شات حوامل مصر لشهر جمادي الاول يارب قومنا بالسلامه

هههههههههههههههههههه

أولا

لازم الأولاد يتعودوا على مكان واحد للأكل
ماينفعش الأوضه اللى بنام فيها ونأكل فيها أو فى الصالون .
زى ماقلت قبل كده ملايه نظيفه وافرشيها على الأرض
حتى لو انتى واقفه فى المطبخ يبقوا جنبك
وهما بياكلوا وبعدين تشيلى الملا يه تنظفيها.
لزم تعوديهم على النظام والنظافه
لانه من شب على شىء شاب عليه . أما بالنسبه لدولابك.
كنور موضوع الدولاب ده هاتكلم عنه لاحقا ان شاء الله.
شوفى ياستى بشوية تنظيم للوقت زى ماأتفقنا أصبح عندنا الآتى
:- مطبخ وحمام زى الفل على طول .
سقف البيت والحوائط على طول نظيفه .
شبابيك الله عليها اللى يشوفها يقول الجواب يبان من عنوانه.
أبواب ولا بعد كده بتلمع من النظافه.....
تعالوا نشوف الباقى السجاجيد
لازم تكون زى الفل ولو ماكانش
كده بتكون بيئه مناسبه لامراض كتيير
والعياذ بالله وخصوصا أمراض الصدر .
والموضوع برضه والله سهل جدا .
لازم مهما كانت الأسباب تشفطى السجاده بالمكنسه الكهربائيه
واظن مافيش بيت مافيهوش مكنسه
بلاش علشان خاطرى المقشه
لانها بتنطر التراب فى كل حته وخصوصا رئتيك
عافاك الله كفايه المجهود والتعب نضر نفسنا
كمان شفطى ياستى لو كل يوم وماتكسليش
تطلعى المكنسه علشان ستات كتير بتكون حطاها فى مكان
تستسهل بدل ماتطلعها تكنس بالمقشه
. انا بأقول كل يوم للى عندها أطفال.
لكن ممكن يوم المكنسه اليوم
اللى بعده شوية ديتول وشويه ميه وبفرشاه البلاط
وانطرها من الميه اللى فيها
وكأنى بأغسل السجاده وأتفضلى شوفى النظافه والريحه والرونق
بتاع السجاده والا أجدعها لاندرى.
ومايمنعش على مدار اليوم
لو حد وقع حاجه التقطها بالفرشاه والجاروف.
أنا عاوزه أأكد على حاجه مههههههههههههمه
وانتى بتشترى مواد التنظيف بلاش تبخلى على نفسك
بجوانتى محترم تلبسيه فى ايدك
قبلها طبعا تدهنى ايدك بأى حاجه
انا عايزة اسهلها عليكى
ان شاء الله شوية زيت أكل
انا باتكلم بجد .
ايدك اللى احنا بنستخدمها فى المشاق كلها
من حقك على نفسك وحق جوزك يشوفها فى منتهى النعومه.
وعلى فكره انا قرأت فى مكان ما ان المنظفات
بها مكونات ممكن تجيب أمراض عافانا الله جميعا.
تعالوا بقى كفايه قعدنا كتير ورغينا كتير تعالوا على باقية الشقه.
بأتمنى انى ماأشوفش المنظر ده مراتب وسجاجيد
على سور البلكون وبالمنفضه وهات يارزع.
الخاسر الوحيد وبدون مكاسب هو انتى .
قولتيلى ليه ؟
أقولك ياستى ....
أولا:-ايدك ودراعك بعد الشر عليكى هايتخلعوا.
والتراب اللى حضرتك عامله تتطلعيه من السجاجيد والمراتب
وبأخص بالذكر المراتب
علشان احنا اتكلمنا على موضوع السجاجيد وحلينا المشكله.
التراب ده كل اللى بتعمليه انك بتعيدى توزيعه مره أخرى
وأنتى من نصيبك الحظ الأكبر
وطبعا على الرئه والجهاز التنفسى جارى؟
طيب ليه وأنا عندى الحل .
المكنسه الكهربائيه اغسلى الكيس كويس أوى
قبلها بيوم هاتلاقى قوة الشفط ماشاء الله .
تمشى بيها على المرتبه فى جميع الاتجاهات
طول وعرض وورب
لغايه لما تحسى ان المكنسه طالت كل سم .
وبعدين ربنا يعينك
وأقلبيها على الوش التانى وأبقى قوليليى
على اللى طلع منها.
الحكايه دى لو عملتيها كل شهر شهرين علشان احنا أثناء النوم
فى شعر وجلد من أجسامنا
وومكن أظافر كل ده بيكون
فى الفرش بيكون حشرات غير مرأيه
مى التراب كمان بيسبب نوع من الحساسيه
وأحيانا والعياذ بالله ربو.
وعلى فكره ممكن تعملى المخدات كما لو قطن .
أنا المخدات عندى من هابيتات فمعنديش مشكله
بأغسلها كلى فتره بالماء الساخن والمسحوق وأشطفها بالديتول طبعا مخفف.
أما المفروشات ياريت كلما أمكن تتغسل كل فتره.
أنا عايزاكو تحكموا قبل ماأكمل ممكن بعد الأسلوب ده
المرتب والمنظم
أستنى رمضان على أقلب البيت رأسا على عقب.

