تجهيزات أحلى عرايس مصر - الجزء الرابع

السلام عليكم ورحمة الله وبركاته
السلام عليكم ورحمة الله وبركاته:shy::sad::sad::cry::cry: اخواتي في الله انا من مصر ومحتاجه مساعده انا من اسكندريه وفرحي كمان ست شهور وممكن تقولوا لسه ما شرتش تقريبا حاجه ومحتاسه عايزاكم تساعوني عايزه اسماء محلات لكل حاجه للانجيري والملابس الداخليه والمكياج ومستحضرات العنايه للبيجامات للتحف للموبيليا للستائر يعني محلات لاقمشه الستائر ومحلات لتفصيل الموديلات للسجاد و لفستان الفرح للبراويز للنجف واهم حاجه عندي هي ملابس النوم بصرااحه يعني كل حاجه تانيه امرها سهل انا شفت هنا في المنتدي موديلات حلوه كتير بس لو حد يعرف خياطه ممكن تفصلهملي انا محتاجه كل حاجه انا بستغيث بلله عليكم كمان في حاجه انا منقبه وحمل فرحي منفصل يعني مش مختلط بس عايزه قاعات تكون منفصله يعني قاعتين مرتبطين ببعض وكمان غير الفستان في حاجه اسمها كاب عايزه اعرف انتم عارفينها ولا لأ هي حاجه زي رداء طويل مشغول برضه و بيتلبس فوق الفستان يغطيني كلي عامل شويه زي الرداء اللي بتلبسه العروس المغربيه بس لونه ابيض لو حد عنده موديلات يساعدني بس يا ريت تكون الاسعار معقوله انا عايزه امسك العصايه من النص حاجه شيك وزوق وجميله بس مش غاليه لان اهم حاجه هو التناسق بين اي حاجه حشتريها ممكن تكون رخيصه بس معاها حاجه مكمله تخليها شيك جدا ساعدووووووني واعتبروا نفسكم بتجهزوني ويجازيكم اله عني خير ويا رب كل واحده عندها حاجه تتقضي ان شاء الله يا عرايس المنتدي بصراحه ربنا يكرمك يا حبايبي ساعدوني انا معرفش حاجه خالص بالذات في مستحضرات العنايه

رورة الف سلامة عليكي يا حبيبتي و متضايقيش نفسك اوى كدة ان شالله ربنا حيحلها من عندة و بعدين بعد كل ضيق فرج و لا اية اهم حاجة لازم تكونى متفائله و انشالله خير

cat حبيبتى ممكن تبعتيلي اسمها و رقم تليفونها على الخاص انا محتجاها اوى ممكن ؟

بنت بلدي

وبنت بلدنا كلنا

أهلا وسهلا بيكي

وولاد البلد هما كده بياخدوا على الناس بسرعة

والناس كمان بتفتح قلبها ليهم

نورتينا وفكرتيني أني بحب بلادي أوي



سوفت روز ولفلي روزا ورورة وهنيا و فيتدودي ودودوريري وحشتوني أوي يا بنات

سبيها على ربنا يا سوفت روز أنتي ورورة

وربنا يفرجها من عنده

حماتي قالتلي كلمة قبل الخطوبة لما الدنيا بتضييق بفتكرها

مفيش يا بنتي جوازة من غير مشاكل

أتوكلي على ربنا و سبحي وأستغفري ربنا كتيير فإنه لكل هم فرجا و لكل ضيق مخرجاَ

وطلعي صدقة لوجه الله فإنها تطفئ غضب الرب


و يا رورة أستريحي يا حبيبتي و أحنا عازرينك وهنكون مبسوطين أكتر لما نسمع أنك كويسة

وربنا يشفيكي يا رب



وربنا يسترها معانا دنيا و أخرة



ggffg

بصراحة موضوع بنات أسكندرية صعب أوي

بحس أني نفسي أقولكوا أي حاجة تفيدكوا بس مش عارفة

كان في بنت معانا من أسكندرية ويمكن كمان يكونوا أتنين بس مش عارفة مين بالظبط

لكن التفصيل مش هتلحقي لو هتعملي كل حاجة

وعموما هدوم النوم بالذات الجاهز حلو أوي ومحلاته كتيير جداً

في محل مفروشات سوري في لوران تقريباً في مكان أسمه جرين بلازاً
بس مش متأكدة من العنوان هحاول أتأكد وأقولك

