[BACKGROUND="70 #FFFFCC"]
موضوع انهارده هنتكلم فيه عن
الحوادث الشائعه اللى ممكن يتعرضلها طفلك و ازاى تتصرفى فيها
طبعا الطفل ممكن يتعرض لحوادث كتير و خصوصا فى المرحله اللى بيبدا يتحرك فيها و يبتدى يستكشف العالم اللى حواليه
دا بيخلينا دايما قلقانين و خايفين عليه
بس برضه مهما كان حرصك ساعات مش بتقدرى تمنعى بعض الحوادث و الوقعات اللى بتحصل لطفلك
و ساعتها بتبقى خايفه و مش عارفه تتصرفى ازاى
طبعا من اهم و اشهر الحوادث دى
سقوط الطفل
مفيش طفل عدى سنه من حياته من غير موقع فيها سواء و قع من على ارتفاع او وقع من فقد توازنه و هو بيحاول يقف على حاجه او يطلع فى مكان
او حتى مجرد انه اتخبط فى راسه
و طبعا فى اطفال اصغر من كده بتقع من السرير او اثناء تغيير الحفاض
بس دا بيكون بسبب اهمال الام
ازاى اقدر احدد شده الوقعه
على فكرة مش شرط ان الوقعه اما تكون جامده تاثر اكتر على الطفل
بالعكس ممكن تكون وقعه بسيطه جدا و يكون تاثيرها اكتر من وقعه عنيفه
طيب ازاى اقدر احدد؟
اهم حاجه انك تلاحظى طفلك كويس بعد الوقعه او الخبطه
ولو ظهرت اى علامه من العلامات دى يبقى لازم تعرضيه على دكتور
العلامات دى هى:
1: ان الطفل يفقد الوعى بعد الوقعه مباشرة و لو لفترة قليله
2:ان الطفل ينام كتير بعد الوقعه و ميكونش فايق على غير عادته
3
:ان الطفل يفقد توازنه فى المشى او تحسى فيه بالذهول او تغيير فى سلوكه
4:ان الطفل يرجع ترجيع مستمر بعد الوقعه مباشرة او فى الساعات اللى بعدها
و خللى بالك من كلمه مستمر دى لان من الطبيعى ان الطفل يرجع مرة او مرتين بعد الوقعه انما اللى مش طبيعى انه يستمر فى الترجيع
5:حدوث نزيف او نزول سايل من الانف او الاذن
6:وجود جرح او نزيف
7:ان الطفل يشتكى من الم فى رقبته او ظهرة
8: ان الطفل يصاب بالصداع المستمر بعد الوقعه او التشويش على النظر وطبعا دى مش هنلاحظها الا لو الطفل كبير
طبعا فى حاله لو فى جرح بينزف حطى عليها قماشه نضيفه و اضغطى جامد
و على اقرب دكتور
تانى حاجه فى الحوادث اللى ممكن يتعرضلها الطفل
خطر الاختناق او الشرقه
و هو ان البيبى يبلع حاجه تدخل عن طريق الخطا فى جهازة التنفسى
ودى من اخطر الحوادث اللى ممكن يتعرضلها الطفل
واسبابها كتير وخصوصا فى المرحله اللى الطفل بيبدا يحط كل حاجه فى بقه
ممكن يختنق بسبب طعام او اجزاء صغيرة من اللعب
لازم تكونى متدربه كويس ازاى تتصرفى فى المواقف دى
اول حاجه لو لقيتى الطفل شرقان او مش قادر يعيط او ياخد نفسه
اول حاجه تفكرى فيها انه ممكن يكون بلع حاجه صغيرة سببت اختناقه
و من اعراض كده انك تلاقيه مطلع صوت غريب او مش قادر اصلا يطلع صوت
او لون جلده بدا يزرق
لو كان بيكح او عايز يرجع شجعيه على كده و سيبيه يكح عشان هو دا افضل طريق عشان يتخلص من الشىء اللى مسبب اختناقه
لو الحاجه دى مطلعتش
دى الطريقه اللى هتحاولى بيها تطردى الشىء ده من الطفل
اول حاجه هتاخدى طفلك على ايديكى بحيث يكون وشه لتحت و مستواه اقل من مستوى باقى الجسم
و ايديكى على رقبته و ايديكى التانيه على ظهرة و خبطى بيها 5 خبطات على ظهرة مابين العظمتين بتوع الكتف
لو لسه الحاجه دى مطلعتش
اعدلى الطفل و اضغطى بصوابعك على صدره ما بين الحلمتين او فوق عظمه القص و اضغطى 5 مرات
اعملى كده بالتناوب 5 مرات على ظهرة و خمس مرات على بطنه بالطريقه اللى شرحناها
و لو الطفل فقد الوعى اجرى بيه على اقرب مستشفى عشان يعملوله الاسعافات اللازمه
ازاى تحمى طفلك من خطر الاختناق؟
اول حاجه ابعدى عنه اى حاجه صغيرة ممكن يبلعها زى الزراير و العملات المعدنيه
و الاطعمه اللى ممكن تسبب الختناق زى الفشار و الفول السودانى طالما الطفل لسه ش مهيا ليها
علمى طفلك انه ياكل ببطء و تانى و علميه يمضغ كويس
و اخر حاجه افتكرى دايما ان طفلك امانه فى رقابتك فراعى دايما ربنا فى العنايه بيه و عدم الاهمال
وهنكمل المرة الجايه ان شاء الله
[/BACKGROUND]
] 
