اللي ولادتهم في فبراير الجاي...حياكم

سلام عليكم حوامل شخباركم كلكم انشالله بخير:salam:

غطيت عنكم مدة ورجعت اشوف ما شالله الكل حاضر ومتابع .. قلت اشارككم النشاط والفاعلية :clap:

عن أحوالي أنا المتوقع ولادتي 21 /2/2007م واليوم مكملة (25 أسبوع ) يعني داشة ع الشهر السابع الله يسهل علينا وعليكم ياااااارب

متشوقة حدي لضم الجنين وتقبيله وترتبيته .. وهذا هو طفلي الثالث لأختين وحدة 7 والثانية 3 ولحين ما سويت التراساوند فما أدري جنس الجنين وعليه ما بدأت التشري والتسوق للحين ... هل أنا متأخرة ؟؟؟؟

عموما أنا خدامتي وصلت بتاريخ 5/11 يعني توها صار ليها يومين والحمدلله (باين) إنها زينة وهادئة ومرتبة وتسوي شغل

والحمدلله أحس بأن تعب اللي شتفه طول المدة اللي فاتت وأنا مهلوووووووووكة راح عني والقلق على ترتيبات الأطفال وأمور البيت ومتابع كل شي خف بدرجة كبيييييييرة وصرت كأني أميرة أو خل تقول نصف أميرة

ع الأقل يمديني أطلع لو ناموا الجهال وأير جو وأسوي مشاويري .... الليلة معزمة اروح اتسوق BHSمسوين تخفيضات
وناوية أروح - الجهال توهم نايمين الحمدلله

خبروني عنكم وعن صحتكم .. شكله الكل يعاني مثلي من الأرق والإجهاد بسبب تعب التقلب أثناء النوم.. لكن ليلة اللي أسترخي بماء ساخن وأستحم بمزاج تكون نومتي من أحسن ما يكون

إلا شخباركم مع الاحلام اللي ما تخلص أثناء النوم ؟ وايد تصيدني احلام كأني قاعدة بسينما مو في نووومة ؟

يللا طمنونا عليكم وسامحوني على الهذرة :gum: ..:)

[CELL="filter:;"][ALIGN=center]هلا فيكم انا اليوم رحت للدكتورة وعملتلى التراساوند والحمدلله اللي تمنيتا وطلبته من الله سبحانه صار (الحمدلله) وضع البيبي زين بس الرجول تحت والراس فوف جهة اليمين بس الدكتورة طمنتني وقالت لي ان البيبي في هذا الشهر مايتم على وضع ثابت انا الحين 26 اسبوع يعني 10 ايام انشاء وادخل السابع.

طبعا الحلوم اللي تقولين عنها يااخت ام مريم فضيعه بس الله يستر

انا انشاء الله بعد ماتطمنت على وضع البيبي راح انزل السوق واتشرى بعض الاغراض الضرورية للبيبي ولي

سلامي للجميع[/CELL]

السلام عليكم

يعني مش بس انا اللي يعاني من اعراض الارق في الليل والتقلب والاوجاع
في غيري
طمنتوني
بس الغريب اني احس باوجاع شديدة في البطن واحس مرات قاسي مثل الحجر ويشد كثير

ليلتين على التوالي وانا لا استطيع النوم ، بقيت اتقلب حتى طلع علي الصبح
والمشكلة انو عندي ثاني يوم دوام في الجامعة :sad: :confused:

انا بعد اقل من عشر ايام وادخل في السابع

كان الله في عون الجميع حبوبات

[CELL="filter:;"][ALIGN=center]سلام عليكم يااختي reem_kh تري مشكلة النوم كلنا نعاني منها انا صار لي اسبوع مافي نوم وكتبتلي الدكتورة على حبوب للغثيان تستعمل بالمساء علشان تجيب النعاس بس لما استعملتها تعبت كثير ماقدرت اصحه للعيال للمدرسه وانا والحمدلله تركت الشغل وجالسه بالبيبت بالنسبه لي هذا الوضع اريح[/CELL]والله يكون في عونك

سبحان الله يوم نذكر انه كل هالمعانا فيها غسل لذنوب وزياده في الحسنات بإذن الله و انه في النهايه بنشوف البيبي الكتكوت اللي تربى في البطن يخلي كل الأوجاع تهون :)
أنا هذا أول حمل لي و ساعات أتم اشوف بطني و أضحك على البيبي و هو يتحرك لأنه نحنا الثنين عدنا نفس المعاناه مانعرف نجلس ولا نام عدل.. عشان جي هو يرافس و احنا نتقلب طول الليل...
وأنا ان شاء الله بدخل السابع بعد كمن يوم...ولازم أبدأ بالتجهيزات..الله يسر علينا جميع :)

عندي سؤال..أنا لاحظت انه شعر بطني زاد مع الحمل..هل هذا طبيعي..وهل بيخف بعد الولاده ولا لازم بعد اشله بالحلاوه؟

هلا حوامل ايه اخباركم انشاء الله بخير
والله حالي مثلكم بالضبط بالنسبه للارق وقلة النوم وكمان لسه ما جهزت شئ انشاء الله كام يوم بدخل بالسابع بان الله
سمعت حاحه وحبيت اقولكم عليه سمعت ان اللبن مع البلح كتير مفيد ويخلي الجنين وزنه يزيد بسرعه لو كان ناقص يتري الكلام ده صح ولا لا

السلام عليكم جميعا ..........

انا عضوة جديدة بس انا بعد شهر ولادتي شهر فبراير تاريخ 14/2/2007 ادعولي ان الله ايقومني

بسلامة لاني خايفة وايد لان حملي لاول او ما اتصورون الرعب الي انا عايشتى كل ما قرب الموعد

و الله ايهون علي او عليكم جميع:sad: :sad: :sad:

زوحة راشد



انا هنا بس اتغلى وما ادخل الموضوع هههههههههه تسلمين الغلا على سؤالج




ام مريم

ربي يحفظ لج البيبي وانا مثلج مشتاقه للبيبي وااايد وبالنسبه للاحلام االيوم بعد ما سار ريلي الدوام حلمت حلم مب حلو بس معظم احلامي عن اكلات واشيا وكل ما اخبر ريلي ينفذه لي يقول عن يتم في خاطر البيبي الله يحفظ ريلي والبيبي



عالم الهدوء

اشربي كوب حليب دافي وبيريحج وبترقدين بدال الحبوب



Cute Mama
صدقج والله بس بعدني متروعه وكل مره اقول كيف هالبيبي بيي للدنيا
وبالنسبه للبيبي مالي يتحرك اكثر شي يوم يحس بأبوه هههههه دلوع باباته

وشعر البطن كلنا مثلج :(

عروس حيرانه


تسلمين عزيزتي عالمعلومه والتمر واللبن مفيد انا يوم اشرب حليب بالزعفران وايد ارتاح



amnaser


تاريخ ولادتج مميز (f)

الله يسهل علينا جميع ...انا خايفه مثلج بعد بس مصبره عمري




.


.




حوامل رابطتي

دخيلكن ادخلن هالرابط (f)

http://www.3roos.com/forums/showthread.php?t=209256

صباح الخير عرايس شخباركم

أنا للحين ما أشتريت ولا شي ما دري ليش احس ان تو الناس على الأغراض ان شاء الله من نهاية الشهر السابع راح ابتدي

مرحبا يا امهات فبراير ..... اشحالكم ......

كـــــــــــــــــــــوين 82

صدقينى انتى اتقولين تو الناس بس الوقت يركض ركيض وبعدين احس الشهر الاخير الوحده اتكون اثجل ومالها بارض..... ماادري يمكن احساسي انا جذه وما ابا اعممه عالكل :)


عروس كتكوتــــــــــــــــــــه

عيل متروعه ها ؟؟؟ :) ياختى انا مول مب متروعه ماادري يمكن من كثر مب متولهه على البيبي ... ويقولون احساس البكريه احلا لانها ما تعرف شقايل الالم ....بس الولاده الثانيه الوحده اتكون جد امجربه عاد واتعرف فعسب جذه اتخاف ... انا اصبر عمري ... وكلها تساهيل من ربج .....وجان على الالم والتعب انقرضت البشريه ومحد ياب عيال .... عيبتنى انقرضت هاي :)


Cute Mama

والله شراتج .... احس شعر بطنى زاد ... ويوم سالت قالوا لي كله يطيح عقب الولاده وها كله بسبب الهرمونات ... ربي ايسهل علينا جمعيا وانقوم بالسلامه .


amnaser
لا تتروعين ولا شيات ... وكلي امرج لله ... وادعي دوم .." .اللهم يسر عليه حمله وولادته " " اللهم اسالك حسن الخلق وهـــــــــــــــون الطلق "
وعلى فكره ترا الوحده الخوافه تتعسر ولادتها .. لانها لا تساعد عمرها ولا تساعد الدكتورة ....ربي ايسهل عليج وعلينا جميعــــــــــــــــــــــــــــــا .


انا اربيعتى امربيه من 8 ايام ونصحتنى باشيا بقولها لكم عسى كلنا نستفيد منها :
- قالتلي امشي وكثري من المشي في الشهر الاخير عالاقل ساعه فاليوم .
-ومن بدايه الثامن كل يوم كلي طاسه تمر .... وسبحان الله هالشي مذكور في سورة مريم مثل ما تعرفون .
-وقالت انها في حملها الاول عانت بعد الولاده ... من تشققات الصدر واتقول حتى انها قررت ما ترضع بنتها من كثر الدم والالم ...بس في الولاده الثانيه والثالثه ما عانت من هالشي ....لانها من بدايه ال8 على قولتها واسمحولي على اللفظ تحلب عمرها ... اتحاول اطلع الحليب من صدرها ... عسب الصدر يتعود على هالشي وما يتشقق ... واتقول الحمدالله امورها تمام ولا دم ولا شيات .


يالله اسمينى وايد رمست ....... هذربان :)

هلا يا حمولات
انا هنا معاكم بس كنت كسلانه اكتب

cute mama عادي الشعر اللي في الجسم يتغير مع الحمل بسبب الهرمونات

وانا بعدني ما سويت اي شي، بس كنت شاريه جلابيه حلوه بالدانتيل من معرض رمضان والعيد، وكم غرض من ادامز لما كان مسوي تنزيلات ،،، بس ابي يوم في الويك اند عشان اطلع ثياب بنتي وهي توها مولوده عشان اشوف اللي ممكن استعمله لا وايد اغراض يديده وفي منهم بعد ما استهلكتها وايد ...

وبشوف يوم اسير للخياط عشان افصل جم شغله للولاده. يمكن اسير اليوم انشالله

بس الحين خاطري في دونات، بعد ما اخلص دوام بطوف على محل دونات وباخذلي جم واحده

ايه على فكره ابي اسوي التراساوند ملون بس مادري الحين اوك ولا انطر للثامن؟؟؟

مادري ليش هالمره انا حاسه اني مابطلع من غرفة الولاده، ابي اسوي صدقه جاريه، وبعد جهزت وصيه... وكتبت الجمعيات اللي داخلتهم حق زوجي وامي عشان يعرفون... الله يستر انشالله بس مادري وايد مكتئبه (مابي اكئبكم) يمكن هرمونات الحمل بس صدج مضايقه..

المهم انتبهو على اعماركم وعلى رأي زوجة راشد الوقت يطوف بسرعه ترى نحن الحين خلاص انشالله بندخل السابع،، تذكرون اول ما كتبنا في هالتجمع كنا في الرابع تقريبا هاهاها.

يللا اخليكم الساعه 3:00 الحين وابي ارد البيت بس مابنسى ايب دونات.. تبون؟؟

the Queen 82


عزيزتي انا انصحج من الحين تبدين تاخذين مب شرط مره وحده كل مره خذي شي...لانج بتنسين حزتها



زوجه راشد


امممممممممم شوي بس لاني اول مره وما سألت اختي او حد عن يقولون خوافه ههههههههه بس انا بتبع اللي قلتيه لي والله بيسهل علينا هيه يقولون العجوه زينه هلي سايرين العمره ويابوا لي وميودتنه لين ادخل الثامن خخخخخخ وسمعت ان الحلول زين ينظف البطن والوحده تشربه من تدخل التاسع بس انا ما احبه وقبل يوم كنت اشربه كنت امرض ما اعرف شوه البديل ؟؟؟

ام شهد
شوه هالفال تفائلي بالخير ...وانتي مجربه قبل خلي عنج هالكلام واشغلي نقسج بأي شي واقري قرآن كل ما حسيتي بهذا الاحساس ...ما تنلامين تعب الحمل والشغل والبيت من غير شهوده ربي يحفظها ...... ولا تبخلين علينا نبا دونات بروحي مشتهيتنه من امس وانتي طريتيه الحين

وي وي وي وي
ليه كل هذا التشاؤم او شهد روحي عن نفسك انشاء الله تومي بالسلامه

مشكورة اختي عروس كتكوته

اعرف ان التاريخ حلو بس ما راح اقضيه على ضوء الشموع مثل كل سنة معى زوجي بس الحمد لله على كل حال

بعد عمري والله زوجة راشد ما قصرتي حبيبتي ما اتصورين من بداية حملي الى الحين او انا متعلقى بقراءة القران او الكل يدعي لي بس لان فيني السكر او هذا الي امخوفني او اول حمل
لي فا لابد من الخوف


ام شهد الله ايهداج انشاء الله حبيبتي وكلي الله مع اني خايفة بس ما وصلت فيني الى ها الحالة
اذكري الله و خليش متفالى

او الله انشاء الله ايقومنا بسلامة او انشوف الي تاعبينا او امسهرينا الليل من الحين او الله يستر بعدين او يهون علينا :shy:

[CELL="filter:;"][ALIGN=center]مرحبا حوامل فبراير انا هذا الويك اند نزلت السوق وشريت الاغراض تقريبا خلصت بس باقي بعض الاغراض البسيطة مين اقول تو الناس لا موتو الناس لان بعدين راح تثقلين والدوارة والوقفه بتعبك فالاحسن انكم تستعجلون وهذا رايي وانتو براحتكم, انشاء قريبا راح اعرض لكم بعض ما شريته

عروس كتكوته
مشكورة على النصيحه ممع اني من المواضبين على شرب الحليب الساخن قبل ماانام والله يعينا اجمعين

amnaser
اهلا بيك بالمنتدي والله يهون عليك وعلينا ترا انا بعد من البحرين بس مقيمه بالسعودية وانشاء الله الولادة سهله بس ادعي ربج واقراءي سورة مريم والزلزله وفي وصفه انشاء الله تستفيدون منها جميعا اهي انكم تاخذون محلب مغسول ومطحون وتاخذون منه ملعقة اكل واحدة باليل بس تبتدون في الشهر التاسع هذا يقوي عضلات الرحم باذن الله وهذا انا مجربته

نصيحه للجميع
ملعقة اكل من زيت الخروع يخلط مع عصير منجو المراعي او الصافي او اي عصير متوفر ويشرب لما تحسين انك فيك طلق وهذا راح ينظف بطنك وسهل الولادة انشاء الله بس ترا اهو مر كثير اذا تقدرون تستحملونه

umshahad
تعوذي من ابليس وتوكلي على الله والله يسهل عليك

سلامي للجميع[/CELL]

هلا يا حمولات... اشحالكم يا حبيباتي

انا اليوم تعبانه صدق
احس بطني ثقيل ومب قادره اتحرك
لا بعد نعسانه مووووت، انا يالسه في المكتب وكل شويه اغمض عيني واغفى ثواني ومديري شافني بس شو اسوي مب قادره افتح عيوني

وعندي بعد موعد عند الدكتوره بعد شوي ،، بروح ومابرد مرة ثانيه للدوام هاهاها

اخليكم الحين بكمل رقاد

مرحباااااا ... اشحالكم يا حلوات .......

ام شهد ... حبيبتي تعوذي من ابليس وهذا كله من الشيطان... لا اتخلينه ايغلبج .. ووكلي امرج لله ... وانشالله الوقت بيركض واشوى نسمع ام شهد ربت ويابت نونو حلو .... وبتظهرين انشالله من غرفه الولاده وبتخبرين الملاقيف اللى شراتي القصه :)

انا يوم الاحد كان عندي موعد فمستشفى دبي ...اسميه كرهت حياتي من زحمه دبي ....شكلي اذا يتنى لحظة الولاده بربي فالسياره من كثر الزحمه ...وريلي ايعفد عالرصيف يبا يلحق عالموعد والله خض جبدي خض ...واخر شي ايقولى هالتخضيضات اضايقج!!!!!!!!!!! بطلت عينى اقوله لا مجرد مساج حق البطن.. طبعا اضايجنى ......ووحليله قام ايحاسب :)
الدكتورة طمنتنى قالت كل شي اوكي وضع البيبي والماى اللى حوالينه ودقات القلب والمشيمه وحجم الراس ....بس خوفتنى من شي حتى يلست احاتى اتقولى عمر الجنين على حساب اخر دورة 25 اسبوع بس ايبين في الجهاز ان عمرة 27 اسبوع ... فسالتها هالشي عادى قالت عادى ايكون الحمل صاير قبل حسابنا باسبوعين .....
بس عاد منو يقول تميت... مكتئبه واموسوسه .....بس ريلي ايقولى ما عليج منهم دام قالت كل شي طبيعي لا اتحاتين ....وهذا ابليس يبا ايخرب عليج فرحتج بالبيبي ...وكلت امري لله وتعوذت من ابليس .

اتخبركم ... انا جد خبرتكم ان اربيعتى اتقولى انها ادلك صدرها عسب ما يظهر لها تشققات يوم اترضع وانها ما عانت من دم ولا الم ....بس يوم كنت فالمستشفي قريت في كتيب الرضاعه ان تدليك الصدر في فتره الحمل يسوى ولاده مبكرة .....والله احترت بس بغيت اخبركم لانها امانه وذمه .




خبرونا عنكن ولاتكونن كسولات

أم راشد
والله ضحكتيني أونه مساج حق البيبي ههههههههه دمج خفييف هههههه أنا ريلي يوم أطلع وياه كل ما انمر على شارع خربان ولا محفر بتلقينه يصد عليه ويقول سوري سوري ههههه مسكيين
وبعدين أنا مثلج طلع البيبي في التصوير عمره أكبر من اللي عاطيني اياه بس هذا طبيعي لأنه الجهاز يحسب على الوزن و الحجم..وهذا معناته انه بيبياتنا صحتهم زينه الحمدالله مب (under weight
ماعرف كيف أقولها بالعربي ههههه ... الله يقومنا بسلامه ان شاء الله ..

يا حوامل يا حلوات
خلنا نكتب وين ممكن نحصل أغراض حلوه لتجهيزات المستشفى والبيبي..يعني كل وحده تشوف محل ولا بضاعه يديده تكتب من وين عشان نسهل على بعض... :)

و بما انه هذا أول حمل لي فودي ادلع عمري و البيبي و أسوي أشيا سبيشل...بس مخي متحجر هالأيام..
سرير البيبي: في محل في القوز اسمه ( just kidding) هو مكانه وين المصانع بس محل عود مجابل مول الامارات.. عنده أغراض حق البيبي صح غاليه شوي بس روعه...السراير والاكسسوارات تجنن..

الدلال و الكاسات: أبا شي حلو سمعت انه الحين موضة الكرستال مع أحجار السوارفسكي ..مادري أسوي منهم؟ ولا عندكم أماكن ثانيه ممكن أشتري من عندهم شي مذهب و مزخرف ؟

التوزيعات: أنا فكرت في المسابيح اللي بو 33 حبه بحاول أحصل منهن و بحطهم في علب اللي عليها ستان و مزخرفه بالزري.....حد عنده فكره وين ممكن أحصل علب راقيه؟ وماتكون وايد غاليه؟

قمصان النوم والجلابيات: بسويهن في بوظبي و الشارجه في الخان يقولون خياييطهم زينين وحتى في مركز حلوان في الشارجه...و في دبي لازم أدور..حد يعرف وين ممكن اسوي قمصان نوم حلوه في دبي؟

السلام عليكن يا الحوامل

اشحالكن

انا احس بمغض الحين بس خف شوي الحمدلله ومن يومين بديت اصوم الست من شوال:( ما اقدر بس ريلي شجعني


والبيبي فديته وايد يتحرك الحين :)احيانا ما احس بحركه بس اول ما يوصل ريلي يتحرك ههههههه

شكله يحب ابووه اكثر مني ..هذا وانا تعبانه عليه

وانا بعد احس بثقل حتى الحوض يعورني اشوي

بلاني انا كله اشتكي في هالمشاركه هههه

يله طمننا عليكن