تجمع حوامل الشهر التاسع - فقط -

sounya;3914298:
هلا كروشات..
سوسو..ام عبادي ..غروب يارب تكونوا ولدتوا :clap:
غلا ..شخبارك يالغالية ..يلا هانت كلها كم يوم
ام فجورة..شروق انتوا ولادتكم نفس اليوم يارب ..تولدوا اليوم قبل بكرة
ام مهند..هلا بالغالية ..صح كلامج عاد بعدما تفرقوا الجميع صرنا ندخل ونشارك قليل بس يلا ان شاء الله نجتمع في رابطة الامهات

اما انا فدخلت بارحة بالاسبوع 38 .. وغير الالام الي مالية جسمي صار عندي حكة شديدة وعملت فحوصات وطلعت سليمة وقالت لي دكتورة هاي حساسية حمل..ياربي مااقدر انام من كثر الحكاك وحتى مرات من كثرة شدة الحكة اجلس احك بقوة لحد مايدمي بس شو اسوي والله مااقدر استحمل:sad: دكتورة عطتني كم من كريمات بس قالت لي هاي ماتروح الا بالولادة واذا مامستحملة بسويلك طلق صناعي.. بس عاد انا خفت.. الحكة ومؤلمة والطلق صناعي بعد مؤلم ماعندي حل افضل
وكانت تبي تفحصني بس انا مارضيت ..عاد خوافة انا:eeksign:
يلا شو نسوي نستحمل

هلا بسونيا

سلامات الغالية
عاد في الاخير كل شئ يطلع
شو هاذي بعد حساسية الحمل الله يعطيك الصبر عليها ويخفف عليك ومأجورة حبيبتي

ومبروووووووك عليك قصر المشوار ودخولك الاسبوع 38 الله يعدي الايام علينا
وعليك يارب
ولا تحتاجين لطلق صناعي او غيره

بنات ممكن استفسار ..............

ممكن الوحده مايجيها الم ووبيوم واحد يجيها الالم وتكون ولاده ؟؟؟؟؟؟؟

ولا لازم يتكرر عليها الالم كذا يوم ؟؟؟؟؟؟؟؟؟

صباح الخيرات

ما شاء الله الأحباب متجمعين صلى الله عليى رسوله ..

أم فجورة مو الحال .. أقولك حبوبة بما إنك بكرية فآلام المخاض الحقيقية ممكن تستمر عندك على مدى يومين أو أقل بفارق سويعات بسيطة .. وتكون كذا مال تعب ووجع وثقل وشوية سوايل تنزل عليك .. بس هم أقولك لا تستعجلي لأنك لو رحتي على كل هذا بتقولك النرسة بس فاتح 1 سم أو 2 سم .. وعندها خيارين يا إنها تنومك في المستشفى وهذا يترتب عليه الإستعجال البغيض في الولادة أو يسوا لك طلق صناعي .

فإنتي إستحملي هالألام البسيطة بس من تشوفينها ما توقفت على مدار اليوم وتلاحظينها ورا بعض وتشبه ألم الدورة بس بشدة هنا تحركي المستشفى وصدقيني بعدها الدكتورة هتقولك لسه ما وصل ال10 سم ، وهذي عاد عشان توصلين لها .. يا أم فجورة ما أريد أخوفك لأنك مشرفة ع الولادة بس خذيها كمعلومة راح تكون قوييييية ولا يوجد فاصل بين التقلصات أبدا وخلاص تحسين حالك في عالم آخر وسبحان ربك ذيك الساعة إنتي بنفسك تحسين تريدي تزفري وتخرجي هالشي اللي ضاغط عليك .. وعاد ساعتها وأكيد إنتي قريتي طرق الولادة من ناحية تتبع التقلصات مع الزفر وووو .. والزفرة وهذي وااايد بنات ما يفهمونها وتفشل عنهم حزة الولادة هي وما أستحي بذكرها بس عشان البكرية تستفيد هي مثل لما تروحي الحمام وإنتي بكرامة وكأنه عندك إمساك وتبغي تنزلي بالقوة ( نفسسسسسسس الشي ) .. والله يطلعنا جميعا بالسلامة يااا رب .

غلا عمـــــري;3919212:
كربلاء

حبيبتي


طمنيني شحال ام شهد

مالها حس


وينها

ولدت ولا بعدها


والله اني خايفة عليها

وهالايام دوم في بالي


؟؟؟!!

تقصدي أحلى شهد ؟؟؟ إذا هي فالحمد لله ولدت بالسلامة وجابت بنين ربي يحفظها

يتصفح الموضوع حالياً : 3 (3 عضو و 0 ضيف)
‏elsherog, ‏UMABDULRAHMAN, ‏أم المهند


وكمااااااااااان صباح الخيرات لام المهند:)

غلا عمـــــري;3919203:
ام المهند


حبيبتي طمنيني عليج

شو اخر اخبار الحمل وياج ؟؟!!!

هلا غلوي مو صبحتي ..

أنا يا قلبي بخير ولله الحمد .. مشي وما أعرف وين أمشي بسبب الإعصار اللي خرب علينا الشوارع والمنتزهات وهذا مو زين لي بالعكس لازم أشد الهمة الحين .. والبنوتة فديتها صايرة كسولة مسكينة المكان ما عدا يسعها هههههههه .. بس تخبرين وزنها 2 كيلو و400 غرام حلو ؟؟ هذا كان وزنها من أسبوع تقريبا . الطبيبة طمنتني ولله الحمد بأنه حلو بس يالسة أتخيل إنها بتجي ما مربربة فديتها .. يالله أهم شي صحتها ووصولها بالسلامة وتاليها نهتم في ربربتها ولا شو رايك .

عندي موعد يوم الأربعاء هاذي وعسى خير يا رب .

هاتي علومك يا عسل

elsherog;3919295:
بنات ممكن استفسار ..............

ممكن الوحده مايجيها الم ووبيوم واحد يجيها الالم وتكون ولاده ؟؟؟؟؟؟؟

ولا لازم يتكرر عليها الالم كذا يوم ؟؟؟؟؟؟؟؟؟

يا صباح الأنوار لأحلى شروق ..

شخبارك يا قلبي عساك طيبة .. بالنسبة لسؤالك طبعا مستحيييييييييييل ، لازم تحسين بأوجاع تسبق الولادة بيومين أو أقل وشوفي ردي لأختي أم فجورة وضحت كل شي .. وهذا الكلام للبكرية فقط بس كلما تكررت الولادت راح تقل الساعات تدريجيا والله يعين .

سوسو أم شهودة يسعد صباحك أو مساك الوقت أي وقت تدشين فيه ..

بالنسبة للحكة يا عمري والله إني حاسة فيك لأني عانيييت معاناااة ما أقدر أوصفها وا عتقد تذكرون موضوع الحرار اللي أصابني ربي لا يجيبه من جديد ..

بصراحة ما بقيت شي لا مرهم ولا دوا ولا غيره بس بدون فايدة .. وإذا تصدقني لازال الحك مستمر عندي بس مو ذاك الزود .. ويش نسوي يالغالية يالله هانت ومأجورين بإذن الله ، أنا سألت الدكتورة بنت النيل خبرتني إنها حساسية الحمل وتسمى ( الحكة الحملية ) وهذا تصاب فيه الحوامل في الغالب - بس ما أصابتني يوم حملت بالمهند - وصبري حالك عسى ربي يفرجها عليك ويخففها آميين يا رب العالمين .

وخليك من موضوع الطلق الصناعي وإنت يعاد ما بقى لك شي أحسن لك ولادة طبيعية بون تدخل والله يستر عليك يا رب .

اختي طمطم .. دعواتنا لك بالسلامة والعافية .. ربي يسهل عليك آمييين وتولدين بالسلامة

لا تنسين تبشرينا وتطمنينا عليك .. ودعواتك الغالية بعد لا تنسينا منها .

