رابطة امهات ديسمبر... حيااااااااااااااااكن هوووون !!

هلا ام فروحه شحالج غناتي؟؟ واخبار النونو؟؟

ين باقي البنات ؟؟ من يومين محد دخل الرابطه؟؟

هاي بنات شلونكم

الحمدالله عل سلامه ماما حسون وانصحج حاولي تغيرين شي في حياتج عشان تنسين الملل يعني غيري اثاث بيتج ولا اشتري فراش يديد للسرير قصي شعرج اي شي عشان يشغلج عن الملل والتعب

انا جيت.. وصلت البيت

السلام عليكم

للتو وصلت المنزل من السفر.. وحبيت اسلم عليكم قبل ما اروح انام وارتاح شوي...


ولهت عليكم موووووووووووووووت يا عرووووس.. على فكرة كنت اتابعكم من هناك. وكنت ادخل اقرأ من وقت لوقت ردودكم واموت من الضجك خصوصا فرووحه وهي تتحلف فيني...

برررررد لكم بعدييييييييييين ..

هلا شقوره شخبارج الغلا؟؟

يا مرحبا مليون بالغاليه جمانه ... الحمد الله على السلامه الغلا...وانترياج تدخلين عشان اتطمنينا عليج واتقولين لنا اخبار السفر...

هلا اختي القيوانيه شلونج وشلون البيبي وياج

هلا اختي جمانه والحمدالله عل سلامه ننتضرج عشان تقولين لنه مغامراتج في السفر

هلا جمانه الحمدلله على السلالالالالالالالالالالالالالامه :cool2:

من طول الغيبات ياب الغنايم..

يله وين صوايغنا ههههههههههه :gum:

عيل كنتي اتابعينا من اهناك و ما تردين علينا :qaq:

يله بانتظار سوالف السفر و مغامراتج على قولة شقوره :shy:

ليتك معي منزمان فاقدينها!!

لعل المانع خير ان شاء الله


ماما حسون شلون نفسيتج الحين طمنينا؟؟

الله يسلمكم ويسلم بيبياتكم من كل شر يا رب...

عاد انا اذكر قريت سوالف وايد .. بس ما اذكر كل سالفة حق منو بالضبط...

مين اللي كانت تعتقد انها حامل بولد بنسبة 95% وطلع بنت؟ انتي فرووحه؟
تدرين يا ام فرووحه اني كنت ادش هناك من مقاهي انترنت اكيد... وكمبيوتراتها فيها الف علة وبرنامج وفيروس وسبايويرات.. فخفت اسوي تسجيل دخول هناك ويصير شيء وما اسوي تسجيل خروج.. مو على شيء.. بس حسابي امانة في عنقي وفيه خصائص اشرافية لو وقت في ايدي غير امينة يمكن يعفسون المنتدى او على الاقل سمعتي هني... فـــ ..... ابعد عن الشر...

ام حسون انتي اللي صاد ولدج شنيتر .. صحيح.. والليلة عندكم معاريس يعني ما بنشوفج؟ اكيد ناقعة بالصالون الحين... على الله عاد ما تنفخت براطمج وخشمج ... عشان يطلع عليج المكياج حلوووو

شقوره قالوا لج ولد موو؟

ليتك معي الله يشافي جهازج وتردين لنا...

بنت البحرين سلامات الغالية من الم البطن والحمدلله انها مجرد غازات ( صح اللي احاجيها؟ )

كندة يا هلا ومرحبا فيج معانا بالرابطة ما شاء الله شلتيها شيل.. والله يتمم لج حملج بخير..
القيوانية هم مرحبا فيج..

مدري من مسوية اقتباس حق ردي الاول في المضووع وتقول انها في نفس ظروف حملي .. عاد عصرت مخي ماقدرت اتذكر اسمها .. ومافيني ارد اتصفح الموضوع حبة حبة.. هههههههه المهم يا مرحبا فيج اختي واكيد احب اتعرف عليج اكثر واكثر..

-*-*-*-*-*-*-*-*-*-*-*-*-*-**-*-*

امس طلعت تعب السفر كله في النوم.. نمت نومة عميييييقة وبالليل انشغلت بتنظيف الشقة من الغباررر.. وصادتني حساسية وهذي متأذية من العطاس.. حتى اذوني تألمني من داخل..

ام فروحه حلاوتج وصوغتج محفوظة بس عاد متى بييبها؟ لما تولدين عشان مرة وحدة افتك من هدية الولادة هههههه

انا للحين ما نزلت صور السفر في الكمبيوتر.. بروح اشتغل عليهم وان شاء الله بس اخلص احطهم لكم..

انا توني الحين رادة من عند الدكتورة ( سريعة مو؟؟ ) والحمدلله تطمنت على بيبي مال انا هههه لكن خوفتني شوي.. اول شيء تقول نبضه مو منتظم بعدين قالت لالا طبيعي يمكن تحرك شوي فحسيت انه مو منتظم النبض.. الحمدلله..

ايه ودشيت السادس هناك السفر.. عاد شقول لكم .. ووايد حلووو السفر في شهور الحمل الوسطية.. يعني اعتبرها انا شهور الراحة في الحمل.. توج افتكيتي من الوحم وبلاويه.. وللحين ما انتفخ البطن وصرتي دبة صعبة المشي والحركة ههههههههه

حسون الحمدلله ما غربلني.. لأنه كله عند ابوه.. افتكيت منه ومن حماله.. دايما اقول لزوجي.. الحياة الزوجية مناصفة .. انت خذ حسون وانا اخذ ولدك اللي ببطني.. وخلاص مرتاحين خخخخ

وعلى فكرة ترا الحمل في الشهور الباردة من السنة فللللة.. والله العظيم.. ما تحسين عمرج فاطسة مثل الحين في الصيف... هناك وايد ارتحت ولا اعرق بسرعة وحتى المشي امشي وايد بدون ما تألمني مفاصلي... اللللللللله .. وش لي راجعة اصلا .. هههههههههههههه لو تامة هناك لما اولد بعدين ارجع في الشتا هههههههههه

هناك ما قدرت اقاوم اركب التلفريك فوق الجبل.. بصراحة ما اقنعتني سالفة الضغط.. اولردي انتي راكبة الطائرة وضغطها اكبر من التلفريك بواااااايد وعادي مشى الموضوع.. اضافة الى اني سألت وحدة كانت حامل وركبت فيه مرة قبل كم سنة.. قالت لي يعتمد عليج اذا تخافين من الارتفاع او لا... اذا ما تخافين ما راح يصيبج شيء... عاد جمانة الا تخاف... اصلا انا اخوف خخخخخخخخخخ ركبته وكأنه العيد .. والحمدلله ما فوّته جان تطلع في بيبي مال انا شامة هههههه

ايه وبالنسبة لملابس الاطفال هناك... كان ريلي مخترع عليهم اكثر مني... بس انا للاسف ما قدرت اشتري منهم... ما قدرت اعرف جنس الجنين للاسف قبل السفر... وانا ناوية ان شاء الله اشتري ملابس ملونة هالمرة يعني لازم اعرف جنسه.. بحسون مليت وطفحت من الالوان المحايدة... ما يصير اشتري الحين محايد بعد... لازم لازم ازرق او وردي... من جذي ما اشتريت رغم انه عجبتني اشياء بس كلش ما خليت في خاطري... عادي يعني...

موعدي بعد اسبوعين عشان نكشف مستور هالبيبي ونشوف جنسه وخله يصك ريله هالمرة ان ما قمت اناقز في العيادة لما يتأدب ههههههههههههه

ايه صحيح .. بالسفر زادت حركة البيبي بشكل ملحوظ وصرت احس فيه عدل سواء كنت مستلقية او قاعدة او بأي وضع... بس وااااااااااااااايد حركته اخف من حسون... بحسون بغا يشق بطني ويطلع في الشهر السادس من كثر الضرب العدل... شكله حنّين هالبيبي... اهم شيء بس لين طلع من بطني ما يصير مثل حسون لعّاي من الزين...

انزين بنات عاد... توني رادة من السفر... ذبحتوني من السوالف نشفتوا ريقي ههههههه <<< من طلب منج كل هالهذرة ؟ :D

بروح لركني لحظات وبرد لكم ..

السلام عليكم ورحمه الله وبركاته

حبيت اشارك في الموضووع لاني من نفس رابطتكم >>>>> ام من امهات ديسمبر


انا اخر دوره جاتني في 21_3_2006 وانشااء الله تكون ولاتي في 26 ديسمبر 2006وهذا حملي الثالث اول حملي كان متعب والتزمت الفراش لان كانت عندي مشااكل في الرحم بس الحمد لله عدت على خير وانا الحين في منتصف الشهر الخاامس والبيبي بدا يتحرك والحمد لله الحين صرت احسن وبس هذا الي عندي الحين وللحديث بقيه

يا هلا فيك اخت احلى لورا.. وجذذي تكونين حطمتي الرقم القياسي.. معظم الرابطة امهات اول مرة او ثاني مرة... يا هلا بالخبرة والله يتمم لك الحمل بكل خير.

السلام عليكم ورحمة الله وبركاته

اشحالكم بنات اقصد امهات المنتدى اشلون بيبياتكم؟؟؟؟؟؟؟؟

اخبار السفر الغاليه جمانه؟؟الحمدلله على السلامه!!!!!!!!

على فكره انا هذا ثالث بيبي لي بس عندي بنتين والثالث الله اعلم شنو

لان مثل ما قالت اختي جمانه مصكر ريوله :angry: بس شكلي بسوي مثلج بناقز لين اعرف

شنو هو ههههههههههه:dd:

وبالنسبه لالم البطن انا من حملت الى اليوم تجيني وتروح بس الحمدلله خفيفه لكن حملي هالمره ثقيل

مادري العيب مني لاني متنت :o ولا من اللي في بطني.........:no:

ان اشاءالله اشوفكم على خير بعد موعدي الجاي واقولكم اذا عرفت شنو اللي في بطني

سلام امهات

يا هلا وغلا والله بالجميع....

يا الله بنات قولوا لنا ما بديتوا اتجهزون للبيبي؟؟

عني انا سرت من يومين ادمز ولقيته مسوي تنزيلات وخذت منه كم من قطعه...

ومريت على نكست بعد كان مسوي تنزيلات واشتري بعض الاغرض...

واشتريت قطع ووديتهم الخياط عشان يسويهم جلابيات فيعم دانتيلات حق النفاس.. وشفت انه اسوي لف للبيبي واايد حلو فقلت بشتري قطع وبوديهم له...

وشو بعد؟؟ اييييييييه اشتريت بجامات وجلابيات خفاف بعد حق عقب الولاده...

اكيد بتقولون مستعيله بس شو اسوي يوم بولدي الاول ولدت وماسويت شي كله اقول باجر باجر لين ولدت لوووووووووووول

هلابيكم بنات

حمدلله على السلامة اخت جمانة وشلون السفر كان؟؟تعب؟؟

شخباركم مع الكتاكيت تحسون فيهم او لا؟؟

انا الحين كله بكوابيس الحمل وكله احلم اني ولدت وبنتي جوعانه وعندي حليب لها واتهاوش مع زوجي ..الله يعينه

المهم امس اكتشفت شي وقمت اصيح انا طالع لي بالجوانب الحوضين خطوط اللي تطلع بس لونها وردي غاتم بس مووايد زادو بس للحين شوي وحاسدة روحي اقول بس شوي

جان امس ياتني حكة تحت الدبة حكيت بقوة وخفت اني جرحت روحي يبت المنظرة اجوف لانه ماجوف شي من الدبة جان اجوف مثلها الخطوط بس صغار ولنها احمر غاتم من الحك صحت وتضايقت وتخرعت وجتني حالة ورحت قبال المنظرة ارفع شوي الدبة واجيك زوجي يقول مو وايد بس صايرين حمران من الحك وبالليل خليت عليهم زيت بس الحين المنطقة وايد تحكني احاول ماحك عشان لايزيدون ويصيرون حمر....

صجقت صجيقتي يوم حملت قالت لي بتكرهين روححج من تغيرات الجسم اي والله

هلا جمانه..ههههههه والله ضحكتيني لم قلتي :


ام فروحه حلاوتج وصوغتج محفوظة بس عاد متى بييبها؟ لما تولدين عشان مرة وحدة افتك من هدية الولادة هههههه



يله شنو يبتيليىىىىىىىىىىىى مافيني صبر انطر لم الولاده ههههههه


اي جمانه انا و زوجي كان في بالنا ان 90% يكون ولد لكن طلعت بنوته :) الحمدلله اهم شي الصحه و العافيه..

عاد البنات احلى لكن مسؤوليتهم اكبر..



المهم بانتظار الصور سويتيلنا تشويق بالرابطه.. بس مو يطوول التشويق اكثر..

و حتى ماما حسوون نبي التشوييق ما يطول وين الصور؟؟ :)))))

بنت البحرين ليش تحكين أححح :( موزين حاولي تقاومين الحكه لانه بياثر عليج..

شوفي يا طويلة العمر دكتورتي عطتني كريم اسمه افالون اظنه معروف فيه حق البطن و باقي اجزاء الجسم مثل الظهر و الايد..و في حق الحلمه..

ليش ما تجربينه؟؟

و اعرف وحده شاريه كريم من الصيدليه بعد ريحته مثل الفكس و غالي تقريبا 60 دينار تقول لم احطه ما احس بحكه ابد و يطري الجلد..

انصحج ابتعدي عن الحك ولا بيأثر عليج..!


القيوانه بالعكس مو مستعيله عادي احس هذا الوقت اللي المفروض ان نشترري فيه لان بعد ما ثقلنا..فلم نثقل بنحس بتعب..

انا بعد الحمدلله جهزت ملابس الاربعين و افتكيت مثلج..

بس حق البيبي لم الحين ما جهزت لان لم الحين ما نزل الشتوي بالسوق :(


يله بانتظار الصور ماما حسون و جمانه بنشوف منو يسبق فيكم هههه :):)

تبون الصور؟ للاسف بلوتث الكمبيوتر مادري وين خشيته عن ولدي قبل السفر.. والحين رجعت ابي اتذكر المخبأ السري مو قادرة.. كله من الحمل يقولون ينسي :(
عندي صور الكاميرا الدجتل .. بس التلفون بعد فيه صور وايد حلوة بحطها لكم بعدين لما احصل هالمقرود المنخش..


اختي بنت البحرين والله تصدقين تذكرتج اليوم المغرب.. كنت توني سابحة وحسيت بطني وخواصري مشدودين رحت بسرعة ورطبتهم بزيت الزيتون.. والحمدلله خف عني الاحساس والرغبة ف الحكة.. عاد تذكرتج اقول مادري بنت البحرين الحين صارت تستعمل شيء ترطب فيه بطنها ولا للحين ما تستخدم ولا شيء.. لأنه مو معقول اتمين بدون ترطيب.. خلاص الحين صار كل يوم ينتفخ فيه البطن اكثر واكثر..

روحي مذركير وسئليهم عن كريم التشققات stertch marks مخصوص للحوامل للبطن والصدر بعد.. انبوبة لونها بنفسجي.. ومو غاالية ذاك الزود عادي سعرها.. بدون ريحة خايسة .. بس اهم شيء لا تخلين روحج جذي بدون ترطيب..

وينهي كندة اللي كانت مزعزعة الرابطة.. بس ييت انا شردت؟ لا يكون خرعتها من هذرتي؟ ههههههههه


انزين انزين بلا طق بحط الصور هههه

لحظات

المنظر من غرفتنا بالفندق في الشمال.. عاد وصلنا الليل وكان ظلام ما يبين شيء.. لما قعدت الصبح صرت جذي :I من حلاوة المنظر ..



كأننا في الجنة :o


في التلفريك اللي ما ركبته ماما حسون وركبته انا :D تدور الصورة الراس مو ؟ :)

ويدش بنا التلفريك وسط الغيم !!


وبس الباقي صور شخصية يا انا او زوجي فيهم
صور التلفون احلى واحلى .. ان شاء الله احطهم قريب

سلام بنات .. والحمد لله على السلامة جمانة .. بصراحة الصور حملتنا للماضي وخلتنا نحن لذيك الايام اللي رحنا فيها لهذه المناطق .. متى العودة من جديد ؟؟
بنات صار لي كم يوم صايدني شد في اعلى القدم اليمنى ( أسفل الظهر ) وموراضي يروح يعني ما الحق اقوم وامشي شوي الا بالالم وفوق هذا بعد من دخلت السادس زاد الم الخواصر ( الكليتين ) ولا عاد الجهة اليمنى ورحت امس المركز الصحي وبعد ما اخدوا تحليل ابوال طلع عندي التهاب خفيف بس مو معقولة هالالم كله من التهاب خفيف فعطاني تحويل للمستشفى حق اشعة وللحين ما رحت وخايفة موت ..فيه احد مرت عليه هالاعراض وطلع الامر عادي ؟؟؟
ارجوكم افيدوني ..وجزاكم المولى خيرا

صباح الخير يا حلوات....


شخباركم؟؟

هلا حبيبتي بنت البحرين... الغلا لازم تدهنين جسمج لانه هالحكه من الجفاف... فلازم اترطبينها دايما بزيت اللوز او زبده الكاكاو .. بس انا افضل زيت اللوز رهيييب للبشره....


ام فروحه... شخبارج حبيبتي؟؟ زين لقيت حد معايه بدا يجهز اغراض الولاده...

جمانه... الصور واااايد حلوة يا قلبي...


تراتيل...ما اتشوفين شر الغلا واتحملي على عمرج....

هلا الغاليات اشحالكم ؟؟ واشحال البيبيات الحلوين؟؟

اختي تراتيل ليش ما تشوفين مساده تمسد لج هالمنطقه

لان زوجة اخوي صارلها مثلج بس بالثامن وراحت لمساده وارتاحت!!!

جربي ان شاءالله ترتاحين وطمنينا عليج الغاليه!!!!!!

القيوانيه انا الصراحه ابتديت اجهز من الرابع للبيبي

لان بحملتي الثانيه ولدت بالثامن وانا ما جهزت شيء

والله خواتي الله يعطيهم العافيه اللي جهزولي بعد ولادتي

فقلت خلني استعجل هالمره افضل بس بعد الى الحين ما خلصت خذت

اشياء بسيطه من بيبي شوب الملابس والفوط ولفات البيبي

بشوف الباقي لاني ناسيه اشياءوااااااااايد وان شاءالله راح اتذكر معاكم

وبعدين اذا جانا رمضان ما في وقت الصراحه للتجهيز افضل اللي ما جهزت تبتدي

تجهز الحين لانكم بتنشغلون برمضان وبعد ه العيد!!!!!!!!

ويالله اشوفكم على خير

انا بس اعرف جنس البيبي بعد 10 ايام ان شاء الله راح ابتدي مباشرة في التجهيز.. خلاص الحين دشينا السادس.. وان شاء الله ربي يتمم علينا بخير