/////خبرات ومعلومات تخصك يا ماما /////

ما شاء الله تبارك الله

الله يخلي لكم كتاكيتكم يارب

ويا هلا ويا سهلا بالجميع نور الموضوع

طيب ايش رايكم بما ان اغلب المشاكل عن النوم نتكلم عن النوم

من بداية الشهور الى سنه سنه تقريبا

الي عندها طفل عمره اكبر من سنه تتبع الجدول الي بحطه لها

لتنظيم النوم <<< ترااا انا حياتي كلها جداول

بس صدقيني ان هالجدول مدروس من جهات مختصه بالاطفال

يعني راح يوفر الراحه التامه لطفلك وايضا تحافظين على صحته ونموه بشكل طبيعي

////////////////////////////

بسم الله الرحمن الرحيم

نتوكل على الله ,,,

أولا :
حابه إني أدعي لكل متزوجه ما رزقها ربها بالمولود الأول
والله اني عمري ما دخلت موضوع او شفت توقيع لوحده من خواتي
بالمنتدى تطلب الدعاء وما دعيت لها بالذريه الصالحه
وحابه انكم تدعون لهم بظهر الغيب ان الله يطعمهم مما اطعمنا
اللهم آمين اللهم آمين

والله يجعل ذرياتنا من الذريه الصالحه اللهم آمين

///////////////////////////

القسم الأول :::

النـــــــــــــــــــــــــوم ::::

عموما الأطفال خلال الأيام والأسابيع الأولى ينامون عشوائيا لفترات قصيره بين الليل والنهار

ولا تخافين ان ما تعودت انها تتأقلم على تنظيم نومها لفترات طويله ... خصتا بالشهور الثلاثه الأولى ...

أول الحلول يجب عليك تطبيقها :: مباشره

لو خلونا بجحر ما نعرف ليلنا من نهارنا اكيد ما بنعرف متى ننام ومتى نصحى ومتى ناكل ومتى...

صح ؟؟؟

طيب الطفل يحس بنفس الاحساس
لأنه ما يعرف كيف الحياه وما يعرف ان بطلوع الشمس يبتدي يوم جديد على ايام عمره الصغير ...

دورك انتي عزيزتي يا ماما

انك تحسسين طفلك ان الحين نهار وان الحين ليل

كيف ...

في اشياء لازم تتبعينها , بعض النشاطات تسوينها فقط الصباح
وبعض النشاطات تخصصينها فقط لليل

يعني كثير من الامهات بس يصحى الطفل من النوم راح سوت له شور

واليوم الثاني عملت له شور بس بالليل بدل الصباح ...

لا تقولين هذا بيبي صغير ما يحس

بالعكس الله خلقنا واحنا ما شاء الله الأحساس مكتمل

وهذي اول طريقه انك تعملين له نظام شور مثلا بالليل قبل ما ينام بساعه تقريبا

وصدقيني مجرد اسبوع , وراح ياخذ على الروتين

الاستحمام يساعده على استرخاء جسمه الصغير

واكيد لاحظتوا كثير ان الاطفال الصغار بس تحممينه راح يحس انه نعسان ويغفى بسرعه

يعني اكيد البيبي يقول هااا تراااا امي حممتني الحين وبعد اشوي اكيد السالفه فيها نوم :wink:

لانه تعود لمدة اسبوع على هذا الحال ...

كيف يعرف ان الحين وقت النهار ....

وقت النهار خصصي له جزء للعب تقدرين تبتدين بعمر 3 شهور انك تحركين قدامه الاشياء الملونه واللافته للنظر ... اكثر الالوان الي تلفت نظر الاطفال الأحمر ...

وحركي هذي الاشياء من يمين الى يسار وهو يتبع هذي اللعبه منها انك تشغلينه عن البكاء ويعرف تدريجيا ان هذا لعب ومنها انك تقوين حاسة البصر عنده بتتبعه للعبه
وهذا الشي اكيد شفتيه لما رحتي زياره للطبيب

ممكن تقضين وقت النهار بالصاله فيتعرف على هذا المكان جيدا ويحس تدريجيا ان هذا المكان خاص بالفتره النهاريه

وبالليل لفيه جيدا ببطانيه وخذيه لغرفة نومك بعد ما خذتي له شور وبدلتيه وغير

وراح يحس ايضا تدريجيا ان هالمكان مخصص للفتره الليليه وهي فترة النوم والراحه ..

بما ان الطفل اكثر شي يحس بوالدته

خليك بالليل قبل فترة النوم هادئه سواء انك ترضعينه طبيعي او لا

خلي كلامك هادئ ما فيه انفعال وكل حركاتك هادئه لأنه ياخذ على حسب مزاجك

طيب بالنهار وانتي ترضعينه كلميه وداعبي يده
وبالليل قللي من الكلام واللمس ...

وهكذا بيحس ان في تغير بالنسبه للفترات بين النهار والليل ..

