البيت الثامن عشر.. لربات البيوت السنعات..لشهر ذي القعدة

صباح الخير


جننتني سوسو بالقوه نامت


يومياتي امس
تصدقون ما اكر منها شي الا اني غسلت
حمامين!!


يومياتي اليوم
صحيت 6 الا ربع و الروتين الصباحي معروف و ودعتهم

و كنت ما اشوف الطريق نعسااااانه حطيت راسي و نمت

و صحيت ح ل 12 احس عظام رجولي توووجعني ارسلت

لزوجي يجيب غدا لانه مافيني حيل اطبخ و غيرت لسوسو

و دودي و عملت لسوسو رضعه و لدودي سيريلاك ( ما

كانت تاكله لما سوسو صارت تاكله صارت تبغى زيها

و منعتها و لا بامنعها لانها عما تغار من سوسو باديه

تمشي و تغار من جوجو عشان المدرسه فما ابغى ازيد

على نفسيتها) و رتبت سريري و طفيت مكيفات البيت

كلها و جيت للمقلط فتحت شوي من الشباك و انسدحت

عالكنب ريحت و سويت شوية رياضه اقل من كل يوم

و رجعت اانسدحت و جلست اقول بنفسي لو اني صاحيه

من بدري و مستغله يومي صح و بسرعه سكّت نفسي رجعت

اقول انا كنت محتاجه هالنوم فعلاً و باقي نص النهار و قمت

صليت الظهر و دخلت المطبخ غسلت النحاس اللي سايبته

من اليوم اللي قبله و جاء زوجي و بعدها جوجو و لست اكمل

غسيل النحاس و هي تلبس تطووووول تفقع مرارتي و تغدينا

و ريحت بعد الغدا لما بعد العصر نشرت ملابس مغسلتها من امس

و حطيت مراييل جوجو بالغساله و رجعت للمطبخ اخذت بخاخ

حطيت فيه كلوركس و ديتول و مسحت كل شي الطاوله و الكاونتر

و اللي عليه و الثلاجه من برا و الكراسي و شلت المناشف الوسخه

عالحمام عشان اغسلها و شطفت الارض بديتول و كلوركس الريحه

خنقتني صح بس ابغى تعقييييم و عملت بابونج لي و للبنات و جلست

اذاكر لجوجو و على 6 الا ربع حطيت القهوه كنت مجهزتها و انا انظف

المطبخ و تقهوينا و المغرب خرج زوجي و انا روشت البنات

و جهزت العشا فول و تعشينا و جلست على محاضرتي 8

و راح عليه ربع المحاضره من سوسو الزميله المزعزه

و بعدها اخذت الايباد اريح شوي و بعدها قمت غسلت

النحاس و لقمت سوسو سيريلاك و كنت باقوم اكوي بس

لقيت عائض القرني على برنامج طباشير و الموضوع

المناهج عجبني كلامه و جلست اسمع لما انتهت الحلقه

رحت كويت كم قطعه و كويت مريول جوجو،،

و بعدها مسكت وحده من شنط الباحه ( متعمده سايبتها

مو طناش لا عمداً اللي فيها مو مهم مره و كنت ابغى اخلص

العميق اول و الحمدلله خلصته الاسبوع الماضي)

المهم فضيتها اللي عالكوي حطيته عند المكوى

و اللي تطبيق عالدولاب و كنت جوووووعانه انتظر

زوجي يجي موصيته على توست و اخيراً جاء

و عملت لي سانطويشة بيض مع كوب يانسون

و اخذت بسكوت اوريو تعشيت و جلست اقرأ قرآن

و بدأت سوسو ازعاجها و وناناتها غيرت لها الحفاض

و نومتها و بالعااااافيه نامت قبل 2 و لميت الزبايل و

جلست عالنت و خلاص باروح انام،،




بالنسبه لانثى تغيرت كثييييير و بكره ان شاء الله
افصل الاجابه،،



( ما جلست مع ناجح او ناجحه الا وجدت له مع
الصبح حكايه) نوال العيد

يقول المغامسي ( لا تجعل يوماً يمر دون ان تمرر
نظرك بالقرآن الكريم)


و انا اقول صلاة الضحى و صلاة الوتر لا تقطعيها
حتى لو كنتي تتغصبينها في البدايه ادعي لنفسك بالهدايه
و بتلاقين فيها راااااحه فضيعه،،


تصبحون على خير

[CENTER][CENTER]كيف تغيرتي عن زمان
واسباب تغيرك
وهل انتي راضيه عن نفسك
وطموحك هالفتره ايش

اسباب تغيري اشياء مو شي واحد
اكتشفت ان الاسلوب اللي كنت عليه
و الطريقه ماهي من مصلحتي و لا من مصلحة
اللي حولي و جالسه تأثر فيني سلباً


