Miss FaTi;12448651:
ماهى هى التطعيمات دى مش بتكون مجانية مع التطعيمات التانية؟؟
انا طعمت احمد الشلل الى هو نقط وحقنة الدرن الى بالكتف وقالولى تعالى كمان شهرين
الى بتقولى عليهم دول تبع التطعيمات ولا حاجة زيادة؟
ماهماهاتى الحلوين
هو الطبيعى ان البيبى دلوقتى نص شهر عندة بيزيد المعدل الى بيفضل فية ماسك صدرى ولا اية لانة اتقطم ضهرى من كتر القعدة طول الليل وهو كل ما عينية تروح بالنوم ويحس ان هشيل صدرى يصحى يعيط
كمان بيتقرع وهو لسة على صدرى وايدية ورجلية بقالهم يومين متلجين رغم مخففتش لة وكل مااغطية بيرفس الغطا البسة شراب ولا اية ؟؟
وامبارح وانا بغير لة وبحط لة كحل مكان السرة ماوقعت لقيت القطنة متوسخة كانها بقع دم كدة بس مش زغير فمش عارفة دة من اية
اروح للدكتور ولا دة طبيعى
اصل مامتى بعيد عنكم معادية الدكاترة وبتقولى لو اخدتى ابنك على الدكاترة علطول مش هتتقطعى من عندهم :confused:
لا التطعيمات دي خارجية زيادة علي بتوع الصحة وانتي براحتك عايزة تديها اوكي مش عايزة خلاص يعني مش كلنا طعمناهم ليها، بس الدكاترة بيأكدوا اكتر علي الانفلونزا البكتيرية وده اهم واحد فيهم.
وانتي بترضعي حاولي تحطي وراكي مخدة تسندي عليها او تبقي تقعدي علي كنبة المهم ضهرك يبقي مفرود ومسنود كويس ورجلك مستريحة وممكن تحطي بردو مخدة تحت دراعك عشان تسنديها عليها وتقعدي بقي الوقت اللي هو يرضع فيه كله براحته عشان متشتكيش من ضهرك قدام شوية وتقولي ياريتني.
وفيه مخدات للرضاعة علي فكرة بس انا مجبتهاش قلت اخليني في الاساسيات عشان المصاريف وكده.
وبالنسبة للغطاء انتي لما تغطيه دايما حطي الغطا تحته كده دخليه تحت جسمه من الجنبين عشان مهما يتحرك او يفرك الغطاء ماينزلش من عليه ويبرد ويعيا لا قدر الله، والسرة هي لسه موقعتش؟؟؟
ولا انتي قصدك وقعت بس بتكملي التنضيف بتاعها العادي، هو عامة الدم البسيط ده مفهوش مشكلة انا كنت سألت الدكتور فيه قبل كده وقاللي طبيعي بس المهم مش يزيد عن 3 ايام باين ونضفيها كويس بالقطنة عشان تنشفي اي بواقي موجودة للسرة حتي لو وقعت.
ولو مكنتيش وديته للدكتور خالص يبقي لازم تروحي علي الاقل اول 4 شهور دول تابعي فيهم وبعد كده وقفي عادي بس عشان تتابعي وزنه وتاخدي الفيتامينات والنقط والحاجات اللي بيحتاجها، مفروض من اول اسبوع بعد الولادة.