رابطة امهات ديسمبر... حيااااااااااااااااكن هوووون !!

نسيت اقولج شقورة..طبعا ملابس الطلعه و البيت اكثر شي اللون الوردي :)

اما باجي الاشياء الوان متنوعه..

الجنطه مثلا و كيس البيبي سكري عشان اقدر استخدمه بعدين ان شاء الله اذا كان شكله يديد :)



جمانه اي والله صاجه وايد وايد اختفوا..

و بعد في بنات معانا ماعرفنا جنس البيبي :)

بانتظار ليتك معي مع الاشرطه التشجيعية..^_^



يله بنات احنا اذن الفير عندنا..:)

وناسه اول مره نسهر بالرابطه لي هالوقت :):)

تصبحون على خير

جماااااااانة الله يقطع بليسج على هالاشعه مايبين شي انا مره وحده سوت لي الدكتورة هالاشعه ومن يومها مارحت لها احب الرباعي لانه واضح وماخليهم يشيلون الجهاز بسرعه عشان اكحل عيوني بشوفة البيبي

اتصدقون بنات شكل الجنين مب حلو كنه جاي من الفضاء قرعه خخخخخخ يوم قالت لي الدكتورة تبين الصورة قلت لها لا مابي اخاف اشوفه

جمانه نسيت اقولج عادي اذا الراس فوق انا مره فوق مره بالعرض وعادي البيبي وايد يتحرك.

بنات اتصدقون من كثر ماقريت عن النساء والولاده احس صرت دكتورة ولين اولد بصير استشارية :bigsmile:

والحلوه ام طلال اشلون تدخلين كل شهر تاريخ 30 وانتي ولادتج 22/12 اذا موعد ولادتج 22 معناته تدخلين كل شهر بتاريخ 22 مب 30 انشالله فهمتي علي.

ماما فروووحة شوفي رضاعات ديووووور حلوين جبتهم من فرنسا وفي طلب بالانترنت حلووووين في ازرق و وردي وفضي انا خذت الفضي وشنو هاااي كيس البيبي؟؟

هلا بيكم عرايس ووووحشتوني يومين مادشيت كنت مزحومة بالدوام..شخباركم وشلون الكتاكيت..

شقورة ماعليج شر انشالله ...

ام فروووحة الله يردج ويسلمج بوقتج يارب انا بعد هالاحساس دايما عندي بولد قبل وقتي واللي يسألني عن موعدي اقول نوفمبر مو ديسمبر كأني متأكدة..والف مبروك عليج اغراض البيبي انا بعد شريت الاكثر تقريبا باقي لي المفرش والشنطة بخيطهم وسرير البيبي باخده بالتاسع او اول مااولد لان مااحتاجه بالاربعين بكون في بيت امي يعني اشياء بسيطة..

جمانه الف الف الف مبروك وتستاهلين كل خير..ياربي تقر عينج بشوفتها..يالله عاد الحين تفنني وانتي تشترين لها الاغراض..

انا يابنات رحت موعدي الاسبوع اللي طاف وقالت لي الدكتورة عكسج ياجمانه ان الراس تحت وااايد يعني قللي من الحركة وارتاحي وذبحتني الحكة سوت لي تحاليل دم وطلع النتيجة الحمدلله اوكى عطتني لوشن كأنه مال بو شنيتر استخدمه خفف الحكة شوي..

بالنسبة للسكر قالت لي طبيعي بس يزم راجعت النتايج يوم رديت البيت قريت ان النورمال من 75-115 وانا كانت نتيجتي 115 يعني حد الحد اعتقد يعني 6.3 بنات حد منكم سو تحليل سكر بو ساعة وجم كانت نسبته وهل كان طبيعي؟؟

المهم قالت لي راجعيني بعد 3 اسابيع لاني داشة عالسابع..

رحت هالاسبوع اخترت الستاند وتزيين الغرفة والباب وحجزت ودفعت مقدم بجهزومه لي على بداية نوفمبر اول سبوع خليت الالوان كلها الاف وايت والبنفسجي والوردي بس التوزيع للحين مااستقريت على شي..