كيف تغيرت؟
تغيرت فيني اشياء كثير للأفضل و لله الحمد

اول شي بالنسبه لنفسي بابدأ من قبل الزواج

كنت ماشيه عالبركه ما في راسي شي ابداً

غير هالكتب اللي قدامي اذاكر انجح و يالله

بس فيه فايده مجنيه فايده حقيقيه؟! لا

لانه اساساً ما كان لي شخصيه ابني

عليها شي كنت اذا احد قالي يمين رحت

يمين يسار رحت يسار ربي رحمني انه

ما جاء بطريق حياتي اصدقاء سوء

و نجي لبعد الزواج الصدمه العنيفه

غلط غلط غلط غلط غلط و اكبر غلط

الاهل يزوجوا بنتهم و هي ما تفهم

شي من الدنيا و لا تعرف ايش بتواجه

و ايش ممكن تلاقي صدمه عنيفه لاقيتها

لا هذا البيت اللي قدامي ما اعرف كيف انظفه

و لا ارتبه خلي عاد احط لمساتي،، طبعاً

امي مدلعتنا ما نشتغل الا النحاس

و طبخ بسيط جدا كيك و كذا و

احيان نادره الغسيل،، هي اكيد

كانت تبغانا نهتم بدراستنا لكن

دراستي مو كل شي ( امي تقولي

بعد زواجك حسيت قد ايش انا غلطت و رجعت

اعدّل طبعي مع اخواتك)

و لا لهذا الرجال ماني عارفه كيف افهمه و لا اتعامل

معاه زياده على تضجري من حقوقه الشرعيه

و لا لهذي البنت ( جوجو) كيف اهتم فيها و اربيها

و للاسف كنت معاها قاسيه جدا كنت محركتها

بريموت كنترول ( غلط غلط غلط غلط) كان كل

شي ممنوع عليها ان جات يمين و لا يسار خاصمتها مسكت

شي خاصمتها ( اخاف تخرب)

لما البنت صارت خواااااافه خجوووووله

الى الآن اذا احد سألها تخاف تحسب

انه هالسؤال بعده عقاب

بس الحمدلله هذا كله قدرت اغيره

متى بدأت اتغير ؟

من يوم عمر جوجو 3 سنوات و الحمدلله اني

بديت اتغير لانه اهم مراحل الطفوله من السنه

للست سنوات يعني لا زال عندي مجال

مع جوجو ..

طيب كيف صرت؟!

الحمدلله اعصابي هاديه و لا تستثار سريعاً على

اني كنت عصبيه جدا جدا ،، اصبحت اهتم بنفسي

اكثر و ما اقصد الناحيه الجماليه لا ، اقصد من الناحيه

النفسيه و المعرفيه بنظري اهم من الجمال

لو شفتي وحده كااااااشخه و نفسها راس خشمها

و لسان حالها يقول يا ارض انهدي ما عليك قدي

و شفتي وحده مرتبه عاديه الابتسامه ما تفارق

شفاتها و لسانها ينقط عسل

مع مين تفضلي الجلوس!!

و بالنسبه لزوجي بعد ما كنت كاتمه انفاسه من جد

والله كنت اتضاااايق اذا خرج على طول اقول ايه اكيد

رايح مع بنات!! استغفر الله كله من منتدى حواء كنت اي

مشكله اقرأها اكررررهه و هو ما سوى شي و اتعامل

معاه على هذا الاساس بس خلاص انتهينا مشاكل

معد اقرأ هالانسان اللي قدامي اتعامل معاه باللي

ظاهر لي معد فيه فين رايح و فين جاي و ليش بتتأخر

و هو صار عارف عني هالشي ( امس كنت جيعانه مره

دقيت قلت مطول؟ لانه راح يشتري مقاضي و غاب

اكثر من ساعتين قال اكثر من نص ساعه غير الساعتين

قلت يووووه ، مو بزعل طبعاً، رجع يضحك يقول ايش فيك

تقولين يوه لهالدرجه جيعانه!! صار عارف اني ما اتصل

او ارسل الا لحاجه ) و اذا تزاعلنا عادي اكلمه عادي

و اقوم بواجباتي طبعاً و مبتسمه ليش؟ ايش باستفيد

اذا كشرت انا اول وحده باكون متضايقه بعدين اذا

حانت منيتي و مت و احنا متزاعلين ايش افضل؟

يقول فكه منها و من تكشيرتها و لا يقول الله يرحمها

حتى و هي زعلانه اكرمت معاملتي!!