لوعايزة تسألي عن تجهيزات هتلاقينا كلنا بنساعدك لكن أماكن في أسكنرية مش عارفة

لكن لو في يوم نزلتي القاهرة قوليلنا قبلها وأحنا نجمعلك الأماكن اللي تقدري توصليلها

مستحضرات العناية

بالنسبة لبشرة الوجه
1- منظف (لغسل الوجه صباحاً ويقوم بعمل الصابون ولكن أفضل)
2- تونر (قابض للمسام يوضع بعض المنظف بأستخام قطنة)
3- مرطب (يوضع بعد التونر ليحافظ على الوجه من العوامل الجوية والجفاف ويمكن أستخامه للجسم)
4- ماسك حسب نوع بشرتك يستخدم مرة أسبوعياً
5- مقشر (scrub يستخد قبل الماسك وبعد حمام البخار لإزالة الخلايا الميتةويمكن أستخامه للجسم)

بالنسبة للشعر
1-شامبو حسب نوع الشعر
2-بلسم حسب إحتيلجك
3-كريم تصفيف للشعر بعد الحمام
4- زيت مناسب لعمل حمامات الزيت


بالنسبة للجسم
1- مجموعتين من مجموعة أوريفليم أو أيفون وأعتقد يوجد فرع لأحدهم في الأسكندرية عبارة عن برفان + شاور جل + بودرة تللك + بودي سبراي +مزيل للعرق + كريم للجسم (المجموعة تباع أجزاء منفصلة يمكنك شراء ما تحتاجين منها وليس المجموعة كاملة)
2-مطهر للمنطقة الحساسة و كذلك غسول لها


دي الحاجات الأساسية على ما أعتقد
ولوغلطت في حاجة صححولي يا بنات

وبصي على موضوع رورة اللي في ركن العروس مفيد جداً

نسيت أقولك
بالنسبة للوجه كلين أند كلير أو نيفيا فيزاج أو جونسون

وبالنسبة لمجموعة الحمام اللي هيا شاور جل و....
ممكن دوف وفا

رورة:
يابنات.. انا محدش يسألني عن حاجة اليومين دول لأنكو بجد نفسكو هتتسد..

وبجد البنات كلها ياريت ميزعلوش عشان مبسألش.. انا حالتي صعبة جدا
مفيش فلوس وناقصني بلاوي
رجلي مكسورة ومبنزلش
شغل كتير
وانشغال رهيييييييب
وناقص على فرحي شهرين..
كل حاجة فية بايظة (شعري - وزني - وشي - جسمي)

