لمتنا السورية اهلا وسهلا فيكم لشهر محرم1432

صباح الخير حبيباتي انا مبارح مافتت كنت مشغولة طبخت كوسا محشي وبيتنجان وفليفلة كمان

كاتس :هههههههه حلوين كتير


شامة:الحمد لله عسلامتك ونشالله الله يبعتلي شي ولد او بنت بيشبهوني هههههه
[/SIZE]



mimati:شكرا عالإفادة

mimati:جزاك الله كل خير وجعلها بميزان حسناتك
كاتي يسلمو على هالطرف مبارح كنت منكدة وما روقني الا الطرف تبعاتك صحة عالحلو وطالما نفسك فيه اكيد طيب
شامة حبيبة قلبي معافاية يارب وانا متأكدة مجرد الروحة لعند هبوش فيها الشفا ان شاء الله وانا لساتني على حالي بجي بكاسة زعتر بروح بكاسة ليمون وعسل وله الحمد
اليان صحة عالمحاشي اكلة غير شكل الله يعطيكي العافية ويرزقك الذرية الصالحة انا مبارح ابدا ماكان اللي خلق للمطبخ فمانت سيرة الحب بيتزا هت بس اليوم رح عوض عم اعمل رز بفول وبما انه في من ولادي حدا بيعترض عليه رح ساوي معه معكروتة بشاميل وعنجد الاكل بيحير
دمشقية الله يجعل فيهم الشفا والعافية وباذنه تعالى بتستفادي عليهم

يابنات برأيكن ايمتى لازم فكر احبل مرة تانية انا ولدت ب13-9 ولادة مبكرة شو رأيكن؟

مسالخير ياحلوات
ليان صحة والف هنا على المحاشي والله اكلة طيبة بالعافية يارب
وبخصوص الحمل حبوبة يعني انتي حاليا عم تستخدمي مانع ؟ ولا شو بالضبط

لؤلؤة تسلمي يارب وربي يشفب الجمييع
وصحة وهنا على الرز بفول انا زوجي مابياكل هيك اكلات فبعملها لما بكون دوامه مسائي ... والبشاميل بتجنن عوافي يارب

انا سيرة الحب عندي اليوم ارضي شوكي باذن الله غيرت عن الملوخية كاتي هههه لانها بعدها مبلولة ومانشفت منيح انا بحبها يابسة
وسلامي للجميييع

دمشقية:على قلبك والله طيبة كتير

وانا عم بستعمل مانع بس مو حبوب

ليان طيب انتي الدكتورة شو قالتلك لما اجهضتي يعني بتبقى الدكتورة افهم بهيك مواضيع
هلا انا مرة اجهضت بالشهر الثاني بس حملت بشام بعدها ب3 او 4 شهور والحمد لله ماصار علي شي

الدمشقية;13892305:
يسعد صباحك يارب شامة وربي يسلمك وكل عام وانتي بالف خير يارب والف لا باس عليكي لك شو صايرلنا بدنا رقية شاملة ووافية ههههه
بس انتي كمان الله يهديكي ماريحتي حالك اسم الله حولك من بيت شقاع لبيت رقاع هههههه لا تزعلي بعرفك مابتوعلي مني ....
يعني بلا المدرسة وبلا الواجبات وكنتي ريحتيلك شوي بالبيت والله الكريب صعب وخاصة اذا نزل على الرجلين او حتى الصدر ... يالله طهور ان شالله
وان شالله هنا وعوافي على الكباب طمنيني نزلت المطر عندكم ولا لسى ؟ الله يبعت الخير يارب

ويالله ذكرتيني بجلسات الذكر ... اديش كنت احضر روحات وجيات مع اني بصراحة ماكنت احب هدول ابو اشارب ازرق وابيض مو كلهم طبعا
ولا حدا يزعل مني ... بحسهم كتتير متكبرين وهالشي شفتو ولامستو بنفسي وكانت طلباتهم اوامر وانا مابحب حدا يتأمر علي خخخخخ
يعني بحب قول الله سبحانه وتعالى ... ولو كنت فظا غليظ القلب لانفضوا من حولك .... صدق الله العظيم
انا قلت شامة والله مو الكل .. شو رايكم ؟