واجبه الشرعي هذا واجبه حطيت براسي انه

مهما كنت ميته من التعب و هلكانه ما يحق لي

ارفض طلبه و احتسبي الاجر لله احتسبي انك

عما تعفيه عن الحرام و في حديث ما افتكر نصه

لكن عن الرسول محمد صلى الله عليه وسلم انه

قال - فيما معنى الحديث- ( و في بضع احدكم

صدقه) فسأله اصحابه انه هل في هذا الامر

اجر فقال ( اذا وضعها في حرام اليس عليه

وزر قالوا بلى قال كذلك ان وضعها في

حلال فله اجر) فيما معنى الحديث ان شاء الله

اجيب نص الحديث خلاص حطيت هالشي في

بالي،،

بالنسبه لجوجو و بناتي الآن اعاملهم اخواتي

نسولف استشير جوجو في شغلات على قدها

العب معاهم مو كل يوم لعب لكن لازم كل يوم

لي وقت معاهم و لازم لكل وحده منهم

وقت خاص بها طبعاً دودي و سوسو

كلها ضم و بوس و احبك و جوجو كمان زيهم

بس ازيد عليها مره اقولها سر و مره اقولها


ايش رايك نتفق على كذا و شخصيتها الحمدلله

في تحسن بس الآن متعبتني في مسألة اللبس

اذا جات من المدرسه تضيع ساعه كامله من الوقت

و لاحظت جوجو تحب سوسو اكثر من دودي و عما

احاول اقرب بين دودي و جوجو ،،

بالنسبه للدين اجاهد نفسي مجاهده على عدة اشياء

ذكر الله استغفار و غيره احاول يكون لساني دايم

يذكر الله اذا نسيت ارفع صوتي و اذكر الله ادي

نفسي حافز و جو و لو بناتي حولي اعودهم كمان

عالذكر ،، و على صلاة الضحى فهي صلاة الاوابين

و معروف اجرها و انها تعد مكان صدقه عن كل

سُلامى ،، و صلاة الوتر ،، و ترك الغيبه،،

و قراءة ورد من القرآن كل يوم و حفظ ورد كذلك،،

و قراءة تفسير اي آيه من القرآن،، و الصدقه

كل يوم و الصدقه ممكن تكون باشياء كثيره كلمه

حلوه ،، ابتسامه،، صحن مويه او رز او حب

عالشباك في اشياء كثير ممكن نتصدق بها،،

التصبيحات ارسلها و اعقد النيه على ادخال

الفرح على قلب مسلم و احس براحه فضيعه

بصدري ،، ما انام و في قلبي غل على احد

اسامح كل الناس ،، اشياء كثيره ممكن نسويها

تزيد من رصيد حسناتنا،،




بناتي الآن عندي مبدأ ازرع فيهم مباديء و معتقدات

اسلاميه بكل تأكيد و اخليهم هم يشكلون شخصياتهم

ما اتدخل فيهم اذا غلطت الوحده و ابغاها تعترف و ماهي

راضيه تعترف أمنّها من العقاب اقولها والله ما اعاقبك

بس قولي لي و فعلاً ما اعاقب ( عقابي مستحيل يكون

ضرب انا ان ضربت اقرص و اكثر وحده اقرصها دودي

اذا تفلت) و اذا خافت جوجو وقت المذاكره تغلط

اقولها عادي جداً لازم نغلط اصلاً اذا ما غلطنا

ما نتعلم..

و بالنسبه لسورة البقره الحديث يقول

قال صلى الله عليه و سلم ( لا تجعلوا

بيتكم مقابر إن الشيطان يفر من البيت

الذي تقرأ فيه سورة البقره)

ما حدد وقت و لا شخص و انما باستمرارية

قراءة سورة البقره بالبيت و ان كان اللي يقرأها

مو شخص واحد ، باسأل ان شاء الله عن موضوع

قرائتها كل يوم

باعتقادي انها غير مشروعه ما اقصد انها محرمه

لا طبعاً اقصد انه هي مش فرض الزم نفسي

فيه كل يوم ، و عندي مبدأ الاولويات اولاً

الفروض و الواجبات اول بعدين السنن الثابته و بعدين

السنن ،، يعني لو مثلاً باصلي الوتر

و زوجي طالبني ايش اسوي؟

اروح لزوجي طلبه فرض عليّه و الوتر

سنه ثابته لو ما لحقت اصليها كُتب اجري

بإذن الله،، طيب لو ما فضلي الا اقل من ساعه


مثلاً اقرأ البقره او اشوف بناتي ؟ انا اختار اشوف

بناتي تربيتهم واجب عليه و انا مسؤوله عنهم امام

الله ،، الام اللي كل وقتها مشغوله و علاقتها بابنائها

اصدار الاحكام و الاوامر هذي مو تربيه بنظري

هذا معسكر،، و قيسوا على ذلك ،، زي مثلاً لما سوسو

امس تبكي وقت الدرس بنتي اولى من الدرس

يعني مسألة معادله نوازن بين كفتي الميزان..






بالنسبه لاهدافي


انا حكاية الجداول ما تمشي معايه انا قبل ما انام

احدد اشياء اسويها بكره و اكتبها بالجوال مو بس بشغل

البيت لا كل شي ابغى اسويه اكتبه على شكل نقاط

و اول كل شهر اراجع اهدافي اللي كتبتهم لهالشهر

اللي نفذته الحمدلله و اللي لا احيان اشوف انه خلاص

هالهدف لا فائده منه اشيله و انا اذا كتبت اهدافي باوراق

معد ارجع لها لذلك كنت اكتبها في الجوال و كانت بسيطه

جداً الآن اكتبها عالايباد و في تطور واضح على نوعية الاهداف

و ليش في الجوال و الايباد عشان تكون تحت عيني على طول

هذا الزم اني اشوفها و اتحمس انفذها ،،


طولت مره عليكم سامحوني