وانا مش هتكلم في اي حاجة إلا لما نفسيتي تتعدل شوية
وادعولي يابنات

بصي يا حبيبتي انت وتوتي وده والله عن تجربه بصي انا خطوبتي كانت كلها مشاكل لاني انا منتقبه وزوجي ملتحي واهلي كانوا عايزين يعملوا اغاني واختلاط وانا كنت رافضه ده وخطوبتي اتعملت زي ما هما عايزين واغاني وحاجات كتير وبصراحه الفرح كان منفصل و انا كنت لابسه فستان عريان بس مغطيه نفسي بحاجه اسمها كاب و بعدين بابا مكنش راضي يعمل كتب كتاب الا يوم الدخله وده طبعا كان صعب لان انا منتقبه مش معقول انه ميشفنيش الا ليله الدخله لازم يتعود علي شكلي لقيت اني كل مفتح الموضوع مع بابا تحصل مشكله فقررت اني مفتوحش مع حد وبدأت استعين بلله و ادعي ربنا واصلي قضاء حاجه وسبحان الله بابا وافق بس بشرط لما خطيبي يجيب الشقه وبابا مسافر خلال شهر و فضلت اصلي وادعي ربنا انه يرزقنا بالشقه قبل سفر بابا و الا حفضل مخطوبه لحد الدخله وسبحان الله ربنا رزقنا بشقه قبل سفر بابا باسبوع وتم كتب الكتاب انا قصدي حاجه اقولها هنا ان الاستعانه بلله مفيش زيها يعني توكلي علي الله في كل مشاكلك لان اكتائبك ده مش حينزلك وزنك و حيتعبلك وشك و شعرك يا حبي و صدقيني كل مشكله حتعدي واوعي تقولي ان ربنا لسه مستجبش لان ربك كريم وبيقول ان الدعاء يستجاب طالما لم يستعجل العبد ولان ربك بيحبنا كل ما تدعي اكتر تخدي ثواب وكل ما يتأخر استجابه دعائك زاد ثوابك فانسي كل مشاكل وقولي لنفسك ان ربك حييسر لك امورك وادعي بالدعاء ده اللهم يا مدبر الامور دبرلي امري وقولي يا حي يا قيوم برحمتك استغيث اصلح لي شأني كله ولا تكلني الي نفسي طرفه عين وخلي كل صحابك وقرايبك يدعولك لان دعوه المسلم لاخيه المسلم عن ظهر غيب مستجابه وتوكلي علي الرحيم يا حبيبتي وصدقيني مشكلتك حتتحل اما انتي يا توتي انا زيك كرهه خطوبتي ومش بحب افتكرها لانا ولا زوجي بس مادام انا توبت الي الله في غلط عملته يبقي انساه وافكر في اللي جي واحاول مكررش غلطتي وكمان انا زيك عندي حبوب في ضهري خليكي واثقه من نفسك خليكي زي الفراشه في بيتك وهو حينسي كل ده املي حياته برقتك ونعومتك وهو حينسي كل ده و اوعي تخلعي حجابك يوم فرحك واتقي الله وصدقيني لما تبني حياتك علي طاعه ربنا حيكرمك وبيتك حيكون مليان حب ولو عصيتيه بيتك حيبقي كله مشاكل اتقي الله والله انا بحبك فلله فهل تقبلوني اختا لكم وادعولي ان فرحي لما يجي يتم يكون في مسجد ويتعمل بما يرض الله واهلي يرضوا اسفه طولت عليكم

و بالنسبه لموضوع التأجير حقولك حاجه عنها وانا مجرباها في خطوبتي ودي الحاجه الوحيده اللي عدله في خطوبتي انا زوجي وقتها عطاني مبلغ عشان اعمل فستان رحت انا بشاطرتي قلت طب هو مش حيشفني اليوم ده لاكن حيشفني يوم كتب الكتاب رغم ان انا عارفه ان بابا مش راضي بس كان املي بلله كبير جدا فرحت راحيه منقيه اتيليه شيك عندنا وسألت عن تأجير الفساتين لأول مره ونقيت الموديل اللي انا عايزاه من الكتالوج ونقيت لونه كمان واتفصلي علي قد جسمي ودفعت نص الثمن و باقي الفلوس اللي معايا رحت شاريه فستان سواريه بسيط رقيق عشان كتب الكتاب علي الاقل بتاع كتب الكتاب ممكن البسه في ليله الحنه لاكن فستان الخطوبه بيبقي ضخم علي ليله الحنه وحعمل كده كمان في فستان الدخله بس لسه مقررتش

ازيكم يا بنات انا مشغوله فى الكليه
وكل اصحابى بيقولولى ان خسيت اوى


بس انا ناويه انشاء الله بعد اما اخلص امتحانات يعنى اول 7 كده هبدء العنايه بنفسى لان الظاهر كده مافيش فايده الايام دى

