شات منتظرات الحمل وامهات المستقبل القريب باذن الله(بنات مصر)لشهر رجب / يونيو

اخباركم اية يا بنات
نفسى اقعد اتكلم معاكم زى زمان

يا بنات
جوجو لسه مفقستش

كنت لسه بكلمها على الفيس دلوقتى
والجهاز عندها بايظ ومش عرفت تدخل عروس النهارده
وهى بتسلم عليكم كلكم

ازيك يا مها عامله ايه
وحشانا والله

اهلا يابنانييييييييييييييييييييييييييييييييييييت عاملين ايييييييييييييييييييييييه

دارين
اخبارك اية

حبيبة امها 4;15293003:
دارين
اخبارك اية

الحمد لله تمام ياجميل حرانه وفطسانه وزهقانه ولله الحمد

manyaa;15292732:
ياااااااااااه دا احنا طلعنا كلنا بنحب العزلة اهو...
بصوا الموضوع مش موضوع خلفة و بس لأ .. يعني مش لو كنت حامل كنت ححب الناس و يلا بقى... الموضوع في التدخل نفسه.. يعني واحدة لسة اعرفها من يومين ... و الاقيها مثلا هوووب بتحكيلي كل اسرارها و مشاكلها و جوزها مغلبها و تشكيلي من جوزها و تتكلم على فلانة و علانة و كلام الحريم و النميمة اللي بتخنق دي.. و لو انا اكتفيت باني اسمع و اعلق تعبيرات بوشي بس و كلام مسايرة زي ( يا سلااام...:woo: معقولة ...:|...بجد..:worn_out: )و انا بيبقى تلات اربع الكلام مش مركزة و لا واخدة بالي .. وياريت الموضوع يجي على كدا و بس لا لما تلاقيها في مرة تعد تقولك انا زي اختك و مش عارف ايه و لازم انبهك من فلانة و علانة.. و انا اسكت..هي بقى تتنرفز من سكوتي.. و تقولي انا لما بعد اكلم حد و احكيله و افضفضلي و هوا ما يحكيليش و يفضفضلي بعرف انه خبيث و ما اطمنلوش... انا بقى ساعتها ببقى عاملة كدا:hysterical:....فأنا مليش في القعدات دي.. و اكيد مش حعمل كشف هيئة لكل واحدة اتعرف عليها جديد..و افضل انقي ...غير بقى التدخل اصلا في حياتي الخاصة .. يعني واحدة تقولي مثلا انا جوزي بينرفزني في كذا و كذا و كذا .. طيب انت جوزك بيعمل معاكي ايه في الموضوع ده بيعمل كدا برده؟؟؟ و شوية شوية تلاقي الموضوع دخل في انها عايزة تعرف مرتب جوزي كام.. و انت مالك بية و بجوزي ياحجة .. فبقيت احس ان كل واحدة اتعرف عليها جديد حتعد تنخور عشان عندها فضول تعرف انا بعمل ايه و عايشة انا و جوزي ازاي و مش عارف ايه.. دا كوم و كوم العلاج و الخلفة ده حاجة تانية.. انا ما بضايقش لما حد بيسألني عندك اولاد وللا لأ و كدا.. و يدعيلي .. انا بضايق من اللي تفضل تتابعني في كل مرة تشوفني فيها و تسألني رحتي للدكتور الفلاني اللي قلتلك عليه ؟ و قالك ايه؟ طب ماتعملي معرفش ايه .. زي واحدة بقالي فترة ما شفتهاش اول ما شفتها سألتني ها ايه الاخبار و بتاع.. قلتلها حملت و حصلي اجهاض.. المفروض مالهاش دعوة بقى انا حملت ازاي و بتاع .. لأ تسألني عملت ايه عشان تحملي.. قلتلها رحت لدكتور كويس وخدت منشطات كتير و كدا.. ماكدبتش اهو ...الاقيها ترجع تاني تقولي منشطات و حقن مجهري يعني وللا منشطات بس... فانا بزهق من كدا.. مش لازم كل تفاصيل حياتي تبقى كل الناس عارفاها.. في مصر كان نفس الكلام... كل خطوة بعملها كل الناس متابعاكي فيها و مترقبة و مستنية .. و لما حصل حمل الحمد لله ماحستش بحد فرحانلي غير اهلي القريبين بس... طيب مالكوا من الاول بقى بتدخلوا ليه؟؟وتحسي برده بمقارنات .. يقارنوا بين معاملة زوجي لية و معاملة ازواجهم ليهم .. مفيش ولا اجازة ننزل فيها مصر غير و خناقاتي انا و جوزي بتبقى جامدة جدا فوق الطبيعي.. احنا نفسنا مابنبقاش مصدقين انه حصل بينا كل الخناقة دي بالشكل ده.. وعياط و انهيار بقى و تحسي انك خلاص على المحك.. و حياتك قربت تنتهي..
حاجات كتير اوي انا عمري ما اتكلمت في الكلام ده و لا حكيته لحد غير جوزي.. بس بما اننا قاعدين بنفضفض قلت افضفض معاكوا..
انا و انا صغيرة كنت زي بوسي و امونة كدا محبش اطلع اسلم على الضيوف لما يجوا .. غير لما ماما تزعقلي اطلع اسلم و ادخل جوة تاني.. بس لما دخلت الجامعة و حياتي بقت منفتحة اكتر بقيت بعرف ناس كتير اه باخد وقت عشان نبقى قريبين لبعض لان عندي حذر زايد في التقرب من حد بس في الاخر متخرجة بشلة بنات كبيرة ماشاءالله .. و في كل مكان بسيب بصمة بعلاقاتي مع الزملاء و مع الدكاترة و في النقابة علطول بتعامل كويس مع الكل.. كان في دكتورة مسمياني فراشة نقابة الاسنان عشان علطول ماشية بالبسمة على وشي و بتعامل كويس مع الناس كلها .. بس من ساعة ماتجوزت و ابتديت احس بالمقارنات دي و التدخلات اللي مالهاش لازمة بقيت عايزة ارجع اتقوقع على نفسي و على زوجي.. حتى مش عايزة اتكلم مع اهلي و قرايبي ....
صدعت دماغكم .. حاسة اني ماسورة و انفجرت :)