تكلمنا بالنسبه للثلاث الشهور الاوليه

وهذي الطريقه اتبعيها الين ما تكمل 6 شهور علشان يسهل عليك المهمه الي بعدها

لأن الطفل كل ثلاث شهور تحسينه يتغير بعاداته سواء النوم او الاكل او البكاء او طلباته واحتياجاته الغير واضحه بالنسبه لك ...


6 شهور :::::

بيكون مسئلة النوم عند الطفل بهذا السن أهم , وكثير من الليالي تحس انها فعلا تعبه وقت ما يحين موعد نومها , لكن برضوا ما تقدر تستغني عن غفوتها النهاريه ...

بفتره الظهريه او العصريه بتنام تقريبا ساعتين او ثلاث على حسب كل طفل
ولكن ان كان نومها منتظم بالليل بتحاول تنام اكثر من 3 ساعات بالنهار تحاول لعل وعسى تخرب نومها هههههه بس كوني لها بالمرصاد

حاولي انك تقعدينها لا تفرحين انك مبسوطه ومرتاحه وقاعده تسوين الي عليك وهي نايمه وتعطينها راحتها لأنك انتي ما تعطينها راحتها راحتها بس بالليل ونوم الليل افضل لها من النهار
احيانا لما يصحى الطفل يكون معصب وماله مزاج ويبكي وغيره

اصبري عليه عطيه مجال يستوعب انه صحى من النوم قبل ما تمارسين معه اي نشاط نهاري
يعني انا اشوف كثير من الامهات بس يصحى الطفل تركض تجيب الرضعه او تجيب الاكل المهروس

او تبي تغير له الحفاض ...

وآخر شي تشتكي تقول ما ياكل ما يشرب حليب !!!

عطيه مجال انه يستوعب كل شي

لأنك لو عطيتيه وجبة الرضعه بعد ما صحى من النوم بتلاقينه يرجع ينام تدريجيا ..
وكأنك ما سويتي شي !!

طيب بعطيكم الجدول لتنظيم النوم للشهر السادس الى الشهر 12 يعني بسن سنه توقفين الجدول وتستمرين على جدول السنه الى 18 شهر وراح احطه لكم برضوا ...

ببتدي معكم بساعات النهار طيب :

7 الصباح تصحينه من النوم الى الساعه 10الصباح

10 الصباح تنومينه بعد ما ياخذ رضعته الى الساعه 11 ونص

11 ونص تصحينه الى الساعه 1ونص

1 ونص تعطينه الرضعه ينام الى الساعه 3ونص

وخلاص بعدها ما تنومينه الى الساعه 8 بهذا الوقت انتي اشغليه

وبالليل بتلاقينه ينام بكل هدوء

هذا الجدول خاص بـــ سن 6 شهور الى سنه

لا تقولون لي مو معقوله ان الطفل بينام طول الليل

لأن بقول لك على شي انتي بتلاحظينه ان بيقعد

ما بين الساعه 4 الى الساعه 5 ونص هذي الفتره بيكون فترة السهر الطبيعي عند الطفل
وبهذي الفتره حاولي تكونين هادئه لا تشغلين التلفزيون وتسهرين معه
مجرد بكل هدوء غيري له الحفاض واعملي له رضعه او ارضعيه طبيعي وققللي لمساتك

واحظنيه بحنان ولا تطلعينه خارج غرفة النوم علشان يحس ان وقت الليل ما انتهى

طبعا الفترات النوم بالنهار نفس العمليه تعملينها انك تنقلينه من الصاله الى غرفة النوم علشان يحس انه وقت القيلوله بالنسبه له ...

بالنسبه للي عندهم مشكله بهز الطفل الين ما ينام ..

اكيد المشكله لها حل بعد ما تعود الطفل يحتاج منك الصبر انك تعودينه على شي ثاني

مثلا انها تحظنه وهي نايمه جمبه وتحط يدها على اذنه علشان يحس بالدفى بس لا تضغطين على اذنه يعني بشكل خفيف

الصوت الي ناتج من لمس يدك لأذنه يحس انه لسه ببطن امه وخلي يدك مرتخيه لأن الارتخاء يكون فيه شي من الهز وهذا الهز ينتج منه صوت وهذا الصوت هو الامان بالنسبه للطفل


كان يسمع هذا الصوت من الماء الي كان موجود بالرحم ونفس هالصوت راح يحسسه بالامان والهدوء ..

عوديه انك ما تشيلينه لأسباب تخصك انتي

يعني تبين تدلعينه وتشيلينه ومعلش فيها احراج لبعض الاهل معك بالبيت

يشيلون الطفل وهو صغير ويعلمونه على الشيل

وبالاخير كله على راسك انتي بتحملينه وبتهزينه على رجولك وكلها نفس العمليه تعب في تعب

ولمجرد الطفل انه ينتبه من نومه راح يحس انه بسريره وما قاعده تهزينه ما راح يواصل نومه وبيطلب عن طريق البكاء انك تستمرين بنفس العمليه وكأنك تدورين بنفس الدائره

من اليوم ورايح وقفوا هذي العاده

وممكن يسبب من كثر الهز خلل بالدماغ لا سمح الله ..