أم المهند;3919324:
تقصدي أحلى شهد ؟؟؟ إذا هي فالحمد لله ولدت بالسلامة وجابت بنين ربي يحفظها

هي اقصد احلى شهد يا ربي ما عرف ليش اسميها ام شهد

بس بعد هي مختفيه على الاقل اطمنا عليها :)

هلا طمطم

عاد الحين اكيد بالمستشفى
وحاضنة احلى بنوته
الله يقومك بالسلامة
نسال الله لك السهالة يا رب

بس طمطم انتي متى موعد ولادتك
يعني هل انتي متأخرة بوااااايد عن الموعد
عاد الحرمة تولد هناك وانا جالسة اخورف بالاسئلة بروحي

الله يعينها ويسهل عليها
وعقبالنا نولد في الموعد وطبيعي

رمز المحبة
يالله هاذي الخبيرة ام عبادي افادتك
والله يسهل على الجميع

ام عبدالرحمن .....طمطم موعد ولادتها اتوقع معنا 7/7 بس اتوقع عندها الماي حول الطفل قليله عشان كذا راح يولدونها
وانا بكره عندي موعد وشكلي بقول لدكتوره تعطيني طلق صناعي :(

مسكينة سوسو
حالتك يرثى لها
حبيبتي الله يسهل عليك وتولدين
طبيعي مثل ووالدتك واختك

الله يسهل عليك
اصلا من ما يخاف يشوف قدامه مقاص ومشارط
مذبحة حشا موب ولادة

الله يسهل علينا جميعا


والله سوسو وام عبادي
كل يوم صرت احاتي عن
اصير مثلكم
يا ربي[

مسلمة وافتخر
فال الله ولا فال الدكتورة
عسى بس ع المووووعد يجيك احلى سعد
يقولون الولد ما يتأخر

مو مثل البنت تجهز مشطها وكحلها ومرايتها
خخخخخخخخخخخ
تروح تتكشخ وتجي
عشان كيه تتأخر في ولادتها

والله يسهل علينا جميعا حبيبتي وتولدين في الموعد

آآآآآآآآآآآآآآآآآآآآآآآآآمين

هلا الشروق

ويصير تفوتني بروحي
يعني طمطم كانت معانا
وانتي ليش تبغي الطلق الصناعي

اكيه سوسو هاربة منه
وانتي تروحي ليه برجليك

؟؟ليه؟؟؟

احلى ام

والله صدقتي الله يعين البكريات
لان فيه وحده من زميلاتي قالت انها ما عرفت تدفع في بنتها البكرية
وطلعت البنت خضرا ونفسها قليل المسكينة
يعني حتى الولادة يحتاج لها تدريب من قبل
ومع الخبرة
بتعرفي تدفعي
بس قالوا لي لا تدفعي الا لما يقولوا لك السستريات " بوووووش "

الله يعين بس

عسى يا كربلاء تولدين قبل
عادي حبيبتي
انا في اول المواعيد عطوني بالحساب 7/7
وحساب الالترا ساوند يوم 12/7
ودكتورة ثانية عطتني 13/7
واخر يوم 14/7
ويتصرفوا بعدها
عاد كيف ما ادري

يالله يا رب ترزقني ببنتي سليمة معافاة في يوم 7/7
وكل الحوامل يا رب في موعدهم

الشروق
يا بختك حبيبتي بالاجازة
والاهم اجازتك مع الشيخ بدر شلونها
يعني انتي كموظفة كم بتكون؟؟؟
احنا بس اجازة الوضع 50 يوم
والباقي من رصيد اجازتنا الاعتيادية هذا اذا رؤساء العمل حنوا ووافقوا عليها

فانا معزمة اذ 33 يوم زيادة
يعني راح يكون عمر فجورة 83
صح قليل بس عاد تسامحني
اذا قدرت اخذ لها كذا فبكون شاطرة
لان الاجازات عندنا هلليلة كبيرة

اقول كيف وضعية بدر هل ماخذ الوضعية الصحيحة للولادة ؟؟

ان شاء الله ما تجي الجمعة الا واحنا بغرفة الولادة يا رب
يوم اتذكر احط ايدي على بطني واقرأ سورة الزلزلة
عسب اعجل في الولادة

انا بخير حبيبتي
والكروشة مثل ما قلتي انتي
كل مرة تجي على صوب
مرة تلقين البيبي جهة اليمين
ومرات تلقيه يتجمع فوق ويشد علي

ام المهند
كيفك
مشكورة ع المعلومة ونتمنى الاستفادة لجميع البكريات عشان البيبيات يطلعوا سليمين
مالت الزفرة هاذي
خبرتني عنها وحدة من زميلاتي بالعمل
لانها بعد لما كانت بكرية كانت عندها اخت زوجها
قالت كنت ما اعرف شئ في الزقار ولولا الله ثم اخت زوجي
كانت طبقت في الولادة
خخخخخ