ggffg مشاكلك قريبه جدا من مشاكلي بس ربنا يحلهالي لاني لسه مكتبتش الكتاب وبدعي ليل ونهار ان اهلي يوافقوا بس لسه لغاية النهارده انا مش عارفه الموضوع هيتم ولا هيحصل اايه انا نفسي بس اعرف عشان استريح يا بنات بجد ادعولي فالموضوع ده بس انتي منورانا وولا يهمك انا صحبتي اهل باباها من اسكندريه ودي اقرب اصحابي واختها جهزت كل حاجتها من هناك انا هسالها على التفاصيل وارد عاليكي وبعدين مالكم كلكم يا بنات انا كمان نفسيتي تعبانه ولو اخدت بالاسباب هعد فبيتي واكتاب ومعملش حاجه لان مفيش اي حاجه مساعداني الفلوس مزنقه معايا اكتر منك يا روره واللهي وقولي الحمد لله على كل حاجه اايه يا روره انا مش عارفه عنك كده متسيبيش نفسك للاحساس الوحش ده وقولي يا رب هيوفقك وسوفت روز ربنا معاكي ويوفقك يا رب مالك يا حبيبتي انتي كمان وقفتي ليه بس مفيش وقت للدلع يلا استعيني بالله عشان تعدي فيت دودي ننساكي ازاي بس يا حبيبتي تقولي كده ربنا معاكي يا رب وتنجحي ومتخفيش لما هتفوقي من موال الكليه ان شاء الله هتتخني هوه بصراحه انا نسيت انتي كنتي عايزه تخسي ولا تتخني :think: بس عموما ربنا معاكي تيتو انا رايي من ggffg انا كمان نفسي طبعا اولا واخيرا ماغضبش ربنا يوم فرحي وفنفس الوقت اعمل كل الكنت بحلم بيه الغستان العريان والفرح والغنا والرقص وفرحة عمري اللمش هفرحها تاني عشان كده انا مش مع انك تسافري من غير ما تعملي فرح وتفرحي مامتك واهلك بيكي يا حبيبتي ان شا الله فرح صغير بس حسي انك عروسه.

انا ااسفه لادارة المنتدى انا كنت هكلمهم على الخاص بس للاسف حالة الياس والاحباط عند معظمنا فعشان كدعه كنت بحاول اشجعهم عموما يا بنات نتكلم فالمهم انا بصراحه كنت محتاجالكم فموضوع محتاجالكم كلكم فيه بس لو مردتوش عاليه هزعل منكم انا كنت ناويه احكلكم تجربتي انا كمان بس ملحقتش قفلوا الموضوع :cry: فهقلهلكم دلوقتي بقه بالنسبالي انا اصغر اخواتي وقبلي 3 بنات معملوش ولا واحده فرح لما امي جالها احباط وعشان هيه عارفه اني مش عاوزه فرح مختلط فامش متخيله اني هعمل فرح اصلا وحتى لو هعمل هيه مش متحمسه للفكره خالص انا عن نفسي واللهي عاوزه افرحها ولاني لسه معملتش اي حاجه ولا حتى حفلة اراية الفاتحه البتتعمل دي قررت اني اعمل كلوا مع كتب الكتاب لان هوه الحاجه الوحيده اللهقدر اعمل فيها حفله مش مختلطه فانا بفكر ففكره بس محتاجه رايكم معايا انا بقول انو اجهز البيت عندي كويس وهوه الحمد لله ينفع وعملنا فيه خطوبات كتييير للعيله بس محتجالكم فنقطة التجهيز دي يعني مش عايزه السجاده الحمرا وكراسي العزا والكرسي الغريب ده عاوزه حاجه شيك ورقيقه بس مش عارفه ازاي انا فكرت فبلالين حمرا اللشكل قلوب وفيها لمعه كده شكلها حلو اجيب منها كتير
وكمان البلالين البتطير دي اجيب منها برده اشكال حلوه بس ومش عارفه اايه تاني ده بالنسبه للتجهيز
بالنسبه لمشكلة الاختلاط قلت الستات هتكون عندي فالبيت والرجاله فالمسجد اايه رايكم بس ده هيضطرني اني ابدا الحفله بدري علشان الحق اروح اكتب الكتاب وده معناها ان الناس مش هتيجي بسواريه هييجوا على انها عزومة غدا ودي نقطه نرفزتني فمعظم الافراخح بتاعة اصحابي اللحضرتها صحيح انا عاووزه اكون احلى واحده بس عاوزه احس انو فرح مش عيد ميلاد
قولولي برده المشكله دي احلها ازاي انا فرح واحد بس كان يجنن وعجبني لان كله كان لابس سواريه حتى خالات العروسه وامها وحماتها وهما للعلم ستات وقوره جدا بس كانوا زي العسل وكلنا فرحنا ورقصنا لانو مش مختلط وكان بصراحه احلى فرح لان مكنش حبة بنات بترقص وولاد على البيست وخلاص لا كان الكل بيغني مع الفرقه ويهيص ومحدش قاعد على الكلراسي وكان احلى من المختلط بكتييير لان الكل اتبسط وبقية الافكار والمشاكل هقلها لما تردوا عاليه بس مطنشونيش