الله يسعد صباحك ومساكي وكل ايامك
معقول دمشقية ازعل منك بس والله اوقات بتطري تطلعي برات البيت
وبالنسبة للمطر نزلت مبارح شوي فرحنا فيها بس طمعنا برب العالمين اكتر من هيك
وفعلا متل ما قلتي هدول الجماعة انا تعرضت لموقفين معهن وعاملوني بغلظة مع انو دينا دين تسامح ورحمه واخلاق قبل كل شي وطبعا مو الكل
ونحنا مبارح جمعتنا كانت جارات اختي وانا وماما يعني دعاء بسيط من القلب وعالفطرة عسى رب العالمين يتقبل ويبعتلنا الغيث

لؤلؤة الله يسعدك وصحة وهنا عالرز بفول والبشاميل تبعك الي بتجنن وسلامتك من التنكيد هاد لانو النا كم يوم ما حكينا مع بعض ههههههههه
ليان حبيبتي انت ودكتورتك بتحددي هالشي مثلا اذا كان الحمل والولادة تعبولك جسمك ولا لأواذا كنت حاسة حالك مو تعبانة وفيكي تريحي حالك بأثناء الحمل فلا توقفي الله يطعمك الولد الصالح يارب انا وقت صارت معي هديك القصة حبلت بعد الاربعين مباشرة لأنو كان عندي احساس انو نفسيتي ما بتتحسن لشوف ولد عأيدي والحمد لله اجاني حموده مع انو ماما كانت معترضة وبدها ياني ريح حالي شوي

دمشقية:‏ أنادكتورتي بلشام وما اعتبرو اجهاض لأنو ولدت طبيعي وطلق ضل ‏12ساعة و هلأرح يصيرو3شهور بس أنا قلت بدي استنى بس متل ماقالت شامة حاسة
مارح ارتاح لشوف عندي ولد لأنو قبل كان عادي بس هلأخايفةيصيرشي وماجيب ولد لاسمح الله
وموحابةشوف أطباء هون لأنو هن السبب بلي صار معي

مسا الخير ياحلوات طلعت لعند جارتي وكانت جمعة بتجنن عنجد اشتهيتكم معي حلو وقت بتقعد مع ناس بتحب الفرفشة وبتكون القعدة وناسة وبس عقولة الكويتين لا بتحكي عحدا ولا بتشكي عن حدا
شامة اشتقتلك وعنجد يمكن نكدي لاني ماعم حاكيكي بتعرفي اني باخد طاقة من الدردشة معك عنت
دمشقية صحة وهنا على الارضي شوكي وانت كيف بتعمليه انا يا مع صينية البطاطا او لوحده بصينية وعلى وشه لحمة وصنوبر بس غالبا مع بطاطا لانه ولادي مابياكلوه بس انا وجوزي منحبه
ليان انا براي تروحي على دكتورة نسائية تعملي كشف عادي بدون ماتجيبي سيرة الحمل واذا قالتلك انه امورك ان شاء الله كلها تمام ساعتها الغي المانع وحملي ولا تخافي ابدا والله معك بأذن الله
كاتي شو قصتك غاطة شو عم تشتغلي باليالنجي وعلى فكرة على قولة دمشقية جارتي اليوم ضيفتنا يالنجي روعة قال حاطة مع الحشوة معلقتين كبار بن انا استغربت بصراحة بس طعمته طيبة

باقي البنات يا عروسات طلو والله اشتقنالكم ليش تقلانين علينا مونو بيرل سمورة شامية بنت الشام ماما لولية الله يقويكي اكيد مشغولة مع هالصبايا وسورية خانم يلي عاساس بدها تخلينا نزهئ منها ماعم تبين الا بالمناسبات

زوروا موضوعي وشجعوني ههههه

انجينار ((ارضي شوكي )) بالصلصة الذهبية ومن ايدين الدمشقية ...

هي الطريقة تمام لولو وان شالله راجعة بالردود

يسعد صباحكم يارب
ليان ايوا يعني انتي حبيبة قلبي ولدتي ولادة طبيعية ... ياستي الله يصبرك ماشالله عنك وربي يعوضك ان شالله بالحمل السليم المعافى
انا براي لا عاد تاخدي اي مانع وروحي عند دكتورة نسائية يعني خليها بس تعملك متل المراجعة اذا حابة هيك افضل

حتى تعرف ليان شو سبب وفاة الجنين اول مرة وحتى لا قدر الله ماتنعاد وتتفادو اي خطئ

شامة تسلميلي يارب وربي يسعدك دوم مو يوم
قلتيلي ملدعوة منهم هدول الجماعة متلي ... ستي الحمد لله والله يكبرنا بالايمان ويبعد عنا الكبر والمتكبرين
والله يبعت الخير يارب اي والله قللي بابا بخبخت المطر شي قليل وربك كريم ان شالله ... الدنيا عم تنقلب الله يعفو عنا يارب
والله يجعل جمعاتكم كلها خير وحب يارب