لاء يا مانيا ده كده كتير بجد عندك حق تنعزلى عن الناس انا عمرى ما اتعاملت مع ناس بالشكل الفظيع ده بس فى ناس بحسهم فعلا عاوزين يتدخلوا فى حياتك بزيادة و يعرفوا كل حاجة
بس انت فى حكاية مصر و الحقن و كده كان ملكيش حق فى انك تعرفى الناس موضوع الحقن اولا من ناحية الاستعانة على قضاء الحوائج بالكتمان و من ناحية ان مفيش حد هتفرق معاه حاجة اصلا فانت يا مانيا مواضيع العلاج و الدكاترة دى احسنلك متعرفيش حد بيها اصلا
عارفة يا مانيا الموضوع كمان مش حد جديد تتعرفى عليه و تخافى يقرفك فى عيشتك ممكن حد قديم كمان انا كان فى واحدة صاحبتى اوى من ايام الجامعة و اتجوزت بعدى بشهر و حملت على طول و اولا خبت عليه فترة طويلة مع انى كان بقالى شهرين بس متجوزة بس دى مش القضية تحولت بقى تماما بعد الجواز للنموذج اللى بتحكى عليه تكلمنى و هاتك يا رغى جوزى و حماتى و اخو جوزى و خطيبته و فلانة و علانة و اصل و فصل و انا زى ما بتقولى كده ايوه:woo: معقول:-o يا سلام و هى شايفة انى مبحكيش حاجة و تبدا بقى بعد كده جوزك بيعمل ايه فى كذا و بيسوى ايه و تنتقد تصرفات احنا بنعملها انت مالك يا ستى ما كل بنى ادم حر فى نفسه لحد ما وصلت لمرحلة انى لو شفتها على الشات بقفل قبل ما تكلمنى لانى فعلا مبقتش قادرة اتعامل معاها
انا بحب يكون ليا اصحاب و كل حاجة بس فى حدود للعلاقة لازم الكل يحترمها انما فى ناس بصراحة مبتعترفش بكده خالص انا عمرى ما كنت بحب العزلة بس الظروف هى اجبرتنى عليها لانى بقيت معنديش مشكلة انى احرج اللى قدامى لو هو تجاوز حدوده من منطلق ان هو اللى جابه لنفسه بقى:worn_out:

