لـيـلـة الحـنا في قطر والدول المجاوره "أفكار و خبرات متجددة" مع عنود الغيد

يا بنات.....
والله المحلات اللي تسويلكم الحفلات
تاخذ منكم شي وشويات
مع انكم لو رتبتوا كل شي ونظمتوه
بيكون من أروع ما يمكن
وبتوفرون وايد....
يعني ممكن تحجزون الكوشة بس
والتوزيعات الأهل يسوونها
يعني صندوق كبير
وفيه سلال وداخلها ملال فيها حنة
مع شوية تور وورود ذهبية
والطاولات ممكن تاجرونها من اي محل للنطاطيات والحفلات
وتجي مع مفارشها
أو تحطين من مفارشج وتبقى لج....
وللي فوق الطاولات....
سلة عين الجمل مرشوشة بالذهبي والأخضر
وسلة فيها حلوى من حكيم
وملة مكسرات...
وجاكليت...
وشوي مشموم....مع طيب
والتوزيعات
هريس
نخي وباجلة رخيص وممكن عمله بالبيت
خبز ايراني مع مهياوه مقطع ومثبت بأعواد...
خبز محلى...
بان كيك...
رقاق..
خنفروش ولقيمات...
وأكيد حنة....
وصدقوني لو رتبتوا عمركم قبله بأسبوع
كل شي بيكون أكثر من روعة...
والله قلبي يعورني
لما أشوف الناس والمحلات يستغلونكم
وانتوا مضطرين تسوون عندهم.....
وياخذون منكم بالثلاث وطالع...
وفي ناس تتفقون معاهم على سعر
وفي ليلة لحنة يصيدونكم ويحرجونكم بين الناس
ويكون الاتفاق شي
بس حزة الجد يغيرون رايهم
ويمسكونكم من اليد اللي تعوركم
مثل ما صار في حنة حماتي...
والله المستعان؟؟؟