تجمع بنات مصر المتاخرات عن الحمل

ربنا معاكى إن شاء الله حاولى تستمتعى بوقتك على قد ما تقدرى يا نونا و عيد سعيد عليكى يا رب و يا رب ربنا يرزقنا جميعا الذريه الصالحه يا رب اللهم أمين يا رب العالمين

أيه يا بنات محدش بيدخل ليه عاملين أيه وحشتونى أيه أخباركم أزيك يا نونا عامله أيه؟؟؟؟؟؟؟؟؟؟؟؟؟

انا الحمد لله كويسة
و ماشيه ع البرنامج بتاع الرقيه
و سورة البقرة
انتي اخبارك ايه يا رونا مع الدكتور بتاعك
؟؟؟؟؟؟؟؟؟؟؟؟؟؟؟
طمنيني عليكي
انا ملاحظه ان مافيش حد بيدخل التجمع تقريبا
مش عارفه ليه كده؟؟؟
ربنا يدينا كلنا الذرية الصالحه الشهر ده
و يفرحنا في الايام المفترجه دي يا رب

و الله كله تمام الحمد لله ماشيه على حقن تحت الجلد و حقن المنشطات و كمان كان كاتبلى أنا و جوزى شويه مضادات حيويه و الله يا نونا كانت بتخلينا مدروخين على الأخر بس الحمد لله على كل حال لسه كنت عنده أول إمبارح لقى المبيض عندى مطلع بويضات كتي بس صغيره يعنى ملهاش لزمه فكتبلى برشام إسمه سيدوفاج و قالى إن البرشام ده بيقلل نشاط المبيض و بيقلل عدد البويضات اللى بتطلع الواحد مبقاش فاهم حاجه بس عارفه أنا بنفذ اللى بيقوله و خلاص و يا رب ميضعش تعبى على الفاضى لإنى والله تعبت من كتر الحقن و ربنا يكرم يا رب وانتى أيه أخبارك عامله أيه و جوزك جيه ولا لأ وعملتى أيه فى العيد ؟؟؟؟؟؟؟؟؟؟

انا كويسه الحمد لله
وجوزي جه في العيد و ماشي اخر الاسبوع
يوم الوقفه كنا صايمين وهو جه ع الفطار على طول
و اول يوم العيد خرجنا واتفسحنا و كله تمام
تاني يوم العيد قاللي انه عاوز يريح في البيت
المهم انبسطنا و رجعت على الشغل و انا نفسي اقعد معاه
بس هاخد اجازة ان شاء الله اليومين اللي فاضلين
و ربنا يبارك في الكام يوم دول
يا رب في الايام الجميلة دي يكتبلنا كلنا نحمل حمل سليم ثابت و تكون نتيجته طفل صالح سليم معافى كلنا يا رب و يا رب تراضي كل واحده نفسها في طفل يارب

يا رب يا نونا يا رب يسمع دعائك يا رب و دعائى و دعاء كل واحده نفسها فى طفل يا رب و يا رب يطرح البركه فى الكام يوم دول يا رب و يرزقك الذريه الصالحه يا رب اللهم أمين يا رب العالمين

اللهم امين اللهم استجب لدعاءنا يا رب

و الله انا نفسي كلنا نحمل من غير ما نتحوج للدكاترة
دول طلعوا عينا و بهدلونا من كتر الدوا اللي بيوصفوه

ربنا هو الطبيب الشافي و الرزاق
و ان شاء الله يدينا الذرية الصالحة من غير ما يحوجنا لحد

يا رب يا نونا لأنى مش مستحمله يأس تانى والله عارفه تعبت و نفسى أفرح لأنى مريت بحاجات كتير كلها غلط من الدكاتره حتى الإجهاض كان بسبب غلطه دكتور فزهقت منهم ومبقتش بثق فى كلامهم بس فوضت أمرى لربنا و متوكله عليه بس عشان جوزى بيقعد فتره صغيره مقدرش أقول إنى مش هروح لدكتور فإدعيلى إن ربنا يكرمنى بالحمل تانى و يرزقنى ببيبى صغير يونسنى و يملى عليه حياتى و يا رب يا نونا ربنا يكرمك أنتى كمان بالحمل و كفايه علينا بعدنا عن أزواجنا و ربنا كريم و إن شاء الله هيكافإنا على صبرنا و رضانا كل خير يا رب اللهم أمين يا رب العالمين

ربنا ان شاء الله يرزقك يا رونا وتحملي على طول من غير تعب و يثبت حملك ويرزقك الولد الصالح السليم المعافى اللي يملا حياتك فرح و مرح و انا كمان باذن الله و كل العرايس في المنتدى اللي نفسهم في الذرية

أزيك يا نونا مقلتليش أنتى بتشتغلى صح بتشتغلى أيه شوفى يا ست أنا مهندسه كمبيوتر و حاليا قاعده شويه فى البيت لحد ما أسترد صحتى و بعدين هرجع الشغل تانى و أنت؟؟؟؟؟؟؟؟؟؟ و بتروحى لدكتور ولا مكبره دماغك من الدكاتره

انا بشتغل محاسبة في شركة مقاولات و دوامي طويل و صعب
و بتابع لما جوزي يكون موجود او قبل ما ييجي بشويه
و بكبر دماغي لما يكون مش موجود فترات طويله
و الحياة ماشيه على كده
بس المشكلة اني تعبت والله من الدكاترة
تعبو اعصابي وبهدلوني من الادويه
و كمان كلام الناس مع ان جوزي مش موجود معايا طول الوقت
ربنا يصبرنا ويكرمنا ان شاء الله

والله العظيم حاسه بيكى معلش ربنا معانا و يكرمنا يا رب عن قريب و نحمل يا رب عشان الناس تبطل كلام مع إن صدقينى مش هيبطلوا كلام و هيدوروا على أى حاجه يتكلموا عنها و أشغلى نفسك فى شغلك و ربنا معانا يا رب اللهم أمين يا رب العالمين

الحمد لله على كل حال
اكيد ربنا عارف الخير فين
و انتي عامله ايه مع عيلة جوزك
تعرفي انا نفسي ربنا يكرمنا و نحمل عشان نسكت كل الناس دي
و لو انهم بعد الطفل الاولاني برده بيقعدوا يزنوا عشان التاني
هم ليه شاغلين بالهم بينا ليه؟
يا رب يا رحمن يا رحيم يا قادر على كل شيء ارزقنا بالذرية الصالحة يارب و صبرنا على الابتلاء ده

شوفى يا ستى أنا عيله زوجى بعيد عنى شويه فى المنصوره أما مامته و إخواته هم بس اللى موجودين فى إسكندريه بس من ساعه موضوع الإجهاض و اللى جرالى فيه و بصراحه مامته على طول تقولى متفكريش ووقت ما ربنا هيريد هيحصل حمل و بابه مش بيتكلم عن الحمل خالص و لكن المشكله عندى فى أهلى أنا تصدقى مش بابا و ماما لأ عيلتى هم اللى مش سيبنى و على طول يسألوا حتى لما الدكتور كتبلى مانع حمل ماما بقت تقولهم كده و برده بقوا عاوزين يعرفوا ليه عارفه بقيت مبحبش أقعد معاهم ولا أروح عند حد بسبب الحوارات دى و عارفه عندى بنت خالتى متربيه معايا عرفت إنها حامل بالصدفه مع إن مامتها كل يوم عندنا تصدقى مع إنها عارفه أد أيه الواحد بيتمنالها الخير بس الواحد هيقول أيه يا رب يكرمنا بالحمل عشان كل واحد بيتكلم يبطل يتكلم يا رب اللهم أمين يا رب العالمين و أنتى عامله أيه فى الرجيم لسه شغاله فيه ولا بطلتيه

تعرفي نفس الموقف اللي بتحكي عنه ده حصل معايا و برده بنت خالتي ماقالتليش انها حامل الا لما خلصت التالت و بنت خالة جوزي تصوري برده تقعد ترغي في التليفون كل يوم معانا و في الاخر اكتشف انها حامل في الشهر التاسع تصوري؟؟؟ مع انها جربت اللي انا فيه قبل كده لانها ماخلفتش الا بعد اربع سنين من الجواز

لا حول ولا قوة الا بالله
انا مش عارفه الناس اللي وحشين وللا احنا اللي بقينا حساسين زيادة عن اللزوم
عموما ربنا كبير و كريم و ان شاء الله يعوض صبرنا خير