قبل الكلام مايخدنا واللى تعبنا فيه يرجع يتبهدل تانى......
أكيد وأحنا بنشفط المرتبه ونقلبها الناحيه التانيه
لاحظنا ان فيه حاجات تحت السرير مايمنعش نظرا لعدم وجود أماكن تخزين كفايه .
بس عايزه أقول حاجه موش علشان اسمها تخزين تبقى شكلها
موش عاطفى
لأ أحنا زى ماقولنا ممكن نعمل من الفسيخ شربات
. ازاى ؟
أقولك أهم حاجههههههه
أتعامل مع كل سم فى البيت كأنه مكان ظاهر
على طول قدام عينى يعنى تحت السراير
لازم كل فتره أشيل الحاجت كلها وأمسح برضه يالديتول
وأسيبها شوية تتهوى وبعدين أرجع الحاجه تانى
بس ياشطوره لو فيها تراب طبعا أنظفها
ولو موش منشقه ومترتبه وأكون عارفه ايه اللى محتاجه بالظبط
موش كركبه على الفاضى.
وياحبذا لو فرشتى مثلا على الأرض ملاية قديمه
ونظيفه طبعا وأحط الحاجات عليها على أعتبار
ان هذا الاشياء مثلا أغطية الشتاء
كل لحاف أو بطانيه فى الكوفر
بتاعه اللى جاى بيه
ويترصوا بطريقه مرتبه علشان المكان
يكفى وفوق كل ده ملايه أخرى.
على فكره دون أن ندرى لو تحت السرير
فيه كراكيب حتى لو موش شايفه بتكون موجوده
فى عقلك الباطن وممكن تصابى بالأرق والصداع أو التوتر
اللى ساعات مابيكونش عندنا سبب ظاهر له.
أنا باديلك أمثله وأفكار فقط وانتى عليكى تتطوعى ده يما يناسبك.
الدواليب وماأدرااااااااااااااااااااك ما الدواليب
عند بداية كل موسم صيفى أو شتوى خاليكى واقعيه مع نفسك
الحاجات اللى انتى متأكده انك موش هاتستعملها
انتى أو أولادك غيرك أولا بيها ..
الأستفاده مضاعفه روقتى مكان وشعرتى براحه نفسيه
وموش هاأكلمك عن الراحه النفسيه الأخرى اللى هاتحسى بيها
لما الحاجات دى تروح لناس هم فى أشد الحاجه اليها وماأكثرها.
وبلاش البواب والشغالين.
الجمعيات الخيريه أفضل
.يعنى ربة المنزل غير الموظفه.
اللى أولادها كبار وبيعرفوا يتحملوا مسئولية نفسه
واللى لسه أولادها صغيرين ومرتبطة بميعاد نوم أو أكل.
اللى جوزها بيرجع بدرى من الشغل أو العكس .
يعنى بمعنى أصح أنا بأحط الخطوط العريضه
وكل واحده توفقها بما يتناسب معها. بصى
أنا عن نفسى حاطه بلوك نوت على الكومود بتاعى
وآجى مثلا ايام زى اللى احنا فيها دلوقتى
داخل فيها مصيف وداخل فيها رمضان وان شاء الله العيد
وبعده المدارس أعمل خطه بعيدة المدى وابتدى اكتب.
أنا هاسافر المصيف أجهز أكل المصيف كله بالايام
انا باعمل قائمة فطار وغداء وعشاء حتى لو فيه يون هانتغدى بره.
وأجهز الوجبات على التسويه .