بنات البحرين ترى مذركير من اليوم مسوي تخفيض اللي بالسقية والمارينا والرفاع والمحرق االي ماكملت تجهيزاتها ومابدت خل تروح لان ماراح يجي تخفيض الا يمكن قبل ولادتنا بشوي..انا ياحسافة تقريبا شريت كل الاغراض قبل 3 اسابيع وماكان فيه سيل..يالله

شخباااركم بنات..
القيوانية شخبارج حبيبتي..وحشتينا..
جمانة:الف مبرووك عالبنت وعقبال مانبارك لج بولادتها بالسلااامة..
ام فروحة:اي والله احمد ربي ان الحادث صار جذيه ولا بطريقة ثانية افضع..
شقورة:شخبارج حبيبتي؟؟وشخبار صحتش؟؟طمنينا عليج؟؟

اليوم ان شاء الله بروح مارينا مول عندهم تخفيض مثل ما قالت بنت البحرين,,

تحملوا بروحكم بنااااااات وبالبيبيات..

صباح الخير يا حلوات....

شخباركم اليوم؟؟

انا عني امس جاني شد عضلي في ريولي اليسار وتميت اتألم واصيح واقول حق ريلي خلاص بربي وهو فديته يقرا عليه لين خف الحمد الله...

وبالنسبه للاغراض تقريبا اشتريت كل شي بس بفصل كم قماط لاني شفت اشياء حلوة عند الخياط...

وان شاء الله بصورهم لكم بس الكاميرا شالنها اخو زوجي واول مايردها بصور الاغراض وبعرضهم....

اي والله ما شاء الله علينا وعيوننا علينا باردة يا رب دوم هالضجة والنشاط... :)

ما شا ءالله بنات كل الاخبار عندكم... خلاص اليوم ان شاء الله اروح لمذركيير اشتري اغراض اذا عجبوني

بسوي موضوع عن التطعيم في ركن الطفل وبرد لكم...

حبيبتي كندة وحشتيني بالليل... جان قعدتي معانا سهرتنا كانت حلوة..
ان شا ءالله تحليل السكر يطلع سليم يا رب... الله يعينج على الطعم..
وان شا ءالله رأس بنوتتي ينزل .. مع اني احس حركتها قليلة جداً مقارنة بحركة حسوون لما كان بنفس الشهر...

ويتهيأ لي اي مقدار من الثياب راح تاخذونه او الفوط راح تستفيدون منه... لأنه بيكون شتا... اتذكر بولادتي الاولى مديت لي حبال على كبر الشقة ونشرت اقمطته وثيابه... لأنه ما كان فيه شمس... بس غربلتني عدد القماطات .. خذيت 4 بعدين رديت خذيت 3 زيادة ... يمكن لو بالصيف كان بتكفيني الاربعة قماطات.. بس بالشتا تعب وانتي اولردي تعبانة من السهر مع البيبي...
[line]

القيوانية...
نصيحة لج امشي لج ثلث او نص ساعات وبتخف عليج هالالام.. عاد مو تروحين السوق وتقولين مشيت... لا اطلعي طلعة مخصوصة للمشي وخلي مشيج زين مو بطيء عاد مو تطولين..

وبانتظار الصور :up:

[line]


الله يبارك فيج يا صمت الامل... وان شاء الله اروح اليوم مذكير اشوف الوضع هناك.. وبشتري اذ عجبني...
[line]

اختي بنت البحرين مشكورة اختي .. والله يعينج على الشغل.. ما طلبتي اجازة؟
ان شا ءالله ما عليج ولا على البيبي شر...
الاول كنت معاج تقريبا بحساب الولادة بس الحين تأخرت عنج 15 يوم :(
انا سويت تحليل السكر بس للحين ما خذيت النتيجة...
بس ما قلت لنا شنو كان وضعج مع شراب السكر؟
وبعد .. من وين خذيتي الستاند وبكم كان سعر الحبة؟ انا افكر في الوها بالرفاع.. .. بس للحين ما رحت شيكت التوزيعات.. وتزيين الغرفة..
مو جنه مبكر؟؟
[line]

قطر قيرل... لا تحبطين فرحتي حسبي الله على بليسج.. بنشوف اذا عرفتي جنس الجنين ان ما سويتي اخس مني... هههههههه
الرباعي ان شا ءالله بسويه بس بعدين.. لما يربرب البيبي..اللي مخوفني ان حركته قليلة نسبياً .. وما احسها كافية عشان ينقلب... بس بعد اقول لسه وقت .. اليماا لتاسع وبعدين ان شاء الله نشوف الوضع شلوون...


برجع .. عقب ما اسوي موضوع ركني... عاد نبي تفاعل مو تنامووون

هلا بكروشات ديسمبر شخباركم وشخبار البيبيات ؟؟؟؟؟؟؟؟؟؟؟؟؟؟؟


كان ودي اسهر معاكم امس بي الريل قاعد على النت ومابغى يهده لين الفجر:angry:


تصدقون مارحت اسوي تحليل السكر قمت مالي خلق حق شي لاني ماعرفت ارقد

الكرشه مضايقتني احلى بطحه على الظهر وقالوا لي مب زينه عالبيبي يختنق
فكل ليله انام على اعصابي

[line]

من اعيوني خواتي بحط الشريط

بس يبيله وقت لين اسويه

[line]

وعن اغراض البيبي خذت لي من الامارات كله لبس مشكل

وان شاء الله اروح السنتر بوينت وباخذ الاغراض

المشكله اهلي واكثر شي ((الزوج الكريم)) ما يبوني اخذ شي يقولون بتجيج هدايا وانا في خاطري اخذ على ذوقي

شفت سرير فضيع واهم شي نفس لون اثاث الغرفه من محل شيكو شكلي بعاند الكل وباخذه


وعن تجهيزاتي ولا شي لين الحين عندنا وحده في الدوحه الكل يمدحها اسمها ام عارف

قلت يمكن افصل عندها القمصان وكفر السرير

ويمكن لما اروح البحرين امر على الخبر في محلات وايد حلوه للامهات

وعن الون اللي اخترته لون البنفسجي الغامج ............. اشرايكم؟؟؟

مرحبا كنده... الله يسلم غاليج غناتي....

يا هلا والله بالغاليه جمانه...مشكووره الغلا على نصيحتج وانا اليوم احسن الحمد الله بس كنت وايد خايفه لانه نفس هالشد العضلي جاني بحملي الاول الصبح وولدت بالليل وكنت بالثامن وقعدت اوسوس واحاتي اقول اكيد خلاص بربي....

ليتك معي... عاد انا زعلانه منج يعني اتيين الامارات ولا اتقولين لنا على الاقل انقوووم بالواجب والضيافه,,,
على العمووم تتهنين بالاغراض ان شاء الله ويا الله شدي حيلج وجهزي اغراضج قبل رمضان ترا ماشي وقت بعدين...

:shy: يالله حوااااااااااااااااااااااااااااااااااامل أخيراً شوفوا الشريط :shy:


nawaray

4/12/2006







ghada2

bent el ba7rain

5/12/ 2006






ليتك معي

شيخة البيت

6/12/2006





شقوره

7/12/2006







nooooooooooooooor

11/12/2006






ماما حسون

صمت الامل

ام نوووره

12/12/2006






القيوانيه

16/12/2006






bride2004

17/12/2006





jay

18/12/2006







الموناليزا

19/12/2006







جمانة

20/12/2006





soosoo googoo

21/12/2006





omtalal

22/12/2006






Qtr Girl

23/12/2006






كنده 88

24/12/2006




البرازيلية
25/12/2006






احلى لورا

26 _12 _2006






سحابة حب

27/12/2006






eng-nona

29/12/2006






أم فرووحة

30/12/2006





شرايكم بتغير الالوان !!!!!!!!!!!!!!

ان شاء الله تعجبكم :shy:

هلا حبيبتي القيوانيه فديتج ماتقصرين ان شاء الييات وايد اهلي في الامارات

يعني بين فتره وفتره بنطل عليكم

وان شاء الله نشوفج:smile:

هلا وغلا ليتك معي حياج غناتي وان شاء الله اتزورينا وانشوفج عن قريب...

واسمحولي حبيباتي بغيب عنكم كم من يوم بروح بيت اهلي وللاسف ماعندهم انترنت....راح اشتاق لكم والله....

الله يحفظج اختي تروحين وترجعين بالسلامه

الله يحفظج اختي القيوانية... وتحملي بعمرج.. ننتظرج بفارغ الشوق...

اختي ليتك معي.. مشكورة حبيبتنا على المجهود... واكيد التغيير حلو... اموووت على الوردي...

اليوم رحت مذركير وشريت معظم اغراض البيبي.. عاد الحين انا خبرة ما راح اشتري من عرض وبعدين ما استفيد منه.. وبعض الاغراض راح اخذها من الصيدلية افضل ...

بعدين بكتب لكم شنو شريت وبصور الاغراض بعد.. :)

هلووو بنات
ام فروحه كل الي قلتيهم انه شريتهم بس الحين احس المناشف الصغار الي للرضاعه يبي لي اكثرهم على حسب كلامكم
شكرا بنات كل الي خايفين علي
اختي كنده ادري اقولج هل شي وايد مخوفني سالفة الولاده المبكره صارت تيني كوابيس اني بولد بلسابع
تخيلو بنات لو اسبقكم بشهرين واولد ههههههه صج خايفهوايد من هل شي
ليتك معي صج تغيبين وتطلين علينه مع اشرطة الحمل فتحيينه من يديد خليتيني افرح من قلب لمه اكتشفت ان بقالي 99 يوم يعني بدا العد التنازلي يعني الحين اقدر اعدهم بلايام ياااااااه شعور حلو
وبنات ماقلتو رايكم في ان نخلي الرابطه ليه بعد الولاده سوالف النفاس وسوالف اعيالنه ؟؟؟؟

هلا اختي جمانه................

العفو حبيبتي......... ماطلبتوا شي............ انتوا تامرون

والله يهني الدلوعه بالاغراض ..........

وبانتظار الصور

[line]

اختي شقوره شخبارج؟؟؟

شفتي شلون على قولة القايل من طول الغيبات جاب الغنايم :smile:


ولاتفاولين على عمرج ان شاء الله تكملين حملج وتفرحين فيه بصحه وعافيه


وعن الرابطه الجديده فكره حلوه وان شاء الله اللي بتولد قبل اتسوي هالرابطة...........

وانخليها تنطرنا لين نولد وانخلص :dd:

وفي الاخير اطلع انا وانطركم:dd:

ان شاء الله اذا خلصنا حملنا وقمنا بالسلامة... نسوي رابطة ما بعد الولادة والنفاس... لكن هذا وجهي ان استمريتوا فيها هههههههههههه

اصلا عادي بعد الولادة 3 ايام ما تدرين عن النت ولا الكمبيوتر ،لأن المعرس الصغير ما بيخلي لج مجال ولا حتى للنوم ... ولييييييييييييييييه انا كل يوم بس افكر في هالموضوع ويعورني راسي...

الله يساعدنا على السهر من قللللللللب خصوصا اللي اول مرة ..

اختي شقوره المناشف الصغار انا خذيت 3 بس.. ما اعتقد احتاج اكثر.. خصوصا ان الرضاعة الطبيعية ما توصخ وايد كثر الصناعي.. .. الله يصبرنا ونقدر نرضعهم طبيعي..

اخذت ويايي ولدي حسينووه لما رحت اتشرى وما خلى فيني روح اطالع الاغراض.. يشوف العفسة مالت السيل والثياب مرمية كل مكان يقوم هو بعد يشيل الثياب ويرميهم من فووووق الى الجهة الثانية.. دهشني فجعني دبحني... خذاه ابوه بعدين.. وظليت اتسوق بروحي :( ماعندي احدا ستشيره... وكانت النتيجة ان بعض الاطقم نسيت اخذ بعض القطع معاها... الطقم الاصفر نسيت الجوارب.. والطقم الاخضر نسيت القماط اففففف يبيلي ارد ارجع مرة ثانية اكمل الاطقم..

وبعد فيه اشياء كنت ناوية اشيلهم من التروولي وارجعهم واخذ شيء غير بدلهم.. لما رجعت البيت تفاجأت فيهم !! اف حالتي حالة هالمرة.. وتسوقي يبيله ترقيع عدل..
اخترت طبعاً الاكثرية ملابس وردية وبنفسجية .. ما عدا طقمين محايدين اصفر وااخضر ( فلاااش طبعا يا كندة :D ) واحسن شيء لما شيرت في نص التسوق ضرب الوسواس فيني ... لويطلعون غلطانين وفي الاشعة الجاية يقولون لج فيج ولد شبتسوين بكل هالثياب ؟!!!! ههههههههه لكن خزيت بليس وواصلت مسيرتي الشرائية...

الملابس الداخلية اللي تتسكر من تحت بطقاق خذيت شوية بس 3 قطع او 4 لأن عندي مخزون مال حسينوو وكله الوان محايدة...


بعد طالعت البدلات الكشخة عن يا زعم باخذ لها بدلة العيد.. بس تالي غيرت رأيي وقلت بنتظر ملابس الشتا وبشتريها..