بالنسبة للريجيم ساعات امشي عليه وساعات بزهق منه
بس ربنا يسهل وانتظم عليه
يا رب قويني و صبرني

معلش يا نونا هو ربنا بيختبر قوه إيماننا بيه و صبرنا الحمد لله على كل حال بس عارفه أنا قررت إنى أعامل الناس بالمثل بالرغم إن دة مش من طباعى بس كل واحده خبت عليه إنها حامل لما ربنا يكرمنى مش هقولها حتى لو عرفت من الناس اللى حوليها أنى حامل و أنا مقلتلهاش مش هيفرق معايا لإنى مش عارفه الواحد هيفضل طيب مع الناس لحد إمتى يحرجوه و يسألوه فى حاجات ملهومش فيها و كأن حملك أو عدم حملك هيعود عليهم بحاجه المهم و هبطل كل ما حد يتكلم معايا و يحرجنى أمام أى حد إنى أبتسم و أقول ربنا يكرم عارفه بعد كده هرد و هقولهم لما ربنا يأذن أنا اللى هقولكم مش هستنى إنكم تسألونى لأنى إتخنقت المهم سيبك أنتى عامله أيه و أخبار الرجيم النص كم اللى أنتى عامله أيه على فكره جربى خل التفاح كل يوم معلقه صغيره على فنجان ميه كل يوم على الريق تحفه هيعجبك إن شاء الله و ربنا كريم ويا رب يكرمنا بالذريه الصالحه يا رب اللهم أمين يا رب العالمين

على فكره يا نونا إحنا مش حساسين زياده عن اللزوم ولا حاجه بس الناس مش المفروض كل شويه يسألونا ما لو إحنا حوامل هنقول لأن الحاجات دى مبتتخباش ولازم يكون فيه مراعاه لمشاعر الأخرين مش كل واحد يفكر فى نفسه وبس المهم طولت عليكى بس لأن الموضوع ده فعلا خانقنى و حبيت أفضفض معاكى

و الله الموضوع ده خانقني انا كمان و ما بصدق ان حد يكلمني فيه بقعد اتكلم واعيش حياتي ... المهم انا هحاول اجرب خل التفاح مع اني مش بطيق ريحته بس هحاول ان شاء الله لاني عاوزة اخلص من التخن ده برده الواحد مش ناقص تخن كمان على الي هو فيه. انتي عارفه يا رونا انا كان نفسي اوي احمل الشهر ده لما جوزي جه بس ربنا ماكتبش. كنت نفسي ابقى حامل عشان جوزي لما بيسافر بيجيلي اكتئاب و بكره الحياة و كان نفسي حاجه تشغل وقتي وتاخد كل مجهودي بس سبحانك يا رب اكيد ليك حكمة ف كل ده. لا اله الا انت سبحانك اني كنت من الظالمين. يا رب يا قادر على كل شيء هب لنا من لدنك ذرية طيبة انك سميع الدعاء. آآآآآآآآآآآآآآآمين يا رب العالمين.

معلش يا نونا و الله العظيم أنا حاسه بيكى لأن جوزى بيجهز ورقه عشان يسافر و مش هشوفه إلا بعد 6 شهور و بتخنق جدا من القعده لوحدى و من الفراغ اللى فى حياتى وخصوصا إنى سيبت الشغل من ساعه الحمل الأولانى فمقولكيش على الزهق اللى بحسه لما بيسافر بس هنعمل إيه قدرنا كده ربنا معانا و يصبرنا يا رب و يعوض صبرنا خير يا رب اللهم أمين يا رب العالمين

ازيك يا رونا اخبارك ايه
تعرفي يا رونا على قد مانا بكون فرحانه ان جوزي معايا بضايق من كلام الناس لما بيكون معايا قال ايه بقه ماعنديش حجه و ليه مش بحمل بقه والكلام الفاضي اياه
ماعلينا الناس كده كده بتتكلم
بس بصراحه انا برتاح لما بتكلم مع حد منكم هنا في المنتدى بحس ان في حد حاسس بيا شويه
ربنا يكرمنا ان شاء الله و نحمل و نخلف احلى عيال و يعوضونا عن ايام الحرمان
يارب استجب لدعاءنا يا رب