بعد كده أنا عايزه أجهز شنط المصيف والمايوهات للآولاد ولبس البيتش
المفروض طبعا الحاجا ت الخاصه بالمصايف
متشاله بطريقه معينه انتهز هذه الفرصه
وأروق الدواليب وأشوف اللازم واللى أنا موش محتاجه
يبقى أنا ضربت عصفورين بحجر. ممكن مثلا
قبل السفر بيومين ألم السجاجيد
لو فيه حاجه تتغسل او أشفطها زى ماقلت وأشيلها وأخلى البلاط كده
ولما أرجع ان شاء الله
تانى يوم أمسح الشقه كلها وأفرش السجاجيد .
ولو فرض وبعد الشر عندك أى حشرات ممكن
وانتى نازله يوم السفر ترشى الشقه وتقفليها.وبعدين
السراير
طبعا ممكن تعملى موضوع المراتب وتشفطيها
ويوم السفر برضه تكونى فرشه السرير بملاْات نظيفه
وتحطى على كل سرير ملايه أخرى على السرير كله
وتغطى المخده كمان وأول ماتوصلى بألف سلامه شيلى الملايه
اللى على الوش ونامى لانك هتكونى راجعه من السفر مرهقه
وفى نفس الوقت موش هاينفع تنامى على تراب
علشان أقفله الشقه أسبوع او عشرة أيام.
يعنى الخلاصه انتى بتوفقى أوضاعك بما يتناسب معاكىانتى عارفه فيه ناس كتير
بتعتبر باب الشقه ده خارج حساباتها ده بره هى مالها
وماله زيه زى الشبابيك هى مابتشوفهاش.
طب انتى عارفه اللى بنفس درجة الشقه الدواسه اللى قدام الشقه
فيه ناس بتعتبرها علشان ننظف فيها الأحذيه ازاى تتنضف.
المفروض أقلبها وأدوس عليها
برجليا لغاية لما التراب الناعم كله ينزل
وبالمكنسه وأشفط .اوعىىىىىىىىىى
من الكنس بالمقشه التراب ده
هايطلع على الرئتين دوغره .
وبعد ماأشفط بشوية ديتول فنيك
اى حاجه ان شاء ميه بصابون
وأمسح قدام الشقه فيه ستات كتير أوى جميله
عندها فى العماره بواب خى بتحس ان المنطقه دى تخص البوا ب
لآ ثم لأ..
دى جزء من مملكتك.
انتى عارفه انا كل فتره اخرج بره الشقه
وأغسل باب الأسانسير اللى فى الدور بتاعى من بره ومن جوه وألمع المرايا.
لكن فعلا لو كل يوم عملتى حاجه تكون أساسيه
يعنى مثلا هاتى الشغل من بره بمعنى النهارده
تغسلى الشبابيك كويس وتنشفيها وباب الشقه والدواسه.
وباقى اليوم الشغل العادى حتى وانتى بالكسل بتاعك .
بمعنى الشغل العادى اللى هو الأكل
واذا كان فيه غسيل
يوضع فى الغساله أو غسيل
على الحبل يتلم بسرعه طالما نشف
بلاش المنظر الغريب
بتاع ستات كتيير .
ساعات أنشر وألم والله موش مبالغه أكثر من خمس مرات
وألاقى الست من دول فس الغسيل على الحبل زى ماهو
يكون عايز يتغسل تانى.
هو الموضوع موش كسل
بصراحه بيبدأ استهتار
ويتحول لأحباط نتيجة انك موش عارفه تبدأى منين.

