وزنك في الخمسين وتتمنين الأربعين

المملوحهss;7504715:
انا وزني 55 وابيه ينزل لل45 وباديه من اسبوع اخفف اكلي وامشي بالير 20 دقيقه بس مو يوميا يوم ورا يومين ولسى ماوزنت يارب انزل بصراحه انا نفسي انزل 8 كيلو ومتحديه نفسي الشهر هذا
تحياتي.....

ياهلا فيج أختي المملوحه
إن شاء الله ينزل وزنك .. وحلو التحدى .. حياك الله معانا ..

معكم محدثتكم علكه
اول ماجلست من النوم الظهر 2 ماكلت شئ الى 4ونص لان رحت البنك
اول شئ اكلت 4ونص تفاحه وخوخه ومويه
الساعه 8 كليت شبس عمان ...مع شوية فصفص يعني كم حبه بس و شربت شاي اخضر
الساعه 12 كليت صدر دجاجه مع روب خالي الدسم وكم اصبع بطاطس بالشططططططططططه وبس
الساعه 4 تسحرت شوربه وتفاحه وموزه واصبع كيت كات صوغنن وعصير تفاح ..............وناويه اصوووم السته باذن الله الواحد الاحد
ها ...يابنات تتوقعون خبصت .....
وينكم ..ايرما ..الحلا ياخذ من حلاها ..هنادي ..دنياك دنياي .. والله فاقدتكم ...طمنوني عليكم

ننتزر دعمكم
ودمتم بود .....

هلاااااااا هلااااااااااا
أنا البارحه الأربعاء فطرت سندويش جبن ومربي وكوب حليب
تغديت 2 سندويش دجاج ودايت يببسي صغير
العصر حليب
المغرب خبصت وكلت لقيمات كم حبه
بعد ين رحت أمشي برا تقريبا 45 دقيقه
رجعت شربت عصير كيوي وأناناس وشريحة أناناس
وبس ..

علكه .. الله يوفقلك وتصومين الست .. ويتقبل منك إن شاء الله
شكلك ماخبصتي أكلك زين .. بس حاولي تمشين لو نص ساعه ..

هلا بنات

شخبااااركم لكم وحشة والله

اليووم خبصت السمووووحة

واليووووم ماباكل شي غير اني بشرب عصر وقت العشى وبس

وانتوا شمسوين مع الرجيم طمنونا

انا ببدي معاكم يا بنات من باجر ان شاءالله


والله ماادري جم وزني بالضبط بس اخر مره قسته كان 52 وبضعف معاكم لاني ابي بطني يلصق بظهري بأي طريقه


وباجر ببدي باول شي


وهو اشرب ماي حار وليمون على الريج اول مااقعد


واتفطر توسته سمره وجبن اشوي

والغدا شوربه خضار ودياي مشوي

وبين الغدا والعشى برتقال او اي فاكهه غير الممنوعات اللي بالرجيم

والعشى سلطه

وامشي نص ساعه من باجر ببلش معاكم


وحلووو والله هالموضوع خليتو فينا حماس وتحدي

هلا هنادي ...تسلمين حبيبتي ..والله يهنيك تقدرين تمشين برا
هلا ايرما ...والله لك وحشه انتي كمان ...يالله شدي الهمه بلا تخبيص وخرابيط ..عليك جزا تاكلي كبسه اوكي.........خخخخخخخخخ والله امزح معاك ..
وبالتوهلا حاملة الايمان ...ومرحبا فيكي ضيفة جديدة عندنا بس ...واخت عزيزه وغالية ...وان شاء الله تقدرين تحققين معانا ...اهم شئ الاراده والعزيمه ..وحطي الهدف قدامك انك تخففين علشان صحتك اولا وحلاوة جسمك ثانياوثالثاواخرا .......بالتوفيق للجميع يارب
اليوم صمت الحمدلله بس تعبت لاني قبل لا انام الصباح الساعة 7 تقريبا سويت تمارين نص ساعه وتعبت فيها من جد....
وجلست المغرب وتفطرت شوربه مع سلطه(طماطم وخست) و3 حبات ورق عنب >على فكره انا مجنونة ورق عنب < وايش كمان بس كده
والساعة 8 حطيت بفمي علك نوفا الاخضر خالي من السكر و10ونص اكلت شبس عمان ماقاومته وتفاحه كبيره وشاي وكم حبة فول سوداني علشان اخذ قوه ..لان احس جسمي ومفاصلي تألمني ..
والان توي تسحرت بدري 2.30 صدر دجاجه مع روب خالي الدسم وشططططططططططططططه ..وشوية هريسه....يم يمي من عند ام زوجي ....زوجي راح يتشكى لها اني ما اكل زين وتعبانه ..وسلامتكم
ادري تعبتكم من الهرج ... بس احس اني مستانسه معاكم وااااااااايد ....واول مره انضم واسوي رجيم مع احد يحمسني ويسأل عني .....

