صفاء غ;12462919:
بنات كيف حالكم اني اسبوع الجاي ماشيا لطرابلس نبي نبضع لعرسي نبي نعرف احسن الاسواق في طرابلس يكون سعرها معقول:*:ارجوكم ساعدوني بليييييييييييييييييييز اوشكرا ماعنديش غيركم ايساعدني
شدى عندك يا حبيبه
في المدينه المحلات اللي في شوارعها الرئيسيه زي أول سبتمبر وميزران وغيره
وفيه في الشوارع الفرعية شويه وفيه لو تحبي تشوفي العربي في اللبس الطرابلسي سوق المشير وباب الحريه
الأسواق اللي يكونو دورين أو دور وهلباااااااااااا محلات عندك
فيه في زاوية الدهماني سوق الشط "" وجيهة راس حسن سوق جامع الصقع "" وهذا أغلبه قطاعي يعني بلايز وقونات وبنطلونات وبدل وسط وملابس الحوش وغيره وغيره من ماعين وفرش وأثاث ما شاء الله "" وفي في سوق الجمعه سوق الترسانه والمحلات اللي جنبه في السوالم وفيه محلات الحشان والفرناج وفيه في تاجورلء محلات بس والله ما نعرفهم كويس لأني مانمشيش غادي إلا نادرا
فيه شارع الجرابه في بن عاشور أغلبه راقي وحلو وغالي بس تلقي حاجات تعجب
فيه في بوسليم سوق كبير للملابس والفرش والأثاث
وفي قرقارش على طول طريقها من أولها لآخرها وهادي حاجات نازكه وغاليه
وفيه شارع الجمهوريه قبل ميدان بوهريده المحلات للبس السهره والبدل وحاجاتهم روعه والسعر كذالك غالي وبعده محلات الصحافه وأغلبها قطاعي
فيه محلات في الظهره على الطريق يعني كل واحد بروحه
وفيه في فشلوم علي طول طريقها وأغلبهم قطاعي أما كبدل وسهرات فيه محل نوح في فشلوم أسعاره غاليه بس تلقي حاجات حلوه
وفيه خياط في نفس المحل لو حبيتي تفصلي حاجه من مخيلتك وعلي ذوقك
وفيه سوق ملابس في غوط الشعال كذالك
وهاذي علي بالي أقدم وأحسن الأماكن في طرابس
وفيه غيرها محلات بس هادي الأسواق اللي محلاتها هلبا وجنب بعض
وإن شاء الله أفدتك