وبعدين اليوم اللى بعده لمى الستاير كليها
أغسليها برضه مع الشغل الأساسى وماتنسيش علشان خاطرى
من ضمن الشغل الأساسى الحمام والمطبخ .
أنتى عارفه انا الحاله الوحيده اللى يكون باب الحمام مقفول
لما يكون حد مننا فيه.
غير كده هو زيه زى أى غرفه
فى البيت من نظافته وريحته العطره على طول .
اوعى تتضحكى عليا أنا كنت بأفرش فى الحمام سجااااااااااااااااده.
ايوه سجاده وعارفه شيلتها ليه علشان لاقيت
ان من شكلها الحلو فى ناس تانيه اولى بيها.
وبقيت أضع الفوط المخصصه للحمام بيضااااااااااااااااااااء.
من الآخر انتى موش كسلانه
انتى محبطه. ابدأى وخاللى توكلك على الله وهو يقويكى.
سبحى الله33 مره والحمد لله 33مره والله أكبر 34مره قبل النوم .
وانتى ان شاء الله يكون عنك نشاط موش فى عشرستات
. والله المستعان.

تعالوا أحكيلكوا
أنا عملت ايه النهارده .
كانت الشقه الحمد لله نظيفه. وعندى تقريبا أكل.
دخلت على المطبخ وجبت جردل ميه وعليه شوية مسحوق وشوية كلور
ولبست ماسك ولبست جوانتى.
وجردل تانى فيه ميه بس وجبت السلم
وبحذر شديد بفوطة فى الجردل الأول
وعصرتها نص ولمعت السيراميك كله من فوق لتحت
والمنطقة اللى اخلصها قبل ماأسيبها بالفوطه الاخرى ميه بس
واعصرها كويس أوى وأنشف. شوفى أنا بأعمل الشغلانه دة كتييير

موش عايزه أقولك الميه بأه شكلها ايهههههههههه.
خاللى بالك . بعد ماتخلصى السيراميك تغيرى الميه اللى الأتنين
وتكررى
نفس السيناريو فى المطبخ نفسه كدواليب .
أنا بأعتبر دواليب المطبخ زى دولاب حجرة النوم بالظبط.
يعنى ايهههههههه؟
يعنى ياستى زى الفل ولاحتة سمنه ملزقه هنا ولانقطه صلصه مطرطشه هنا.
ولا ريحةأكل .بس خلاص.
ده كان يومى المهارده.
أشوفكم على خير.
طيب . هو أحنا هاننسى أهم حاجه
فى الشقه .
الصالون والأنتريه والسفره.
(موش ملاحظين ان كل مانروح
لاى ركن فى البيت أقول اهم
مكان فى البيت)
أنا بصراحه قاصده كده
لأن مافيش ركن ولا سم فى البيت
أقل أو أهم من الآخر.
كله على نفس الدرجه من الاهميه...

بس صعبه اوى اخلع الشبابيك واغسلها مجربتهاش دى ولا جربت اغسل الابواب هههههههه

ياللا نبتدى باسم الله.
كراسة الانتريه والصالون والسفره. تشفطيها كويس بالمكنسه الكهربائيه ومعاها
الفرشاه الصغيرهعلشان الأركان الضيقه.
بعد كده شويه ميه عليهم نقطتين صابون
(بصراح أنا بأستعمل شامبو مخصوص لللأنتريه وشامبو للسجاد)
بس اى حاجه بتؤدى المهمه .
ونجيب فوطة حجمها صغير
يعنى مقاس فوط التواليت علشان تعرفى تملكيها وأبلها فى هذا المسحوق
وأعصرها كويس وأدعك قماش الكرسى
بس خاليكى حريصه وعلى حسب نوعية القماش
علشان مايتقطعش.
المهم فوطه تانيه وتكون ميه بس وأعصرها كويس
وأعمل نفس الموضوع أدعك الكرسى علشان الصابون مايسبش أثر.
معلهش استحملينى فوطه كمان جافه وأعيد على الكرسى
علشان أمتص أى ميه موجوده.
ولوالشباك يكون مفتوح علشان الكراسى تتهوى.
وأبقى قوليلى الميه أصبح لونها ايههههههههههه؟....
الخطوة اللى بعد كده بالبليدج وتلمعى الايدى الخشب كويس .
اذا كان الكراسى فيها اويما وبتلم تراب.
قبل ماتعملى القماش هاتى فرشاه أسنان قديمه
ونظفى النتؤات اللى فى الخشب وبع كده
أعمليها بالبليدجياجماعه كتير
من الستات مابتاخديشى بالها
أن الأجهزه الكهربائيه دى يجوز عليها النظافه
برضه زى اى حاجه فى البيت.
خدى عنك مثلا السخان سواء كهرباء او غاز
مين بتفتكر ان السخان ده لازم يكون زى الفل
ويتغسل بالماء والصابوه ويكون
على طول زى الفل.
شفاط المطبخ بلاش يوصل لمرحله يبقى تنظيفه صعب
يعنى برضه أول بأول ممكن افكه وأحطه فى الحوض
وشوية ميه سخنه وشويه كلور وصابون وسيبيه ساعه ساعتين
على ماتخلصى أى حاجه فى ايدك
وبعدين اغسليه ونشفيه ويتركب
(أنا بصراحه بأحطه فى غسالى الأطباق بيطلع فله)
. الكمبيوتر وجميع الأجهزة الكهربائيه
لازم تكون زى الفل وعلشان التراب أنا جايبه بلور
زى بتوع الكهربائيه بأستعمله فى طرد التراب من الأجهزة
مع الحرص الشديد فى التعامل
مع كل جهاز.
الخلاط والكبه والمفرمه
وكل الأدوات الكهربائيه الخاصه بالمطبخ
لازم تكون زى القشطه. أنا الخلاط اللى متجوزه بيه من 25 سنه
الحمد لله فله.
المكنسه الكهربائيه موش معنى انى بأنظف بيها
يعنى بلاش أنظفها.
بصراحه أنا بيجيلى أكتئاب من الحاجه اللى موش نظيفه .
النجف برضه ينطبق عليه نفس البرنامج
ميه بخل وفوطه صغيره وألمع .
كلنا فى بيوتنا
فى براويز صور معلقه لازم كل فتره أمر عليها بفوطه مبلله ومعصورة كويس .
مفاتيح الكهرباء يطرف الفوطه
وأشيل التراب الموجود على الحافه بتاعتها
وأنظف المفتاح نفسه ولكن بحرص شديد
علشان الكهرباء وممكن الحائط
اللى حوالين المفتاح علشان
المنظر ده موش حلو خالص.

