تجمع أمهات الوطن العربي .. شهر شوال 1430 - 2009 م

بقولكم عن شي صارلي.. وحسيت فعلا الدنيا صغيرة...

كان عندي صديقة وايد قريبة مني..

ايام المراهقة..

كانت تعتبر فرد من البيت ومب صديقة..

حتى اذا حد سافر من اخواني.. اييبون لها هديه مثل ما اييبون لي.. :)

ويوم يتصلون.. يسئلوني شخبارج وشخبار فلانه؟ كأنها توأمي..


يعني اقدر اقوللكم.. انها لين اليوم .. اكثر انسانه في حياتي كانت تفهمني وافهمها.. وتشبهني واشبهها .. حتى زوجي على كثر ما احبه واتفاهم وياه.. ما وصل نص التفاهم اللي كان بيني وبينها...


ومرت السنين وصارت لنا صديقة يديدة... وفجأة اتصلت لي هالصديقة وقالت لي فلانه بتقطع علاقتها فيج وما تبغي تكلمج.. قلتلها ليش نحنا ما صار بينا شي.. انا بتصل لها

و اتصل ما ترد..

قالت .. هي تقول انه خلاص ما تقدر تتحمل عيوبج ومن هالخرابيط.. قلتلها نحنا ربع من سنين وبنين وعمرها ما اشتكت مني ليش فجأة صارت مب مستحمله حتى تكلمني..


والله يشهد اني وصلتها .. علشان يطيح الحطب مثل ما يقولون.. بس صدتني .. وجرحت كرامتي .. :(


وهذي كانت اول و اخر مره .. اركض ورا حد ...

من هاك اليوم استوت الصداقة عندي صعبه .. اتقرب من الكل عادي والحمدلله

بس محد يتقرب مني شخصيا.. ماقدر اشيل الحدود...


وبعد هالكلام بحول الثلاث او اربع سنين.. حلمت فيها تصيح وتقول لي آسفة .. وقمت من الحلم مستغربه

اقول شو يابها على بالي ..


وعقب اسبوع بالضبط تفاجأت فيها يابت رقمي من بنت وكلمتني .. كلمتني عادي يعني كأننا متشاوفين ومسولفين من زمان...ما اعتذرت عن اللي صار.. وعن اللي غلطته في حقي.. ولا عن افشاء بعض من اسراري جدام بعض الاشخاص .. بس سولفت عادي شخبارج شو تسوين شو تدرسين وين تدرسين.. ومن هالكلام.. وانا مشيت الموضوع :) ومن يومها علاقتي فيها رسمية .. مسجات فالاعياد والمناسبات بس مافي اتصال ..


ولكن ما اخفيكم .. صديقتي هاي لازالت تخطر على بالي يوميا.. عالاقل مره

اشتاق لها ..واشتاق لوجود شخص اتكلم وياه على راحتي و يفكر نفسي ..


وفي يوم من الايام.. دخلت المنتدى هني .. كنت اشوف مواضيع اعراس و تجهيزات.. واشوف موضوع بنت كاتبه عن خطوبتها ومصوره الكراسي و الورد....

قلبي قرصني..

اعرف هالكراسي.. اعرف هالزاوية ..

رجعت قريت الموضوع من البداية.. ياربي اعرف هالاسلوب!!!!


طلعت نفس الانسانه :) ما تتخيلون كيف فرحت ..

ماعرف ليش فرحت .. بس فرحت

وهي لازالت تشارك فالمنتدى .. وتقريبا كل كمن يوم .. ادور ردودها في اي موضوع ولو كان سخيف.. واتم اقرا و ابتسم .. ولو اني مب فاهمه عن شو تتكلم ومب متابعه الموضوع كامل بس استانس يوم اقرا ردودها احس اني اسولف وياها مثل قبل..

على الرغم من مرور اكثر من 8 او 9 سنين على المشكلة اللي صارت بيننا .. (f)


شفتوا كيف الدنيا صغيره .. :)