تسلمون لي كلكم ياااااااااااااااارب
وان شاء الله نقدر نوصل للي نبيه...
ونصير حلوات وموووووووودلز ..والبطن لاصق بالظهر ..رشيقات ..انيقات ...جميلات ..واثقات من حالنا ...واكيد
هذا كله بالصحه والعافية من غير شر ...

يالله دعواتكم

وأنا ياقماري معاكم وزني 59 ونففففففففففففففففففسي أصير عالقليلة 50

هلاااااااا و غلاااااااااااا
حياكم الله خواتي .. والحمدلله زاد عدد المشتركات
عشان يزيد التشجيع ..

بالنسبة لي البارحه فطوري كان حليب واربع تمرات
الغدي مكرونه بالبشاميل وشاي باجرفه عشان جتني الدوره
المغرب كان فطور اخوي وأكلت شوي لقيمات
بعدين شربت حريروه بالحليب كوبين
واحد بعد المغرب و واحد بعد العشاء عشان تنزل الدورة
وطبعا مافيه رياضه ..

اليوم الجمعه .. الصبح شربت حليب وأكلت تمر
بعدين مشيت على الجهاز 45 دقيقة
الغدي 2 خبز وقطع لحم مشوي .. وبس
وإن شاء الله ناويه أكمل باقى اليوم تخفيف ..

ومن يوم الأحد بإذن الله بسجل في صالة الرياضة ..

الله يوفق للجميع ..

هاي بنوتات


اليوم اول ما قعدت شربت ماي حار وليمون

وما تريقت مااشتهيت

والغدا سلطه خس وسوس برتقالي

وعقب العصر حاولت اشرب شاي من غير شكر والحمدلله قدرت

والعشا سلطه سيزر وهذا يومي

والله ماادري اشفيني مااشتهيت اكل شي

هلا جارة الحبيب ... حياج الله ويانا وان شاء الله تحققين حلمك ويانا ....هلا ويانا .....وش فيني مسكت على كلمة ويانا ]....
هلا هنادي ....تمام معاج ....وحلووووو....بس بسألج شنو الحريره ....ترا خبله ماعرف اكلات شعبية وايد
هلا حاملة الايمان ....تمام بداية حلووووه وايد بس تتوقعين مايأثر عليج لان اكلج وايد قليل ...وبالتوفيق للجميع
انا مستحيه منكم ...وين اودي ويهي
اليوم خبصت شوي .. امس ماسويت رياضة بس سويت بدلها شئ اعظم من الرياضه ...سويت تعزيل وترتيب وتنظيف من الالف للياء للصالة تقريبا 4 ساعات شغل ...
اما عن الاكل ...المغرب فطرت على صحن سلطه (خست وطماطم) وصالونة لحم ...بس اكلتها بدون رز وبعد ساعتين شربت شاي اخضر ...
ومسكت حالي الى الساعة 12وشوي واكلت فطيرة جبن من المخبز مع كاسين شاي اخضر ...وناوية اكل على السحوردجاج على الفحم مع روب خالي الدسم وشططططططططططه ...وبس ..
اهي اهي اهي ...بكره يوم الميززززززززززززززززززززززان ...خايفة الفطيره الي اكلتها تلخبط لي الدعوه كلها ..ويروح تعب الاسبوع كامل
’’’’بس بغيت اسألكم ...متى نوزن ...الصباح ولا المسا ...ومتى بالضبط اول مانقعد من النوم على الريق ولا بعد الوجبه الاولى ..........انتظركم

والى الامام دوووووووووووووووما وابدا....وبالتوفيق يابنات ياحلوات ..........ابيكم دايم كذا ملتزمات مو مثلي اخبص ..على الاخير

يالله اشوفكم بكره
سلملم

اهلا بعودتنا لكم من جديد
ماراح اطول بس مادري اش فيني انهبلت ....كل ما اذكر ان بكره الميزان احس اني على جمر ....
المهم بعد ردي السابق قمت على طول وسويت تمارين لمده 30 دقيقة ...والحين توي تسحرت ....بس ماكلت روب ...كليت ربع دجاجة على الفحم مع سلطه (خست وطماطم وعصرة ليمووووون ) يم يمي ..والحين امسكت ...
يالله اشوفكم بكره
نستودعكم الله
....

صباح الورد .. هلا وغلا بالجميع
اليوم السبت ومادري حد شاف وزني مثله ولا بعدكم خايفين من الميزان
بالنسبة لي شفت وزني وطلعت نازله كيلو ونص لان ميزاني إلكتروني يحسب
كل شي .. دقيق جداً .. لكن ماعليه النتيجة حلوهة كبداية .. وإن شاء الله مستمره


علكه .. الحريروة يعني الحبة الحمراء .. أكيد الحين عرفتيها :)

حامله الإيمان .. حياك الله .. حلو نظام خفيف
إن شاء الله ينزل وزنج بالصحة والعافية ..