لالا طبعا مش لازم تخلعيها هى بتقول لو حد ماعرفش يخلعها مش لازم وهى مكانها بس تنضفيها
بصراحه الست دى ما شاء الله عليها نضييييييييييفه اوى
طب وبعد النضافه دى انا كده هعوز اعيش فى عفانه شويه مش هقدر على النضافه دى ههههههههههههههه
لازم تغيير لازم الشقه تبقى زريبة عشان لما تنضف نحس بقيمتها هههههههههههه

طيب انا عاوزه اغسل بطانيه مرضيتش تتدخل الغساله اغسلها ازااااااى

هههههههههههههههههههههههههه
ايوه الست دى نضيفه اوى ماشاء الله عليها

الكراااااااااااااااااكيب
الكرااااااااااااااكيب وأههههههههههههههههه من الكرااااااااااكيب.

شوفوا احنا تعبانين كلنا أد ايه
بقالنا كام يوم فى تنضيف البيت .
بس لو ده كله اتعمل وفيه كراكيب
(كأنك ياأبو زيد ماغزيت).
على فكره ثبت من دراسات كتير
ان موضوع الكراكيب ده
موضوع نفسى .
أولا سببه أن أحنا ليس عندنا احساس بالأمان
علشان كده بنحتفظ بحاجات كتير يمكننننننننننن
نحتاجه فو وقت من الأوقات وطبعا ده مابيحصلش.
بدليل قومى دلوقتى
على اآ مكان مكركب وشوفى آخر مره مديتى ايدك
فى المكان واخذتى حاجه
من اللى انتى يمكن تحتاجى لها.وهاسيبك انتى تردى.
ده السبب فى الكركبه ..
أما نتيجة الكركبه فتوتر وأحباط وعصبيه
وأنتى موش عارفه ان السبب الأكوام الكتيره
اللى بنمشى نتكعبل فيها فى البيت. عصبيتك مع أولادك.
عصبية أولادك مع بعض.
عصبية جوزك معاكى ومع الأولاد سببها الكراكيب
وأكيد ساعات بيعلق تعليقات احنا ممكن نقول عليها سخيفه
بس بصراحه عنده حق.
ايه سبب الحاله النفسيه اللى بتعملها الكراكيب.
أولا شكلها وحش أوى.
وبعدين دايما تعطيكى احساس انك مهما نضفتى البيت
موش بيبان عليه.
ثالثا التراب اكتر مكان يتجمع عليه الكراكيب.
رابعا وده المهم ان الكراكيب بتعوق مسار الطاقه الموجوده
فى المكان مما يترتب عليه الشعور بالصداع والخمول والأحباط.
طب ايه الحل ؟؟؟؟؟؟؟؟؟؟؟
أقولك
أهم حاجه علشان يكون الموضوع سهل عليكى
تعاملى مع كل مكان منفرد بمعنى بلاش أقول يااااااه
هاأروق ايه ولا ايه كده موش هنعمل حاجه.....
أختارى اى ركن مكركب وركزى فيه فقط
وكونى صريحه مع نفسك فى تقرير انتى محتاجه الحاجات دى ولا لأ
ولو آه محتاجها فى ايه. وبعد أد ايه . وهل احتياجاك يستاهل انك تضحى براحتك النفسيه
علشان يمكن تعوزيها بعد سنه ولا أكثر.
طيب لو كان فيه شفافيه بس موش الشفافيه بتاعة الحكومه
اللى وهقونا بيها. لو كلن فيه شفافيه وقررتى انك فعلا موش محتاجها .
على فكرة الشىء المهمل عندى وعندك
فى ناس كتير بيحلموا بربعه. يبقى الحل أجمع الاشياء دى
وبلاش تستهينى بيها على فكرة
حتى الجرايد القديمه والكتب القديمه واى شىء ممكن تتخيليه.
فى أماكن خيريه بتاخده منك وانتى مستريحه فى البيت .
يبقى ضربتى كذا عصفور بحجر واحد.
الحاجات دى اما تنفع ناس تانيه او بيعملوا عملية تدوير لهذه الأشياء
وتدخل فى صناعة أخرى
والعائد منها بيصرفوا بيه على المحتاجين.
يبقى روقتى البيت وكسبتى ثواب.
ومساء الفل عليكم لازم الدواليب كل فتره نفضيها رف رف
أو ضلفه ضلفه وأعمل عملية جرد وفعلا أكون صريحه مع نفسى
وكل ماهو زائد عن احتياجاتى فى ناس كتير اولى بيه.
ولازم الدولاب يكون من جوه نضيف أمسح الارفف كويس ببليدج
وبعد مايتهوى ارجع الملابس تانى بعد ترتيبها.
حاجه عايزه أقولها ياريت الايشاربات تتغسل بالكتير اوى
كل خروجتين علشان شهرنا بيعرق مع نوع الآقمشة
بتاع الايشاربات وغالبا بتكون الياف صناعيه والحر
بتعمل ريحه موش مستحبه.
حاجه تانى طالما البلوزه او الفستان عرق بلاش يتحط فى الدولاب
وموش الحل انى احطه على الحبل معنى عرق يعنى ريحه موش حلوه.
فى ستات كتير عندها المشكله دى.
أنا عايزه أتكلم على حاجه مهمه أوى.
زى ما كل شخض له رائحه مميزه .
أيضا كل بيت له رائحه مميزه.
وحيث ان ده موضوع يخص المنزل . انا هاتكلم عليه فقط.
أنا لما قلت رائحه مميزه .
والرائحه المميزه ممكن تكون حلوه
وممكن تكون موووووووووش حلوه.
وطبعا احنا هانتكلم على اللى موووووووش حلوه.
ايه اسباب الريحه الوحشه.
هانبدأ بالمطبخ
لو المواعين بتفضل فى الحوض كتير ولو بيفضل اكل مكشوف
ولو باسكت الزباله مابيفضاش أول بأول
ولوموش بأنضف السيراميك وخشب المطبخ
لأن أبخرة الأكل بتلزق فيها وتعمل ريحه مع الآتربه.
لو الوضع هكذا فى المطبخ يبقى لازم فى ريحه.
نقطه مهمه بجد بتزعلنى أوى
احنا بنصرف فلوس فى حاجات كتير
ونيجة على حاجه كلام فاضى .
لييييييه مايكونش
عندة باسكت للزباله محترم واحط فيه الأكياس المخصصه ليه
موش اجمع شوية شنط اشى من كارفور
واشى موش عارفه منين علشان اكومها فى ركن وتلملى حشرات
وفيه ستات بتغسل كمان الشنط دى
وتبقى لخمه نفسها على الفاضى
وبعدين ماتكونش على اد الباسكت
يجى كل واحد معاه حاجه طبعا
موش هايقعد كل شوية يفتم الشنطه .
لأيستسهل وزى ماتيجى على الأرض فى الباسكت نفسه .
اللى برضه في ستات ماحدش قالها ان الباسكت ده
ممكن يتغسل زيه زى اى حاجه فى البيت.
طبعا بيت المطبخ فيه بالشكل ده عمره ماهيكون ريحته حلوه؟
طيب احنا لسه فى موضوع الريحه اللى موش حلوه.
الحمام لو لم اتبع كل وسائل النضافه اللى اتكلمنا عليها قبل كده .
طبعا الريحه هاتبقى موش تمام.
تعالى لغرف النوم أسباب الرائحه الغير طيبه.
انى مابهويش الأوده باستمرار.
انى موش باغير فرش السراير باستمرار
وعايزه أقول ملحوظه
صيف وشتاء لازم السرير يتغير على الآقل فى الصيف مرتين .
فى الشتاء ممكان مره.
على اعتبار حاجه ان فى ستات بتفرش بطاطين ماش ok
بس ده موش معناه ان البطانيه
ماتتغسليش كل اسبوعين مثلا
وممكن تستعملى نوعيه خفيفه
علشان سهولة التجفيف اما فى الصيف ومع العرق
لازمه تبديل فرش السراير
ياحبذا يوم ويوم
وخصوصا خصوصا أكياس المخدات.
الفوط زى ماقلنا قبل كده الفوطه اتبلت
يعنى لازم تتغسل ماينفعش انشفها وأرجع أستعملها تانى.
تهويى البيت كله دى من الضروريات زى مابنهتم نبخر ونعطر
يبقى لازم يكون ده على نضافه.
زى ماهو ماينفعش احط برفان علشان انا عرقانه .
حاجه وحشه قوى. يكون الأساس نضيف
وبعدين هنلاقى ريحه حلوه حتى
من غير عطور ولابخور ولابارفانات.
يارب يجعل بيوتنا وسيرتنا كلنا عطره باذن الله

البطانيه بصى احنا برده عندنا مش بتدخل فى الغساله بنضطر اسفين نغسلها فى البانيو
بس انتى يا منمن عشان حملك راااعى بجد النونو و بلاش تيجى على نفسك ابعتيها لاى حد ينضفهالك ان شا الله حتى البوابه او اى لاندرى

حلو الكلام دا ياقمر دا كلامك ولا ناقله؟؟؟

الأولاد لاززززززززززم
يتعودوا ان فيه حدود لهم فى البيت .
يعنى اكيد لهم أوده يبقى لعبهم
فى ركن من الاوده دى أو
لو عندك ليفينج .
يعنى من الآخر مايبقاش البيت سداح مداح .
الموضوع ممكن يبقى فى أوله صعب لكن هايتعودوا .
والأكل لازم يكون له مكان محدد.
حتى لو فى المطبخ فى الصاله ساعة الاكل
افرشى ملايه ويقعودوا ياكلوا واللى يقوم من مكانه خلاص .
بصراحه أنا لما بأشوف
أولاد فى النادى أو السوبر ماركت أوعندى بعرف هم فى البيت
متربين ازاى.
بمعنى أدق انتى بتحطى حجر الأساس
لاولادك من البيت
ومن خلال طريقة الاكل واللعب
أولا وحدة التكيف أنا كل أسبوع
مع الشبابيك بأغسلها من فوق كده وعلى أد ايدى مابتطول
بأغسل الجناب .
وزى ماقولت قبل كده أنا جايبه بلاور
من بتاع الكهربائيه
اشتريته من سوق الكهرباء أو من العتبه
وموش غالى يتراوح مابين حاجه وثلاتين
مابيوصلش لخمسين جنيه بس ماأقدرش أستغنى عنه.
بأنضف بيه الفتحات
اللى فى التكيف وشوفى التراب اللى بيطلع منه.
بس أهم حاجه فى غسيل الشبابيك والتكيف أكون متأكده
انى مافيش حد من جيرانى ناشر حاجه لو حصل
أيما انى ابلغها تشيل الغسيل.
أو أجل الموضوع ده لوقت تانى..........
ثانيا.
نفسى وبيتى وكل اللى قولتيه الحمد لله والشكر لله.
الاستيقاظ بدرى والنظام بعد ربنا طبعا
بأقدر أعمل كل ده وعلى فكره بيكون عندى وقت كمان
بقرأ باروح النادى أمشى
أو أضعف الأيمان علشان النادى بعيد شويه
لما باكسل بامشى جنب بيتى بس موش أقل من نصف ساعه.
موضوع جمالى
أو أهتمامى بنفسى بصراحه شغل البيت بيسمح لى بكده
علشان انا بأستغل الوقت ده أعمل حمامات كريم أوحنه
أو افتكاسه لشعرى.
وزيه لوشى . وأيدى لازم البس جوانتى وفيها جلسرين فازلين
اى حاجه ورجلى علشان الوضوء
بعد صلاة الصبح أحط كريم كرباميد وألبس شراب.
بعد ماأخلص شغل البيت وآخد حمام يبقى كله تمام.
وطبعا خلال كل ده متابعة الأكل.
وفى الاول والآخرتوفيق
من ربننننننننننننننننا
أنا من كام يوم قلت ألحق ورق العنب قبل مايخلص .
وجبت كميه وربنا قدرنى وجهزتها وشيلة فى الفريزر.
وبعدها جبت
كمية طماطم لا بأس بها وعملتها صلصه وشيلتها فى الفريزر.
وبعد كده جبت شوية بصل محترمين. وبشرتهم وحطتهم فى الفريزر.
هو مالوش علاقه برمضان قوى لانى متعوده
ان الحاجات دى من الأساسيات اللى لازم تكون عندى .
غير ان عندى توم لما كان التوم جديد جبت كميه محترمه وفرمته وحطيته فى الفريزر.
المهم أنا علشان كان همى اجهز الحاجات دى الأول فكنت باحط فى الفريزر عشوائى .
النهارده فتحت الفريزر ورتبت الأرفف كويس
علشان اراجع مره أخرى على الحاجات اللى عندى .
واذا كان فيه حاجه قديمه استعملها الأول.
وطبعا نضفت الفريزر وعايزه اؤكد على حاجه
انا لسه منضفاه قريب من حوالى شهر كده
علشان كده الموضوع كان بسيط.
وبعدين لاقيت ستارة البانيوموش عاجبانى
شلتها وغسلتها.
أنا بأحطها فى الغساله علشام الخامه بتاعتها تنفع.
وجيت على الماسوره بتاعتها نضفتها كويس
وبرضه ماكانتش متوسخه اوى.
وانتهزت فرصة ان ابنى راح يصيف مع اصحابه.
وقلبت الدولاب بتاعه ونظفته بالبليدج ......
ولو عند أدراج فى الدولاب فكيها بشويش
وهتلاقى تحتها؟؟؟؟؟؟؟؟؟؟؟؟؟؟.
تراب
هاتستغربى ده جه منين .
شفطيه بالمكنسه

ما المشكله ان شقتى فى بلد فلاحين مفيهاش لاندرى ولو طلبت من جوزى يجبلى واحده تنضفخا هيقولى انتى بتتدلعى
مع انه قبل الحمل كان بيجبلى حد ينضف معايا بس هو مفكر انى كده بدلع وانى بقيت بتعب بسرعه عشان مش بعمل حاجه وال ايه عاوزنى اعمل انا كل حاجه عشان اتعود بس هبقى اغسلها بعد الولاده بقى ان شاء الله لسه بدرى على الشتا ما يجى

طيب لما تغسليها فى البانيو اعصرها ازاى

لالا يا ماهى كلامى ايه حاشا لله ده انا ناقلاه من منتدى تانى و اللى كاتباه اسمها مملكه
بس ست من زمن الفن الجميل

انا اه بنضف اول باول بس لسه موصلتش لمرحله الست دى ههههههههههه

اااه يا منمن قوليله وايه المشكله لما ادلع لو ما كنتش انت تدلعنى ميييين هيدلعنى هههههههههههه
بنعصرها برجلينا ههههههههههه
بنفضل نمشى عليها برجلينا لحد ما تتعصر وتنزل المايه اللى فيها بس طبعا بيبقى يوم بهدله
لا يابنتى ابعتيها لاى حد ينضفهالك هو انتى بعد ما تولدى هيبقى فيى نفس ولا عندك وقت حتى

لا الست دى ما شاء الله عليها فلته

ههههههههههههههههه اغنيله بقى

Desly;12061134:
لالا يا ماهى كلامى ايه حاشا لله ده انا ناقلاه من منتدى تانى و اللى كاتباه اسمها مملكه
بس ست من زمن الفن الجميل

هههههههههههههههههه عقبالنا بس على فاكره انا خدت اول جمله اللى هيا مش بحرضك على الكسل وحطيتها فى جوجل لقيت نااااااااااس كتير كاتباه الموضوع الله اعلم مين بقى صاحبه الرئيسيه