وغير ان الطفل بيحس بتعبك وبعصبيتك طول الليل وبدل ما يهدى وينام راح ينطبع طبعك بطبعه وما راح ينام بيكون لسه مزاجه متعكر على حسب مزاجك انتي

راحتك هي راحته والعكس ..

ملاحظه : اقل الاشياء تخرب تظام النوم عن الاطفال
لما الطفل يكون مريض اتركي الجدول لمده زمنيه معينه الين ما ينتهي فترة المرض
وبعدها ارجعي للروتين

وكل شي يبي له صبر يا ماما بس اهم شي انك تثابرين على هالشي بهذا السن الصغير
افضل لأنك بتهيئينه للعام الاول والثاني وهكذا ..

:::::::::::::::::::::::::::::::::::::::::::::::

نواصل ان شاء الله
بالكلام عن النوم بسن 12 شهر الى 18 شهر وكمان بحط الجدول لتنظيم النوم

لي رجعه ....

هـلا ترانيـم مبرووك على الاشـتراف وتستحقيـه الغاليـة
حبيت أشـارك معاكم..

أنـا ولـدي عمــره 5 شهـور واسبـوع... والحمد لله ما أشكي
من شــي... بس نومـه هالأيــام متلخبــط أول كان ينـام
من الساعـة 9:30 ويقوم الساعـة 3 الفجر أرضعـه وبرجـع ينــام بس
الحيـن تلخبـط يقـوم كل ساعـة أو ساعتيـن أرضعـه وينــام
وما يحـب يشترب العصير بالمرضعـة يحب يشربـه بالكـوب

تستاهلين الاشراف وبجدارة ماشاءالله عليك

....................................

انا ابني الكبير عمره 4,5

وطبعا عنده روضة الصبح وماينام الظهر
يعني لازم ينام بدري علشان يصحى مصحصح
المشكلة انه اكره ماعليه ينام
احيانا ننام الظهر كلنا وهو يجلس على التلفزيون يقااااااوم بشكل غريب
وبالليل نفس الشي يرفض النوم
وبالعافية لما يقتنع وكل ليلة على هالموال

ونفسي يتعودون>الثاني عمره 2,7<على النوم لحالهم
يعني لازم انام معاهم بالغرفة الين مايغفون وبعدين اطلع

..........................

انتظر خبراتك حبيبتي

ماشاااء الله عليك حبيبتي ترانيم موضوووعك وافاداتك طيبة لي عودة لاني مشغولة الان

ماشاء الله عليك

مواضيعك روووووعة....

الان انا متابعة فقط...

الله يرزقني الذرية واستفيد من خبرتك

اولا
احب اشكرك جزيل الشكر على موضوعك الرائع وجزاكى الله كل خير ويارب يجعله فى ميزان حسناتك
ثانيا
عاوزة اعرف ايه موضوع دراستك واستفسار تقيل شويه سنك اد ايه ؟
لانك شكلك عندك خبرة كبيرة فاحب اعرف جبتيها منين

هلا وسهلا بالجميع الي انضموا إلينا

خواتي انا حطيت رد قبل ردكم ان شاء الله قرأتوه

لأني كتبت ان الموضوع متجدد يعني ياريت تتذكرون وين وصلتوا بالصفحات

علشان ما يفوتكم شي ....

وحي الفيروز

ربي يرزقك ان شاء الله بالذريه الصالحه اللهم آمين

///////////////

نبع الحب

واصلي معنا ان شاء الله وراح نجي للنقط الي حابه تتعلمينها

::::::::::::::::

tobe

أهلين عزيزتي
جزاك وجزانا الله الجنه ان شاء الله
بالنسبه للدراسه انا دارسه رياض اطفال
من فترة الحاضنه الى عمر 6 سنوات ...
وايضا درست بزنس هذا ما يخص الي فوق ولكن
لتغير مسار عملي
وآخر شي درسته التمريض بعد ما كملت دراسة البزنس بسنه واحده ...
ولكن ايضا ما عملت وتوجهت الى العمل بمكان اخر
او تخصص اخر ..
لحبي للدراسه عملت لمدة ثمان سنوات كريئيسه إنتساب للخارج للدراسات العليا
بإحدى الجامعات الخاصه ...
::::::::::::::::::::
أما الآن انا ربت منزل
مع احترامي للجميع
هذي الوظيفه هي الي ارتحت عليها طول حياتي
اني اوفر كل جهدي فيه ..
:::::::::::::::::::::::

عندي مشروع دراسه عن قريب عن طريق الأنتساب ... ادعوا لي ان الله يوفقني
خاطري بتخصص ( علم نفس )