قعلا يا مى عندك حق
الواحد بيحب يبقى عنده اصحاب
بس فى ناس بتتدخل اوووووووووووووووى

انا لياواحده صاحبتى كده
هى لسه متجوزتش ربنا يرزقها يااااارب

بس بتسال على كلللللللللللللللللل حاجه
و بتتدخل جدااااااااااااااااا
و كلامها صعب بصراحه اوى وبتدب الكلام فى وشى كده ومش بعرف ارد

انا عارفه انها طيبه بس ده عيب فيها بصراحه
وانا مبقتش بستحمل كلامها

يعنى لما عرفت انى حامل الحمد لله مقلتش ليا مبروك و كلامها واسئلتها مش حلوه خالص
وبتكلمنى تررررررغى

و النتيجه انى بقيت اهرب منها
وبابا يزعقلى لو اتصلت ورديت و قعدت ترغى
فبعدت عنها بصراحه عن الاول كتير والمشكله انها بتقولى مش عارفه ليه الناس كلها بتبعد عنى مش ببقى عارفه اقولها ايه بس معرفش احرج حد بصراحه

وانا فى الكليه برضو لو واحده من اصحابى اتخطبت
تلاقيها بتخبى و متقلش و تبعد كانى هحسدها او هخطف العريس
حتى لما اتفسخت خطوبتها مقلتليش خاااااااااالص مع انى معها كل يوم ومروحين مع بعض

ومعرفتش انها فسخت الخطوبه الا لما واحده بتسلم عليها وبتكلمها و هتجيبى العفش منين وكده
وانا واقفه ساكته
قالت لها لا ما خلاص مفيش نصيب انتى مش شايفه مفيش دبله

انا زى ما يكون حد دلق عليا جردل مايه ساقعه تللللللللللج
قلتلها ايه؟؟؟
قامت البنت التانيه بتقولى والله يعنى معها كل يوم و متعرفيش
مصدقتش طبعا انى معرفش موضوع فسخ الخطوبه

بجد فى امخاخ ناس عجيييبه
البعد عنهم غنيييييييييييييييييمه

ازيكم يابنات وحشتونى
ياترى فى جديد؟؟؟؟؟؟؟؟؟؟؟؟؟
انا لسه راجعه من عند ماما

مانيا ......... الناس اللي زي صاحبتك دي البعد عنهم غنيمة بجد , يا ساتر يارب

بس مش ملاحظين حاجة يا بنات ؟ اننا هنا في التجمع بنحكي لبعض تفاصيل كتير في حياتنا والخناقات اللي بتمر علينا وتفاصيل رحلة العلاج لكل واحدة , بس مش بنتخنق من بعضنا تفتكرو ليه؟ حب ده ولا ايه ؟ هههههههههههه


بت يا ميرا ........... انا لو كنت حامل في بنت كنت هحميها كل يوم وحياتك وهوديها للكوافير يعملها قصه زي قصة فيروز ههههههههههههه
وكمان عندي توك كتير للشعر وسورتيهات وعايناها للبنوتة اصل انا خلاص مش ناوية البسهم ههههههههههههههه, والراجل جوزي زهد خلاص هههههههههههه



دارين ورشا ازيكم يا حلوين

رشا اخبار تجهيزات الرحلة ايه لسه برده منشفاها على الراجل عشان الرحلة لحست مخك هههههههههههههه

دارين انتي مش بتدخلي كتير ليه ؟ بتختفي كتير اوي وبتدخلي في وقت الناس نايمة , تعالي في وقت الذورة اللي هو بعد المغرب :)



شيري ,,,,,,,,,,,, اخبارك ايه يا جميل ؟ لسه بتحسي بمغص او بتلاقي دم ؟ ولسه بتروحي للدكتور اللي زعقلك ده ولا لأ؟

بت يا امونه انا عندى عقده
السوريتهات دى بتاعت الشعر
تفتكرى ايه مشكلتى معاها
مش بعرف انطقها ههههههههههههههههههههههههههههه بكتبها بس
ولو روحت لاى محل بوصفهاله وانا بقوله توكه وخلاص ههههههههههه بجد مش عارفه حاجه غريبه ههههههههههههههههههههه الواحد مش عارف لما يجيب البنوته هايعمل ايه ولبسها سوريتهات ازاى هههههههههههههههههههههههههههه ونبى صح يا اوختشى هى مفردها ايه سوريته ههههههههه

بنات ادعولى ربنا يقدملى اللى فيه الخير انا مش عارفه مالى ملخبطه كدا وخايفه من كل حاجه وقلبى بيوجعنى ادعولى بالله عليكوا


عايزه ارد ع الموضوع اللى فتحتوه انا زيكو بالظبط بالظبط معنديش كلمه زياده على قلتوه

احنا با امونه بنحكى هنا عشان احنا اكتر ناس حاسين ببعض وبنحب بعض واحنا منعرفش بعض شخصيا ولا عمرنا شوفنا بعض حب ف الله فعلا والاهم ان كل واحده فينا بتحب الخير للتانيه بتدعيلها من قلبها من غير ماتشوفها
تعرفى انا بحس ان الواححد لو حكى موقف حصله مع جوزه لحد حتى قر يب منه عايز النصيحه او كدا تحسى الناس عايزه تعرف لمجرد المعرفه حب الاستطلاع ومتطلعيش منهم بكلمه مفيده
لانهم ف النهابه مش حاسين بيكى من اى ناحيه وعايزين يعرفوا وخلاص وكلامهم مش مقنع ف النهايه
انا بتكلم ع النت اكتر ما بتكلم مع حد من صحابى لانى اتعرضت لمواقف انتو اللى سالتوا عليا وصحابى اللى اعرفهم سنين كله انشغل ف حاله وهى مكالمه وشكراااااااااااا ومحدش سال تانى خالص
لكن فى بنات هنا كانو بيسالوا عليا علطول مع انى مش مدياهم نمره تلفونى بس الاهتمام بيبان والدعاء بيوصل

ربنا يخلينا لبعض ويفرحنا كلنا يارب ونفضل صحبه حلوه علطول ونتقابل كلنا ف الجنه يارب

كان فى حد عايزه ارد عليه ونسسسسيت معلش بقى

سؤال لولبى
انا اخدت يوم الخميس حقنه بيوفيت ينفع اخد واحده تانيه يوم الاتنبن ولا اخد يوم الخميس

paradise rose;15293893:
سؤال لولبى
انا اخدت يوم الخميس حقنه بيوفيت ينفع اخد واحده تانيه يوم الاتنبن ولا اخد يوم الخميس

صباح الخير
الحقنة دى بتاعت اية

نايمين بدرى لية
معرفتش انام من تعب معدتى

امونة
الدكتور اللى زعق دا مش دكتورى اللى بتابع عندة
بس دا كنت ريحاله عاوزة اطمن حتى مرحتش الاعادة
والحمد لله منزلش دم بقالى فترة

طيب الحمد لله انك كويسة يا شيري , ربنا يتمم حملك على خير يارب


امنيه ............ ايه اللي مخوفك كده ومخليكي مقبوضة ؟


رشا ..........انتي كاتبة الكلمة غلط اسمها سورتيهات مش سوريتهات, اكتبيها صح تنطقيها صح ههههههههههه


انا رايحة انام ننه , تصبحو على خير

د\امونة;15293973:
طيب الحمد لله انك كويسة يا شيري , ربنا يتمم حملك على خير يارب


امنيه ............ ايه اللي مخوفك كده ومخليكي مقبوضة ؟


رشا ..........انتي كاتبة الكلمة غلط اسمها سورتيهات مش سوريتهات, اكتبيها صح تنطقيها صح ههههههههههه


انا رايحة انام ننه , تصبحو على خير

ازيك امونة
وانتى من اهلة يا عسل

ايه ده يا عيال اسمها سوتيتاااات جمع سوتيت انا بنطقها كده مين الصح بقى
و ضحكتووونى و الله لااااا ده انا شفت تدخلااات بزيااااااده ناس فاضية
بت يا امووونة لو عند جوزك امل انه بعد الولاده ياخد غرضه قوليله انسى اولا فى 40 يوم حرمان و بعدهم كل ما تيجو ............ هتلاقى الواد صحى و عايز يرضع و يغير و كل حاجة هتطلب معاااه ههههههههههههه
المحلات بقى يا ميرا اوركيدز فى الحى السابع
و فى تشيلد مول فى شارع اسمه ايه ياربى مش فاكرة و كيدز بارك ده فى عباس العقاد و فى عباس العقاد محلات كتير انا مش فاكرة اساميهم بس هو فى 3-4 حلوين
و انتى اعتقد لازم حتى سرير واحد على الاقل يوم واحده تنام جمبك و تبدلى تانى يوم تصدقى اختى مكنتش جايبة سراير كانت عايشة فى دور الام الحنونه و بتنيم الاتنين جمبها بس شوية و جابت كنبة لزقتها فى السرير و هم عليها شوية بقت هى و العيال على السرير و جوزها على الارض هههههههههههههههه شوية العيال على السرير و هى و جوزها على الارض ههههههههههههههه
انتى اشترى دماغك و هاتى واحد على الاقل لانهم شويه و هيتقلبو فوق بعض و انا كنت جايبة سريري جودى من اور كيدز اللى بيتفتح و يتقفل كان ب 350 جنيه بس ده المصرى المستورد اغلى كتير مش اقل من 600

شفتي بقى يا ميرا البعد عن الناس غنيمة ازاي :)
مي.. انا مابقلش حاجة لحد بس انا معظم قرايبنا ساكنين معانا في نفس البيت او جنبنا في المنطقة.. لما ماما رجلها اتكسرت كنت انا ساعتها تعبانة من بعد ترجيع الاجنة و كل يوم ايدي فيها الكانيولا عشان بركب محاليل في البيت و انا كنت ساكنة في وش ماما بالضبط.. و طبعا كل ما حد يبقى موجود بيستغرب ازاي انا امي تعبانة و انا طبعا الدكتور منبه علية ماتحركش .. و بنستعين بقى بقرايبنا عشان ييجوا يخدموا ماما .. و لو قلتيلهم تعبانة التعب مش حيطول بالشهر كدا.. الناس دي كتير بتبقى عند ماما .. طبعا اول ما شافوني كدا علطول جه في بالهم ان انا حامل و مخبية... و اه ساعتها اهتموا بية كمان بس الكلام بقى و نصايح للحامل و كدا .. فكنت عمالة اقول لا يا جماعة لسة معرفش فيه حمل وللا لأ انا باخد تنشيط عند الدكتور و تعبت منه شوية بس لسة معرفش... و يوم ما عرفت اني حامل مع اني ماكنتش ناوية اتكلم لحد ما اطمن على البيبي و اشوفه بعيني .. بس قلت اقول للناس دي عشان عيب هم اهتموا بية و فاكرني حامل ...تخيلي الرد كان ايه... (ما انا عارفة) و ده كان تاني يوم التحليل بالضبط... و مفيش كلمة مبروك نهائي فحسيت اني فعلا ما كانش لازم اقول اصلا ... فالجيرة و تعب ماما غصب عني فيه ناس لازم حتعرف ...فالحمد لله انا دلوقتي عزلت من جنب ماما و مش حشوف حد ..
وبعدين انا هنا اعرف مراتات اصحاب جوزي بس مش كلهم و مفيش غير واحدة بس في نفس المدينة بتاعتنا و التانيين في مدن جنبنا و بيزورونا احيانا اخر الاسبوع..و دول كويسين و مفيش تدخلات الغلسة و كدا .. واحدة منهم جايين انهاردة بس هي سنها كبير يعني مش في سننا و كلامها قليل ... فمش صحاب اوي بس هم جايينلي عشان الواجب يعني و كدا و انا بحترمها و بحبها الست دي ..
مشكلة صحاب جوزي بقى لانهم ساكنين في قرى ... انهم هم بس اللي بييجوا.. محدش بيقولنا تعالوا انتوا .. و انا طبعا اه بحب الضيافة و كدا خصوصا لما الناس دي ببقى حباها ..بس كتيييييير .. السنة اللي فاتت كنت كل اخر اسبوع تقريبا حد جاي .. و انا الشقة عندي واسعة اوي و كلها سيراميك و حيلي بيتهد في تسييقها و كدا و كمان لانهم يعتبروا جايين من سفر لازم اعزمهم على الغدا ... فمجهود علية .. مابالك لو عرفت ناس زيادة.. انا بقول لجوزي انا تعبت انا عايزة حد بقى يقولنا تعالوا انتوا .. بس برجع تاني عااادي خالص و ماعنديش مشكلة في العزومة...بس لما يبقى ورا بعضه كدا ... جهد تنضيف الشقة و العزومة و كدا ببقى مرهقة نفسيا و جسديا...