النتيجة الأولي :
من 18 - 10 إلي 25 - 10

كل وحده تكتب كم كيلو خسرت

هنادي دبي = - كيلو ونص


** ** ** ** ** ** **

وبعد أسبوع بنشوف النتيجة الثانية

النتيجة الثانية :
من 25 - 10 إلي 1 - 11

يا بنات وش رايكم بالوزن 50 بليييييييييييز جاوبو

علكه انا اكلي الطبيعي جذي مااكل وايد حبيبتي والله حتى امي تقولي اكل عصافير ههههههههههه


بس اذا من غير رجيم يكون اكل عيش وشوي دسم مثل الحميسه عرفتي وسكر احطه بالشاي اما الحين لا


واليوم اقصد السبت طبعا


شربت ماي حار وليمون اول ما قعدت


وتغديت شوربه وسلطه



وتعشيت توستتين مع طماط وبدنجان

وكان عشاي الساعه امبجر الساعه 7 ونص تقريبا


بس انا يا بنات مااحب اتعامل مع الميزان بس اذا حد شافيني وكنت ضعفانه بيفرق عليه طبعا واقولكم وملابسي بعد راح تحكم

فاانا معفيه عن سالفه الميزان ههههههههههههههههههههههههههههههههههه

هلا والله حبيباتي
وااااااااااااااااي مستانسه حدي ...ادري هبله .........بس من جد انا مادري ايش اسوي
نقصت كيلوين ...والمره الثانيه يوم وزنت يعطيني الميزان اني نقصت كيلوين ونص ...الوزن السابق :55
الوزن الحالي :53
هلا هنادي ....حلوووو وااااايد ...يعني مثلي تمام نقصتي ...كيلو ونص
بس ماعرفت شنهي الحريروه ....وش الحبه الحمرا ...عدس يعني
هلا حاملة الايمان ...ياعصفوره انتي ....يالله ان شاء الله كل شئ معك تمام
وين الباقيييييييييييييييييييين ....انا بكره بهزئهم في الطابور والاذاعه الصباحيه...خخخخخخخخ متأثره بالمدرسه
روتا ...يعني ايش 50 ....وضحي ايش المطلوب
يالله خلونا كده .....مكاقحين ومجاهدين ضد الاكل الدسم ....
..............
النتيجة الأولي :
من 18 - 10 إلي 25 - 10

علكه = - كيلوين
الوزن السابق :55
الوزن الحالي :53
الوزن الذي اطمح له :47

....................متى اشوفك يا(47)..........

بالنسبه لبرنامجي امس السبت كان
المغرب تفطرت نص صحن سلطه ونص كوب مويه ونص تفاحه صغيره ...وش فيني نص نص نص ...والاحلى اني طلعت ومشيت ساعه وااااااااااااااااااااااااااااااااااااااااااااااااااااااااااو ....صفقوا لي
احس بانه انجاز ....ورجعت وماشتهيت اكل شئ ابدا ...الى الساعه 10ونص ..كليت شريحتين بيتزا متوسطين ..وعلبة روب خالي الدسم بالششششششططططططططه مع لحم مشوي ودجاج مشوي ..قطع صغوننين ...وبس الحمدلله
والى الساعه 4 ماكليت شئ الا شاي اخضر
تسحرت الساعه 4 سمكات مشويين ونصف فطيره جبن ونص صحن سلطه ...وكوب مويه وبس
...اراكم غدا مع مخططي ليوم الاحد باذن الله
باااااااااااااااااااااااااااااااااااااااااااااااااااااااي مع حبي

هلا علكه .. يسعد صباحك
مبروك على النزول فرحت كثير عشان نزلتي أكثر مني هههههه
لكن من اليوم بتزيد المنافسة والأسبوع الجاي بنشوف من ينزل أكثر

اختي حاملة الإيمان .. هلا فيك
أوقات كثيره يبين تغير القياس بدون الميزان .. وأنا بعد تفرق معاي
في القياس يعني لما أكون 58 يكون قياسي أكبر من لما أكون 52
والحمدلله على كل حال ..

اليوم فطرت كوب حليب بالنسكافيه .. وبإذن الله بكمل اليوم رجيم
السوائل .. لأنه ينزل الوزن وينظف الجسم ..

وموفقين جميعاً ..

هنادي دبي مررررررررة حلو الموضوع ومشكورة حبيتي

يالله انا وزني 56 وابي انزل ل 45 حلمييييييييييييييييييييي

وبسوي مثل رجيمك بس ممكن تكتبين رجيمك كاااامل

انا باذن الله لراح اكون معكم

بس عندي سؤال انتم متفقين على رجيم معين ولا كل وحده تسوي رجيم على كيفها ؟؟

بس انا مشكلتي مقدر اقاااوم الاكل وبسرعه اجوع يعني الرجيم الي تسوينه ماتحسين بالجوع ؟؟