اححححح تجنن ثياب البنات

خذيت سودو كريم.. لأن معروف البنات يجيلهم الالتهاب اضعاف المرات اللي تجي للولد.. وبعد مرضعة زجاج ماركة بيجون.. وحلمة زيادة على شكل حلمة الصدر الطبيعية بعد ماركة بيجون.. واخذت بعد سائل استحمام الطفل والبيبي اويل والبودر وهالسوالف ماركة بيجون.. لأن جونسون ما ناسبت ولدي فقلت بغير هالمرة..

وشفت بالمرز زبدة الكاكاو عشان تدهنين به الحلمة اذا واجهتج مشاكل بالرضاعة وترددت اخذه او لا.. بس بعدين هونت.. اصلا اذا شريته وشفته قدامي بستخدمه بسالفة او بدون...

المقراض والمقص وهالسوالف عندي مال حسين.. ما عدا المشط بشتريلها جديد بنوتي..
بعد الفرشاة مالت المراضع عندي
وحوض الاستحمام عندي بعد مال حسين.. واشوى فيه ترمومتر للحرارة من نفسه ما يحتاج اشتري..
بعد يبيلي شنطة عشان اغراض البيبي.. ما عجبوني اللي هناك في مذركير بشوف الخيايط اللي يسوون في سوق واقف وغيره والفراشات اللي يقدمون فيها البيبي تعجبني بعد وايد عندهم... وبسألهم بالمرة اذا عندهم ثياب نفاس..

زوجي يقول ما شريتي لهاية ( مصاصة ) ؟ ههههههههههه اقوله اسم الله عليها .. يمكن تطلع هادية مو مثل حسين.. ابرز الدوا قبل الفلعة :D

اختي ليتك معي ما قلتي شنو اكدوا عليج الاشعة اليوم؟
ام فروحه مفقودة الليلة.. شكلها تعدل نومها استعداداً للدوام خلااااااااص بنفتقد ام فروحه بانصاف اللياالي الحين :)

مساكم الله بالخييييييييير..

شلونكم بنات؟؟ :) هااا اليوم في سهرة ولا بتناموون بكييييير؟؟ :):)


أهلا قطر غيرل شلونج يا الغالية؟؟

شوقتيني على الرضاعات ودي أشوف شكلهم..تقدرين تحطيلنا صورتهم او الرابط اذا ماعليج كلافة ؟؟ :)


هلا بنت البحرين..الله يسلمج و يبارك فيج حبيبتي :)
بالنسبة للسرير الكبير انا شريته و امخليته بكرتونه..و المحل قال متى ماتبون نركبه دقوا علينا..

لان طبعا ماله داعي انركبة من الحين عشان مايتوسخ..

فليش ماتشترينه و تخلينه بالكارتون اذا عاجبج قبل لا يخلص :)


صمت الامل يله ناطرينج تقوليلنا شنو شريتي للبيبي :)


القيوانه سلامتج حبيبتي لا اتعبين نفسج..و بانتظار نشوف الصور :)


هلا بالغالية كنده .. الله يبارك فيج ان شاء الله :)

يله ناطرين تقولين لنا شنو شريتي؟؟:) بس اتوقع الأشياء الكبيرة عندج من قبل مثل السرير و البانيو و الخزانه و كل هالامور صح؟؟ فماراح تكثرين..و بشرينا على التحليل شنو صار..و ان شاء الله مافي الا كل خير..:)



هلا جمانه :) اي والله ان شاء الله دووووووووم هالنشاط بالرابطه..

وينج اليوم؟ :)

بغيت اسالج شنو اهي القماطات؟؟ وصفيلي اياها عشان اكثر منها..



ليتك معي تسلمين يا الغالية على الأشرطه التشجيعية :)

عاد انا آخر وحده فيكم بس لاحظت ان كلنا بالسادس محد دخل السابع؟؟!!


و الالوان حدها عجيبة :))))


الله يعطيج العافية..:)

هههههههههه جمانه..

توج يايبة سيرتي جان اطلعلج :):)

عمري طويل ان شاء الله هههههههههه

لا حبيبتي ان شاء الله ماتفقديني من شر..:):) انا دوامي بيكون عصر يعني هم بسهر..ما اتوقع بعدل نومتي..لانها صعب تتعدل البيبي يقعد يرافس الفير فما اعرف انام عدل من الحين مسهرتني :)

بس اليوم حركتها وايد قليله ما ادري ليش!! :(


هل الاكل يأثر؟؟

صايره هالايام مالي شهية آكل