ازيكوا يا بنات وحشتوني كلكم والله
معلش انا اسفه للتاخير في الردود بس عارفه انكم عدرني دايما
والله انا بنتي لسه نايمه وماهانش عليا ادخل انام قبل ما ارد عليكم واحده واحده مع اني هاقع من التنعب بس كله لاجل عيونكم

يلا مش هاطول عليكم وابدا على طول

حبيبتي كات انا عنيا ليكي وهاقول المعلومات شويه شويه يا سيتي حاضر يا جميل انتي بس اطلبي

تيتو يا روح قلبي انا والله حبيتك جدا ونفسي نبقى اصحاب

بصي اي سيتي بالنسبه لقمصان النوم دي بتفرق من واحده للتانيه يعني لو انتي بتستحملي نوعية الاقمشه بتاعتها وتقدري تقعدي بيها فترات طويله وتنامي بيها هاتي عدد كبير لكن لو كنتي من الناس اللي بترتاح في الاقطان والملابس الواسعه يبقى ما تكتريش لانها هتبقى استخدامها في اوقات معينه بس وغير كده لا

اما بالنسبه للاعداد فطبعا ده على حسب زوق واحتياج كل واحده بس نقدر نقول مثلا
3-4 اطقم قميص + روب طويل وقصير مثلا 2 طويل و2 قصير
وده طبعا لان الاقطم مش عمليه انتي غالبا مش هتستخدمي الروب علشان كده الروب الستان عملي اكتر واستخداماته كتيره
3 بيبي دول بس على شرط تجيبي واحد الاول وتقسيه في البيت لانه مش بيليق على كل الاجسام
3 طقم قطعتين زي المايوه البيكيني كده وفيه منه موديلات كتير قوي
2-3 بيجاما ستان ويفضل يكون فيهم واحده اللي بتبقى متعددة القطع ( توب وبنطلون وجاكت وشورت وغيره)
8 قميص نوم قصير
5 قميص نوم طويل
طبعا تنوعي قى الموديلات والالوان والخامه والسعر كمان يعني مش معقول تجيبي كل ده غالي
وطبعا توفيقي مع كل قميص القطع الداخليه المناسبه معاه
2 روب ستان شيك واحد فاتح وواحد غامق
ا روب تل او شيفون بيتلبس على الاطقم القطعتين او البيبي دول لو حبييتي وبيكون شطله ظريف

اتمنى اكون افدتك وانا تحت امرك في اي سؤال تاني

سوفت روز يا حبيبتي كل الجوازات بتبقى مليانه مشاكا بس الواحد لما بيلجأ لربنا بالدعاء كل حاجه بتتحل وتتيسر ما تعرفيش ازاى
ادعي يا حبيبتي كتير وربنا يوفقك

روره ما فيش داعي يا حبيبتي للاكتئاب لان ده مرفوض مننا احنا المسلمين المؤمنين بقضاء الله
ارمي حمولك على الله واعملي اللي عليكي علشان ان شاء الله لما ربنا يسهلك الامور مترجعيش تعيطي وتقولي اتزنقت في الوقت اعمل ايه
وربنا ان شاء الله يعملك اللي فيه الخير

وبقول لكل عروسه عندها مشاكل تفتكر دايما
لو اطلعتم على الغيب لاخترتم الواقع
احنا علمنا قليل ونظرنا قصير علشان كده لازم نلجا دايما لربنا وما نيأسش ابدا من رحمته مهما حصل
وربنا يوفق الكل ان شاء الله