احنا هنا بنحكي مع بعض عشان ظروفنا متقاربة .. مالاحظتش ان حد هنا عنده فضول غلس و اللي مش عايزة تحكي حاجة ليها الحرية انها ما تحكيش و اللي عايزة تحكي تحكي... بنسأل على بعض في الحلو و في المر.. رغم اننا ماشفناش بعض اصلا... و كل واحد في بلد تانية خالص..الروح هنا حلوة ماشاءالله و النفسيات كمان .. يعني مفيش واحدة بتغير من واحدة عشان حاجة معينة او كدا .. لا كل واحدة في حالها .. بالعكس بنفيد بعض و ننصح بعض بقلب كدا.. و لعلمكم انا يمكن لو واحدة فيكم شفتها فيس تو فيس معرفش احكي و اتكلم ربع اللي انا بحكيه هنا.. :)

paradise rose;15293893:
سؤال لولبى
انا اخدت يوم الخميس حقنه بيوفيت ينفع اخد واحده تانيه يوم الاتنبن ولا اخد يوم الخميس

افصلي بينهم ب 5 ايام ياامنية
يعني التلات تاخديها
مانيا
هوه ده:thumbs_up::thumbs_up::thumbs_up:
هي دي العقدة اللي بقولكم عليها حصلتلي مع الست دي
اللي هي بتشكي من جوزها اول باول حكيتلي من ليلة الدخلة .وببقي برده مش عارفة اقول ايه؟
الاول كنت متاثرة بيها جدا وزعلانة عليها ولما جوزي يقولي حاجة علي جوزها ابقي متضايقة من سيرته واشتم فيه وحاسب منه ولو اتاخر معاه شوية تبقي ليلة بيضا وبقيت اشك في جوزي احسن يكون بيعمل زيه
زلو لقيته رافع سماعة التليفون في الصيدلية
افضل اغلي لحد ما ييجي واستني يحكي انه كلم مين النهاردة مكالمة طويلة؟
ويعد ماعديت مرحلة الخوف من جوزي احسن يطلع زي جوزها
بقيت بخاف منها هي عليه لانها بدات تقارن وتشكر وووووو
اللي زي دول دخولهم البيوت خطر
ولو بديل الفراغ اصناف مين دي يبقي قلتهم احسن