::::::::::::::::::::

أما السن ما اعتقد اني راح اقوله ههههههه

ربي يسعدك ويوفقك ان شاء الله

السلام عليكم ورحكة الله وبركاته

مشكورة يااحلى ترانيم على هالموضوع الرائع

على فكرة انا كثير احب مواضيعك وبهتم اني اقرأ خبراتك في البيت لانها فادتني وايد


انا عروس جديدة ,, عمري 24 تزوجت بشهر 8 والحين حامل بالشهر الثالث,,,

كل خوفي يتركز من المرحلة الجاي,, خايفة اني ماادبر مسؤولية البيبي لوحدي,,

مع اني وايد عندي خبرة عن الاطفال,, اخواني كانوا صغار وبعد ابن اختي ,,

بس كمان افكر انو هالبيبي اللي الجاي بيكون بالنهاية مسؤوليتي لوحدي اخاف

اخاف اني اهمل زوجي ,, او اهمل نفسي,,, والاكثر اللي قالقني هو تدخل الاهل,,,

بحياتي وحياة طفلي او باكله وبشربه وبكل شي,,, يعني مشاعري مختلطة بين الخوف والقلق من

المرحلة الجاي,, وكمان من الولادة,, وايد خااااااااااااااااااااااااااايفة انا شفت ولادة ربيعتي ,, ومن هذاك

وانا اتخيل نفسي جي بيصير فيني بس اولد بموت من الرعبة ,, مع انه لسى بدري على الخوف,,

بس شو اسوي,,



اسفة طولت عليج,, بس حابة ادردش معاكم ومشكورة

طيب نواصل الآن قسم

النوم للفتره الزمنيه بين 12 شهر الى 18 شهر

::::::::::::::::::::::

الطفل بهذا السن يحاول قدر الامكان الممانعه في النوم , اكثر فأكثر ...

وممكن شي حصل بالنهار يخليها ما تنام بالليل , لأن سن الطفل اصبح يعي بعض الاشياء حوله

مثل اللعب او سماع الاصوات او حركات التلفزيون الغير مفهومه بالنسبه له ..

كل هذا له تأثير على الطفل وقت النوم ليلا ...

كثري طقوسك ما قبل النوم بهذه الفتره مــــــــــثلا :

1 - يستحم علشان يرتخي جسمه .
2- عطيه الرضعه الطبيعي او الصناعيه بالصاله مو بغرفة النوم عكس ما كنا نسويه للاطفال ما بين 6 الى 12 شهر والسبب انه يعي بعض الاشياء إن عطيتيه بغرفة النوم راح يحس انه راح ينحرم من كل شي علشان ينام وبهذه الطريقه بيحاول قدر الامكان ان يمنع نفسه من النوم .

3- بعدها اخذيه لغرفة نومه اركز على غرفة نومه وان ما كان عنده غرفة خليه بسريره بس للأسف الكثير من الخوات ينومون اطفالهم بحضنهم على سرير الزوجيه وهذا غلط وبكره بيتعبون انه يبعدونه عن السرير ..
لما تحطينه بسريره خلي جمبه لعبه صغيره من القطن علشان ما يحس انه لحاله ولا تنسين بعد ما ينام تبعدين اللعبه عنه علشان يسهل عليه النوم بكل راحه ...

4- حاولي انك تسوين كل هالطقوس مو متأخر علشان يمكن ياخذ له وقت الين ما يرضى ينام علشان ما تخسرين الفترة الليليه كلها وانتي تحاولين نومه ..

5- الأطفال بعد السنه علميه ان تقرأين له قصه فيها صور جميله وان يكون صوتك هادئ
مع تكرار هالعمليه ليليا راح يعرف ويطمئن الطفل ان هذا وقت النوم بالنسبه له
اكيد الطفل ما يعرف القصه او كلامك ولكن يستمتع بسماع صوتك الهادئ قبل نومه
ونفس الوقت يقتنع انك عطيتيه الجزء الهام بالنسبه له قبل ما ينام .

6- لما تخلصين القصه بوسي كتكوتك ونوميه ولا تطلعين على طول من الغرفه خليك موجوده عنده الين ما يغفو
وتدريجيا بعد اسبوع او عشرة ايام راح تلاحظين انه بسرعه ينام لأنه متأكد من تواجدك غلط ان الوحده منا تفكر ان هالطريقه راح تنجح من اول مره الصبر شي زين بهذي الامور واعتقد صبرك بالغرفه معه افضل من صبر السهر .

وقت ما تكونين بالغرفه معه سكري الانوار وشغلي نور النوم الخاص الخفيف علشان ينام بسهوله


لما تحسين ان طفلك ما يبي ينام لا تتكلمين معه رجعيه لسريره ونفس الطريقه الين ما يتعب وينام

ولا تخافين انتي ما تسيئين معاملته ابدا ...


:::::::::::::::::::::::::::::

هذي جدول للسن ما بين 12 شهر 18 شهر

يصحى الساعه 6 الصباح من النوم الى الساعه 9 ونص
من 9 ونص ينام الى الساعه 11
يصحى الساعه 11 الى الساعه الى الساعه 2
من الساعه 2 ينام الى الساعه 3
وبعدها تصحينه وتلعبين معه وتهتمين بأمور اطعامه وغيره من النشاطات

وتنومينه من الساعه 8 بالليل
وصدقيني بيكون جاهز للنوم

في بعض الاخوات يمكن ما تقتنع انه ياخذ كل هذا الوقت من النهار بالنوم
وبالاخير الفتره الليله اكيد بيكون شبعان
لا يا اختي انتي تنظمين نومه وتهيئينه لنوم الليل
ولازم الطفل يحتاج للنوم بالفتره النهاريه علشان ما يكون مزاجه متعكر
وبيبكي طول فترة صحيانه
واخر شي بالليل ما بينام لأنه تعب من الحركه او اللعب
بيكون تعب من البكاء
يعني بينام مؤقتا ويصحى لأنه مو تعبان لأنه ما سوااا شي
غير البكاء بالنهار ..

:::::::::::::::::::
النشاطات الي ممكن تسوينها بفترة ما يكون طفلك صاحي بالفتره النهاريه

النشاطات الي يهتم فيها الطفل بهذي الفتره

منها اللعب بالعلب الكرتون المربعه يحب انه يتفحصه من كل الجهات
واكيد لاحظتوا هذا الشئ لما تشترين له لعبه جديده يهتم بالعلبه اكثر من اللعبه

والنشاط الثاني
ممكن انك تعطينه ملعقه خشب وقت انشغالك بالطبخ وطنجره وانتي ابتدي انك تطلعين الاصوات له
علشان يتعلم كيف يلعب بالملعقه والطنجره يعني العبي معه بهذي الادوات مثل الطبل يستمتعون الاطفال
بهذي الاشياء خصتا ان الصوت الي يطلع من الطنجره يفرحهم ويخليهم يعيدون الكره بعد الكره وينشغلون وانتي تطبخين ولكن ديري بالك عليه بفترة انشغالك

النشاط الي بعده

عطيه مجلات
اكيد ما يعرف يقرأ ولكن الاطفال يستمتعون بالتصفح ومشاهده الصور وانصحك
بمجلات سبيس تون وماجد او احمد لانه فيه صور حلوه يلفت نظر الاطفال بهذا السن

النشاط الي بعده :

الحبو اكيد يحب انه يحبي وقت ما تكونين انتي بعيده عنده

النشاط الي بعده :

عطيه كوره كبيره ودحرجيها اليه وهو يدحرجها اليك وبهذي الطريقه يتعلم اللعب على الكره
ونفس الوقت يستنفذ نشاطه الين ما يجي وقت نومه .

عطيه مكعبات كبيره الحجم الي يصعب ابتلاعه
عطيه دلو فيه ماء واشياء داخل الدلو من الالعاب الكبيره
الاطفال يفرحون ويمرحون بالماء

كل هذي النشاطات يخليه يتعب الين ما يحل عليه الليل ...

::::::::::::::::::::::::::::::::

لي رجعه ان شاء الله

ترانيم

هلا حبيبتي
موضوع مممتاز كالعادة

دائما موفقة بمواضيعج

وبصراحة عجيبة

ومن اشوف موضوع باسمج ادخله علطول لانج تتحفينا بنصايحج

ولدي علاوي عمره 6 شهور وشوي

مشكلته تعود على ان احد يحمله ويفتر فيه وساعات احنا نتعب اذا علطول حمله
مايحب الا نلعبه يعني لو ثانية باعدنا وجهنا عنه صاح
ودي لو يشرب صناعي اوقات الضرورة لين بطلع عنه او اخذه معاي عشان ايقعد يصيح بالاماكن العامة
ولدي مايحب الاكل المخلوط يحب نوع واحد من الطعام
والصبح لين اقعد من النوم يقعد معاي ولايخليني ارتب بهالبيت
وايرضى ينام الا معاي
ونومه ينحسب بالثواني ماينام الا شوي بس وبسرعة يقعد فما اقدر اسوي شي له

اول شي اشكرك اختي ترانيم

على مواضيعك المميزه

و مشكوره على دعائك لنا نحن المتاخرات بالحمل

ربي يطعمنا و ما يحرمنا

و ان شاء الله يكون موضوعك هذا يفيدنا بالمستقبل باذن الله

اذا الله كتبلنا الحمل و الذريه الصالحه

اول شي ان شاء يرزق كا محرومة بالذرية الصالحة عاجلا غير اجلا و اولهم اختي انوار الحب

و ثانيا ابدعتي يا ترنيم شكرا لك

بس بالنسبة للنوم بغرفة لحاله من عمر سنة ما راح تكون متاخرة شوي و ممكن ما يرضى ينام فيها؟

الله يعطيك العافية وتوفقي بين هالموضوع والبيت
ماشاء الله عليك طويلة بال
الصراحة موضوع قيم ومفيد جداً
والكل حيستفيد وانا قريت كل شئ كتبتيه وبظل اقرى إن شاء الله

أنا ركوني الله يخليه ليه
عمره 9شهور
الحمد لله موضوع النوم هذا تغلبت عليه من الشهر الخامس
وصار ينام لحالة بدون رضعة وبدون ما اكون جمبة
تعبت صحيح لكن عدة
بس اكيد اواجه مشكلة مع النوم إذا طلعت برى سهرة ولا تأخرنا بمشوار
يتخربط شوي نومة بس مايتعبني
مشكلتي مع ركونة وين

مــشــــاغـــــــــــــــــــــــــــــــــــــب

مايخلي شئ إلا يمسكه ويخربة
صار يعور قلبي قد ما احبسه بسرير اللعب بالصالة
لو نزلتة المطبخ بهذل الدنيا وفتح الأدراج وطلع كل شئ وفتح الفرن وحالة
والصالة على طول على التلفزيون يسكرة ويمسك كل شئ بطريقة
ولو أخليه بغرفته بالأرض
ما حقولك كيف يخلي المكان
عنده العاب الدنيا
على طول يروح للدولاب يطلع كل جزمة وملابسة وبجاماته وكل شئ كل شئ
ويقعد ينبش فيهم
اخ ياريت القى عندك حل لهالمشكلة
وعساك على القوة يارب ....


تحياتي القلبية لك

انا ام لبنتين وحدة عمرها سنة والثانية اربع سنوات

حبيت انضم اليكم واستفيد

اول شي اشكرك اختي ترانيم

على مواضيعك المميز

انا عندي بنتين بسم الله عليهم والله يخليهم حقنا

وحده اسمها فاطمه عمرها سنتين واربع اشهور هذي عنييده مشالله عليها وماتسمع الكلام وحده امنه سبع اشهور

واشكرج على المجهود الكبير

بنت الرافدين

الله يقومك بالسلامه إن شاء الله

بقول لك على شي بالنسبه للشهر الثامن

كل الملاحظات الي كتبتها الي حصلي بحملي سواء المولود الأول او الثاني

بالنسبه لهذا الشهر
تحتاجين للراحه التامه عكس باقي الأشهر
واكيد تحسين بتعب وارهاق وتحسين ان صبرك نفذ من الثقل
بالنسبه لطفلك عزيزتي حاليا اكتمل بالكامل وصار جسمه متناسق مع رأسه
وبهذا الشهر يختزن الدهن تحت بشرته الناعمه
ولهذا تحسين انك ضخمه جدا الى نهاية الشهر الثامن
بالنسبه لوضعيته هو خلاص ان شاء الله رأسه نزل بالوضع الصحيح استعدادا من الآن للولاده بشكل رأسي ولكن جسمه مائل الى الخارج علشان كذا يكون بطنك طالع برااا اكثر من الشهور السابقه ...

بالنسبه لك انتي وزنك بزيد اكثر خلال هالشهر حاولي انك تقللين من تناول اي شي فيه كربوهيدرات والمشروبات الي تحتوي على حليب هذا اذا كنتي تكتسبين وزن اكثر من وزنك السابق بالشهور الي مرت عليك

طبعا كلما يكبر الطفل تكبر المشاكل
مثل ضيق التنفس خصتا وقت النوم والحاجه للذهاب للحمام كرمك الله واحيانا بيرشح منك بعض البوم بشكل غير إرادي وهذا شي طبيعي لأن الطفل ووزنه الطبيعي يضغط على أجهزتك الداخليه

واكيد سرتك طالعه على براا الآن اكثر من الشهور السابقه
ولكن لا تخافين من الولاده الحين بهذا الشهر يستعد حوضك انه يتوسع تدريجيا الى نهاية الشهر التاسع ليسهل عملية مرور راس الطفل بسهوله وخروجه وقت الدفع ...

نصيحه لك يا اختي وقت الولاده

تنفسي من الأنف واخرجيه من الفم وقت الألم ركزي على التنفس بدل الصراخ
وقللي من صراخك لأن امامك الكثير من الجهد لازم تسوينه وقت الدفع
بولادتي الاوليه ما عرفت كيف عملية الولاده وكنت اصارخ من اول الولاده الى اخر شي
ولكن وقت الدفع كنت مستهلكه كل طاقتي بالصراخ سابقا علشان كذا كنت تعبانه مو مركزه بالدفع
وبكذا اخسر الكثير من الوقت بدل التركيز بالدفع كنت خلاص ما اقدر اني اصبر ويطول الوقت

لكن بالولاده الثانيه ركزت على التنفس من الانف وخروج الهواء من الفم
سبحان الله هذي الطريقه تقلل كمية الألم وقت الطلق
ومنعت نفسي من الصراخ واشغلت نفسي بالدعاء ومسك قضبان السرير والصبر

ووقت الدفع الحمدلله قدرت اني احط كل قوتي للدفع وانتهت فترة الدفع بكل سهوله يعني ما اخذ الوقت مثل الولاده الاولى بالنسبه لي

خوفك يا اختي بالنسبه لتدخل الأهل بعلاقتك بطفلك شي طبيعي
ولكن مهما سمعتي انتي صاحبة القرار الأخير بكل شئ يقدم او يأخر بأمور طفلك
لا تتأثرين بكل كلمه او رأي يخص موضوع الاطفال ولعل بعض التجارب الجديده مفيده اكثر من القديمه لتسهيل عملية اكتساب الخبرات الي تخص الأمومه تدريجيا

والحمدلله المنتدى فيه الكثير من الامهات الواعيات وتقدرين تستشيرين الكثير من الاخوات
وكلنا معك ان شاء الله

والله يقومك ان شاء الله بالسلامه
وعلى فكره ربيعتك الي ولدت مو شرط انك تكونين مثلها
كل ولاده تختلف على الثانيه
يعني في بعضهم ولادتهم تاخذ وقت طويل وفي ولادات ما تاخذ وقت طويل
وفي بعضهم عندهم قوه انهم يستحملون الألم وفي بعضهم عندهم البديل الصراخ واستفاذ القوه

اقنعي نفسك من الحين وقولي انا ما راح اصارخ
ركزي على التنفس الصحيح مثل ما قلت لك
والباقي ان شاء الله على رب العالمين
ولا تنسين انك تدعين لي بالولاده ان الله ييسر لي اموري ويوفقني


ربي يقومك بالسلامه ...

امونةة;5104163:
ترانيم

هلا حبيبتي
موضوع مممتاز كالعادة

دائما موفقة بمواضيعج

وبصراحة عجيبة

ومن اشوف موضوع باسمج ادخله علطول لانج تتحفينا بنصايحج

ولدي علاوي عمره 6 شهور وشوي

مشكلته تعود على ان احد يحمله ويفتر فيه وساعات احنا نتعب اذا علطول حمله
مايحب الا نلعبه يعني لو ثانية باعدنا وجهنا عنه صاح
ودي لو يشرب صناعي اوقات الضرورة لين بطلع عنه او اخذه معاي عشان ايقعد يصيح بالاماكن العامة
ولدي مايحب الاكل المخلوط يحب نوع واحد من الطعام
والصبح لين اقعد من النوم يقعد معاي ولايخليني ارتب بهالبيت
وايرضى ينام الا معاي
ونومه ينحسب بالثواني ماينام الا شوي بس وبسرعة يقعد فما اقدر اسوي شي له

الله يخلي لك ولدك ان شاء الله ويحفظه

بالنسبه للنوم كتبت كل شي عن سن طفلك والاوقات الي المفروض ينام فيها وكيف تنومينه

وبالنسبه للأكل يا اختي وقت ما يكون مره مره جوعان قدمي له الاكل الي ما يحب ياكله يعني نوعي له الاكل وقت جوعه وقتها ان شاء الله بياكل ..

وبالنسبه لشيلانه وحطته وانتوا تشيلونه اختي وقفي هالعاده حالا
وتدريجيا بينسى ولا تشيلينه ولا تتنازلين وقت بكائه انك تغيرين رايك
اشغليه بأشياء ثانيه ...

بالنسبه لنومه الي ينحسب بالثواني
السبب عدم انتظامه على جدول معين
يعني طفلك متى ما نمتي نام ومتى ما قعدتي قعد
قللي نومك بالفتره النهاريه وكثريها بالفتره الليليه علشان ينتظم عنده النوم

ولا تعودينه ان تنامين معه هذي الطريقه خطأ يا اختي

انتي بس خليه ينام وقت ما تسوين كل الي كتبته بالصفحه الثالثه ياريت تشوفينه ...

الله يحفظ لك ولدك ويخليه

انورا الحب

ان شاء الله يا اختي ما يخلص هالسنه الا وانتي والده ان شاء الله
ما شاء الله على صبركم ان شاء الله هالصبر مفتاحه الفرج يارب
وكلنا ندعي لكم بظهر الغيب والله يرزقكم ان شاء الله ويطعمكم بمولود تفرحون فيه ان شاء الله

اللهم آمين



ابرار الجنه

مو علي كيفه ما ينام ويعاند هههههه

كل شي يبي له صبر

بالنسبه للأمهات الي يرضعون طبيعي انصحها بسن السنه تعزل طفلها وقت النوم بغرفته الخاصه

بالنسبه لي ولدي عزلته بغرفه بعد ما كمل سنه
اما بنتي عزلتها مع اخوها بسن 8 شهور

بس صدقيني بسن السنه فيها تعب بالبدايه ولكن الصبر يسهل كل الامور ان شاء الله
اهم شي انك تثابرين انك تنومينه حتى لو كان رافض بالبدايه ولكن انا دائما اقول ان مدة اسبوع
لكل محاوله سواء بالنوم او الاكل او الاشياء الثانيه هالمده كافيه ان الطفل خلاص يتعود على النظام

بس اهم شي ان الأم تحس انها هي المسيطره على الطفل مو العكس بكل شي

::::::::::::::::::::::::::::::::


في اخت سئلتني عن كيفيه تعويد الطفل على النونيه
علشان تستغني عن الحفاضات

اول شي سيطري عليه نهارا

يعني بالنسبه للأولاد اكثر شي من الاطفال الذكور يكونون جاهزين لهذي العمليه ما بين السنتين ونص الى ثلاث سنوات عكس الاطفال الإناث يكونون جاهزين بالفتره سنتين الى سنتين ونص

أول شي يبين على الطفل انه جاهز للمهمه
لما يأشر على حفاضته ويعلمك انه عملها ههههههههه
هذي بواشر خير انه يعرف ان في شي بالحفاضه

او الإشاره الثانيه انه يصحى الصباح وهو لسه ما عملها يعني انه
مستعد إنك تعلمينه دام يسيطر على نفسه ليلا

اول شي اشتري نونيه
ورجيه اياه علميه هذا الشي يخص الحمام
وما يخص اللعب عليه
يعني خصصي له مكان بالحمام لا تخلينه خارجه علشان يتعلم ان هذا الشئ مخصص لقضاء حاجته

بعدها علميه كيفية الجلوس عليها

ولا تأمرينه على طول بعد شرائك على استعماله مباشره بنفس اليوم

خليه يتعود انه يشوفه بالحمام كأي قطعه اساسيه في الحمام

بعدها لازم تتفرغين لهذي المهمه على الأقل اسبوعين الى ثلاثه اسابيع

وبهذا الوقت قللي خروجك من البيت والرحلات والزيارات علشان ما تضطرين للبسه الحفاضه

البسيه بالفتره النهاريه صروال قطن وذكريه كل مره بإستخدام النونيه

يعني بس يشرب بعدها بعشر او خمس دقايق
ذكريه بالنونيه وقولي له عن جوائزك له لما يستخدمها بكل مره

او كل ما تصورتي انه يحتاج للذهاب الى الحمام ذكريه به

ولما توقفين وانتي تنتظرينه لا تبتعدين كثيرا عنه

واصبري عليه ولا تتكلمين كثير معه وقت ما يستخدم النونيه

واذا طلب مساعدتك بشي اشكريه انه طلبها منك

علشان يحس انك فخوره فيه

ولما يخلص مهمة قضاء حاجته بيني له انك سعيده وطايره من الفرح



ولا توبخينه او تصارخين عليه اذا طول قعدته او اذا سواها خارج النونيه

فمهما يكون هذا طفل مو كبير ...

كوني معه لطيفه وصبوره وان شاء الله اشوي اشووي راح يستغني عن الحفاض


بالنسبه لسؤلك عن وقت ما تغيرين له الحفاضه حاليا ما يرضى

السبب يا اختي انه يبي يلعب معك

يعني تعالي اجري وراي

وانتي فعلا هذا المفروض انك تسوينه

اجري وراه الين ما تمسكينه

ولكن وقت ما تغيرين له الحفاض قبل ما تلبسينه

العبي معه بالدغدغه والكلام والضحك

وقتها بدل ما تركضين وراه راح يجيك على طول

لأنه بيعرف ان فترة تغيير الحفاض فتره ممتعه لأنك بدغدغينه وبتضحكين معه ...

:::::::::::::::::::::::::::::::::::

لي رجعه ان شاء الله نكمل بكره

مرحبا ترانيم ويسلمو على الموضوع الجميل اناعندي نصور وعمره سنه وسبعه شهور مشكلتي معاه انه شقي حيل وبس يضرب الاطفال اللي بسنه او اكبر مثل امه مادري ليش يمكن انه دلووع زياده ومابيسمع كلامي نفسي اعلمه انه هذا الشي خطا ومعاد يكرره بس كانه يحب ينرفزني يكرره مره واثنين وثلاثه ......الله يصلحه ساعديني شسوي معاه

الغالية ترانيم

فديت قلبج على مواضيعج الحلوة مرة

انا لو اقول لج شلون نظامنا انا وولدي وزوجي العزيز

كان اتيين السعودية ترأفين بحالنا وتسوين لنا جدول تنومينا كلنا


الحين كتبت ردي 4 الفجر بقوم انام الى 10

وبكتب لج شلون حياتنا مقلوبة فوق تحت ..

تصبحين على خير