بنت بلدي اهلا بيكي معانا ونورتي الموضوع

جويريه يا جميله انا تحت امرك على طول
بصي يا سيتي موضوع مهندس الديكور ده فيه كلام كتير قوي
بس عامة اللي انتي بتطلبيه ده شيئ عادي وسهل ومنطقي لان دي فعلة شغلة المهندس المهم لما هو يديكي الرأي تقدري انتي تتخيليه وتقتنعي بيه لان الناس دايما تناهد مع المهندس وتحس انه بيعمل حاجات افر وطقه ومش هتطلع حلوه في حين ان هو بيبقى متخيل الشكل

اما بالنسبه للاستيل الاوربي لعملك ده في الشغل اسهل من الكلاسيك لان تفاصيله قليله جدا وبتعتمد على مسطحات والوان ومساحات وفرش بسيط وقليل والعناصر المكمله للديكور من نجف وستاير وتحف وغيره

بس المشكله الحقيقيه انك بتقولي انك مش عايزه تصرفي كتير على الشقه في حين ان الاستايل الاوربي ده بيصرف اغلى من الكلاسيك لان مش شايع عندنا في مصر والناس اللي بتشتغل فيه قليله وبتلاقي حاجاته غاليه زي الفرش والسجاد والاكسسورات والنجف وغيره يعني اللي هتوفريه في التشطيب هتدفعي قده مرتين في الفرش ودي معومه حطيها في اعتبارك وانتي بتفكري

اما اللي حصل من اختك يمكن يكون علشان المهندس خبرته قليله او زوقه مش متنوع او ما قدرش يفهم اختك كويس او اهم حاجه ان هي ما كانش عندها تصور معين او فكره محدده توصلهاله علشان يشتغل على اساسها فعمل لها حاجه كويسه بس عاديه

على العموم خليكي على موقفك وما تقلقيش مش كل مهندسين الديكور كده طبعا دي حالا قليله
وانا تحت امرك في اي سؤال تاني

اما بالنسبه لحفلة كتب الكتاب في البيت فانتي ليه ما تفكريش تعملي الحفله في يوم تاني غير كتب الكتاب ما دام هتبقى بنات بس او تعملي كتب الكتاب بدري وتخرجي تتغدي بره مع جوزك مثلا وترجعي باليل على الحفله في البيت
وساعتها تقدري تهربي من موضوع الغداء ده وتعملي بوفيه بسيط هاى تي مثلا يعني جاتوه وساليزون وبالكتير ساندويتشات
او لو مش حابه تعملي بوفيه خالص ممكن تعملي علب ملبس او تجيبي شوكولاته غاليه شويه توزعيها على المعازيم وتجيبي تورته عروسه ثلاث ادوار مثلا تقطعيها مع اصحابك وتتصوري وبعدين تقدمي منها للناس ومعاها اي حاجه تتشرب

دي اقتراحات نا باحاول افكر معاكي
بالنسبه لتوضيب البيت ممكن تعملي كوشه صغيره بالورد او ببالونات الهيليوم اللي بتطيردي في محلات ورد بتعمل كوش بالبالونات دي وبتبقى حلوه قوي
وممكن ما تحطيش كرسي اصلا لانك مش هتقعدي لوحدك هي بس هتبقى خلفيه للصور انتي واصاحبك او لو حابه حطي كرسي من الصالون عندكم

طبعا لازم تجيبي بوكهين او ثلاثه ورد لانه بيدي شيلكه للمكان طبعا مش لازم تكون البوكيهات بتاعت زمان اللي بنشوفها في الافلام العربي دي انا قصدي بوكيهات من الجديده اللي بقيت اشكالها كتير وحلوه قوي

ممكن كمان تجيبي فروع من البي لايت ودي بتبقى عباره عن لمبات صغيره قوي وملونه ومتجمعه مع بعض بسلك طويل ولما بتوصليها في الفيشه بتنور وتطفي زي اللي بتشوفيها في قاعات الافراح ودي شكلها بيبقى تحفه لو علقتيها وحبيبتي تعملي حركه وتطفي النور مع فتح البوفيه مثلا او وانتوا بترقصوا مع بعض

اما بالنسبه للسجاده الحمراء وكراسي العزاء دي مش عارفه اقلك ايه لان ده اللي موجود عند اغلب بتوع الفراشه ممكن بقى تلفي عليهم شويه يمكن تلاقي حاجه مختلفه

يا رب تلاقي في الافكار البسيطه دي حاجه تعجبل او تناسبك وانا هافكر تاني ولو لاقيت اى حاجه هاقلك على طول
وان شاء الله تبقي احلى عروسه وتعملي كل اللي نفسك فيه

يابنات المقالة دي عجبتني وقلت ابعتهالكو

[CENTER][CENTER]بسم الله الرحمن الرحيم


لو كنت تعلم كيف يدبر الله لك الأمور لا زددت له حبا !!!

إنك تدعو الله فيما تحب ، فإذا وقع ما تكره فلا تخالف الله فيما أحب ..

قال داوود عليه السلام : " رب أي عبادك أبغض إليك" ؟
قال : عبد استخارني في أمر فخرت له فلم يرض به .

لأن العلاقة بين العبد وربه لها تأثير كبير في التوفيق والإجابة ، وقد يختبر الله عز وجل العبد ليظهر صبره أو كفره أو رضاه أو سخطه ...

لله تعالى ألطاف خفية فيما يراه الناس مصيبة ، فكم من راسب في الامتحان تمكن من النجاح بتفوق في الإعادة ، وكم من فاشل في التعليم فتح الله له أبواب الرزق من حيث لا يحتسب ،
فالله يصرف أمور الناس على ما يريد ،
ولا تقاس العطايا الإلهية بالمكاسب الدنيوية ، فالله يحمي عبده من الدنيا كما يحمي أحدنا من يحبه من المخاطر ،

ويعطي الدنيا لمن يحب ولمن لا يحب ، ولا يعطي الدين إلا لمن يحب ..

فعليك أن تبذل أقصى جهدك في دراستك وعملك ودعوتك ، وألا تكل ّ ، واترك الأمر لجانب الله تعالى ، قال الرسول صلى الله عليه وسلم :
" واستعن بالله ولا تعجز وإن أصابك شيء فلا تقل لو أني فعلت كذا ، كان كذا وكذا ، ولكن قل قدر الله وما شاء فعل "

:::لو كنت تعلم كيف يدبر الله لك الأمور لا زددت له حبا

رورة حلوة اوى المقاله دى ربنا يجازيكي خير على المقاله الجميله دى و فعلا يا بنات ربنا مش بيعمل حاجه وحشة الحمد لله على كل شئ

الف سلامه على الجميع من المشاكل والاكتئاب

بجد كلنا عندنا مشاكل كتير لكن الله اعلم بالخير لنا

ان الله لا يترك العبد فى ضيق ولكن كل شى باوان فلنصب جميعا

مقالتك رائعه يا روره وهى كفايه وباذان الله ربنا يحل مشاكل الجميع

شكرا جدا يا ايمان على مشاركتك وانا بحاول اقر الموضوع القديم اقد اه مفيد وبجد كنتم متاعون وفرحك كان جميل عقبل بنتوتك اخبار مصراويه اه

jewayrya انا مع رايى ايمان اخروجى يوم كتب الكتاب وبعدين اعملى الحفله تانى يوم احسن علسان لا تكونى محكومه بالوقت وافكارك حلوه اوى وكمان افكار ايمان ممكن تسفيدى بها

كل سنه وانتم طيبين والسنه الجايه ان شاء يون الجميع فى بيته

سوفت روز بعتلكى اسم بتاعت الحنه على الخاص

واى خدمه ان تحت امرك

على فكره انا مشتركه فى اورفيلام
بجى كل شهر شويه حاجات علشان تنفعنى وميكونش كله فى الاخر

اللى عايزه اى معلومه عنها تقولى

السلام عليكم
على فكرة انا اول مرة اقرا الموضوع دة وقريتة كلة دلوقتى
هانية عاملة شغل جامد وايمان ورورة وكات وووووووو مش عاوزة انسى حد
حبيبتى تيتو انا كمان خطوبتى كانت غريبة اوى مع انها كانت برة مش عارفة اية اللى حصل وكل مااشوف الصور ابقى نفسى اقطعها
علشان كدة مستنية كتب الكتاب والفرح بفارغ الصبر
فمتزعليش كلنا زى بعض الظاهر ان المصريات حظهم وحش:cry: