما نمت واصبحت بالغريبوالسبت ما نزلت الشغل حتى من تعبي
الاحد رحت عالروضة غصب عني رغم اني مو مرتاحة بس قلت بركي بتنشط شوي
الاثنين صرت احسن الحمد لله خلص محمدمذاكراته وشام باقي عندها مادتين بس ما بهكل همها بأذن الله رحت بعد الغدا عند هبوش عندها جمعة جاراتها جايين يعايدوها وعملنا شوية ذكر ودعاء بمناسبة السنة الجديدة وحسيت حالي كتير ارتحت كأنو حجر وانزاح عن قلبي رحت لحالي بدون الاولاد يعني اخدت اجازة منهم من غير شر هههههههه
والمسا رحنا عايدنا عبنت احماي نحناوالاولاد بما انو تاني يوم عطلة مشان راس السنة
وهلق بعد ما اكتبلكن قايمة نام لأنو عيوني ما عاد
اتفتحو وتصبحو على خير ونلتقي غدا بأذن الله

الدمشقية;13892250:
اول شي يسعدلي هالصباح يارب
وتاني شي يسعدلي المروء والكووول :) يارب دائما تكوني بافضل حال ياعسل F:
وحلوة نكتة دقيقة صمت هههههه
والاحلى اغنية ماجدة الرومي زوجي كتير بحب صوتها انا بحسها غريبة الاطوار خخخخ بس صوتها رائع ... يسلموا يارب والله يبعت الخير دوم عليكم وعلى الجميع يارب
يوم الجمعة صلاة استسقاء بسوريا فالله يرحمنا برحمته يارب

والحمد لله انا بخير لا تشيلي هم ... والنفسية تمام والدكتور مبارح طمني بس قال لازم استمر على كورس الابر مدة 7 ايام كمان مبارح اخدت 3 ابر وباقيلي بكرا وبعده والحمد لله على كل حال
ويالله تعالي اتغدي عندي اليوم ههههه .... ياليت والله
بس المجدرة اكلة مقدرة يعني خخخخخ غريب زوجك ليش مابحبها ؟
والملوخية انا بعملها ورق يعني بالطريقة الشامية مابحبها تاعمة ومتل المرئة ... والله الاكل اجمالا بحير بتمضي اليوم بيجي اخوه وهكذااااا ههههه

هلأ بخصوص المخلل يعني شوفي اذا مرطبان وسط مو كبير حطيلك ملعقتين كبار ملح والافضل يكون ملح خشن ليش مابعرف :D بس هيك امي وحتى حماتي بقولوا
وشوفي انتي طعم المي بتبين معك كاتي ولووو كانها طبخة اذا مالحة ضفتي مي واذا لاء ضفتي ملح وتؤبشي قلبي بتوزعي فهم على الكل حيوووتي اتي .... وبالنسبة لليالنجي ربي يسلمك بدنا خدمة تحرز
شوفي كاتي هلأ في كتير ناس مابتقلي البصلة على النار وبتحط الباقي متل ماقلت بيطبقوا المقادير كلها فوق بعض من غير نار
والنتيجة برايي وحدة فشوفي انتي شو بتفضلي .... على فكرة مرة مونو وبيرل قالولي انهم بحطو ملعقة صغيرة نسكافية للحشوة
اي نسكافيه لا تستغربي على قولتهم انها بتعطي طعم مميز لليالنجي انا والله ماجربتها خوفا من حماتي ههههه بقى مابضمنلك ياها على مسئوليتي خخخخخ

وبخصوص الانكليزي ومتل ماقلتي ان بخانقوا الولد اذا اتكلم عربي فلاااااااااااااااااااا اكره هالاسلوب وشفته كتير هون بجدة عارفة بحس الشغلة صارت رياء ومفاخرة قدام الناس وعلى ايش ياحسرة شي مو مستاهل ياليت لو نتفاخر بدينا وبحجابنا وبحفظ القران بس للاسف الله يرحم حالنا ويعفو عنا لك ومنزعل انو ليش ربنا ماعم يرزقنا المطر وليش امورنا معسرة ... وليش وليش
وان الله لا يغير مابقوم حتى يغيروا مابانفسهم ...

وماشالله برافو على اختك تمام هيك وانا ان شالله ناوية اني ادخل شام دورات انكليزي وحتى ابوها ماشالله شاطر كتير باللغة فهو كمان قاعدلها بالمرصاد;) وان شالله محمودي كمان بيساعدها ,,, وربك كريم





الحمد لله اللي بيجي من ربك يامحلاه وعندي يقين انو ماحدا بموت ناقصه عمر ..
والحمد لله كتير اتحسنت عن اول ربي لك الحمد ومتل ماقلتلك باقيلي اليوم وبكرا ومنشوف شو بيقول الدكتور وعلى ربك:017: ههههههه بحب هالسمايل

leeean;13892754:
صباح الخير حبيباتي انا مبارح مافتت كنت مشغولة طبخت كوسا محشي وبيتنجان وفليفلة كمان

كاتس :هههههههه حلوين كتير


شامة:الحمد لله عسلامتك ونشالله الله يبعتلي شي ولد او بنت بيشبهوني هههههه
[/SIZE]



mimati:شكرا عالإفادة

لؤلؤة الشام0;13906495:
السلام عليكم ليان وسورية يعلى قلبي عليكن عن جد حرقتو قلبي الله يفرج همكم يارب ويبرد صدوركم الا بذكر الله تطمئن القلوب ياحلوين
سورية الله يجمعكم فيهم على خير يارب ويفرح قلبك بشوفتهم
ليان الله يعوضك عنه بالخلف الصالح يارب طيب ماعرفتي شو سبب نقص المي عن البيبي وطالما هيك قصتك لازم اذا قررتي تحملي تشوفي دكتورة شاطرة تفهم بوضعك وتقلك شو تساوي
وهي قصة الطلق 12 ساعة صارت في من خمس سنين كنت حامل وبشهر التالت صرت انزف رح عدكتورة قالتلي نبض البيبي ضعيف عطتني دوا وقالتلي رجعي بعد اسبوع رجعت بعد اسبوع كان مافي نبض ابدا حولتني على دكتور اشعة عملي ايكو مهبلي وقلي البيبي ميت وحمدي ربك لانه غالبا كان رح يجي بيبي في اعاقة
بقا رحمة من رب العالمين انه مات حولوني على مستشفى وهيك الدكتورة ماكانت راضية تعمل عملية قالت بدها ياه ينزل لحاله وبقيت 12 ساعة على محرض الطلق يلي طلعو عيوني منه وبعدين نزل وخدرتني وعملتلي كورتاج يعني تنضيف بس مين ماسمع عن الطريقة قال انها احس من العملية واضمن للحفاظ على الرحم سليم ورجعت حملت وجبت يوسف الله يحميه وبقيت القصة ذكرى صحي ذكرى سيئة بس الحمد لله
وانت كمان ان شاء الله ربي بيعوض عليكي وبتنسى بأذن الله

لؤلؤة الشام0;13893512:
mimati:جزاك الله كل خير وجعلها بميزان حسناتك
كاتي يسلمو على هالطرف مبارح كنت منكدة وما روقني الا الطرف تبعاتك صحة عالحلو وطالما نفسك فيه اكيد طيب
شامة حبيبة قلبي معافاية يارب وانا متأكدة مجرد الروحة لعند هبوش فيها الشفا ان شاء الله وانا لساتني على حالي بجي بكاسة زعتر بروح بكاسة ليمون وعسل وله الحمد
اليان صحة عالمحاشي اكلة غير شكل الله يعطيكي العافية ويرزقك الذرية الصالحة انا مبارح ابدا ماكان اللي خلق للمطبخ فمانت سيرة الحب بيتزا هت بس اليوم رح عوض عم اعمل رز بفول وبما انه في من ولادي حدا بيعترض عليه رح ساوي معه معكروتة بشاميل وعنجد الاكل بيحير
دمشقية الله يجعل فيهم الشفا والعافية وباذنه تعالى بتستفادي عليهم

لؤلؤة الشام0;13899799:
مسا الخير ياحلوات طلعت لعند جارتي وكانت جمعة بتجنن عنجد اشتهيتكم معي حلو وقت بتقعد مع ناس بتحب الفرفشة وبتكون القعدة وناسة وبس عقولة الكويتين لا بتحكي عحدا ولا بتشكي عن حدا
شامة اشتقتلك وعنجد يمكن نكدي لاني ماعم حاكيكي بتعرفي اني باخد طاقة من الدردشة معك عنت
دمشقية صحة وهنا على الارضي شوكي وانت كيف بتعمليه انا يا مع صينية البطاطا او لوحده بصينية وعلى وشه لحمة وصنوبر بس غالبا مع بطاطا لانه ولادي مابياكلوه بس انا وجوزي منحبه
ليان انا براي تروحي على دكتورة نسائية تعملي كشف عادي بدون ماتجيبي سيرة الحمل واذا قالتلك انه امورك ان شاء الله كلها تمام ساعتها الغي المانع وحملي ولا تخافي ابدا والله معك بأذن الله
كاتي شو قصتك غاطة شو عم تشتغلي باليالنجي وعلى فكرة على قولة دمشقية جارتي اليوم ضيفتنا يالنجي روعة قال حاطة مع الحشوة معلقتين كبار بن انا استغربت بصراحة بس طعمته طيبة

الدمشقية;13900955:
زوروا موضوعي وشجعوني ههههه

انجينار ((ارضي شوكي )) بالصلصة الذهبية ومن ايدين الدمشقية ...

هي الطريقة تمام لولو وان شالله راجعة بالردود

لولية;13902422:

صباح الخير يا أمرات عم حكيكن وأنا بالفرشة لإني قايمة اليون وكتير تعبانة وحلقي عم يوجعني ومرشحة وحالتي حاله
نحنا امبارح كان عطلة عنا كرمال رأس السة الهجرية إن شاء الله كل عام وإنتو بألف ألف خير المهم قضيت اليوم كله برة البيت لإنه رفيقتي الأنتيم بعد شهر عرس بنتها فرحنا مع بعض ندور على فستان العرس لإنه بتعرفوا مافي بالميدان غير حديدان وصار عندي خبرة كبيرة بهيك مواضيع أد ما عم ضل بالأسواق ولهلأ ما لقيت شي لبينتي لحفلة كتب كتابها
اليوم سيرة الحب بامية ورز امبارح طبختها بنتي الله يرضى عليها وما دا أكل منها لإنه كنت أنا وإخواتها برة البيت وأكلنا برة فضلت بقى اليوم الحمدلله عندي طبختي
يا بنات مونو ما عاد بينت ما حدا بيعرف عنها شي
سلامي لكلكن كلكن

سورية وبفتخر;13906092:
كيفكم ياصبايا ان شاءالله تكونوا بخير
معلش سامحوني بس مابعرف شو صايرلي صايبني الاكتئاب بعيد عنكم حاسة اني دايق خلقي ومافي شي بيسليني حاسة اني مشتاقة لأمي كتير ومالي خلق لا لأولادي ولا لجوزي وبس بدي ابكي انا اسفة مابدي امأتكم ولا اشغل بالكم بس حبيت فضفض شوي