**************
لولوة حبيبة قلبي يسعد اوقاتك يارب
وعلى قلبك وبالنسبة للانجينار بعمله بالطريقة التانية وحطيتلك الرابط حتى تشوفيه ياقمر
وشايفة هالبنات الله يعينهم مشغولات بس والله اشتقنا للمة وللجمعة

وكاتي القمر مبارح مابينت اكيد عم تحضر لوازم الحفلة ويارب تكون بخير وعوافي

اهلا وسهلا لولية نورتي بتعؤفي نصيحتي الك بما انك ببيروت روحي يوم عالشام اشتري غراض لبنتك انا برأيي وين مالفيت مابلاقي احلى من الشام ولبس الشام واكل الشام واهل الشام ههههههههه صرت اكتب شعر

دمشقية :انا ولدت بالشهر الخامس والولد الحمد لله ماكان في شي بس صار عندي نقص بالمي بسبب دوا عطتني ياه الدكتورة هون بالدوحة وحجزوني بالمشفى اسبوع وبدن ينزلو الولد لأنو صار خطر علي انا مارضيت نزلو لأنو مافيو شي مرض وقلبو عم يدق قالولي يابتضلي بالمشفى لتولدي وضليت اسبوع بعدين قلتلو للدكتور خليني اطلع وبيجي بعمل التحاليل لأنو كان لازم كل يومين تحاليل شاملة ومراقبة للحرارة وازا ارتفعت حرارتي فورا رح ينزلو بدون مايسألوني طلعني بس جوزي كتب تعهد انو عمسؤؤليتو وطلعت بليل تاني يوم الصبح نزلت علشام ورحت عدكتورة هنيك كل اهلي بروحو عندا والله مافي منا قلتلا القصة وعطيتا الصور والتحاليل قالتلي المي ناقصة كتير اكتر من لما كنت بالمشفى وقالتلي انو بجوز الولد في شي او اخدة دوا طلبت صور رباعي الابعاد ببين فيها كل شي بس مالحقت اعملا لأنو تاني يوم فقت عم بنزف كتير هلأ هو انا من وقت كنت بالمشفى عندي نزيف بس عادي قليل بس يوما كتير عالأرض رحت فورا عالمشفى قالتلي الدكتورة لازم ولدك وانا ابكي وماني رضيانة اخد الحبة هي تبع توسيع الرحم انا لأنو مفكرتو لسه عايش بس قالتلي خلص مات
ومارضيت تعملي عملية بدا طبيعي وضليت 12ساعة عم اتوجع بعدين بالاخر عملولي تخدير كامل لأنو ماشدتو ابدا خلتو ينزل لحالو مشان ماينخلع اوشي لأنو بدي شوفو كنت وطبعا خلصنا كل شي وطلع هو اختنق بالحبل السري لأنو مافي مي بس هو الحمد لله مافي شي وماشالله كامل ووزنو منيح كتير وشفتو ودفناه بجنينة البيت عنا بس كل ما اتزكرو ببكي لأنو كنت بدي احملو وبوسو وماقدرت مابعرف ليش حتى ماشفتو منيح ماكنت عم شوف بعيوني عقد مابكيت بس منيح صورتو
ومنيح نزلت عالشام كانو كل اهلي معي وعمامي وخوالي والكل بس والله كلن صارو يبكو بس شافو لأنو ماحدا توقع يكون هيك مفكرين جنين بس هو كان ولد كامل يلا الله يعوضني يارب بس قد ما اجاني بعدو مابتخيل رح يروح من بالي ولا رح انسى ايام ما كنت حامل فيه لأنو اول ولد واول فرحة
الحمد لله على كل شي

كيفكم ياصبايا ان شاءالله تكونوا بخير
معلش سامحوني بس مابعرف شو صايرلي صايبني الاكتئاب بعيد عنكم حاسة اني دايق خلقي ومافي شي بيسليني حاسة اني مشتاقة لأمي كتير ومالي خلق لا لأولادي ولا لجوزي وبس بدي ابكي انا اسفة مابدي امأتكم ولا اشغل بالكم بس حبيت فضفض شوي

سلامتك سورية بس معك حق انا بتجيني هالحالة احيانا وما بعرف شو بدي اعمل