شلون تنظمين يومج

مرحبا

ها سماء شخبار الشقه ؟؟

بالنسبه لي كملت تنظيف المطبخ كااامل من فوق لتحت تنظيف عميق باقي المجرات و الثلاجه و اليوم نظفت المكنسه فكيتها و خليت زوجي ينظفها بره و غسلتها هي و كيسها و حطيت فيه كومفورت و لمعتها بخل صدق عجيب سمعت عنه و جربته صدق يلمع كأن الشي جديد الحين لما يجف الكيس بحط فيه زيت عطري حلو يعطر المكان

بكره ناويه أغسل الحمامات و انتو بكرامه و اممم مجرات المطبخ

وانتوا شبتسوون بكره اذا الله احيانا ؟؟

خاطري اكشخ لزوجي مسكين صار لي فتره هامله روحي بس مو عارفه من وين ابتدي ؟؟ المشكله الجو بارد يعني الوحده ما تقدر تتفنن في اللبس

هو الليله طالع فقلت بستغل الوقت بسشور شعري ع الأقل بس ما عندي عزم الحين <<خيابه

اليوم الصبح شريت شموع وقلت بسوي له مساج بس في كم شغله ناقصه ومو حافه فقلت خلها لمره ثانيه و اليوم بكشخ على خفيف بس مو عارفه شسوي؟؟؟؟؟

هاااي مسوزة..
والله عندج عزوووم قوية لاختصار الوقت وترتيب الحياة ههههههه

تدرين عاد انا من اول مووو شاطرة
اتشيطر يوم وأتخايب ألف، حتى زوجي يعطيني بين فترة وفترة ملاحظات
أقول لروحي يا بنت استحي على نفسج وغيري روووحج واعزم في داخلي بكرا ان شاء الله ابتدي ويخلص البكرا ويجي اللي بعده وانا ما سويت شي مهم

يعني كل تنظيفي من فوق لفوق ماكو شي عميق الا كلش اذا هبت الشطارة
وحالياً عاد ويا الحمل والنساة ما اشتغل عدل، وقت ما احس بالنشاط بس اقوم.. ولبي على الطبخ اللي يستهلك نص الوقت وشيل النثرة عن العين والنفس وغسيل الثياب!

ادعوا لي بس أعتدل ويجيني النشاط في كل حزة

بنت الأصايل

هلا و الله اني المشكله زوجي ما يعطي ملاحظات بالعكس يقول لي انتي تعبانه وولدش يعفس يعني يحط لي مبررات وهذا الي ذابحني يكسر خاطري هو اني بيتي مو وسخ ولا شي بس ما يرضيني يعني اعدل كبت الملابس بعد اقل من اسبوع يرجع يتبهدل

انظف غرفة الجلوس تنظيف و كرف وبعدين كأنك يا بو زيد ما غزيت

مشكلتي ابي كل شي يلمع و في مكانه و مرتب بس ما احس في وقت و اذا بحط كل جهدي في الشغل من وين اجيب الوقت للاهتمام بنفسي وزوجي

من قبل كنت اكشخ له العصاري بعد التنظيف و بين فترة و فترة اسشور شعري كتغيير و ميك آب خفيف للبيت و حركات رومانسيه و حاله

بس الحين احس من توفىالوالد الله يرحمه كله ملانه و ما لي خلق و ساعات انسى اقول ليش صرت جدي شلي تغير؟؟؟

حتى هو ماخد اجازة مسكين و حسيت اني ما دلعته ولا ريحته ولا شي مثل الوضع لو كنت قبل كنت سويت الهوايل

يا ربيييي شسوي ساعدوني

خيو النفسيه ليها دور يبي ليش تغيرين في حياتش شوي
واحنا ما ننعطى وجه الزوج اللي طايح فيها بس القوامه في ايده يعني لازم يصبر
بس لمتى؟؟؟؟؟؟؟؟
صدق ما عندي وقت اتكشخ ليه دوام وولد وشقه وغسال بس اشوه منظمة وقتي الحمدلله ما عندي طباخ غير العشا
عشان جدي مرتاحه بس احس ما اقعد ويه ابو علي واجد

الله يعين بس

انزين هل من افكار؟؟؟

مسز عادل;10940390:

هاي

ilshj

مشكورة ع المشاركه

يبي لش جفافه بتجفف الثياب في وقتها و بتغنيش عن معظم الكوي

وشكله ابو علي كسول ليش ما يشيل الي ياكل فيه و إذا ما يحب يشرب في نفس الكاسه خل يغسلها

شغل البيت خفيف عندش بس مشكلتش ما عندش وقت

و العاده الي فيش بعد فيني احب اهدر وقت النوم ههههه

اجازتش بس يوم الجمعه ؟؟؟ انزين قعدي من وقت كلش وبتخلصين الشغل من وقت لأن شقتش شكلها صغيره و بعدين اطلعي شوي و غيري جو

اتمنى تتواصلين ويا الموضوع و يرجع له التفاعل لأن صدق نتشجع مع بعض

سوري خيو تعبت صار لي يومين ادور الموضوع اقول متأكده اني مشاركه في موضوع من ها النمونه بس ما ادري وينه اشوه شفتكم طحت عليكم

شقتي مو صغيره حجمها اوكي مثل باقي الشقق ليكون شقتش كبيرة؟؟؟
اليوم اروح انفخ راس ابو علي لانه قص علي بشقه صغيره
صاله وحجرتين وحمام بس المطبخ هذا اللي غير شكل صغير
حمامي عود بس ما اقدر اجيب جفافه وين اخليها؟؟؟
المشكل مو في اكل ابو علي وكاسات كثر حجايج علوي وحركته الاحين تعرفين 7 شهور بداية حركتهم اللي ما تخلص
بس قصر الوقت هو اللي امخليني دايخه
زوجي حاول اغير ها الطبع بس اقول لي لو تموتين ما بيتغير
الحين اشوه لما كنت حامل اقعده من نومته عشان اسولف وياه تخيلي لو مو الحمل دبحني ديك الحزه
يوم الجمعه اكمل تقفيض شقتي وانزل اساعد عمتي شوي
ابدي من الساعه 8 ابدل علوي واقعد اريقه واقعد وياه شوب على الاقل ربع ساعه العب وياه حاسب اني طول الاسبوع اشتغل بس الجمعه اجازة والسبت نص دوام
اخلص اخليه قبال التلفزيون وساعات عمته اجي تلعب وياه وهي صغيره في صف الاول يعني ما اقدر اعتمد عليها لازم مراقيه
اقفض حجرتي ولازم ابدل الفراش اسبوعيا وامشش الحجره كامل عن الغبار
الحمام اغسله
الصاله اباعد الكراسي واكنس تحتهم وامش الكاشي ولازم ترجيع
ادخل مطبخي امشش الكاشي كامل مو للسقف بس لطولي لعلمش اني طويله
الحجره الثانيه ما فيها شي عن يا زعم حجرة علوي فيها كبته وسريره ومكتبة التلفزيون الاولي لان غيرنه تلفزيونه ولصقانه في الطوف عن علوي وشطانته
لا تقولين اغير من برنامجي ما اعرف وما احب اشوف الكاشي وما امشه طبع
وللعلم الغساله تشتغل
لازم في فواصل لو 5 دقايق اسوي لعلوي شي ابدل حفاظ او اعطيه شي
اسبح علوي وانيمه
انزل اسوي شي لعمتي ما احب احس جنها خدامه لي مع انها ما ترضى اسوي شي ليها
عقب الغدا اقعد اكوي الثياب اللي غسلتهم طول الاسبوع (اغسل واجمع)
اجفس الثياب الباقي
خلاص خلص اليوم من طوله يعني
اي والله خيو يبي لينه نتواصل في الموضوع

هاي مسز..
والله حبيبتي يبي لج تغيرين نفسيتج واقترح عليج تسافرين العمرة ويا زوجج بروحكم صدقيني وناسة.. مو تاخذين ولدج لا.. كلها 4 او 5 أيام هو بيتعب وانتوا بعد بتتعبون!

المشكلة الحين محرم وصفر وما اظن في حملات تروح العمرة صح!!!؟
بس هالفكرة عن تجربة سويتها وايد استانسنا.. خاصة لما تكونين ويا زووجج..

انا بالنسبة لي مثلج البيت مو لهالدرجة يعني مأساة لكن زوجي متعود ان والدته الله يطول عمرها ما تقعد دقيقة.. الحين تمشش الحين تلم النثرة الحين تغسل.. وانا يعني أمشي الحال بتايرين خخخخ (سيكل ويا ريت اعرف اسوق سيكل بعد)

وزين ان زوجج يعذرج.. انا ساعات والله اكون هلكانة عدل ما اشوفه الا ينتقدني انا هني انقهر الصراحة.. بس يلا هذي الدنيا تمشي

مرحبا

ilshj

وبنت الأصايل مشكورين ع التواصل

ilshj أختي كانت حاطه جفافتها بالصاله هههه بس الحين الله انعم عليهم وبنوا ليهم شقه كبيره وحطتها بالمطبخ و الحين قاعدين يبنون بيت عقبالنا المهم ممكن تحطينها في الحمام احس عادي


بنت الأصايل رحنا العمره اني و امي وخواتي كلنا و ازواجهم واني رحت بروحي بدون زوجي ولا ولدي اكيد غيرنا جو ونفسيتنا تعدلت بس للحين في تراكماات في العقل الباطن هو اني مو قاعده متضايقه و حاطه الموضوع في بالي و افكر بس احس اني متضايقه في الاوعي يعني بدون ما احس اشوف روحي جدي

بس ما ادري شلون كلمات ilshj شجعتني

خيو النفسيه ليها دور يبي ليش تغيرين في حياتش شوي
واحنا ما ننعطى وجه الزوج اللي طايح فيها بس القوامه في ايده يعني لازم يصبر
بس لمتى؟؟؟؟؟؟؟؟
صدق ما عندي وقت اتكشخ ليه دوام وولد وشقه وغسال بس اشوه منظمة وقتي الحمدلله ما عندي طباخ غير العشا
عشان جدي مرتاحه بس احس ما اقعد ويه ابو علي واجد

ومع اني كنت قاعده متأخره كلش لأن البارحه ولدي كان متمرض وسهرنا وياه للصبح بس صارت عندي همه وقلت لمتى بقعد اندب حظي لازم اتحرك ويكون عندي هدف لازم احققه و ان الله لا يغير ما بقوم حتى يغيروا ما بانفسهم

وشمرت عن سواعدي و بديت الكرف

جفست ثياب متلتله خبركم الحين ما يجفون بسرعه في الشتا (متى ناخد جفافه)

و رتبت الشقه من فوق لفوق هي شقتي غرفتين و صاله صغيره جداً هي ممر واسع شوي بس فيه جلسه و حركات

شلت الوجوه تبع الجلسه و حطيتهم يتغسلون و نفضت الزوليه بمساعدة زوجي لأنها زوليه شعر و تطفش في التنظيف ما ينشفط منها الوصخ بالمكنسه فلازم كل فتره انفضها وعندي كونسول عليه منظره باعدت الطاوله علشان ما يتخشش فيها الغبار و غطيت المنظره بفوطه لنفس الهدف

و صارت الصاله قرعه كنستها كلها و قلت لكم من قبل عطرت المكنسه بزيت عطري من بودي شوب و صارت الريحه تجنن و شلت الستاره علشان نوديها المغسله

بعدها رحت غرفة الجلوس كنست الزوليه و لفيتها علشان تروح ويا زولية الصالة المغسله و كنست الغرفه وباعدت الكراسي بمساعدة زوجي وكنست وراهم و تحتهم

كنت ناوية بعد امسح في نفس اليوم بس تكسرت قلت خل ارتاح و اكمل مره ثانيه


شفتوا شلون تشجعت من الموضوع خلنا نواصل نشجع بعض

الحين يبي لي امسح الأرضيات و المكتبه و الأبواب خلهم لبكره اذا الله احيانا


علبة جواهر

هلا و الله فيش في موضوعنا و اتمنى تتواصلين ويانا

صباحش عسل خيو

انشالله ها الصباح تقومين امفرفشه وتكملين تقفيضش على الاقل غيرتين من يومش
وتقدرين تغيرين في مكان الاثاث جربتها من قبل حسيت بفرق تغير المكان احس في حركه شوي
وشوي حركات من هال النمونه
بالنسبه للنشافه نو ويه ما يصير لان الغساله ماخده مكان واذا بجيب نشافه ما ليها الا ورا الباب يعني محد يدخل الحمام والصاله اشيل الطاوله واخليها في النص

اذا تبين مساعده في نغير الاثاث انجيش وما يصير خاطرش الا طيب
تقدرين تصبغين الصاله كتغير او اضافه شي في زاوية معينه بتحسين في تغير في نفسيش
عندي مزهرية في الصاله كبيره اشتريتها وتحسفت عليها مع ان كل من اشوفها تعجبه بس ما ادري حسيتها غلط ومن فتره عمتي تبي تروح الانوار وديتها الا حماتي تقول خلينه نشتري ورد للمزهريه ما بنخسر شي
صدق اشتريت وطلعت فن ليومش تقريبا الحين شهر من حطيت الورد بس احس الصاله امنوره ومتغيره
بصورها وبنزلها تشوفينها
واشترينه تلفزيون بلازما وشلنه المكتبه وخلينه التلفزيون في الطوف حسيت الصاله صارت اكبر مع ان للحين ما اشترينه طاوله للرسيفر من الخيابه بس عندنه ستيريو امخلينه تحت وامخلين الرسيفر عليه

هلا

ilshj

و الله انش منورة الموضوع

اليوم قمت من الصبح صدق مفرفشه وسمعت خبر حلو فرحني

مسحت الأبواب و جدران الصاله و المناظر و الحاله الي فيها و المكتبه الي في الحجره حطيت في علبة رش ديتول بريحة الياسمين هاديء ريحته و تعجبني و يا شوي سائل صحون و ماي و قمت ارش و امسح حسيت احسن من لو في سطل مثلاً و اسرع


تالي ع المطبخ سيده سويت غدانا و عشا على الطريق بعد و نظفتالمطبخ و توني قاعده الحين طبعاً زوجي ساعدني بعد في اشياء ثانيه

وعن تغيير الأثاث ما خليت شي الا سويته على طول اغير خصوصاً في الأعياد لازم ومفكرين نغير في غرفة النوم و نسوي غرفة الجلوس حجرة لولدي احس لو غيرنا غرفة النوم نفسيتي بتتعدل 180 درجه

و توني امس افكر اغير في الصاله مع انها حليوه بس مو الحين زوجي مخطط يسافر بعد كم شهر يومين ثلاثه ويا اخوه ففكرت اغير اشياء بسيطه بس كلها بتتغير يعني بشيل المناظر وبحط غيرها بلون ثاني و عندي شمعدانات بحط شموع جديده بعد و الستاره بعد بغيرها هي خفيفه يعني تتبدل بسهوله وما تكلف يعني اكسسوارات هي الوانها بني و برتقالي وبيج بحاول اغيرها للون فرايحي مثل البنفسجي مثلاً وما بخسر شي بعد مده ارجع القبليين و جدي يعني كل مره اغير


هدرت واجد عليش

المهم باقي علي الأرضيات علشان اخلص هدفي لليوم

فرحتيني خيو
انشالله دايما اخبار وناسه عليش ويعطيش العافيه
اكرفي شوي عشان تحسين فيني باجر دوري في الكرف

ها شخبار اليوم؟؟

اليوم اني قعدت الصبح متحمسه بس زوجي الله يهديه اخذ الابت توب في غرفة النوم و اصر اروح وياه علشان يسولف يا زعم قلت له ترى اذا رحت بنام قال لي لالا

وتالي شفت الدفا ورحت في سابع نومه و تالي ما سويت ولا شي حتى اقول له خل نرجع الجلسه مكانها ما رضى قال خلها مره ثانيه

و اليوم بنروح نتغدى في بيت ابويي و ما بنرجع الا الليل يعني خلاص راح اليوم بلوشي

لا واني مزهبه روحي المكان بيلمع ويلق اتاري الهانم خذت غفوه
عليش بالعافيه

سلالالالالالام

اني جيت

بعد ما كتبت الرد الأخير قمت و غسلت الحمام وانتوا بكرامه

و بعدين مشينا بيت ابوي

البارحه كلمت زوجي عن الموضوع و ما شاء الله بالعكس عاذرني ويقول لي انتي مكبره الموضوع و هو يدري اني كل مره اسوي جدول وما امشي عليه فنصحني اني اخليه على الثلاجه علشان يكون في وجهي

المهم نمت في بيت ابوي واليوم رجعت الا المكان يلق مسح الأرضيات و رجع الجلسه مكانها ورتب غرفة النوم مسكين الله يعطيه العافيه :027:

الحين شقتي صارت تلمع من مجاميعه بس لا يمنع اني اطلع لي شغلات اخرى ههههه


اشوف ما في الا اني و ilshj نسولف ليش محد يشارك في الموضوع ؟؟ لهالدرجه منظمين اوقاتكم وما عندكم اي مشكله انزين افيدونا على الأقل

يلا يا ريت

خلنا نشوف مشاركتش ويانا

شجعونا على الأقل

الله يهنيكم يارب
عديتيني من خيابتش امس مو تكيسلت الا تخيبت اسوي شي انظف بملل:068: واقول في خاطري مسز عادل مو احسن مني :037:
نظفت شوي ونزلت لعمتي اشتغل وياها والعصر ركبت الشقه متنشطه خصوصا ان علوي نايم
كملت التنظيف كامل وكوي
بس السرير ما رتبته لاني خليت علوي انام عليه ولما صحى من نومته كانت مغرب قلت الا هي جم ساعه وانام عليه ليش اقفضه بعد

اشوف قايمه لطنازه ها

حدش عاد ترى كملت تنظيف شقتي ههههه

بدل ما انعدي من النشاط تنعدون مني من الكسل !!!!!!!!!!!!!!

اصلاً الحين نفضت الكسل عني خخخخخ

مرحبا مسوزة
ياريتش تفيديني مشكلتي اني ما اعرف من وين ابتدي:091:
يعني وش لازم اسوي اول وشاللي اخليه لبعدين
اني ما اعرف احط ليي جدول بهالسبب ساعديني الله يخليش
خاطري اشوف الشقة تلق:ok: